1. Nkaambo nzi ncotweelede kutobela busolozi bwa Jehova Musololi wesu? Amupe cikozyanyo.

 AMWEEZEEZYE kuti mwasweeka mucisaka. Alimwi muli muntenda kapati nkaambo mucisaka eeci, muli banyama, zyuuka izipa malwazi, zisyango zibyaabi kapati alimwi azilindi. Kweelede kuti inga mwakkomana kapati kweenda amuntu uucizyi kabotu cisaka eeci. Muntu uuzyi kabotu mumasena oomo muli ntenda alimwi uukonzya kumugwasya kuzyeeleba. Mbubwenya buyo, nyika eeyi ili mbuli cisaka eeci nkaambo izwide zintu zikonzya kutubikka muntenda kumuuya. Pele tujisi Musololi uulondokede, Jehova. Ulatusololela kutegwa tutanjili muntenda mane tukasike ooko nkotuunka, nkokuti munyika mpya akuyoopona buumi butamani.

2. Ino Jehova utusololela buti?

² Ino Jehova utusololela buti? Cakusaanguna, ulatusololela kwiinda mukubelesya Jwi lyakwe, Bbaibbele. Pele alimwi ulabelesya abantu. Mucikozyanyo, ubelesya “muzike uusyomeka alimwi uucenjede” kutupa cakulya cakumuuya calo icitugwasya kusala cabusongo. (Mt. 24:45) Kunze lyaboobo, Jehova ulabelesya abamaalumi bambi beelela kutegwa batusololele. Mucikozyanyo, balangizi bamabazu abaalu bambungano balatupa malailile akutukulwaizya kutegwa tucikonzye kuliyumya mubukkale bukatazya. Eelo kaka tulalumba kapati akaambo kabusolozi bugwasya mbotupegwa muziindi eezyi zikatazya kapati izyamamanino! Bulatugwasya kuzumanana kukkomaninwa a Jehova alimwi akuba munzila iitola kubuumi.

3. Ncinzi ncotutiibandike mucibalo eeci?

³ Zimwi ziindi, cilakonzya kutuyumina kutobela busolozi bwa Jehova kwaambisya ikuti naa bwazwa kubantu batalondokede. Nkaambo nzi? Nkaambo ambweni busolozi oobo tabuli mbubo mbotwali kuyanda. Naa ambweni tulakonzya kulimvwa kuti malailile aayo ngotwapegwa taagwasyi mpoonya akuyeeya kuti  taazwi kuli Jehova. Mubukkale buli boobu, tweelede kuba alusyomo lwakuti Jehova nguusololela bantu bakwe akuti kutobela busolozi bwakwe kuletela zilongezyo zitaambiki. Kutegwa citugwasye kuyumya lusyomo lwesu, cibalo eeci cilabandika (1) Jehova mbwaakali kusololela bantu bakwe kaindi, (2) mbwatusololela mazuba aano, alimwi (3) mbotukonzya kugwasyigwa ikuti naa twabutobela busolozi bwakwe.

JEHOVA MBWAAKABASOLOLELA BANA ISRAYELI

4-5. Ino Jehova wakatondezya buti kuti wakali kubelesya Musa kusololela bana Israyeli? (Amubone cifwanikiso icili aacivwumbyo.)

⁴ Jehova wakasala Musa kusololela bana Israyeli kuzwa mu Egepita. Alimwi wakabapa bumboni busalede ikutondezya kuti wakali kubasololela kwiinda mukubelesya Musa. Mucikozyanyo, ciindi camasyikati wakali kubelesya musumpuululu wakkumbi mpoonya masiku wakali kubelesya musumpuululu wamulilo. (Kul. 13:21) Aboobo Musa wakautobela musumpuululu walo iwakamusololela ku Lwizi Lusalala antoomwe abana Israyeli. Pele ciindi bana Egepita nobakatalika kutandaanya bana Israyeli, bana Israyeli bakayoowa kapati nkaambo bakayeeya kuti balajaigwa. Bakayeeya kuti Musa wakalubizya kubaleta ku Lwizi Lusalala. Pele bwini mbwakuti tanaakalubizya pe. Jehova ngowakabelesya Musa kusololela bantu bakwe ooku. (Kul. 14:2) Kumane Jehova wakabafwutula munzila iigambya kapati.—Kul. 14:​26-28.

