1, 2. Ino ncinzi cinookamantanya kapati mu 2018, alimwi ino nkaambo nzi? (Amubone cifwanikiso icili kumatalikilo aacibalo.)

MU March 31, 2018, zuba lyanoyaabubbila, bantu ba Leza alimwi abajisi luyandisisyo banji bayoobungana ku Mulalilo wa Mwami uucitwa ciindi comwe amwaka. Izuba lyaakubbila, bantu banji bayooswaangana kutegwa bacite Ciibalusyo calufwu lwa Kristo. Mwaka amwaka, Ciibalusyo cilapa lukamantano lugambya kapati munyika!

² Tulakonzya kweezyeezya kubona mbuli Jehova alimwi a Jesu mbobakkomana ciindi nobabona bantu banji ibali munyika woola awoola kabajanika kucintu eeci cilibedelede kusikila mane buzuba oobu bwamana. Bbaibbele lyakasinsima kuti “nkamu mpati yabantu batakonzyi kubalwa amuntu uuli woonse, ibazwa muzisi zyoonse, mumisyobo yoonse, mumikowa yoonse alimwi amumilaka yoonse” bayakoongolola kuti: “Lufwutuko lwesu luzwa kuli Leza wesu, ooyo uukkede acuuno cabwami alimwi aku Mwanaambelele.” (Ciy. 7:9, 10) Eelo kaka cilakkomanisya kuti Jehova alimwi a Jesu balalemekwa munzila eeyi kwiinda mu Ciibalusyo cicitwa ciindi comwe amwaka!

3. Ino cibalo eeci cilaingula mibuzyo nzi?

 ³ Kuli mibuzyo imwi iibuzyigwa iitiingulwe mucibalo eeci. (1) Ino mbuti umwi aumwi wesu mbwakonzya kulibambila Ciibalusyo alimwi akugwasyigwa kwiinda mukujanika ku Ciibalusyo? (2) Ino muunzila nzi Ciibalusyo mbocilujatikizya lukamantano lwabantu ba Leza? (3) Ino mbuti umwi aumwi wesu mbwakonzya kusumpula lukamantano oolo? (4) Sena kuli nokuya kuba Ciibalusyo camamanino? Ikuti kacili boobo, ino ndilili?

4. Ino nkaambo nzi ncociyandika kulindiswe kujanika ku Ciibalusyo ikuti kacikonzyeka?

⁴ Amuyeeye kujatikizya mbociyandika kujanika ku Ciibalusyo. Mutalubi kuti miswaangano yambungano ncibeela cabukombi bwesu. Cakutadooneka, Jehova alimwi a Jesu balibazyi aabo ibasolekesya kutegwa bajanike kumuswaangano ooyu uuyandika kapati mumwaka. Cakutainda mumbali tuyanda kuti babone kuti ccita kuti kwabula mbocicitwa, ndendilyo notutakonzyi kujanika ku Ciibalusyo. Ciindi notutondezya kwiinda mumilimo yesu kuti miswaangano yabukombi ilayandika kulindiswe, tupa Jehova kaambo akambi kakuti zina lyesu lizumanane kuba ‘mubbuku lyakwiibalusya’—“bbuku lyabuumi”—oomo mazina aabaabo ibajisi coolwe cakuyoojana buumi butamani mwaalembedwe.—Malk. 3:16; Ciy. 20:15.

