MU MARCH 26, 1937, baalumi bobilo ibakali mulweendo alimwi ibakakatede kapati bakeenzya mootokala wabo asyoonto-syoonto uujisi lusuko kapati kunjila mudolopo lya Sydney, ku Australia. Kuzwa ciindi nobakazwa mudolopo kwamwaka omwe wainda, bakeenda makkilomita ainda ku 19,300 kuzinguluka minzi iili kulamfwu kapati alimwi azyooko zyamalundu izili mucibeela eeci ca Australia. Baalumi aaba tiibakali basikuvwuntauzya masena naa basikweendeenda mumasena aaindene-indene. Ba Arthur Willis alimwi aba Bill Newlands bakali bapainiya bobilo akati kabapainiya banji basungu ibakakanzide kutola makani mabotu aa Bwami bwa Leza kuminzi mipati iili kumasena aali kulamfwu kapati ku Australia.

Kusikila kumamanino aamyaka yakuma 1920, Basikwiiya Bbaibbele basyoonto * mu Australia bakakambauka kapati mumadolopo aali mumbali aamilonga. Muminzi iili mukati oomo kuli masena munyina bantu banji aali kulamfwu kapati, masena aaya ninkanda mpati iinda acisela cacisi ca United States. Nokuba boobo, bakwesu bakalizyi kuti basikutobela Jesu bakeelede kupa bumboni “kusikila kumasena aakulamfwu kapati aanyika,” kubikkilizya aminzi iili kulamfwu ku Australia. (Mil. 1:8) Pele ino mbuti mbobakali kukonzya kuuzuzikizya mulimo mupati boobu? Bakalikanzide kucita kufwumbwa ncobakonzya, kumwi kabasyoma Jehova kuti ulabalongezya.

Mu 1929, mbungano yakali mu Queensland alimwi ayakali ku Australia nkoili kumbo bakapanga myootokala minji iyakajisi zyoonse zyakali kuyandika kutegwa bacikozye kukambauka mumasena aali kulamfwu. Myootokala eeyi yakali kulanganyizyigwa abapainiya bakajisi nguzu kapati ibakali kukonzya kweenzya myootokala mumigwagwa iitali kabotu alimwi akwiibamba myootokala ciindi yafwa. Bapainiya aaba bakasika mumasena manji oomo bantu mobatanamvwa kasimpe.

Bapainiya ibatakali kucikonzya kuba amyootokala bakali kuunka muminzi iili kulamfwu kubelesya ncinga. Mucikozyanyo, mu 1932, mukwesu wakajisi myaka yakuzyalwa iili 23 wazina lya Bennett Brickell wakanyamuka kuzwa mudolopo lya Rockhampton, mucooko ca Queensland, akuunka mumulimo wabukambausi kwamyezi yosanwe mumasena aali kulamfwu kapati mucooko eeci nkocili kunyika. Ancinga yakwe eeyi iyakanyamwide zintu zinji, wakabweza mapayi, zyakusama, zyakulya, alimwi amabbuku manji. Ciindi naakafwa mataila aancinga yakwe, wakazumanana kweenda kasyomede kuti Jehova ulamusololela. Wakaikuba ncinga yakwe kwamakkilomita  aamamanino aali 320 mumasena aayo mumyaka yamusyule baalumi bambi mobakali kufwa akaambo kanyota. Kwamyaka iinda ku 30 yakatobela, Mukwesu Brickwell wakeenda makkilomita manji mu Australia yoonse kubelesya ncinga, honda, alimwi amootokala. Ngonguwe iwakali wakusaanguna kutalisya mulimo wabukambausi akati kabantu baitwa kuti Aborigines alimwi akugwasya kutalisya mbungano zipya, eeco cakapa kuti abe ampuwo alimwi akulemekwa kapati mumasena aayo aali kulamfwu kapati amadolopo.

Icisi ca Australia ncimwi cazisi zijisi bantu basyoonto munyika, kwaambisya mumasena aali kulamfwu amadolopo. Aboobo, bantu ba Jehova batondezya luyandisyisyo lwakujana bantu mumasena aakulamfwu aali muzyooko zimwi azimwi.

Bapainiya bobilo, ba Stuart Keltie alimwi aba William Torrington bakalutondezya luyandisyisyo oolu. Mu 1933, bakainda munkanda ya Simpson, cibanda cipati cijisi musenga munji kapati, kuya kukukambauka mudolopo lya Alice Springs, cooko ca Australia mpocili akati. Ciindi mootokala wabo nowakafwa alimwi akuusiya, Mukwesu Keltie—iwakajisi kuulu kwacisamu—wakazumanana alweendo lwakwe lwakukambauka, pele lino kabelesya nkamela! Kusolekesya kwabapainiya kwakazyala micelo ciindi nobakayaanya muntu iwakajisi hotela mudolopo lya William Creek. Mukuya kwaciindi ba Charles Bernhardt, bakakatambula kasimpe, bakaisambala hotela yabo, alimwi bakabeleka kabali bapainiya balike kwamyaka iili 15 muminzi yakali mumasena aali kulamfwu aatajisi maanzi mu Australia.

Cakutadooneka bapainiya bakusaanguna bakali kuyandika busicamba alimwi akuba aluyandisisyo kutegwa baliyumye kubuyumu-yumu mbobakali kujana. Nobakali mulweendo lwakukambauka kuya muminzi iili kulamfwu yaku Australia, ba Arthur Willis alimwi aba Bill Newlands, ibaambwa kumatalikilo, bakeenda kwansondo zyobilo musinzo wamakkilomita aali 32 akaambo kamvwula mpati yakawa, aboobo kwakali meenda manji alimwi amankanda. Zimwi ziindi, kumwi kabazwa nkasaalo alimwi akutonta mootokala izuba kalitwa mwaaba mumuseenga munji kapati, bakeenda mumakkuti aajisi mabwe alimwi akwiinda mumbali-mbali aamilonga iijisi museenga. Ciindi mootokala wabo nowakafwa, calo icakali kucitika-citika, bakali kweenda naa kuccovwa ncinga kwamazuba aali mbwaabede kusika kudolopo ilyakali afwaafwi mpoonya akulindila kwansondo zinji kuti zibulo zyamootokala ziboole. Nokuba kuti bakali kuyaanya mapenzi aali boobu, bakazumanana kuba amuuya uuli kabotu. Ba Arthur Willis, bakazubulula kaambo kamwi ikakaambidwe mumagazini iitegwa The Golden Age, akukaamba mubufwaafwi kuti: “Kunyina nzila mbi alimwi kunyina nzila ndamfwu kuli Bakamboni Bakwe.”

Ba Charles Harris ibakacita bupainiya kwaciindi cilamfwu, bakapandulula kuti kukkala balikke alimwi amapenzi aambi aakumubili ngobakali kuyaanya muminzi, kwakapa kuti babe acilongwe ciyumu a Jehova. Bakayungizya kuti: “Ncibotu kupona buumi azintu zisyoonto buyo ikuti kacikonzyeka kucita boobo. Ikuti naa Jesu wakali koona aanze nokwakali kuyandika, nkokuti andiswe tweelede kukkomana kucita mbubwenya ikuti mulimo wesu kauyanda kuti tucite oobo.” Oobu mbombubo mbobakacita bapainiya banji. Tulalumba akaambo kakubeleka canguzu kwabo, makani mabotu akakambaukwa mu Australia moonse, ikugwasya bantu banji kapati kuti baiminine Bwami bwa Leza.