1, 2. Ino ncinzi mukwesu umwi ncaakajana kuti cakalibulide kujatikizya bukkale bwakwe bwakumuuya, alimwi ncinzi ncaakacita kujatikizya makani aaya?

BA ROBERT bakabbapatizyigwa kabali bakubusi, pele kasimpe tiibakali kukabikkila maano kapati. Bakaamba kuti: “Kunyina cibi cili coonse ncondakali kucita, pele zintu ndakali kuzicita kwiinzya buyo mulawo. Ndakali kulibonya kuba muntu uusimide kapati kumuuya, ndakali kujanika kumiswaangano yoonse alimwi akubeleka mulimo wabupainiya bwakugwasyilizya ziindi zisyoonto amwaka. Pele kuli cintu cimwi icakabulide.”

² Ba Robert lwabo beni kunyina nobakacizyiba icakalubide kusikila nokwakainda ciindi kuzwa nobakakwata. Balo abakaintu babo bakatalika kuba aciindi cakubuzyanya kujatikizya makani aamu Bbaibbele. Bakaintu babo, balo ibakasimide kumuuya, tiibakajisi buyumuyumu mukwiingula mibuzyo, pele ba Robert bakali kwiile kufwa nsoni, kabatazyi cakwaamba. Bakaamba kuti: “Cakali mbuli kuti kunyina ncondakazyi. Ndakayeeya kuti, ‘Ikuti naa ndeelede kuba silutwe wamukaintu wangu kumuuya, nkokuti ndeelede kubeleka canguzu.’” Aboobo bakacita oobo. Bakaamba kuti: “Ndakaliiya Bbaibbele cakwiinduluka-induluka, mpoonya twaambo tuli mumo ndakatalika kutweendelanya. Ndakalimvwisya kapati, pele ciinda zyoonse, ndakaba acilongwe ciyumu a Jehova.”

3. (a) Ino ncinzi ncotukonzya kwiiya kuzwa kuli cakacitikila ba Robert? (b) Ino ntwaambo nzi tuyandika kapati ntotulaabandike lino?

 ³ Tulakonzya kwiiya ziiyo ziyandika kapati kuzwa kuli cakacitikila ba Robert. Inga katujisi luzyibo lwamu Bbaibbele alimwi inga katuyanzana lyoonse ambungano ya Bunakristo, pele zintu eezyi zilikke tazitupi kuba bantu basimide kumuuya. Ambweni kuli kuyaambele nkotwakacita kale, pele kuti twalilingula alimwi, tuyoojana kuti tulakonzya kuzumanana kuyaambele alimwi kumuuya. (Flp. 3:16) Kutegwa tugwasyigwe kuzumanana kuyaambele, mucibalo eeci tulaingula mibuzyo yotatwe iyandika kapati: (1) Ino ncinzi ciyootugwasya kulilingula kutegwa tubone bwini mbotusimide kumuuya? (2) Ino mbuti mbotukonzya kuba bantu babikkila maano kuzintu zyakumuuya alimwi akuzumanana kuyaambele katuli bantu basimide kumuuya? (3) Ino mbuti kusima kumuuya mbokukonzya kutugwasya mubuumi bwesu bwabuzuba abuzuba?

4. Ino nkuuli bani nkolubeleka lulayo ilujanika ku Baefeso 4:23, 24?

⁴ Ciindi notwakaba babelesi ba Leza, kuli kucinca nkotwakacita. Kucinca ooko kwakazijatikizya mbazu zyoonse zyabuumi bwesu. Alimwi tiikwakamana ciindi notwakabbapatizyigwa. Twaambilwa kuti ‘tweelede kuzumanana kubukulusya mizeezo iitweendelezya lyoonse.’ (Ef. 4:23, 24) Mbwaanga tatulondokede, toonse tweelede kuzumanana kucinca. Nobaba babelesi ba Jehova ibamubelekela kwamyaka minji beelede kuzumanana kusima kumuuya.—Flp. 3:12, 13.