⁵ Kwamyaka iili 40 kuzwa ciindi eeco, Musa wakazumanana kutobela musumpuululu wakkumbi ikusololela bantu ba Leza munkanda. a Kwaciindi cili mbocibede, Jehova wakali kwiimika musumpuululu atala aatente lya Musa, aawo bana Israyeli boonse mpobakali kukonzya kuubona. (Kul. 33:​7, 9, 10) Kwiinda mumusumpuululu, Jehova wakali kupa malailile kuli Musa, kumane walo ngowakali kwaambila bantu. (Int. 99:7) Aboobo bana Israyeli bakalijisi bumboni busalede bwakuti Jehova wakali kubelesya Musa kubasololela.

6. Ino bana Israyeli bakabutambula buti busolozi bwa Jehova? (Myeelwe 14:​2, 10, 11)

⁶ Cuusisya ncakuti, bunji bwabana Israyeli tiibakabusyoma bumboni bwakuti Jehova wakali kubelesya Musa kuba mwiiminizi wakwe. (Amubale Myeelwe 14:​2, 10, 11.) Cakwiinduluka-induluka, bakakaka kuzumina kuti Jehova wakali kubelesya Musa kubasololela. Akaambo kaceeci, Jehova tanaakabazumizya kunjila mu Nyika Yakasyomezyedwe.—My. 14:30.

7. Amupe zikozyanyo zyabantu ibakabutobela busolozi bwa Jehova. (Myeelwe 14:24) (Amubone acifwanikiso.)

⁷ Nokuba boobo, bana Israyeli bamwi bakabutobela busolozi bwa Jehova. Mucikozyanyo, Jehova wakaamba kuti: “Kalebe . . . wazumanana kunditobela camoyo woonse.” (Amubale Myeelwe 14:24.) Aboobo, Leza wakamulongezya Kalebe mane buya akumuzumizya kusala busena mbwaakali kuyanda kukkala mu Nyika Yakasyomedwe. (Jos. 14:​12-14) Abalo bana Israyeli ibakazumizyigwa kunjila mu Nyika Yakasyomedwe bakali cikozyanyo cibotu mukutobela busolozi bwa Jehova. Ciindi Joshua naakanjila mubusena bwa Musa akutalika kusololela bana Israyeli, ‘bakali kumulemeka kapati mubuumi bwakwe boonse.’ (Jos. 4:14) Akaambo kaceeci, Jehova wakabalongezya kwiinda mukubapa nyika njaakasyomezyede.—Jos. 21:​43, 44.

8. Amupandulule Jehova mbwaakali kusololela bantu bakwe ciindi nokwakali bami. (Amubone acifwanikiso.)

⁸ Nokwakainda myaka iili mbwiibede, Jehova wakasala babetesi kuti kabasololela bantu bakwe. Kuzwa waawo, ciindi nokwakali bami, Jehova wakasala basinsimi kusololela bantu bakwe. Aboobo bami basyomeka bakali kulutobela lulayo ilwakali kuzwa kubasinsimi. Mucikozyanyo, cakulicesya Mwami Davida wakazumina  kululamikwa amusinsimi Natani. (2Sam. 12:​7, 13; 1Mak. 17:​3, 4) Mwami Jehosafati wakabutobela busolozi mbwaakamupa musinsimi Jahazieli akukulwaizya ba Juda ‘kusyoma basinsimi ba Leza.’ (2Mak. 20:​14, 15, 20) Ciindi naakatyompedwe kapati, Mwami Hezekiya wakalomba lugwasyo kumusinsimi Isaya. (Is. 37:​1-6) Kufwumbwa ciindi bami nobakali kubutobela busolozi bwa Jehova, bakali kulongezyegwa kapati alimwi akukwabililwa. (2Mak. 20:​29, 30; 32:22) Kweelede kuti boonse bakalibwene kuti Jehova wakali kubelesya basinsimi kusololela bantu bakwe. Nokuba boobo, bunji bwabami alimwi abana Israyeli bamwi tiibakali kubaswiilila basinsimi ba Jehova.—Jer. 35:​12-15.

