1, 2. (a) Ino ncinzi ncaakaamba Jehova kuti ciyoocitika muciindi cesu? (b) Ino mibuzyo nzi itiingulwe mucibalo eeci? (Amulange cifwanikiso icili kumatalikilo aacibalo.)

JEHOVA wakaamba kuti muciindi cesu, “bantu bali kkumi bazwa mumyaambo yoonse yamasi bayoojata, inzya, bayoojatisya cikobela camu Juda, akwaamba kuti: “Tuyanda kuunka andinywe, nkaambo twamvwa kuti Leza ulaandinywe.’” (Zekariya 8:23) “Mu Juda” wiiminina baabo Leza mbaakananika amuuya uusalala. Alimwi baambwa kuti “iba Israyeli ba Leza.” (Bagalatiya 6:16) “Bantu bali kkumi” baiminina baabo bajisi bulangizi bwakupona anyika kukabe kutamani. Balizyi kuti Jehova wakakalongezya kabunga aaka kabananike alimwi balimvwa kuti ncoolwe cipati kukomba Leza antoomwe ambabo.

² Mbubwenya mbuli Zekariya, Jesu wakaamba kuti bantu ba Leza banookamantene. Wakaita baabo bajisi bulangizi bwakuunka kujulu kuti ‘katanga kaniini’ eelyo aabo bajisi bulangizi bwakupona anyika kuti “mbelele zimbi.” Pele Jesu wakaamba kuti boonse bayooba “tanga lyomwe” alimwi akuti banoomutobela, ‘mweembezi wabo omwe.’ (Luka 12:32; Johane  10:16) Mbwaanga kuli tubunga tobilo, bamwi balakonzya kulibuzya kuti: (1) Sena bambelele zimbi bayandika kwaazyiba mazina aabananike boonse mazuba aano? (2) Ino bananike beelede kulibona buti? (3) Ikuti umwi mumbungano mondizulilwa watalika kulya cinkwa akunywa waini lya Ciibalusyo, ino ndeelede kumubona buti? (4) Sena ndeelede kulibilika ndabona kuti mweelwe wabaabo ibalya cinkwa akunywa waini lya Ciibalusyo uyaambele? Cibalo eeci cilaingula mibuzyo eeyi.

3. Ino nkaambo nzi ncocitakonzyeki kubazyiba mazina aabo ibayooba akati kaba 144,000?

³ Sena bambelele zimbi beelede kwaazyiba mazina abananike boonse bacipona anyika mazuba aano? Peepe. Nkaambo nzi? Nkaambo tacikonzyeki kumuntu uuli woonse kuzyiba masimpe ikuti naa aaba bayootambula bulumbu bwabo. ^[1] (Bupanduluzi buyungizyidwe.) Nokuba kuti Jehova wakabatamba kuunka kujulu, bayootambula bulumbu bwabo lilikke kuti bazumanana kusyomeka. Saatani ulikazyi kaambo aaka, aboobo ubelesya “basinsimi bakubeja” kusoleka ‘kubeena.’ (Matayo 24:24) Banakristo bananike tabakonzyi kuzyiba cakusinizya kuti bayootambula bulumbu kusikila Jehova wacisalazya kulimbabo kuti balasyomeka. Jehova nguupa cisinizyo camamanino, naa kubikka ciganto camamanino, kabatanafwa naa kwaakucaala buyo ciindi cisyoonto kuti ‘mapenzi mapati’ atalike.—Ciyubunuzyo 2:10; 7:3, 14.

4. Ikuti kacitakonzyeki kuzyiba mazina abaabo boonse bananikidwe anyika mazuba aano, ino mbuti mbotukonzya ‘kweenda’ abalo?

⁴ Ikuti kacitakonzyeki mazuba aano kuzyiba mazina abaabo boonse bananikidwe anyika, ino bambelele zimbi inga ‘beenda’ buti ambabo? Ibbaibbele lyaamba kuti “bantu bali kkumi” “bayoojatisya cikobela camu Juda, akwaamba kuti: ‘Tuyanda kuunka andinywe, nkaambo twamvwa kuti Leza ulaandinywe.’” Kapango aaka kamu Bbaibbele kaamba mu Juda omwe. Nokuba boobo majwi aakuti “andinywe” alimwi aakuti “ulaandinywe” aamba bantu banji. Eeci caamba kuti mu Juda tali buyo muntu omwe pele wiiminina nkamu yoonse yabananike. Ibambelele zimbi balikazyi kaambo aaka aboobo babelekela Jehova antoomwe ankamu eeyo. Tabayandiki kwaazyiba mazina abaabo boonse bali munkamu eeyi akumutobele umwi aumwi wambabo. Jesu ngo Musololi wesu, alimwi Bbaibbele litwaambila kuti tweelede kutobela buyo nguwe alikke.—Matayo 23:10.

