Baama abataata bakali bacikombelo ca Katolika. Pele nobakaiya kuzwa mu Bbaibbele kuti zina lya Leza ngu Jehova, bakaba Bakamboni ba Jehova basungu. Bataata bakaleka kupanga zikozyanyo zibezedwe zya Jesu. Muciindi caboobo, bakabelesya luzyibo lwabo lwakubeza kucinca ŋanda yesu iyakali ansi kuba Ŋanda ya Bwami yakusaanguna mu San Juan del Monte, ku Manila, idolopo pati lya Philippines.

Nondakazyalwa mu 1952, bazyali bangu bakatalika kundiyiisya kujatikizya Jehova mbubonya mbobakali kuyiisya banabokwesu basankwa bone abasimbi botatwe. Mbondakali kuyaabukomena, bataata bakali kundikulwaizya kubala caandaano comwe camu Bbaibbele abuzuba. Alimwi kwiinda mukubelesya zyakumwaya zyesu ziindene-indene, bataata bakandigwasya kwiiya zinji kujatikizya Jehova. Zimwi ziindi, bazyali bangu bakali kutamba balangizi beendeenda abakwesu ibakali kubelekela a Beteli kusikila kuŋanda yesu. Mbuli mukwasyi, twakali kukkomana akukulwaizyigwa kapati azyakuluula zyabakwesu aaba, calo icakapa kuti kubelekela Jehova tukubone kuba cintu ciyandika kapati mubuumi bwesu.

Ndakaiya zinji kucikozyanyo cabazyali bangu, balo ibakali kusyomeka kapati kuli Jehova. Nobakafwa baama akaambo kakuciswa, mebo abataata twakatalika bupainiya antoomwe mu 1971. Pele mu 1973 ciindi nondakajisi myaka iili 20 yakuzyalwa, abalo bataata bakafwa. Kufwidwa bazyali bangu kwakandipa kulendelelwa kapati. Pele bulangizi “ibusinizyide alimwi ibuyumu nta” ibujanika mu Bbaibbele bwakandigwasya kuzumanana kuzilanga kabotu zintu akuyumya cilongwe cangu a Jehova, muciindi cakutyompwa. (Heb. 6:19) Kalitanalampa kuzwa ciindi bataata nobakafwa, ndakazumina kubeleka mbuli mupainiya waalubazu kunsumbu ya Coron, mucooko ca Palawan.

Ndakajisi myaka iili 21 nondakasika ku Coron. Akaambo kakuti ndakakomenena mudolopo, ndakagambwa kapati kubona kuti ansumbu eeyi maanda aakajisi meenda amalaiti akali masyoonto alimwi  amyoota naa mahonda akali masyoonto. Nokuba kuti Bakamboni bakaliko, kwakanyina mupainiya ngondakali kukonzya kubeleka limwi, aboobo zimwi ziindi ndakali kubeleka mubukambausi ndelikke. Mwezi wakusaanguna, ndakali kubayeeya citaambiki banamukwasyi alimwi abalongwe bangu. Masiku, ndakali kulangilila nyenyeezi kujulu akulila. Ndakali kuyanda kuti nduuleke buyo mulimo ooyu akupiluka kuŋanda.

Muziindi zili boobu, ndakali kumwaambila Jehova zyoonse izyakali mumoyo wangu. Ndakali kuyeeya twaambo tukulwaizya ntondakabala mu Bbaibbele alimwi amuzyakumwaya zyesu. Kanji-kanji ndakali kuyeeya lugwalo lwa Intembauzyo 19:14. Ndakabona kuti Jehova wakali kukonzya kuba ‘Ndomba yangu alimwi a Muvwuni wangu’ ikuti naa kandizinzibala kuyeeya zintu zimukkomanisya, mbuli milimo yakwe alimwi abube bwakwe. Ngazi Yamulindizi yamu Cikuwa iyakajisi mutwe wakuti “You Are Never Alone” a yakandigwasya kapati. Ndakaibala cakwiinduluka-induluka. Aboobo ciindi nondakali ndelikke, ndakatalika kulimvwa kuti ndili aa Jehova calo icakandigwasya kubelesya ciindi eeci kupaila, kwiiya alimwi akuzinzibala kuyeeya.

Nondakasika ku Coron, tiilyakalampa ndakasalwa kuba mwaalu. Aboobo mbwaanga ndime ndakali mwaalu endikke, ndakali kusololela Cikolo Camulimo Weendelezyegwa a Leza icakali kucitwa nsondo ansondo, Muswaangano wamulimo, Ciiyo Cabbuku Cambungano alimwi a Ciiyo ca Ngazi Yamulindizi. Alimwi ndakali kupa makani aabuleya nsondo ansondo. Kujata bubi mumilimo eeyi kwakandipa kuleka kulimvwa kulendelelwa.