5. Mumazuba kacitanacitika Ciibalusyo, ino mbuti mbotukonzya ‘kulisunka kutegwa tubone naa tuli mulusyomo’?

⁵ Mumazuba nobuyaabuswena buzuba bwa Ciibalusyo, tulakonzya kubikka ciindi ambali cakupaila alimwi akulanga-langa cilongwe cesu a Jehova cakusitikila. (Amubale 2 Bakorinto 13:5.) Ino mbuti mbotukonzya kucita oobo? Nkwiinda ‘mukulisunka kutegwa tubone naa tuli mulusyomo.’ Kutegwa tucite oobo, inga twacita kabotu kulibuzya mibuzyo eeyi: ‘Sena ndilasyoma ncobeni kuti ndili akati kambunga ilikke eeyo Jehova njazumizyide kuti kaicita kuyanda kwakwe? Sena ndilacita kufwumbwa mbondikonzya kutegwa kandikambauka alimwi akuyiisya makani mabotu aa Bwami? Sena milimo yangu ilatondezya kuti masimpe ndilasyoma kuti aaya mazuba ngamamanino alimwi akuti bweendelezi bwa Saatani buli afwaafwi kumana? Sena lusyomo ndondijisi lino kuli Jehova alimwi a Jesu ndondulo ndondakajisi ciindi nondakaaba buumi bwangu kuli Jehova Leza?’ (Mt. 24:14; 2Tim. 3:1; Heb. 3:14) Kulanga-langa bwiinguzi kumibuzyo iili boobu kuyootugwasya kuzumanana kulilingula kutegwa tuzyibe bwini mbotubede.

6. (a) Ino ninzila nzi ilikke iisololela kubuumi? (b) Ino mbuti mwaalu umwi mbwalibambila Ciibalusyo mwaka amwaka, alimwi mbuti mbomukonzya kucita munzila iikozyenye?

⁶ Amubale akuzinzibala kuyeeya mabbuku aajisi Magwalo aabandika mbociyandika Ciibalusyo. (Amubale Johane 3:16; 17:3.) Nzila ilikke iisololela kubuumi butamani ibikkilizya “kuzyiba” Jehova ‘akusyoma’ Jesu, Mwanaakwe simuzyalwaalikke. Kutegwa mulibambile Ciibalusyo, mulakonzya kusala zibeela zyakwiiya iziyoomugwasya kuswena kuli Jehova alimwi a Jesu. Amubone mwaalu umwi iwabeleka kwamyaka minji ncacita. Kwamyaka yainda, wali kuzibikka antoomwe zibalo zyamu Ngazi Yamulindizi izibandika kapati Ciibalusyo alimwi aluyando Jehova a Jesu ndobakatondezya kulindiswe. Nsondo zili mbozibede kacitanacitika Ciibalusyo, ulazibala alimwi zibalo eezyi akuzinzibala kuyeeya kujatikizya mbociyandika kapati Ciibalusyo. Zimwi ziindi, ulayungizya cibalo comwe naa zyobilo zipya kuzibalo nzyajisi kale. Mwaalu ooyu wajana kuti kwiinda mukuziinduluka kuzibala zibalo eezyi alimwi akwiinda mukubala akuzinzibala kuyeeya tupango ituli mukubala kwa Bbaibbele lya Ciibalusyo, ulaiya zintu zipya mwaka amwaka. Alimwi iciinda kubota ncakuti, ulimvwa kuti luyando ndwajisi kuli Jehova a Jesu lulazumanana kukomena mwaka amwaka. Ikwiiya munzila iili boobu kulakonzya kumugwasya kuyungizya luyando lwanu alimwi akulumba nkomujisi kuli Jehova a Jesu  mpoonya cilakonzya kumugwasya kuti mujane mpindu kapati ku Ciibalusyo.

7. (a) Ino ncinzi Jesu ncaakapailila mubusiku bwa Mulalilo wa Mwami wakusaanguna? (b) Ino ncinzi citondezya kuti Jehova wawiingula mupailo wa Jesu?

⁷ Mubusiku bwa Mulalilo wa Mwami wakusaanguna, Jesu wakapaila kuti basikumutobela boonse bakali kuyookamantana akuti bakali kuyookkomana alukamantano walo alimwi a Bausyi ndobakajisi. (Amubale Johane 17:20, 21.) Masimpe Jehova wawiingula mupailo ooyo wa Mwanaakwe uuyandwa, alimwi lino bantu banji balasyoma kuti Jehova wakatuma Mwanaakwe. Mbubwenya mbuli miswaangano iimbi yabantu ba Leza, Ciibalusyo cilapa bumboni butakazyiki bwakuti Bakamboni ba Jehova balikamantene. Bantu bamuzisi zinji alimwi amubala balabungana antoomwe mumasena aakuswaanganina nyika yoonse. Mumasena amwi, kubungana kwabantu bamibala iindene-indene eeyi amuswaangano wabukombi ncintu citalangilwi kucitika naa cilasampaulwa abantu bamwi. Pele lukamantano iluli boobo ndubotu kapati mumeso aa Jehova alimwi a Jesu!

