1-2. (a) Ndilili nocikonzya kutukatazya kulekelela muntu? (b) Mbuti ba Denise mbobakatondezya kulekelela?

 SENA cilamukatazya kulekelela bamwi? Bunji bwesu cilatukatazya, kwaambisya ikuti muntu umwi waamba naa kucita cintu cimwi icatucisa kapati. Nokuba boobo, kuli zintu zikonzya kutugwasya kubalekelela bamwi muciindi cakuzumanana kunyema. Mucikozyanyo atulange-lange cakuluula camucizyi Denise, a walo iwakatondezya kulekelela kwini-kwini. Mu 2017, mucizyi Denise amukwasyi wakwe bakaunkide kuyooswaya Maofesi Mapati aa Bakamboni ba Jehova aakazwide aakujalulwa. Nobakali kupiluka kuŋanda, namutekenya umwi wakanyongana akupwaya moota yabo. Ba Denise bakafenta noyakacitika ntenda eeyi. Ciindi nobakasinsimuka, bakazikuzyiba kuti bana babo bakalicisa citaambiki alimwi akuti ba Brian balumi babo, bakafwa. Nobakayeeya ceeci cakacitika, ba Denise bakaamba kuti: “Ndakanyongana kapati alimwi lyakandileka.” Kumane bakazyiba kuti ntenda yakacitika ikutali akaambo kakuti namutekenya uulya wakakoledwe bukoko, misamu iikola naa kunyonganizyigwa azintu zimbi buyo. Aboobo bakapaila kuli Jehova kutegwa abape luumuno lwamumizeezo.

² Namutekenya iwakapwaya moota yabo wakaangwa alimwi akutolwa kunkuta akaambo kakujaya balumi babo. Kuti nkuta noyakakosola kuti ulijisi mulandu, wakali kukonzya kupika ntolongo. Sinkuta umwi wakaambila ba Denise kuti ncobakali kuyakwaamba kunkuta ncecakali kuyoopa kuti mwaalumi ooyu apike ntolongo naa pe. Ba Denise bakaamba kuti: “Ndakalimvwa mbuli kuti muntu umwi wabikka sautu acilonda cangu, nkaambo ndakeelede kupandulula cintu eeci cuusisya kapati icakacitika mubuumi bwangu.” Mpoonya nokwakainda nsondo zisyoonto buyo, ba Denise bakaunka kunkuta kutegwa bakapandulule cintu eeci cicisizya moyo ncaakacita mwaalumi ooyu kumukwasyi wabo. Ncinzi ncobakaamba? Ba Denise bakalomba mubetesi kuti amufwide  luse mwaalumi ooyu. b Ciindi nobakamana kwaambaula, yakamweenda misozi mubetesi. Kumane wakaamba kuti: “Ndabeleka munkuta kwamyaka iili 25, pele tandinamvwide muntu waamba boobu. Tandinamvwide mukwasyi wabantu bacitilwa cintu cibi, kaulomba kuti muntu wabalubizyila afwidwe luse. Tandinabwene muntu uutondezya luyando luli boobu alimwi akulekelela.”

 3. Ncinzi cakabagwasya ba Denise kulekelela?

³ Ncinzi cakabagwasya ba Denise kulekelela? Bakazinzibala kuyeeya Jehova mbwalekelela. (Mik. 7:18) Ciindi notutondezya kulumba akaambo kambwatulekelela Jehova, ciyootukulwaizya kulekelela bamwi.

 4. Ncinzi Jehova ncayanda kuti tucite? (Baefeso 4:32)

⁴ Jehova uyanda kuti katubalekelela bamwi camoyo woonse mbubwenya awalo mbwatulekelela. (Amubale Baefeso 4:32.) Ulangila kuti andiswe katulibambilide kubalekelela aabo ibatulubizyila. (Int. 86:5; Lk. 17:4) Mucibalo eeci, tulalanga-langa zintu zyotatwe zikonzya kutugwasya kutegwa katulekelela.