Ndakali kuukkomanina kapati mulimo wangu wakukambauka ku Coron alimwi basikwiiya Bbaibbele bangu bamwi bakabbapatizyigwa. Pele alimwi kwakali buyumuyumu abumbi. Zimwi ziindi, ndakali kweenda cisela cabuzuba kutegwa ndisike kucilawo, kanditazyi nkondakali kuyakoona. Cilawo cambungano cakajisi tunsumbu tusyoonto-syoonto tunji. Bunji bwaziindi ndakali kubelesya bwato kwiinda mulwizi ilwakajisi mayuwe kutegwa ndisike nkuko nokuba kuti tiindakacizyi kudwaya. Muziindi zyoonse eezyi zikatazya, Jehova wakali kundikwabilila alimwi akundigwasya. Mukuya kwaciindi, ndakazyiba kuti Jehova wakali kundigwasya kulibambila buyumuyumu bukatazya kapati ibwakali kutobela.

Mu 1978, ndakatumwa kuyoobelekela ku Papua New Guinea, Australia nkoili kunyika. Papua New Guinea mbusena bujisi malundu manji alimwi bulatandila kusika acisi ca Spain kukomena. Ndakagambwa kuzyiba kuti mweelwe wabantu babalilwa ku 3 miliyoni bakali kwaambaula myaambo yiinda ku 800. Cikkomanisya ncakuti, bunji bwabantu bakali kukonzya kwaambaula ci Melanesian Pidgin, mwaambo uuzyibidwe kuti Tok Pisin.

Kwaciindi cisyoonto ndakali mumbungano ya Cikuwa mudolopo pati lya Port Moresby. Kumane ndakalongela mumbungano yaci Tok Pisin kwalo nkondakanjila kkilasi yakwiiya mwaambo. Zintu nzyondakali kwiiya mukkilasi ndakali kuzibelesya mumulimo wakukambauka. Eeci cakandigwasya kufwambaana kuuzyiba mwaambo. Tiilyakalampa, ndakacikonzya kutalika kupa makani aabuleya muci Tok Pisin. Ndakagambwa kapati ciindi nondakasalwa kuba mulangizi wabbazu wambungano izyakali kubelesya mwaambo waci Tok Pisin muzyooko zipati izili mbozibede zyamucisi, nokuba kuti tiindakalinakkwanya mwaka kuzwa nondakasika mu Papua New Guinea.

 Akaambo kakuti mbungano zyakalitanteene, ndakeelede kubamba miswaangano yabbazu minji alimwi akweenda kapati. Kumatalikilo, ndakali kulimvwa kulendelelwa akaambo kakuti ndakali mucisi cipya mwalo bantu mobakali kwaambaula mwaambo ngondatakazyi alimwi akutobela zilengwa ziindene anzyondakazyibide. Kunze lyaboobo, tiicakali kukonzyeka kuswaya mbungano kubelesya migwagwa akaambo kamalundu alimwi abuyale bwanyika. Aboobo bunji bwaziindi ndakali kubelesya ndeke. Zimwi ziindi, ndakali kulijana endikke mukandeke kasyoonto ikatakali kabotu. Nyendo eezyi zyakali kundipa kulibilika kapati mbubwenya mbondakali kulibilika ndabelesya bwato.

Bantu banji tiibakajisi mafooni, aboobo ndakali kubandika ambungano kwiinda mukubelesya magwalo. Nokuba boobo, kanji-kanji ndakali kusika kaatanasika magwalo ngondakatuma, aboobo ndakali kubuzya buyo bantu mbondajana nkondakali kukonzya kujana Bakamboni. Pele kufwumbwa buyo ndabajana bakwesu, bakali kunditambula amaanza obilo alimwi akulumba kapati cakuti andime ndakali kukkomana kuti ndacikonzya kusika. Ndakalibonena lugwasyo lwa Jehova munzila zinji alimwi cilongwe cangu anguwe cakayuma kapati.

Nondakaunka kumuswaangano ciindi cakusaanguna kunsumbu yiitwa kuti Bougainville, banabukwetene bakandisikila kumwi kabamweta-mweta akundibuzya kuti, “Sena mwatuyeeya?” Ndakayeeya kuti ndakabakambaukila banabukwetene aaba ciindi nondakasika mu Port Moresby. Ndakatalika kwiiya Bbaibbele ambabo kumane ndakalomba mukwesu wakubusena ooko kuti azumanane kwiiya ambabo. Lino bakalibbapatizyidwe. Eeci cakali akati kazilongezyo zinji nzyaakandipa Jehova ciindi nondakali kubeleka kwamyaka yotatwe mu Papua New Guinea.

