1-2. Mapenzi nzi ngobajana babelesi ba Jehova banji, alimwi ino abajatikizya buti?

AMUYEEYE kujatikizya bukkale oobu botatwe: Mukwesu uucili mwana-mwana wajanwa abulwazi bupati. Mukwesu uucili aanguzu alimwi uubeleka canguzu watandwa mulimo alimwi nokuba kuti wasolekesya kapati kuyandaula mulimo uumbi kunyina naaujana. Mucizyi uucembeede uusyomeka tacibeleki mbuli mbwaakali kubeleka musyule mumulimo wa Jehova.

² Ikuti naa andinywe muli mubukkale oobu, ambweni mulakonzya kulimvwa kuti tamuciyandiki. Bukkale oobu bulakonzya kumumanina lukkomano, kumupa kulimvwa kuti munyina mpindu, alimwi akumupa kutaanguluka kuba azilongwe abamwi.

3. Ino Saatani alimwi abaabo ibayungwa anguwe babubona buti buumi bwabantu?

³ Nyika eeyi itondezya mbwabubona buumi bwabantu Saatani. Lyoonse ubona mbuli kuti bantu banyina mpindu. Nokuba kuti Saatani wakalizyi kabotu-kabotu kuti kutamvwida Leza kwakali kuyoosololela kulufwu, calunya wakaambila Eva kuti wakali kuyooba alwaanguluko ikuti wasala kutamvwida Leza. Saatani ngonguwe weendelezya makwebo, mapolitikisi alimwi abukombi bwamunyika eeyi. Aboobo tacigambyi kuti basimakwebo banji, basimapolitikisi alimwi abasololi babukombi batondezya muuya ngwajisi wakutalemeka buumi bwabantu.

4. Ncinzi ncotutiibandike mucibalo eeci?

⁴ Nokuba boobo, mukwiimpana a Saatani, Jehova uyanda kuti tuzyibe kuti tulayandika kapati, alimwi ulatugwasya ciindi notulijana  mubukkale ibukonzya kutupa kulimvwa kubula mpindu. (Int. 136:23; Rom. 12:3) Cibalo eeci cilabandika kujatikizya mbwatugwasya Jehova mubukkale oobu butobela: (1) ciindi notuciswa, (2) ciindi notujisi buyumu-yumu bwakujana mali aayandika, alimwi (3) ciindi kucembaala nokutupa kulimvwa kuti kunyina ncotukonzya kucita mumulimo wa Jehova. Aboobo cakusaanguna, atubone kaambo ncotukonzya kuba alusyomo lwakuti umwi aumwi wesu ulayandika kapati kuli Jehova.

5. Ncinzi cimupa kusinizya kuti bantu balayandika kapati kuli Jehova?

⁵ Nokuba kuti twakabumbwa kuzwa kubulongo, tulayandika kapati kwiinda bulongo. (Matl. 2:7) Amubone twaambo tumwi itutondezya kuti tulayandika kapati kuli Jehova. Wakalenga bantu munzila yakuti kabacikonzya kwiiya bube bwakwe. (Matl. 1:27) Kwiinda mukucita boobo, utupa kuti katwiindene kapati azilenge zyoonse izili anyika alimwi watupa mukuli wakulanganya nyika abanyama.—Int. 8:4-8.

6. Mbumboni nzi bumbi ibutupa kusyoma kuti Jehova ulababikkila maano bantu batalondokede?

⁶ Noliba leelyo Adamu naakabisya, Jehova wakazumanana kubabikkila maano bantu. Leza ulatuyanda kapati cakuti wakatupa Mwanaakwe ngwayandisya, Jesu, kali cinunuzyo cazibi zyesu. (1Joh. 4:9, 10) Kwiinda mukubelesya mpindu yacinunuzyo, Jehova uyoobabusya aabo ibakafwa akaambo kacibi ca Adamu, nkokuti “baluleme abataluleme.” (Mil. 24:15) Ijwi lyakwe litondezya kuti tulayandika kapati kulinguwe, tacikwe makani tulaciswa, tujisi penzi lyamali naa ambweni tulicembeede.—Mil. 10:34, 35.

7. Ntwaambo nzi atumbi itupa babelesi ba Leza kusyoma kuti Jehova ulababikkila maano?

⁷ Tulijisi twaambo atumbi itutupa kusyoma kuti tulayandika kapati kuli Jehova. Wakatukwela kulinguwe alimwi akubona mbotwakaatambula makani mabotu. (Joh. 6:44) Mbotwakatalikila buyo kuswena kulinguwe, awalo wakaswena kulindiswe. (Jak. 4:8) Jehova ulabelesya ciindi cinji alimwi anguzu kutuyiisya, kutondezya kuti tulayandika kapati kulinguwe. Ulizyi mbotubede lino alimwi ambotukonzya kuba. Kuyungizya waawo, ulatupa lulayo akaambo kakuti ulatuyanda. (Tus. 3:11, 12) Eelo kaka oobu mbumboni bukkwene ibwakuti Jehova ulatubikkila maano kapati!