AMUSOLE KUMVWISYA MBOMULIMVWA

 5. Kweelana alugwalo lwa Tusimpi 12:​18, ino inga twalimvwa buti kuti muntu umwi watulubizyila?

⁵ Cilakonzya kutucisa kapati kuti muntu umwi waamba naa kutucitila cintu cimwi cibyaabi, kwaambisya kuti muntu ooyo kali mulongwe mwini-mwini naa munamukwasyi. (Int. 55:​12-14) Zimwi ziindi, kucisa nkotukonzya kumvwa kulakonzya kukozyanisyigwa kukucisa nkotukonzya kumvwa ikuti naa twayaswa. (Amubale Tusimpi 12:18.) Tulakonzya kusola kutakubikkila maano kulimvwa kwesu. Pele kucita boobo, kuli mbuli kuleka naifi kaiyaside acilonda. Mbubwenya buyo, tatukonzyi kulangila kuti tulakonzya kulimvwa kabotu ikuti naa twalicengeezya kuti tiicatucisa ciindi bamwi nobatatweendelezya kabotu.

 6. Ino inga twacita buti kuti muntu umwi watunyemya?

⁶ Ciindi muntu umwi naatulubizyila, cintu cakusaanguna ncotucita nkunyema. Bbaibbele lilaamba kuti tulakonzya kunyema. Nokuba boobo, lyaamba kuti tatweelede kuzumanana kunyema. (Int. 4:4; Ef. 4:26) Nkaambo nzi? Nkaambo kakuti mbotulimvwa kulakonzya kupa kuti tucite cintu cimwi. Alimwi kunyema kanji-kanji kupa kucita zintu zitali kabotu. (Jak. 1:20) Tweelede kuyeeya kuti talili lyoonse notukonzya kulijata kunyema, pele kuzumanana kunyema makani aakulisalila.

 7. Ino inga twalimvwa buti kuti muntu umwi watucitila cintu cibyaabi?

⁷ Ciindi notwateendelezyegwa kabotu, tulakonzya kulimvwa bubi kapati. Mucikozyanyo, mucizyi wazina lya Ann wakaamba kuti: “Ciindi nondakacili mwana, bataata bakabaleka bamaama akukwata mukaintu wakali kundilanganya aŋanda. Ndakalimvwa kulekelezyegwa. Ciindi nobakaba abana, ndakalimvwa kuti ndanjililwa busena. Ndakakomena kandilimvwa kutayandwa.” Mucizyi wazina lya Georgette wakaamba mbwaakalimvwa ciindi balumi bakwe nobakacita bumambe, wakati: “Twakali balongwe kuzwa kubwana akucita bupainiya antoomwe. Eeci cakandicisa kapati, moyo wangu wakabbila mubulowa.” Mukuya kwaciindi, twakalekana. Mpoonya mucizyi wazina lya Naomi wakaamba kuti: “Tiindakali kuyeeyela kuti balumi bangu inga bandicitila cintu cicisizya moyo. Aboobo ciindi nobakalyaambilila kuti bakali kweebelela zintu ziletela muzeezo wakoonana cakusisikizya, ndakalimvwa kweenwa alimwi akulekelezyegwa.”

 8. (a) Ntwaambo nzi tumwi itweelede kutupa kubalekelela bamwi? (b) Mbubotu nzi buboola akaambo kakulekelela bamwi? (Amubone kabbokesi kakuti “ Mbuti Kuti Muntu Umwi Watunyemya?”)

 ⁸ Tatukonzyi kucinca zintu bantu nzyobaamba naa kucita, pele tulakonzya kulyeendelezya caboola kuzintu nzyotwaamba. Alimwi nzila yiinda kubota nkubalekelela buyo. Nkaambo nzi? Nkaambo kakuti tulamuyanda Jehova alimwi uyanda kuti katuli bantu balekelela. Ikuti naa twazumanana kunyema alimwi akuti katutalekeleli, tulakonzya kucita zintu cabufwubafwuba alimwi akuciswa buya. (Tus. 14:​17, 29, 30) Atubone cikozyanyo camucizyi wazina lya Christine. Wakaamba kuti: “Ciindi nondinyemede akaambo kakucitilwa cintu cibi, inga tandivwuli kumweta-mweta. Inga ndilya zyakulya zitajisi busani. Inga bulaca ndibala milonga alimwi inga cilandikatazya kweendelezya mbondilimvwa calo cipa kuti kanditabeendelezyi kabotu balumi bangu alimwi abamwi.”