5. Ino nkucenjezya nzi bananike nkobeelede kubikkila maano kapati alimwi nkaambo nzi?

⁵ Bananike beelede kukubikkila maano kapati kucenjezya kujanika mulugwalo lwa 1 Bakorinto 11:27-29. (Amubale.) Ino muunzila nzi munanike mbwanga walya cinkwa akunywa waini munzila “iiteelede” lya Ciibalusyo? Ikuti muntu katajisi cilongwe cibotu a Jehova alimwi akuti katasyomeki kulinguwe, nkokuti ciindi nalya  cinkwa akunywa waini, tatondezyi bulemu. (Bahebrayo 6:4-6; 10:26-29) Kucenjezya ooku kuyeezya bananike kuti beelede kuzumanana kusyomeka ikuti kabayanda kuyoopegwa ‘bulumbu bwakujulu mbwabaitila Leza kwiinda muli Kristo Jesu.’—Bafilipi 3:13-16.

6. Ino Banakristo bananike beelede kulibona buti?

⁶ Paulo wakaambila Banakristo bananike kuti: “Mebo ndemwaange mu Mwami, ndimulomba kuti kamweenda munzila yeendelana abwiite mbomwakaitilwa.” Ino inga bacita buti oobo? Paulo wakapandulula kuti: “Cakulicesya cakumaninina akubomba moyo, cakukkazika myoyo, akweengelelana caluyando. Kamusoleka camoyo woonse kuzumanana alukamantano lwamuuya mucaanzyo caluumuno.” (Baefeso 4:1-3) Muuya uusalala wa Jehova ugwasya babelesi bakwe kulicesya, kutali kulisumpula. (Bakolose 3:12) Aboobo bananike tabaliboni kuba kabotu kwiinda bamwi. Balizyi kuti Jehova tapi bananike muuya munji kwiinda mbwapa kubabelesi bakwe bambi. Alimwi tabalimvwi kuti inga bakamvwisya kapati kasimpe kamu Bbaibbele kwiinda bamwi. Alimwi tabakonzyi kwaambila muntu kuti awalo wakananikwa akuti weelede kutalika kulya cinkwa akunywa waini lya Ciibalusyo. Muciindi caboobo, balalicesya alimwi balizyi kuti Jehova alikke nguukonzya kutamba bantu kuunka kujulu.

7, 8. Ino Banakristo bananike ncinzi ncobatalangili alimwi nkaambo nzi?

⁷ Nokuba kuti bananike balizyi kuti ncoolwe cipati kutambwa kuunka kujulu, tabalangili kulanganizyigwa abamwi munzila yaalubazu. (Baefeso 1:18, 19; amubale Bafilipi 2:2, 3.) Alimwi balizyi kuti ciindi Jehova naakabananika, tanaakazyibya bantu boonse makani aaya. Aboobo munanike tacimugambyi ikuti naa bamwi tabasyomi mpoonya-mpoonya kuti wakananikwa. Aboobo ulazyiba kuti Bbaibbele litwaambila kuti tatweelede kufwambaana kumusyoma muntu iwaamba kuti Leza wamupa mukuli uulibedelede. (Ciyubunuzyo 2:2) Akaambo kakuti munanike talangili kuti bamwi bamubikkile maano, takonzyi kwaambila baabo mbabonana abalo ciindi cakusaanguna kuti ulinanikidwe. Alimwi buya ambweni inga takonzyi kwaambila muntu uuli woonse makani aaya. Alimwi tayeelede kulidunda kujatikizya zintu zibotu nzyayoocita kujulu.—1 Bakorinto 1:28, 29; amubale 1 Bakorinto 4:6-8.

⁸ Banakristo bananike tabalimvwi kuti beelede kuba buyo abananikenyina mbuli kuti bali mukabunga kamwi. Tabasoleki kujana bananikenyina kutegwa babandike makani aajatikizya kunanikwa kwabo alimwi tabaswaangani mutubunga kutegwa babale Bbaibbele. (Bagalatiya 1:15-17) Mbungano tazikonzyi kukamantana ikuti bananike bacita boobu. Inga banookazya muuya uusalala, walo uugwasya bantu ba Leza kuba aluumuno alimwi alukamantano.—Amubale Baroma 16:17, 18.