JEHOVA MBWAAKABASOLOLELA BANAKRISTO BAKUSAANGUNA

9. Mbaani mbaakabelesya Jehova kusololela Banakristo bamumwaanda wamyaka wakusaanguna? (Amubone acifwanikiso.)

⁹ Mumwaanda wamyaka wakusaanguna C.E., Jehova wakapanga mbungano ya Bunakristo. Ino wakabasololela buti Banakristo aaba bakusaanguna? Wakasala Jesu kuba mutwe wambungano. (Ef. 5:23) Pele Jesu tanaakali kubandika asikwiiya umwi aumwi kumugama ikumwaambila cakucita. Muciindi caboobo, wakali kubelesya baapostolo abaalu bamu Jerusalemu kuti kabasololela. (Mil. 15:​1, 2) Alimwi baalu bakali kusalwa kutegwa basololele mbungano.—1Tes. 5:12; Tit. 1:5.

10. (a) Ino bunji bwa Banakristo bamumwaanda wamyaka wakusaanguna bakacita buti kubusolozi mbobakapegwa? (Milimo 15:​30, 31) (b) Nkaambo nzi bamwi kaindi ncobakabakaka aabo Jehova mbaakasalide kubasololela? (Amubone kabbokesi kakuti “ Ikaambo Bamwi Ncobatabuzumini Bumboni Busalede.”)

¹⁰ Sena Banakristo bamumwaanda wamyaka wakusaanguna bakali kubutobela busolozi bwabaapostolo? Bunji bwabo bakali kwaakkomanina malailile ngobakali kutambula alimwi bakali kwaatobela. Mane buya, “bakakondwa kujatikizya makani aayo aakukulwaizya” ngobakamvwa. (Amubale Milimo 15:​30, 31.) Pele ino Jehova ubasololela buti bantu bakwe mazuba aano?

JEHOVA MBWATUSOLOLELA MAZUBA AANO

11. Amupe zikozyanyo izitondezya Jehova mbwaali kubagwasya aabo basololela.

¹¹ Mazuba aano, Jehova wazumanana kubasololela bantu bakwe. Wali kucita oobo kwiinda mukubelesya Jwi lyakwe a Mwanaakwe, imutwe wambungano. Sena kuli bumboni mbotubona  ibutondezya kuti wazumanana kubelesya bantu kumwiiminina? Inzya. Mucikozyanyo, amumvwe cakacitika kumamanino aamyaka yakuma 1800. Ba Charles Taze Russell abeenzinyina bakatalika kumvwisya kuti mwaka wa 1914 wakali kuyooba mwaka uuyandika kapati kujatikizya Bwami bwa Leza. (Dan. 4:​25, 26) Bakakazyiba kaambo aaka kwiinda mukuvwuntauzya businsimi bwamu Bbaibbele. Sena Jehova wakali kubagwasya mukuvwuntauzya kwabo? Eeco tacidoonekwi buya. Zintu izyakacitika mu 1914 zyakasinizya kuti Bwami bwa Leza bwakatalika kulela. Mucikozyanyo, kwakaba Nkondo Yakusaanguna Yanyika Yoonse, zilwazi, mizuzumo yanyika alimwi anzala. (Lk. 21:​10, 11) Aboobo tacidoonekwi buya kuti Jehova wakali kubelesya bamaalumi aaba Banakristo basyomeka kugwasya bantu bakwe.

12-13. Ncinzi ncobakacita bakwesu ibakali kusololela ciindi ca Nkondo Yabili Yanyika Yoonse kutegwa mulimo wakukambauka uyaambele?