 9. Nkaambo nzi ncotuteelede kubikkilila?

⁹ Nokuba kuti muntu iwakatucitila cintu cibyaabi tanaalilekelela, tulakonzya kucesya mapenzi aaboola akaambo kakubikkilila. Mubuti? Mucizyi Georgette, iwaambwa kale, wakaamba kuti: “Cakatola ciindi, pele ndakaleka kunyema alimwi akubabikkilila ibakali balumi bangu. Eeci cakapa kuti ndibe aluumuno lwamumizeezo.” Ciindi notuleka kubikkilila, cipa kuti katubeendelezya kabotu bamwi. Alimwi tulakonzya kucita cintu cikonzya kutugwasya, nkokuti kuleka kwaabikkila maano makani akutalika kupona kweelana ambotwakali kupona musyule. (Tus. 11:17) Pele ncinzi ncomweelede kucita kuti kamulimvwa kuti tamulibambilide kulekelela?

MBOTUKONZYA KULEKA KUNYEMA

10. Nkaambo nzi ncotweelede kulipa ciindi kutegwa tuleke kunyema? (Amubone azifwanikiso.)

¹⁰ Ncinzi cikonzya kumugwasya kuleka kunyema? Nzila imwi nkwiinda mukulipa ciindi. Mucikozyanyo, ciindi naamana kupegwa busilisi, muntu iwalicisa kapati weelede kulindila kwaciindi cili mbocibede kutegwa apone. Mbubwenya buyo, inga kwayandika ciindi kutegwa tuleke kunyema akumulekelela muntu kuzwa ansi aamoyo.—Muk. 3:3; 1Pet. 1:22.

11. Mbuti mupailo mboukonzya kumugwasya kuba bantu balekelela?

¹¹ Amupaile kulomba Jehova kuti amugwasye  kuba bantu balekelela. c Mucizyi Ann, iwaambwa kumatalikilo, wakaamba mupailo mbowakamugwasya. Wakaamba kuti: “Ndakamulomba Jehova kuti atulekelele toonse mumukwasyi akaambo kazintu nzyotwakaamba naa kucita zyalo zyatakali kabotu. Mpoonya ndakalembela bataata alimwi abakaintu babo bapya lugwalo, ikubaambila kuti ndakabalekelela.” Mucizyi Ann wakaamba kuti kucita boobo tiicakali cuubauba. Pele wakati: “Ndiyeeya kuti kwiinda mukusolekesya kwangu kwiiya kulekelela kwa Jehova, bataata alimwi abakaintu babo bayookulwaizyigwa kuyanda kwiiya zinji kujatikizya Jehova.”

12. Nkaambo nzi ncotweelede kusyoma Jehova ikutali mbotulimvwa? (Tusimpi 3:​5, 6)

¹² Amusyome Jehova, ikutali mbomulimvwa. (Amubale Tusimpi 3:​5, 6.) Jehova lyoonse ulizizyi zintu zikonzya kutugwasya. (Is. 55:​8, 9) Alimwi kunyina nakonzya kutwaambila kucita cintu cikonzya kutucisa. Aboobo, ciindi natukulwaizya kuba bantu balekelela, tulakonzya kuba masimpe kuti kucita boobo kuyootugwasya. (Int. 40:4; Is. 48:​17, 18) Kulubazu lumwi, kuti twabikkila maano kujatikizya mbotulimvwa, tuyakwaalilwa kuba bantu balekelela. (Tus. 14:12; Jer. 17:9) Mucizyi Naomi iwaambwa kumatalikilo, wakaamba kuti: “Kumatalikilo, ndakali kulimvwa kuti tiindakeelede kubalekelela balumi bangu akaambo kakweebelela zintu ziletela muzeezo wakoonana. Ndakali kuyoowa kuti, ikuti ndabalekelela balakonzya kundicitila cintu cimbi cibyaabi mane buya akuluba mbobakandicisizya moyo. Kunze lyaboobo, ndakayeeya kuti Jehova ulizyi bwini mbondilimvwa. Pele ndakabona kuti nokuba kuti Jehova ulizyi bwini mbondilimvwa, eeci tacaambi kuti ulazuminizya. Masimpe ulizyi mbondilimvwa akuti citola ciindi kuleka kunyema, pele alimwi uyanda kuti kandili muntu uulekelela.” d

AMUCINCE MBOMULIMVWA

13. Kweelana alugwalo lwa Baroma 12:​18-21, ncinzi ncotweelede kucita?

¹³ Ciindi notwamulekelela muntu wakatunyemya, kuli azimbi nzyotweelede kucita kunze buyo lyakuleka kubandika kujatikizya cintu eeco cakacitika. Makanze eesu ngakubamba luumuno, kwaambisya kuti muntu ooyo wakatunyemya kali mukwesu naa mucizyi Munakristo.  (Mt. 5:​23, 24) Kutegwa tucikonzye kucita boobo, tweelede kusala kuleka kunyema mpoonya akutondezya luse alimwi akulekelela. (Amubale Baroma 12:​18-21; 1Pet. 3:9) Ncinzi cikonzya kutugwasya kucita boobo?

