MULI Bwatatu mafwumofwumo, mu January 24, 2018, bamukwasyi wa Beteli baku United States alimwi abaku Canada bakakkomana kumvwa cakwaambilizya caalubazu cakuti: Mukwesu Kenneth Cook, Jr., wakatalika kubeleka kali umwi wamu Kabunga Keendelezya.

Mukwesu Cook wakazyalwa akukomenena ku Pennsylvania, U.S.A. Wakaiya kasimpe kuli sicikolonyina kali afwaafwi kumanizya lwiiyo lwakwe lwaku sekondali alimwi wakabbapatizyigwa mu June 7, 1980. Wakatalika bupainiya bwaciindi coonse mu September 1, 1982. Naakabeleka mulimo wabupainiya kwamyaka yobilo, wakatambwa kuyoobelekela ku Beteli, wakatalika mulimo wakwe waa Beteli ku Wallkill, New York, mu October 12, 1984.

Kwamyaka iili 25 yakatobela, Mukwesu Cook wakabeleka milimo iindene-indene mu Dipatimenti Yakusimba Mabbuku alimwi adipatimenti iitegwa Bethel Office (ofesi iilanganya nzyobayandika bamukwasyi wa Beteli.) Wakakwata ba Jamie, mu 1996, alimwi bakamusangana mumulimo waa Beteli ku Wallkill. Mu December 2009, Mukwesu alimwi a Mucizyi Cook bakatumwa kuyoobelekela ku Watchtower Educational Center ku Patterson, New York, kwalo Mukwesu Cook nkwaakali kubelekela mu Dipatimenti Iilanganya Mibuzyo Njobabuzya Bantu. Mu April 2016, nobakapiluka kwaciindi cisyoonto ku Wallkill, Mukwesu alimwi a Mucizyi Cook bakatumwa kuyoobelekela ku Brooklyn, New York. Nokwakainda myezi yosanwe, bakalongela kumaofesi mapati ku Warwick, New York. Mu January 2017, Mukwesu Cook wakasalwa kubeleka kali mugwasilizyi wa Kkomiti Iilanganya Ziyiisyigwa iya Kabunga Keendelezya.