Ba Mary abalumi babo ba John, a bakkala kucisi nkobakonzya kukambaukila bantu banji ibazwa ku Philippines, balo ibaboola kubeleka. Aboobo lya bulwazi bwa COVID-19, ba Mary bakatalisya ziiyo zya Bbaibbele kubantu banji bamucisi alimwi abamuzisi zimbi. Ino bakacikonzya buti?

Ba Mary bakali kubuzya bantu mbobakali kwiiya limwi Bbaibbele kuti: “Sena kuli muntu uumbi ngomuzyi uunga wayanda kwiiya Bbaibbele?” Ikuti naa baamba kuti inzya, bakali kubalomba kuti babagwasye kuzyibana ambabo.” Kubuzya mubuzyo ooyu kanji-kanji kulagwasya kapati. Nkaambo nzi? Nkaambo bantu ibalikkomanina Jwi lya Leza kanji-kanji inga balayanda kwaambila banamukwasyi naa balongwe kujatikizya nzyobaiya. Aboobo, ncinzi cakacitika akaambo kakubuzya mubuzyo ooyu?

Ba Jasmin ibakali kwiiya Bbaibbele aba Mary bakabazyibya kuli basikwiya bambi bone. Umwi wabo mbaa Kristine, balo ibakali kucikkomanina kapati ciiyo cakuti bakalomba ba Mary kuti kabaiya ambabo ziindi zyobilo ansondo. Ciindi ba Mary nobakababuzya naa kuli bantu bambi mbobakazyi ibakali kuyanda kwiiya Bbaibbele, ba Kristine bakaamba kuti: “Inzya nkobali beenzuma, ndilabaambila mukazyibane.” Munsondo buyo zisyoonto, ba Kristine bakabazyibya ba Mary kubalongwe babo bone ibakali kuyanda kwiiya. Mukuya kwaciindi, ba Kristine bakabazyibya alimwi ba Mary kubalongwe babo bambi, kumane balongwe aabo abalo bakaamba mazina aabantu bamwi ibakali kunga bayanda kwiiya Bbaibbele.

Ba Kristine bakali kuyanda kuti abalo banamukwasyi ibakali ku Philippines batalike kwiiya Bbaibbele. Aboobo bakabandika amwanaabo musimbi Andrea. Kumatalikilo, Andrea wakayeeya kuti: ‘Bakamboni ncikombelo citazyibidwe, tabasyomi muli Jesu alimwi babelesya buyo Cizuminano Cakaindi.’ Pele naakamana buyo kwiiya ciindi comwe, wakabona kuti zyoonse nzyaakali kuyeeya kujatikizya Bakamboni tiizyakaluzi. Kufwumbwa ciindi naakali kwiiya cintu cipya kuzwa mu Bbaibbele, wakali kwaamba kuti: “Mbwaanga cijanika mu Bbaibbele, kweelede kuti ncamasimpe.”

Mukuya kwaciindi, Andrea wakazyibya ba Mary kubeenzinyina bobilo amubelesinyina omwe balo ibakatalika kwiiya. Kumane kabatazyi ba Mary, baanti ba Andrea bazina lya Angela ibakali boofwu, bakali kuswiilila ciindi Andrea naakali kwiiya aba Mary. Mpoonya bumwi buzuba, ba Angela bakaambila Andrea kuti abalombe ba Mary kutegwa batalike kubayiisya Bbaibbele abalo. Ba Angela bakazikkomanina kapati nzyobakali kwiiya. Mumwezi buyo omwe, bakacikonzya kuswata magwalo manji mane buya bakali kuyanda kuti kabaiya ziindi zyone ansondo. Kumane bakatalila kujanika kumiswaangano  lyoonse kubelesya videoconference kwiinda mukugwasyigwa a Andrea.

Ciindi ba Mary nobakazyiba kuti balumi baba Kristine ba Joshua, lyoonse bakali kujanika afwaafwi ampobakali kuyiila, ba Mary bakabalomba kuti babasangane. Ba Joshua bakaamba kuti: “Ndinooswiilila buyo, pele mutandibuzyi mubuzyo uuli woonse, ikuti naa mundibuzye, ndilamusiya.” Mumaminiti osanwe buyo kuzwa nobakatalika kwiiya, ba Joshua bakabuzya mibuzyo minji kwiinda ba Kristine mpoonya abalo bakayanda kutalika kwiiya Bbaibbele.

Mubuzyo ba Mary ngobakali kubuzya wakapa kuti bajane ziiyo zya Bbaibbele zinji. Kumane bakapanga bubambe bwakuti basikwiiya bamwi batalike kwiiya a Bakamboni bambi. Antoomwe, ba Mary bakatalisya ziiyo zya Bbaibbele zili 28 muzisi zyone.

Ba Jasmin, sikwiiya wakusaanguna iwaambidwe mucakuluula eeci, bakabbapatizyigwa mu April 2021. Ba Kristine bakabbapatizyigwa mu May 2022 akupiluka ku Philippines kutegwa bakabe amukwasyi wabo. Kumane basikwiiya bambi bobilo ibakazyibana aba Mary kwiinda muli ba Kristine abalo bakabbapatizyigwa. Mpoonya ba Angela bakabbapatizyigwa nokwakainda myezi misyoonto buyo alimwi lino mbapainiya baciindi coonse. Ba Joshua, ibalumi baba Kristine amwanaabo Andrea alimwi abasikwiiya bambi ibali mbobabede, bazumanana kuyaambele.

Mumwaanda wamyaka wakusaanguna, makani mabotu akamwaika cakufwambaana akati kabanamukwasyi alimwi abalongwe. (Joh. 1:​41, 42a; Mil. 10:​24, 27, 48; 16:​25-33) Aboobo amubabuzye basikwiiya Bbaibbele banu alimwi abaabo bajisi luyandisisyo kuti: “Sena kuli muntu uumbi ngomuzyi uunga wayanda kwiiya Bbaibbele?” Kwiinda mukubuzya mubuzyo ooyu, ambweni andinywe mulakonzya kujana bantu banji ibayanda kwiiya Bbaibbele.