14. Ncinzi ncotweelede kusolekesya kucita? Nkaambo nzi?

¹⁴ Tweelede kusolekesya kubona muntu watulubizyila mbubonya Jehova mbwamubona. Jehova ubikkila kapati maano kubube bubotu mbobajisi bantu. (2Mak. 16:9; Int. 130:3) Tulakonzya kubujana bube buli boonse mbotuyanda mubantu, kufwumbwa naa mbubotu naa mbubi. Ciindi notulanga bube bubotu mubantu, ciyootuubila kubalekelela. Mucikozyanyo, mukwesu wazina lya Jarrod wakaamba kuti: “Ncuubauba kumulekelela mukwesu ciindi nondiyeeya kujatikizya zintu zibotu nzyacita muciindi cakubikkila maano kukulezya kwakwe.”

15. Nkaambo nzi ncocikonzya kugwasya kumwaambila muntu kuti mwamulekelela?

¹⁵ Cintu cimbi ciyandika kapati ncotweelede kucita nkumwaambila muntu ooyo iwakatulubizyila kuti twakamulekelela. Nkaambo nzi? Amubone mucizyi Naomi iwaambwa kumatalikilo  ncaakaamba, wakati: “Balumi bangu bakandibuzya kuti, ‘Sena mwandilekelela?’ Ciindi nondakayanda kujalula mulomo kutegwa ndibaambile kuti, ‘Ndamulekelela,’ ndakaalilwa. Aboobo ndakazyiba kuti tiindakabalekelede kuzwa ansi aamoyo. Mukuya kwaciindi, ndakacikonzya kwaamba bbala eeli liyandika kapati lyakuti, ‘Ndamulekelela.’ Ciindi nondakabalekelela, misozi yakaibaiba mumeso aabo. Ndakagambwa kapati kubona mbobakalimvwa alimwi andime ndakaba muluumuno. Kuzwa waawo, ndakatalika kubasyoma alimwi kumane lino tulamvwana kapati.”

16. Ncinzi ncomwaiya kujatikizya kulekelela?

¹⁶ Jehova uyanda kuti katulekelela. (Kol. 3:13) Nokuba boobo, cilakonzya kutuyumina kubalekelela bamwi. Pele tulakonzya kubalekelela kuti twasolekesya kuleka kunyema. Mpoonya tulakonzya kucinca mbotulimvwa kujatikizya mbabo.—Amubone kabbokesi kakuti “ Nzila Zyotatwe Zikonzya Kutugwasya Kulekelela.”

AMUBIKKILE MAANO KUBUBOTU BWAKULEKELELA

17. Nkaambo nzi ncotweelede kubalekelela bamwi?

¹⁷ Tulijisi twaambo tunji itweelede kutupa kulekelela. Amuleke tutulange-lange tumwi. Kusaanguna, twiiya Taateesu siluse, Jehova alimwi akumukkomanisya. (Lk. 6:36) Cabili, tutondezya kulumba kuli Jehova akaambo kakuti wakatulekelela. (Mt. 6:12) Mpoonya catatu, tulaba abuumi bubotu alimwi tulazumanana kuba azilongwe ziyumu.

18-19. Ncinzi cikonzya kucitika ciindi notulekelela?

¹⁸ Ciindi notubalekelela bamwi, tulakonzya kuba azilongezyo nzyotwatali kuyeeyela. Mucikozyanyo, amubone cakamucitikila mucizyi Denise, iwaambwa kumatalikilo. Nokuba kuti kunyina ncaakazyi aciindi aawa, namutekenya iwakanjila moota yabo wakajisi makanze aakuti akalijaye waakumana kukosolwa mulandu wakwe. Nokuba boobo, wakakulwaizyigwa kapati akaambo kakulekelela kwamucizyi Denise, calo cakapa kuti atalike kwiiya Bbaibbele a Bakamboni ba Jehova.

¹⁹ Tulakonzya kulimvwa kuti kulekelela muntu umwi ncintu cikatazya kapati ncotutakonzyi kucita. Pele alimwi ncintu cikonzya kutuletela zilongezyo zinji kapati. (Mt. 5:7) Aboobo, toonse atucite kufwumbwa ncotukonzya ikwiiya kulekelela kwa Jehova.