¹² Amuyeeye alimwi cakacitika lya Nkondo Yabili Yanyika Yoonse. Nobakamana kulanga-langa lugwalo lwa Ciyubunuzyo 17:​8, bakwesu ibakali kusololela kumaofesi mapati bakazyiba kuti nkondo eeyi tiiyakali kuyoosololela kunkondo ya Amagedoni pe. Bakazyiba kuti kwakali kuyooba ciindi caluumuno yaakumana nkondo calo Bakamboni ba Jehova ncobakali kuyoobelesya kukambaukila bantu banji. Aboobo, nokuba kuti ambweni aciindi eeco cakali kulibonya kuti tacigwasyi, bakwesu ibakali kusololela bakatalisya cikolo ca Gileadi kutegwa bayiisye bamisyinali kukambauka akuyiisya bantu muzisi zinji nyika yoonse. Kumane bamisyinali bakatumwa noliba leelyo nokwakacili nkondo. Kuyungizya waawo, muzike uusyomeka wakatalisya cikolo icakali kwiitwa kuti Course in Theocratic Ministry b ikuyiisya bakwesu abacizyi boonse mumbungano kutegwa babe bakambausi abamayi bacibwene. Kwiinda mukucita boobu, bantu ba Leza bakalibambila mulimo wakukambauka iwakacili kuyandika kucitwa.

¹³ Twalanga musyule, cilisalede kuti Jehova wakali kubasololela bantu bakwe aciindi eeco icakali kukatazya kapati. Kuzwa lya Nkondo Yabili Yanyika Yoonse, bantu ba Jehova balijisi lwaanguluko lwakukambauka muzisi zinji. Mane buya, bantu banji baba acoolwe cakumuzyiba Jehova alimwi babelesi bakwe baluujisi kukambauka munyika yoonse.

14. Nkaambo nzi ncotweelede kwaasyoma malailile aazwa kumbunga ya Jehova alimwi akubaalu? (Ciyubunuzyo 2:1) (Amubone acifwanikiso.)

 ¹⁴ Mazuba aano, bamu Kabunga Keendelezya bazumanana kulanga kuli Kristo kuti abape busolozi. Bayanda kuti malailile oonse ngobapa bakwesu abacizyi kaatondezya kuti azwa kuli Leza a Kristo. Mpoonya babelesya balangizi bamabazu abaalu kupa malailile aayo kumbungano. c Baalu bananike kubikkilizya abaalu boonse mumbungano bali “mujanza lya [Kristo] lyalulyo.” (Amubale Ciyubunuzyo 2:1.) Nokuba boobo, baalu aaba tabalondokede alimwi balalubizya. Awalo Musa a Joshua bakali kulubizya zimwi ziindi mbubonya mbuli baapostolo. (My. 20:12; Jos. 9:​14, 15; Rom. 3:23) Pele cilalibonya caantangalala kuti Jesu nguusololela muzike uusyomeka abaalu, alimwi uyoozumanana kucita boobo “mazuba oonse mane kusikila kumamanino aabweende bwazintu.” (Mt. 28:20) Aboobo, tulijisi twaambo tubotu itweelede kutupa kubusyoma busolozi mbwatupa kwiinda muli baabo mbasalide kuti kabasololela.

TULAGWASYIGWA CIINDI NOTUZUMANANA KUTOBELA BUSOLOZI BWA JEHOVA

15-16. Ncinzi ncomwiiya kuzyakuluula zyabaabo ibakabutobela busolozi bwa Jehova?