9. Nkaambo nzi ncomweelede kubikkila maano kuli mbomubalanganya aabo balya cinkwa akunywa waini a Ciibalusyo? (Amubone kabbokesi kakuti “ Luyando ‘Talujisi Cisapi.’”)

⁹ Ino mweelede kubabona buti bakwesu abacizyi bananike? Jesu wakaambila basikwiiya bakwe kuti: “Nywebo nyoonse muli  babunyina.” Wakazumanana akuti: “Kufwumbwa uulisumpula uyoocesyegwa alimwi kufwumbwa uulicesya uyoosumpulwa.” (Matayo 23:8-12) Aboobo tacili kabotu kuyandisya muntu, nokuba kuti mwanookwabo Kristo. Ciindi Bbaibbele nolyaamba kujatikizya baalu litukulwaizya kwiiya lusyomo lwabo, pele talitwaambili kuti tulakonzya kubona muntu uuli woonse kuba musololi wesu. (Bahebrayo 13:7) Masimpe kuti Bbaibbele lyaamba kuti bamwi “baleelela kupegwa bulemu kapati.” Ikaambo nkakuti “beendelezya kabotu” alimwi ‘babeleka canguzu mukukanana akuyiisya.’ (1 Timoteyo 5:17) Ikuti bananike twababikkila maano akubalumbaizya kapati, inga twabajazya nsoni. Ciinda kubija ncakuti, ambweni inga twapa kuti batalike kulisumpula. (Baroma 12:3) Kunyina umwi wandiswe uukonzya kuyanda kuti mwanookwabo Kristo umwi alubizye kapati munzila eeyi!—Luka 17:2.

10. Ino inga mwatondezya buti kuti mulabalemeka Banakristo bananike?

¹⁰ Mbuti mbotukonzya kutondezya kuti tulabalemeka aabo bananikidwe a Jehova? Tatukonzyi kubabuzya mbobakananikwa. Aaka nkaambo kabajatikizya balo, tatujisi nguzu zyakuyanda kuzyiba. (1 Batesalonika 4:11; 2 Batesalonika 3:11) Alimwi tatweelede kuyeeya kuti balumi babo naa bakaintu babo, bazyali, naa banamukwasyi bambi balinanikidwe abalo. Muntu tabi abulangizi oobu akaambo buyo kakuti umwi mumukwasyi ulinanikidwe. (1 Batesalonika 2:12) Alimwi tatweelede kubuzya mibuzyo iikonzya kubanyemya. Mucikozyanyo, inga tiitwabuzya mukaintu wamukwesu munanike mbwalimvwa kujatikizya kupona anyika aano kukabe kutamani kukunyina balumi. Ncotweelede kuzyiba ncakuti munyika mpya, Jehova ‘uyookkutya cilenge coonse cipona kwiinda mukucipa ncociyanda.’—Intembauzyo 145:16.

11. Ino tulikwabilila buti ikuti katutaciindizyi ‘kulumbaizya’ bube bwabantu?

¹¹ Ikuti katutababoni bananike kuba bantu bayandika kapati kwiinda bamwi, andiswe tulalikwabilila. Munzila nzi? Ibbaibbele litwaambila kuti kulakonzya kuba ‘bakwesu balicengeezya’ mumbungano ibakonzya kwaamba kuti balinanikidwe. (Bagalatiya 2:4, 5; 1 Johane 2:19) Alimwi bananike bamwi ambweni inga tiibazumanana kusyomeka. (Matayo 25:10-12; 2 Petro 2:20, 21) Pele ikuti katutaciindizyi ‘kulumbaizya bantu,’ tatukatobeli bantu, nobaba baabo bananikidwe naa bantu bazyibidwe kapati naa aabo ibabelekela Jehova kwaciindi cilamfwu. Mpoonya, ikuti naa baleka kusyomeka naa bazwa mumbungano, tatukaleki kusyoma Jehova naa kuleka kumubelekela.—Juda 16.

12, 13. Ino nkaambo nzi ncociteelede kutulibilisya kujatikizya mweelwe wabaabo balya cinkwa akunywa waini lya Ciibalusyo?

¹² Kwamyaka minji, mweelwe wabaabo ibakali kulya cinkwa akunywa waini lya Ciibalusyo wakazumanana kuyaansi. Pele mazuba aano, mweelwe ooyu ulayungizyika mwaka amwaka. Sena eeci ceelede kutulibilisya? Peepe. Atubone kaambo eeci ncociteelede kutulibilisya.