5. Ino mibuzyo nzi iikonzya kutugwasya kulilingula tobeni?

⁵ Kutegwa tuyaambele akuzumanana kusima kumuuya, tweelede kulilingula tobeni cakusyomeka. Tacikwe makani tuli bana naa bapati, tulakonzya kulibuzya mibuzyo eeyi: ‘Sena ndilakubona kucinca ikucitika mubuumi bwangu ikutondezya kuti ndiyaambele kuba muntu uubikkila maano kuzintu zyakumuuya? Sena bube bwangu buyaabuba mbuli bwa Kristo? Ino bube bwangu alimwi ambondililemeka kumiswaangano ya Bunakristo kutondezya nzi kujatikizya mbondisimide kumuuya? Ino mibandi yangu itondezya nzi kujatikizya zintu nzyondilombozya? Ino bubambe bwangu bwakwiiya, nsamino akulibamba, naa mbondilutambula lulayo zitondezya nzi kujatikizya ndime? Ino ndicita buti ciindi nondijana masunko? Sena ndayaambele, akusima kuba Munakristo uuzulide?’ (Ef. 4:13) Kuzinzibala kuyeeya bwiinguzi bwesu kumibuzyo eeyi kulakonzya kutugwasya kulilingula akubona mbotwayaambele mukusima kwesu kumuuya.

6. Kutegwa tulilingule mbotusimide kumuuya, ino ncinzi acimbi cinga cayandika?

⁶ Kutegwa tulilingule mbotusimide kumuuya, zimwi ziindi inga twayandika lugwasyo kuzwa kuli bamwi. Mwaapostolo Paulo wakaamba kuti muntu uusololelwa azisusi zyanyama takonzyi kubona kulubizya kwakwe kumbele lya Leza. Kulubazu lumwi, muntu uusololelwa amuuya ulamvwisya mbwazilanga zintu Leza alimwi akulubizya kwamuntu uusololelwa azisusi zyanyama. (1Kor. 2:14-16; 3:1-3) Baalu ibajisi mizeezo ya Kristo kanji-kanji balazibona zitondezyo zicenjezya zijatikizya kuyeeya kwanyama mbozyatalikila buyo. Ikuti batwaambila kujatikizya nzizyo, sena tulalutambula akulubelesya lulayo lwabo? Kwiinda mukucita boobo, tupa bumboni butondezya kuti tulayandisya kuyaambele kutegwa tusime kumuuya.—Muk. 7:5, 9.

7. Ino nkaambo nzi ikuba aluzyibo lwamu Bbaibbele ncokutazulide ikutegwa muntu kabikkila maano kuzintu zyakumuuya?

⁷ Amuyeeye kuti, ikuba buyo aluzyibo lwamu Bbaibbele takuzulide pe kutegwa muntu asime kumuuya. Mwami Solomoni wansiku wakalijisi luzyibo lunji kujatikizya nzila zya Jehova. Majwi aakwe kumbele akaba cibeela ca Bbaibbele. Pele kumamanino, wakaalilwa kuzumanana kusyomeka kuli Jehova kali muntu uusimide kumuuya. (1Bam. 4:29, 30; 11:4-6) Aboobo kunze lyakuba aluzyibo lwamu Bbaibbele, ino ncinzi ciyandika? Tweelede  kuzumanana kuyaambele kumuuya. (Kol. 2:6, 7) Pele ino mbuti mbotukonzya kucita oobo?

8, 9. (a) Ino ncinzi ciyootugwasya kutegwa tukkalikile kumuuya? (b) Ino makanze nzi ngotujisi ciindi notwiiya akuzinzibala kuyeeya? (Amubone cifwanikiso icili kumatalikilo aacibalo.)

⁸ Paulo wakakulwaizya Banakristo bamumwaanda wamyaka wakusaanguna ‘kuya kumbele kusikila mane basime.’ (Heb. 6:1) Ikutegwa tutobele lulayo lwa Paulo mazuba aano, ino nintaamu nzi nzyotweelede kubweza? Ntaamu imwi iiyandika kapati njakwiiya bbuku lyakuti ‘Amuzumanane Kukkala Muluyando lwa Leza.’ Kwiiya bbuku eelyo kusikila kumamanino kuyoomugwasya kubona mbomukonzya kubelesya njiisyo zyamu Bbaibbele mubuumi bwanu. Ikuti naa mwakalimanizya kale kuliiya bbuku eelyo, sena inga tiimwatalika kwiiya makani aambi aakonzya kumugwasya kutegwa muyumye lusyomo lwanu? (Kol. 1:23) Sena mulapaila alimwi akuzinzibala kuyeeya kujatikizya mbomukonzya kuzibelesya nzyomwiiya mubuumi bwanu?