¹⁵ Ciindi notuzumanana kutobela busolozi bwa Jehova, tulagwasyigwa kapati noliba lino. Mucikozyanyo, ba Andy aba Robyn bakakutobela kukulwaizya kwakuti baubye-ubye buumi bwabo. Akaambo kaceeci, bakacikonzya kutola lubazu mukugwasyilizya mulimo wamayake. Ba Robyn bakaamba kuti: “Zimwi ziindi twakali kukkala mumaanda masyoonto kapati aatakajisi abusena bwakujikila. Aboobo ndakali kuyandika kusambala zibelesyo zinji nzyondakali kubelesya kukkopa mafwoto, imulimo ngondakali kukkomanina kapati. Mane buya ndakalila nondakazisambala. Pele mbubwenya mbuli Sara mukaintu wa Abrahamu, ndakalikanzide kuzumanana kulanga zintu zyakumbele ikutali zyamusyule.” (Heb. 11:15) Ino banabukwetene aaba bakalongezyegwa buti akaambo kakusala kwabo? Ba Robyn bakaamba kuti: “Tulikkomene kapati akaambo kakuzyiba kuti tupa Jehova zintu zyoonse nzyotujisi. Ciindi notucita mulimo ngwaatupa Jehova, tulabona kadyonko kabuumi mbobunoobede munyika mpya.” Ba Andy bakayungizya kwaamba kuti: “Tulikkomene kapati akaambo kakwaaba ciindi cesu coonse anguzu zyesu mumulimo wa Jehova.”

¹⁶ Muunzila nzi aimbi motugwasyigwa akaambo kakutobela busolozi bwa Jehova? Naakamanizya  lwiiyo lwakusekondali, Marcia wakayanda kutobela lulayo ndwaakamupa mupainiya umwi kujatikizya kubelekela Jehova. (Mt. 6:33; Rom. 12:11) Mucizyi Marcia wakaamba kuti: “Ndakapegwa coolwe cakwiiya kuyunivesiti kwamyaka yone kakunyina kubbadela. Pele mebo ndakali kuyanda kuyungizya mulimo wangu kuli Jehova. Aboobo muciindi cakuzumina coolwe eeci, ndakasala kwiiya mulimo umwi iwakali kuyoondigwasya kujana mali aakuligwasyilizya mumulimo wabupainiya. Ooku kwakali kusala kwiinda kubota nkondakacita. Lino ndilikkomene kubeleka kandili painiya waciindi coonse alimwi mbwaanga mulimo wangu ulandipa ciindi, ndilacikonzya kugwasyilizya mulimo ku Beteli alimwi amilimo iimbi yaalubazu mumbunga ya Jehova.”

17. Nzilongezyo nzi zimbi nzyotujana akaambo kakutobela busolozi bwa Jehova? (Isaya 48:​17, 18)

¹⁷ Zimwi ziindi, tulatambula lulayo lutukwabilila kujatikizya kuyandisya zintu zyakumubili alimwi azintu zikonzya kupa kuti tusotoke milawo ya Leza. Tulagwasyigwa kwiinda mukutobela busolozi bwa Jehova mumakani aaya. Nkaambo tulazumanana kuba amanjezyeezya aasalala alimwi akweeleba mapenzi manji. (1Tim. 6:​9, 10) Akaambo kaceeci, tulakonzya kumubelekela Jehova camoyo woonse calo icikonzya kutuletela lukkomano lwini-lwini, luumuno alimwi akukkutila.—Amubale Isaya 48:​17, 18.

18. Nkaambo nzi ncomukanzide kuzumanana kutobela busolozi bwa Jehova?

¹⁸ Tacidoonekwi buya kuti, Jehova uyoozumanana kubelesya bantu kupa busolozi ciindi camapenzi mapati mane kusikila mu Bulelo bwa Myaka Iili 1,000. (Int. 45:16) Sena tuyoozumanana kutobela malailile ngobanootupa noliba leelyo nocinookatazya kucita boobo? Eeci ciyeeme ambotucita mazuba aano kujatikizya busolozi mbwatupa Jehova. Aboobo, aabe makanze eesu lyoonse kutobela busolozi bwa Jehova, kubikkilizya abusolozi mbwatupa kwiinda mukubelesya bamaalumi ibasalidwe kuti kabatusololela. (Is. 32:​1, 2; Heb. 13:17) Atuzumanane kutobela Musololi wesu Jehova, akumusyoma cakumaninina nkaambo ulatukwabilila kuntenda iili yoonse iikonzya kunyonganya cilongwe cesu anguwe akutusololela kubuumi butamani munyika mpya.