 ¹³ “Jehova ulibazyi aabo bazulilwa kulinguwe.” (2 Timoteyo 2:19) Kwiindana a Jehova, bakwesu ibabala mweelwe wabantu balya cinkwa akunywa waini lya Ciibalusyo tabazyi uunanikidwe ncobeni. Aboobo mweelwe ulabikkilizya abaabo ibayeeya kuti balinanikidwe pele tabananikidwe pe. Mucikozyanyo, bamwi ibakali kulya cinkwa akunywa waini mukuya kwaciindi bakazikuleka. Bamwi balinyongene mumizeezo aboobo basyoma kuti bayoolela a Kristo kujulu. Masimpe, tatuzyi mubwini mweelwe wabananike bacisyeede anyika.

14. Ino Bbaibbele lyaamba nzi kujatikizya mweelwe wabananike banoosyeede ciindi mapenzi mapati aakutalika?

¹⁴ Kuyooba bananike mumasena manji anyika ciindi Jesu aakuboola kubabweza kuya kujulu. Ibbaibbele lyaamba kuti Jesu “uyootuma bangelo bakwe akulila kupati kwamweembo, eelyo bayoobunganya basale bakwe antoomwe kuzwa kumyuwo yone, kuzwa kumagolelo amwi aajulu kusikila kulaambi.” (Matayo 24:31) Ibbaibbele alimwi lyaamba kuti kumazuba aamamanino, kuyooba mweelwe musyoonto wabananike bayoosyala anyika. (Ciyubunuzyo 12:17) Pele talyaambi naa bali bongaye banoosyeede ciindi mapenzi mapati aakutalika.

15, 16. Ino ncinzi ncotweelede kuzyiba kujatikizya ba 144,000 mbasala Jehova?

¹⁵ Jehova ulasala ciindi nayoobasala bananike. (Baroma 8:28-30) Jehova wakatalika kusala bananike Jesu naakabusyigwa. Kuboneka kuti mumwaanda wamyaka wakusaanguna, Banakristo bakasimpe boonse bakalinanikidwe. Kwamyaanda yamyaka  minji nowakainda mwaanda wamyaka wakusaanguna, bunji bwabaabo ibakali kulyaamba kuti Mbanakristo tiibakali kumutobela Kristo. Nokuba boobo, mumyaka eeyo, Jehova wakananika basyoonto ibakali Banakristo bakasimpe. Bakali mbuli wiiti njaakaamba Jesu kuti iyookomena akati kansaku. (Matayo 13:24-30) Kumazuba aakumamanino, Jehova wazumanana kusala bantu bambi kuti bakabe cibeela caba 144,000. ^[2] (Amubone bupanduluzi buyungizyidwe.) Aboobo ikuti naa Leza wabasala aaba ciindi buyo cisyoonto kaatanasika mamanino, atusyome kuti ucita ciluzi. (Isaya 45:9; Daniele 4:35; amubale Baroma 9:11, 16.) ^[3] (Amubone bupanduluzi buyungizyidwe.) Tweelede kucenjela kutegwa tutabi mbuli babelesi ibakatongooka kujatikizya simalelo wabo mbwaakalanganya baabo ibakatalika mulimo muciindi camamanino.—Amubale Matayo 20:8-15.

¹⁶ Tabali boonse ibajisi bulangizi bwakujulu ibali cibeela “camuzike uusyomeka alimwi uucenjede.” (Matayo 24:45-47) Mbubwenya mbuli mumwaanda wamyaka wakusaanguna, Jehova a Jesu mazuba aano babelesya buyo bantu basyoonto kusanina, naa kuyiisya bantu banji. Balikke bananike basyoonto mumwaanda wamyaka wakusaanguna mbabakabelesyegwa kulemba Magwalo aa Banakristo aa Chigiriki. Alimwi mazuba aano, balikke Banakristo bananike basyoonto mbabajisi mukuli wakupa bantu ba Leza “cakulya cabo aciindi ceelede.”

17. Ino mwaiya nzi mucibalo eeci?

¹⁷ Ino twaiya nzi mucibalo eeci? Jehova wasala kupa buumi butamani kubantu banji anyika alimwi akuli baabo ibayoolela a Jesu kujulu. Jehova ulabalongezya babelesi bakwe boonse, “mu Juda” ‘abantu bali kkumi,’ alimwi uyanda kuti kabatobela milawo iikozyenye alimwi akuti bazumanane kusyomeka. Boonse beelede kuzumanana kulicesya. Boonse beelede kumubelekela antoomwe alimwi akukamantana. Alimwi boonse beelede kuleta luumuno mumbungano. Mbotuyaabuswena kumamanino, atuzumanane kubelekela Jehova akumutobela Kristo katuli butanga bomwe.