⁹ Amuyeeye kuti notwiiya akuzinzibala kuyeeya, tweelede kucita oobo katujisi makanze aakuba aluyandisisyo lwakukkomanisya Jehova alimwi akutobela milawo yakwe kuzwa ansi amoyo. (Int. 40:8; 119:97) Aciindi nciconya, tulazikaka zintu zikonzya kutusinkila kutegwa tuyaambele kumuuya.—Tit. 2:11, 12.

10. Ino ncinzi bakubusi ncobeelede kucita kutegwa kababikkila maano kumuuya?

¹⁰ Ikuti naa muli bakubusi, sena mulijisi mbaakani zini-zini zyakumuuya? Ciindi mukwesu umwi uubelekela a Beteli najanika kumiswaangano yabbazu, ujisi cilengwa cakwaambaula abasikubbapatizyigwa kaitanatalika pulogilamu. Bunji bwabasikubbapatizyigwa mbakubusi. Mukwesu ulababuzya kujatikizya mbaakani zyakumuuya nzyobajisi. Bunji bwabo balapa bwiinguzi ibutondezya kuti balicizyi cini-cini ncobayanda kucita mukubelekela Jehova—ambweni kwiinda mukunjila mulimo waciindi coonse naa kwiinda mukubelekela kubusena kubulide basikumwaya ba Bwami. Pele zimwi ziindi, inga kuli bakubusi ibalibonya kuti tabajisi bwiinguzi. Sena eeco inga catondezya kuti tabanasala mumoyo wabo kuti beelede kuba ambaakani zini-zini zyakumuuya? Ikuti kamuli bakubusi, amulibuzye kuti: ‘Sena ndilatola lubazu mumilimo yakumuuya akaambo buyo kakuti ncencico ncobalangila bazyali bangu kulindime? Sena ndilaswena kuli Leza kwiinda mukuyumya cilongwe cangu anguwe?’ Masimpe, lulayo lwakuba ambaakani zyakumuuya talubeleki buyo kubakubusi balikke pe. Kuba ambaakani zili boobo kuyootugwasya toonse mbuli babelesi ba Jehova kusima kumuuya.—Muk. 12:1, 13.

11. (a) Ino ncinzi ncotweelede kucita kutegwa tuyaambele ncobeni kumuuya? (b) Ino ncikozyanyo nzi camu Bbaibbele ncotukonzya kwiiya?

¹¹ Mbotwamana buyo kuzyiba mbazu motuyandika kuyaambele, tweelede kubweza ntaamu zigwasya iziyootugwasya kuyaambele. Ikuba muntu uubikkila maano kuzintu zyakumuuya ncintu ciyandika kapati. Alimwi buya, aaya makani aakonzya kuyootupa kuba abuumi naa kufwa. (Rom. 8:6-8) Nokuba boobo, kutegwa tube bantu basimide kumuuya, eeci tacaambi kulondoka pe. Muuya wa Jehova ulakonzya kutugwasya kucita kucinca kuyandika. Nokuba boobo, tweelede kubeleka canguzu. Naakali kubandika lugwalo lwa Luka 13:24, mukwesu John Barr, iwakabeleka mu Kabunga Keendelezya, wakaamba myaka iili mbwiibede musyule kuti, “Banji balaalilwa akaambo kakuti tabali basungu kapati kutegwa bazumanane kucita mbuli baalumi.” Tweelede kuba mbuli Jakobo, iwakazumanana kutingana amungelo kusikila mane walongezyegwa. (Matl. 32:26-28) Nokuba kuti cilakonzya kukkomanisya kwiiya Bbaibbele, tutalangili kuti Bbaibbele liyooba mbuli kabbuku katwaano ikakalembelwa buyo kukkomanisya bantu. Tweelede kubeleka canguzu kutegwa tujane mbono zyakumuuya izikonzya kutugwasya.