8. Ino mulumbe nzi Jehova ngwaakapa Ezekieli kujatikizya lukamantano?

⁸ Mbuli bantu ba Jehova, tatugambwi akaambo kalukamantano ndotukkomanina. Mubwini, Jehova, wakaambila limwi oobo. Amulange-lange mulumbe ngwaakapa musinsimi Ezekieli kujatikizya kuswaangana antoomwe kwatusamu tobilo, kasamu ‘ka Juda’ alimwi akasamu ‘ka Josefa.’ (Amubale Ezekieli 37:15-17.) Cibalo ca “Mibuzyo Yabasikubala” icakamwaigwa mu Ngazi Yamulindizi yamu July 2016 cakaamba kuti: “Jehova wakapa Ezekieli mulumbe uupa bulangizi wakukamantanya cisi ca Israyeli ciindi nocakapilusyigwa ku Nyika Yakasyomezyedwe. Mulumbe ooyo alimwi waambilizya kukamantanya kwabantu ba Leza ikwakatalika kucitika mumazuba aamamanino.”

9. Muunzila nzi kuzuzikizyigwa kwabusinsimi bwa Ezekieli mbokulibonya mwaka amwaka ku Ciibalusyo?

⁹ Kuzwa mumwaka wa 1919 kuyakumbele, Jehova cakusaanguna wakabambulula alimwi akukamantanya bananike asyoonto-syoonto, balo munzila yacikozyanyo ibakali mbuli kasamu ‘ka Juda’. Mpoonya, ciindi aabo ibajisi bulangizi bwakupona anyika —munzila yacikozyanyo ibali mbuli kasamu ‘ka Josefa’ nobakali kuyaabuvwula akusangana bananike, nkamu zyobilo zyakaba “tanga lyomwe.” (Joh. 10:16; Zek. 8:23) Jehova wakasyomezya kuswaanganya tusamu ootu tobilo akupa kuti tube kasamu komwe mujanza lyakwe. (Ezk. 37:19) Lino nkamu zyobilo zilabeleka calukamantano kwiinda mukusololelwa a Mwami omwe—Jesu Kristo uulemekwa, walo mubusinsimi iwaambwa kuba ‘mubelesi wa Leza Davida.’ (Ezk. 37:24, 25) Lukamantano lutaliboteli ilwaambidwe mubbuku lya Ezekieli lulalibonya cantangalala mwaka amwaka ciindi bananike basyeede alimwi ‘abambelele zimbi’ nobabungana kutegwa bacite Ciibalusyo calufwu lwa Kristo! Aboobo, ino ncinzi ncotukonzya kucita umwi aumwi wesu kutegwa tuzumanane kusumpula lukamantano oolu?

10. Ino mbuti mbotukonzya kusumpula lukamantano akati kabantu ba Leza?

¹⁰ Nzila yakusaanguna mbotukonzya kusumpula lukamantano lwabantu ba Leza nkwiinda mukulicesya. Ciindi naakali anyika, Jesu wakalailila basikwiiya bakwe kuti kabalicesya. (Mt. 23:12) Ikuti katulicesya, tatukajatikizyigwi amuuya wanyika wakulisumpula. Muciindi caboobo, kulicesya kwesu kuyootugwasya kulibombya kuli baabo beendelezya, alimwi muuya wakumvwida uuli boobu ulayandika kutegwa kube lukamantano mumbungano. Kwiinda zyoonse, kulicesya kwesu kuyoomukkomanisya Leza, nkaambo walo “ulabakazya ibalisumpula, pele ulabafwida luzyalo aabo ibalicesya.”—1Pet. 5:5.