Kanditanazwa mu Coron mu 1978, ndakazyibana amucizyi mubotu alimwi iwakalyaabide wazina lya Adel. Wakali mupainiya waciindi coonse kumwi kakomezya bana bakwe bobilo, Samuel a Shirley. Aciindi ncomunya, wakali kulanganya banyina ibakacembeede. Mu May 1981, ndakapiluka ku Philippines kuyookwata mucizyi Adel. Notwakamana kukwatana, twakazumanana abupainiya bwaciindi coonse akulanganya mukwasyi antoomwe.

Nokuba kuti ndakajisi mukwasyi, mu 1983, ndakasalwa alimwi kuba mupainiya waalubazu akutumwa kunsumbu ya Linapacan, mucooko ca Palawan. Mukwasyi woonse wakalongela kubusena oobu ibwakali kulamfwu kwalo ikwakanyina Bakamboni. Mpoonya banyina baba Adel bakazimina nokwakainda mwaka omwe. Nokuba boobo, twakazumanana kujata bubi mumulimo wakukambauka calo icakatugwasya kuliyumya kubuumba bwakufwidwa muyandwa wesu. Twakatalisya ziiyo zya Bbaibbele mu Linapacan izyakali kuyaambele cakuti kalitanalampa, twakali kuyandika Ŋanda ya Bwami. Aboobo twakaliyakila. Mpoonya nokwakainda buyo myaka yotatwe kuzwa notwakasika, twakakkomana kubona bantu basika ku 110 ibakajanika ku Ciibalusyo, alimwi bunji bwabo bakazumanana kuyaambele kusikila antaamu yakubbapatizyigwa notwakazwa.

Mu 1986, ndakatumwa kunsumbu ya Culion, ikwakali bantu ibakali kuciswa cinsenda. Kumane nokwakainda myaka misyoonto, abalo ba Adel bakasalwa kuba bapainiya baalubazu. Kumatalikilo, twakali kuyoowa kukambaukila bantu ibakali kuciswa cinsenda. Pele basikumwaya bakubusena oobu bakatwaambila  kuti bantu ibakali kuciswa bulwazi oobu bakatambula busilisi aboobo tiitwakali kukonzya kuyambukilwa. Basicinsenda bamwi mane bakali kujanika kumiswaangano iyakali kucitilwa muŋanda yamucizyi. Tiilyakalampa, twakatalika kulikwaya kubaambila bulangizi bwamu Bbaibbele bantu ibakali kulimvwa kutayandwa a Leza alimwi abantu bamwi. Cakali kukkomanisya kaka kubona bantu aaba ibakali kuciswa kapati kabakkomene akaambo kakuzyiba kuti bumwi buzuba bayooba abuumi bubotu.—Lk. 5:​12, 13.

Ncinzi cakagwasya bana besu kubuzyibila buumi bwaku Culion? Mebo abakaintu bangu ba Adel twakatamba bacizyi bobilo bakubusi kuzwa ku Coron kuti batusangane kutegwa bana besu babe abalongwe bali kabotu. Samuel, Shirley alimwi abakubusi aaba bobilo bakalikkomene kugwasya bamwi kwiiya kasimpe. Bakali kwiiya abana banji mpoonya mebo aba Adel twakali kwiiya abazyali babana aabo. Mane buya aciindi cimwi, twakali kwiiya amikwasyi iili 11. Twakali kusololela ziiyo zya Bbaibbele izyakali kuyaambele kapati cakuti twakacikonzya kutalisya mbungano mpya.

Kumatalikilo, ndime ndakali mwaalu ndelikke mucilawo eeci. Aboobo ofesi yamutabi yakandilomba kuti kandisololela miswaangano yansondo ansondo kuli basikumwaya bali 8 ansumbu ya Culion alimwi akuli bali 9 ibakali kukkala kumunzi wa Marily, kwalo ikwakali kweendwa mawoola otatwe abwato. Twamana kuswaangana okuya, mbuli mukwasyi twakali kweenda kwiinda mumalundu kwamawoola manji kuunka kuyoosololela ziiyo zya Bbaibbele mumunzi wiitwa kuti Halsey.

Mukuya kwaciindi, bantu banji bakaiya kasimpe mu Marily amu Halsey cakuti kwakayakwa Maanda aa Bwami muminzi eeyi yoonse yobilo. Bakwesu baku Linapacan alimwi abaabo ibakajisi luyandisisyo bakagwasyilizya kapati mumulimo ooyu wakuyaka. Ŋanda ya Bwami yaku Marily yakali kunjizya bantu bali 200 alimwi yakali kukonzya kukomezyegwa, calo icakapa kuti katucikonzya kucitila miswaangano yabbazu.