12, 13. (a) Ino ncinzi ciyootugwasya kutobela majwi aali ku Baroma 15:5? (b) Ino mbuti cikozyanyo camwaapostolo Petro alimwi alulayo lwakwe mbozikonzya kutugwasya? (c) Ino ncinzi ncomukonzya kucita kutegwa mube bantu ibayaambele kumuuya? (Amubone kabbokesi kakuti “ Ntaamu Nzyomukonzya Kubweza Kutegwa Muyaambele Kumuuya.”)

¹² Ciindi notubeleka canguzu kutegwa tusime  kumuuya, muuya uusalala uyootupa nguzu kutegwa tucince mizeezo yesu. Kwiinda mukugwasyigwa amuuya, asyoonto-syoonto tulakonzya kutalika kuyeeya mbuli Kristo mbwaakali kuyeeya. (Rom. 15:5.) Kuyungizya waawo, ciyootugwasya kugwisya zisusi zyanyama akuba abube bukkomanisya Leza. (Gal. 5:16, 22, 23) Ikuti naa twajana kuti mizeezo yesu iyanda kuti katuyeeya zintu zyakumubili naa zisusi zyanyama, tatweelede kutyompwa pe. Amuzumanane kulomba muuya, mpoonya Jehova uyoomugwasya alimwi kugamika mizeezo yanu kuzintu zili kabotu. (Lk. 11:13) Amuyeeye mwaapostolo Petro. Ziindi zili mbozibede mubuumi bwakwe, tanaakayeeya mbuli mbwayelede muntu uusimide kumuuya. (Mt. 16:22, 23; Lk. 22:34, 54-62; Gal. 2:11-14) Pele tanaakatyompwa pe. Asyoonto-syoonto, kwiinda mukugwasyigwa a Jehova, Petro wakatalika kuyeeya mbuli Kristo. Andiswe tulakonzya kucita mbubwenya.

¹³ Mubwini, Petro mukuya kwaciindi wakalemba zintu zigaminide mpotweelede kubelekela. (Amubale 2 Petro 1:5-8.) Ciindi ‘notusungwaala kapati’ kutegwa tube abube mbuli kulilesya, kuliyumya, aluyando lwabunyina, tuyoogwasyigwa kuzumanana kuyaambele katuli bantu basimide kumuuya. Abuzuba, tulakonzya kulibuzya kuti, ‘Ino sunu ndeelede kubelekela aali kutegwa ndiyaambele kumuuya?’

14. Ino mbuti kusima kumuuya mbokubujatikizya buumi bwesu?

¹⁴ Kuyeeya kwesu mbuli Kristo kuyoojatikizya ŋambawido yesu, kulilemeka kwesu notuli kumulimo naa kucikolo, alimwi anzyotusala buzuba abuzuba. Kusala ooko kuyootondezya kuti tulasolekesya ikuba basikutobela ba Kristo. Mbotuli bantu basimide kumuuya, tatuyandi kuti cintu cili coonse cinyonganye cilongwe cesu a Taateesu wakujulu. Ciindi notusikilwa masunko, kuba abube mbuli bwa Kristo kuyootupa kwaazunda. Ciindi notusala zyakucita, tuyakuzinzibala kuyeeya akulanga-langa mibuzyo eeyi: ‘Ino ninjiisyo nzi zyamu Bbaibbele ziyoondigwasya kusala? Ino ncinzi ncaali kukonzya kucita Kristo mubukkale oobu? Ino nkusala kuli buti kukonzya kumukkomanisya Jehova?’ Kutegwa tuliyiisye kuyeeya munzila iili boobu, atulange-lange zikozyanyo zisyoonto. Mucikozyanyo cimwi acimwi, tulabona njiisyo yamu Magwalo iikonzya kutugwasya kusala cabusongo.

15, 16. Amupe zikozyanyo izitondezya kuba amizeezo ya Kristo mbokukonzya kutugwasya notusala zyakucita kujatikizya (a) kusala wakukwatana limwi. (b) kusala balongwe besu.