11. Ino mbuti kuzinzibala kuyeeya ncoziiminina zitondezyo zya Ciibalusyo mbokutugwasya kusumpula lukamantano?

 ¹¹ Nzila yabili mbotukonzya kusumpula lukamantano nkwiinda mukuzinzibala kuyeeya ncoziiminina zitondezyo izibelesyegwa lya Ciibalusyo. Kabutanasika buzuba bwaalubazu oobo—ikapati mangolezya aayo nocicitwa—amuyeeyesye kapati mukamu uutajisi bumena alimwi awaini uusalala ncozipandulula. (1Kor. 11:23-25) Mukamu wiiminina mubili wa Jesu iwatakajisi cibi iwakatuulwa kacili cipaizyo, alimwi waini wiiminina bulowa bwakwe ibwakatilwa. Pele tatweelede kuba abusongo buyo bwakumvwisya kujatikizya ncoziiminina zitondezyo eezyo. Amuyeeye kuti cipaizyo cacinunuzyo ca Kristo cakali kujatikizya nzila zipati zyobilo luyando mbolwakatondezyegwa, nkokuti luyando oolo Jehova ndwaakatondezya kwiinda mukupa Mwanaakwe kuti azootufwide alimwi aluyando oolo Jesu ndwaakatondezya kwiinda mukulisungula kwaaba buumi bwakwe akaambo kandiswe. Kuzinzibala kuyeeya luyando ndobakatondezya kweelede kutupa kuti andiswe tubayande. Alimwi luyando ndotujisi kuli Jehova swebo abakombima luli mbuli ntambo iitwaangilila antoomwe alimwi akuyumya lukamantano lwesu.

12. Mucikozyanyo cakwe camwami iwakali kulingula zikwelete, mbuti Jesu mbwaakacisalazya kuti Jehova ulangila kuti katulekelela?

¹² Nzila yatatu mbotukonzya kusumpula lukamantano nkwiinda mukulekelela bamwi camoyo woonse. Ciindi notubalekelela aabo ibatulubizyila, tutondezya kuti tulalumba kulekelelwa kwazibi zyesu zitugeme kwalo ikukonzyeka akaambo kacipaizyo cacinunuzyo ca Kristo. Amulange-lange cikozyanyo ca Jesu cimwi icilembedwe mulugwalo lwa Matayo 18:23-34. Amulibuzye kuti: ‘Sena ndilakulwaizyigwa kutobela ncaakayiisya Jesu? Sena ndilatondezya kukkazika moyo alimwi akubamvwisya babelesima? Sena ndililibambide kubalekelela aabo ibandibisizya kundigama?’ Masimpe kuti zibi ziliindene, alimwi nciyumu kapati kubantu batalondokede kulekelela zibi zimwi. Nokuba boobo, cikozyanyo eeci cituyiisya ncalangila Jehova kuti tucite. (Amubale Matayo 18:35.) Jesu ulacisalazya kuti Jehova takatulekeleli ikuti katutabalekeleli bakwesu ciindi nokuli kaambo ikamvwika ikeelede kutupa kucita boobo. Eelo kaka aaka nkaambo kapati nkotweelede kubikkila maano! Tulazumanana kulukwabilila lukamantano lwesu lutaliboteli ciindi notubalekelela bamwi mbubwenya Jesu mbwaakatuyiisya kuti katucita.

13. Ino mbuti kulitondezya kuti tuli basikubamba luumuno mbokusumpula lukamantano?

 ¹³ Ciindi notubalekelela bamwi, tutondezya kuti tuli basikubamba luumuno. Amuyeeye lulayo lwamwaapostolo Paulo lwakuti tweelede ‘kusoleka camoyo woonse kuzumanana alukamantano lwamuuya mucaanzyo caluumuno.’ (Ef. 4:3) Mumyezi ya Ciibalusyo alimwi kapati mubusiku bwa Ciibalusyo, amuyeeyesye kapati kujatikizya mbomubeendelezya bamwi. Amulibuzye kuti: ‘Sena ndilatondezya caantangalala kuti ndili muntu uutabikkilili? Sena bantu balakonzya kubona kuti ndilasolekesya kubamba luumuno alimwi akusumpula lukamantano?’ Eeyi mibuzyo iiyandika kapati njotweelede kulanga-langa aciindi cino camwaka.