Mu 1993, ciindi bana nobakakomena mebo aba Adel twakatalika mulimo wamubbazu ku Philippines. Kumane mu 2000, ndakanjila Cikolo Cakwiiya Mulimo kwalo nkondakayiisyigwa kuba mwiiyi wacikolo eeci. Ndakali kulitenga kuti inga tiindacikonzya, pele ba Adel lyoonse bakali kundikulwaizya. Bakandiyeezya kuti Jehova uyoondipa nguzu kutegwa ndicikonzye kuuzuzikizya mulimo ooyu mupya. (Flp. 4:13)  Ba Adel bakalizyi kuti aaya masimpe nkaambo bakali kucikonzya kuzuzikizya mukuli wabo kumwi kabaciswa.

Mu 2006 ciindi nondakajisi cikolo, ba Adel bakajanwa abulwazi bwa Parkinson. Twakatyompwa kapati. Pele nondakapa muzeezo wakuti tuuleke mulimo wesu, balo bakaingula kuti: “Akaka amujane buyo dokota uukonzya kundigwasya kubulwazi bwangu alimwi ndilizyi kuti Jehova ulatugwasya kutegwa tuzumanane mumulimo wesu.” Kwamyaka iili 6 yakatobela, ba Adel bakazumanana kumubelekela Jehova kakunyina kutongooka. Ciindi nobatakali kukonzya kweenda, bakali kukambaukila akacinga kabo kabalema. Mpoonya nocakali kubakatazya kwaambaula, bakali kwiingula kumiswaangano kwiinda mukwaamba buyo bbala lyomwe naa obilo. Lyoonse bakali kutambula makkaadi atugwalo twaafooni twakubalumba akaambo kakuba cikozyanyo cibotu cakuliyumya kusikila nobakafwa mu 2013. Ndakakkala mucikwati abakaintu bangu basyomeka alimwi basiluyando kwamyaka yiinda ku 30. Aboobo nobakafwa, ndakaba mubuumba akutalika kulimvwa kulendelelwa alimwi.

Ba Adel bakali kuyanda kuti ndizumanane amulimo wangu, aboobo eeco ncondakacita. Ndakali kujata bubi calo icakandigwasya kapati kulwana kulendelelwa. Kuzwa mu 2014 kusika mu 2017, ndakali kutumwa kuyooswaya mbungano izyakali kubelesya mwaambo waci Tagalog mumasi mwalo mulimo wesu mowakalesyedwe. Kuzwa waawo, ndakali kuswaya mbungano izyakali kubelesya mwaambo ooyu mu Taiwan, United States, alimwi aku Canada. Mu 2019, ndakali kweendelezya makkilasi aa Cikuwa aa Cikolo Cabakambausi ba Bwami ku India alimwi aku Thailand. Ndajana lukkomano lunji mumilimo yoonse eeyi. Inga ndilakkomana kapati ciindi nondijata bubi mumulimo wa Jehova.

Mumulimo mupya uuli woonse ngondakali kupegwa, ndakali kubayanda kapati bakwesu abacizyi mbondakali kujana, aboobo tiicakali cuuba-uba kubasiya. Muziindi zili boobu, ndaiya kusyoma Jehova cakumaninina. Lyoonse ndali kulubona lugwasyo lwakwe alimwi eeci candigwasya kukutambula kucinca kuli koonse camoyo woonse. Mazuba aano, ndilabeleka kandili mupainiya waalubazu ku Philippines. Ndilikkomene kuba mumbungano mpya yalo iyaba mukwasyi uundigwasya akundilanganya. Alimwi ndilikkomene kubona Samuel a Shirley kabaiya cikozyanyo cabanyina cakusyomeka.—3Joh. 4.

Masimpe kuti ndali kujana mapenzi manji mubuumi bwangu, kubikkilizya akubona mukaintu wangu uuyandwa kapenga akufwa akaambo kabulwazi bubyaabi. Alimwi ndakali kuyandika kuzyibila bukkale bunji bwiindene-indene. Pele ndalibonena kuti Jehova “tali kulamfwu kuli umwi aumwi wesu.” (Mil. 17:27) Janza lya Jehova “talili lifwaafwi pe” cakuti talikonzyi kugwasya babelesi bakwe alimwi akubakulwaizya nobaba baabo bali mumasena aali kulamfwu kapati. (Is. 59:1) Jehova Nindomba yangu, wali aandime mubuumi bwangu boonse alimwi ndilamulumba kapati. Kunyina nondakali ndelikke.