¹⁵ Kusala wakukwatana limwi. Njiisyo yamu Magwalo ijanika ku 2 Bakorinto 6:14, 15. (Amubale.) Majwi aa Paulo alatondezya kabotu-kabotu kuti muntu uubikkila maano kuzintu zyakumuuya takonzyi kweendelana cakumaninina amuntu uubikkila maano kuzintu zyanyama. Ino mbuti majwi aaya mbwaakonzya kubelesyegwa kujatikizya kusala wakukwatana limwi?

¹⁶ Balongwe. Amubone njiisyo yamu Magwalo iijanika ku 1 Bakorinto 15:33. (Amubale.) Muntu weendelezyegwa a Leza takayanzani abaabo ibakonzya kumunyonganya kumuuya. Ino mibuzyo nzi iikonzya kumugwasya kutegwa mulutobele lulayo oolu munzila iigwasya? Mucikozyanyo, ino lulayo oolu inga lwabelesyegwa buti kujatikizya intaneti? Naa, ino ncinzi ncomweelede kucita ikuti mwalombwa kusobana zisobano zyaakkompyuta abantu mbomutazyi?

17-19. Ino kuzilanga munzila yakumuuya zintu inga kwamugwasya buti (a) kutantamuka zintu zitagwasyi? (b) kulibikkila mbaakani mubuumi? (c) kumana mazwanga?

 ¹⁷ Kucita zintu zisinkila kuyaambele kumuuya. Majwi aa Paulo ngaakalembela Banakristonyina alacenjezya. (Amubale Bahebrayo 6:1.) Ino ‘milimo nzi iifwide’ njotweelede kutantamuka? Kufwumbwa micito iitakonzyi kutugwasya kuyaambele kumuuya. Njiisyo eeyi ilakonzya kutugwasya kujana bwiinguzi kumibuzyo minji iikonzya kuboola mubuumi mbuli yakuti: ‘Sena mulimo ooyo ubalilwa kumilimo yanyama? Sena ndeelede kutola lubazu munzila eeyi yakujana mali? Ino nkaambo nzi nconditeelede kunjila kabunga ikasola kucinca bukkale bwamunyika?’

¹⁸ Mbaakani zyakumuuya. Majwi aa Jesu ngaakaamba mu Mulumbe Waacilundu alatupa busolozi bubotu kujatikizya kulibikkila mbaakani. (Mt. 6:33.) Muntu uusimide kumuuya ubikkila maano kumbaakani zyakumuuya. Kuyeeya njiisyo eeyi kulatugwasya kwiingula mibuzyo mbuli yakuti: ‘Sena ndeelede kubikkila maano kukujana lwiiyo lwaatala? Sena ndeelede kuzumina mulimo umwi?’

¹⁹ Mazwanga. Ino mbuti lulayo lwa Paulo ndwaakalembela mbungano yaku Roma mbolutugwasya kumana mazwanga? (Rom. 12:18) Mbotuli basikutobela Kristo, tulasolekesya “kukkala muluumuno abantu boonse.” Ciindi nokubuka mazwanga, ino tucita buti? Sena cilatuyumina kuzumina mizeezo yabamwi, naa tuzyibidwe kuba baabo ‘ibaleta luumuno’?—Jak. 3:18.

20. Ino nkaambo nzi ncomuyandila kuzumanana kuyaambele kumuuya?

²⁰ Eezyi nzikozyanyo buyo zisyoonto zitondezya kulanga-langa njiisyo zya Leza mbokukonzya kutugwasya kusala zyakucita izyeendelana acilangilwa kumuntu uusimide kumuuya. Kusima kumuuya kulakonzya kutugwasya kuti buumi bwesu bwabuzuba abuzuba kabukkomanisya alimwi akupa kukkutila. Ba Robert, balo mbotwalanga-langa kumatalikilo aacibalo eeci, baamba kuti: “Nondakamana kubamba cilongwe ciyumu a Jehova, ndakaba mwaalumi alimwi ausyi uuli kabotu. Ndakakkutila alimwi akukkomana.” Tulakonzya kukkomana azilongezyo zili boobu ikuti kuyaambele kumuuya twakubikka mubusena bwakusaanguna. Mbotuli bantu basimide kumuuya, tuyookkutila kapati mubuumi lino alimwi akukkomana ‘abuumi bwini-bwini’ ibuboola kumbele.—1Tim. 6:19.