14. Ino mbuti mbotukonzya kutondezya kuti ‘tuleengelelana caluyando’?

¹⁴ Nzila yane mbotukonzya kusumpula lukamantano nkwiinda mukutondezya luyando ikwiiya Jehova, Leza siluyando. (1Joh. 4:8) Tutabi notwaamba kujatikizya basyomima kuti, “Ndileelede kubayanda, pele tandeelede kubakkomanina buya pe”! Kuyeeya kuli boobo takweendelani alulayo lwa Paulo lwakuti tweelede “kweengelelana caluyando.” (Ef. 4:2) Amubone kuti tanaakaamba buyo kuti tweelede “kweengelelana.” Pele wakayungizya kuti tweelede kucita boobo “caluyando.” Twaambo ootu tuliindene. Mumbungano zyesu kulajanika bantu baindene-indene aabo Jehova mbaakakwela kulinguwe. (Joh. 6:44) Mbwaanga Jehova wakabakwela kulinguwe, weelede kuti ubabona kuti mbantu ibeelela kuyandwa. Aboobo ino mbuti swebo mbotukonzya kubeteka musyomima akumubona kuti teeleli kuti swebo tumuyande? Tweelede kubikkila maano kubayanda mbubonya Jehova mbwayanda kuti tucite!—1Joh. 4:20, 21.

15. Ino tuzyi buti kuti kunooli Ciibalusyo camamanino?

¹⁵ Bumwi buzuba Ciibalusyo ciyoocitwa ciindi camamanino. Ino tuzyi buti oobo? Mulugwalo lwakwe lwakusaanguna ndwaakasololelwa amuuya kulembela bana Korinto, Paulo wakalembela Banakristo bananike kuti kwiinda mukwiibaluka lufwu lwa Jesu mwaka amwaka, ‘balazumanana kwaambilizya lufwu lwa Mwami, kusikila akaboole.’ (1Kor. 11:26) Aawa ibbala lyakuti “akaboole” lyaamba cintu comwe ‘akuboola’ Jesu nkwaakaamba mubusinsimi bwakwe kujatikizya ciindi cakumamanino. Kujatikizya mapenzi mapati ngotulangila kumbele ino-ino, wakaamba kuti: “Citondezyo ca Mwanaamuntu ciyoolibonya kujulu, eelyo bantu bamisyobo yoonse anyika bayoolyuuma acamba akulila, alimwi bayoobona Mwanaamuntu kaboola mumakumbi aakujulu kajisi nguzu abulemu bupati. Alimwi [Jesu] uyootuma bangelo bakwe akulila kupati kwamweembo, eelyo bayoobunganya basale bakwe antoomwe kuzwa kumyuwo yone, kuzwa kumagolelo amwi aajulu kusikila kulaambi.” (Mt. 24:29-31) Ooku ‘kubunganya basale’ caamba ciindi Banakristo bananike boonse ibanoocili anyika nobayootambula bulumbu bwabo bwakujulu. Eeci ciyoocitika caakwiinda cibeela cakusaanguna camapenzi mapati pele nkondo ya Armagedoni kaitanacitika. Mpoonya iba 144,000 boonse bayootola lubazu antoomwe a Jesu mukuzunda bami bamunyika. (Ciy. 17:12-14) Ciibalusyo camamanino iciyoocitwa kakutanacitika kubunganya kwabananike kujulu cinooli camamanino, nkaambo Jesu unooli ‘waboola’ kale.

16. Ino nkaambo nzi ncomukanzide kuyoojanika ku Ciibalusyo camwaka uuno?

¹⁶ Atube amakanze aakugwasyigwa kwiinda mukujanika ku Ciibalusyo mu March 31, 2018. Alimwi atumulombe Jehova kutegwa atugwasye kuzumanana kusumpula lukamantano akati kabantu bakwe! (Amubale Intembauzyo 133:1.) Amuyeeye kuti, bumwi buzuba Ciibalusyo ncotuyoocita cinooli camamanino. Aboobo kwalino, atucite kufwumbwa mbotukonzya ikujanika, alimwi atulubone kuba cintu ciyandika kapati lukamantano lukondelezya lutondezyegwa lya Ciibalusyo.