8. Mbuti majwi aali kulugwalo lwa Intembauzyo 18:27-29 mbwaakujatikizya kuyeeya kwesu kumapenzi ngotujisi?

⁸ Bamwi bakali kubona Mwami Davida kuti unyina mpindu, pele walo wakalizyi kuti Jehova ulamuyanda alimwi akuti uli kulubazu lwakwe. Eeci cakamugwasya Davida kubulanga munzila yeelede bukkale bwakwe. (2Sam. 16:5-7) Ciindi notutyompedwe naa notuli mubukkale bukatazya, Jehova ulakonzya kutugwasya kuzilanga munzila yeelede zintu alimwi akutugwasya kuzunda penzi lili lyoonse. (Amubale Intembauzyo 18:27-29.) Ciindi notugwasyigwa a Jehova, kunyina cikonzya kutulesya kumubelekela calukkomano. (Rom. 8:31) Lino atubulange-lange bukkale obuya botatwe bugaminide mwalo motuyandika kubona kuti Jehova ulatuyanda alimwi ulatubikkila maano.

9. Mbuti kuciswa mbokukujatikizya mbotulibona?

⁹ Kuciswa kulakonzya kwiijatikizya mizeezo yesu alimwi akutupa kulimvwa mbuli kuti tatucijisi mpindu kumuntu uuli woonse. Tulakonzya kufwa nsoni ciindi bamwi nobabona kuti kuli cilubide kulindiswe. Nokuba kuti bamwi inga kabatazyi kuti tulaciswa, tulakonzya kufwa nsoni akaambo kakuti tatucicikonzyi kucita zintu zimwi nzyotwakali kucita. Muziindi eezyo zikatazya, Jehova ulatuyumya-yumya. Munzila nzi?

10. Kweelana alugwalo lwa Tusimpi 12:25, ncinzi cikonzya kutugwasya ciindi notuciswa?

 ¹⁰ Ciindi notuciswa, ‘Ijwi libotu’ lilakonzya kutuyumya-yumya. (Amubale Tusimpi 12:25.) Kwiinda mu Bbaibbele, Jehova ulatwaambila zintu zinji zibotu izituyeezya kuti tulayandika kapati kulinguwe nokuba kuti tulaciswa. (Int. 31:19; 41:3) Ikuti twaabala cakwiinduluka-induluka majwi aaya aakasololelwa amuuya, Jehova uyootugwasya kulwana kuyeeya kutaluzi ikuboola akaambo kakuciswa.

11. Mbuti mukwesu umwi mbwaakagwasyigwa a Jehova?

¹¹ Amubone cikozyanyo caba Jorge. Nobakacili bana, bakaciswa bulwazi ibwakabapa kulimvwa kubula mpindu. Bakaamba kuti, “Tiindakazyi kuti bulwazi bwangu bwakali kuyoondipa kulimvwa boobu naa kufwa nsoni akaambo kakuti bwakali kupa kuti bantu kabandilanga kapati. Bulwazi bwangu bwakakomena alimwi ndakali kuyeeya kujatikizya buumi bwangu mbobwakali kunoocinca. Ndakatyompwa kapati, aboobo ndakakombelezya Jehova kuti andigwasye.” Ino Jehova wakabagwasya buti? Bakaamba kuti, “Ndakajisi penzi lyakutacikonzya kubikkila maano kuzintu nzyondakali kubala akaambo kakuyeeya kapati kujatikizya bulwazi bwangu, aboobo ndakakulwaizyigwa kubala buyo zibalo zifwaafwi mubbuku lya Intembauzyo, izitondezya kuti Jehova ulababikkila maano babelesi bakwe. Ndakali kwaabala cakwiinduluka-induluka magwalo aayo masyoonto abuzuba, alimwi ndakaabona kuti alaumbulizya. Mukuya kwaciindi, bantu bakatalika kubona kuti ndakalikkomene. Mane buya bakaamba kuti lukkomano lwangu lwakabakulwaizya. Ndakabona kuti Jehova wakayiingula mipailo yangu! Wakandigwasya kucinca mbondakali kulibona. Aboobo ndakatalika kubikkila maano kuli ncolyaamba Jwi lyakwe kujatikizya mbwandibona nokuba kuti ndilaciswa.”

12. Ikuti kamuciswa, ino inga mwacita buti kutegwa Jehova amugwasye?

 ¹² Ikuti naa mulaciswa, amusyome kuti Jehova ulibuzyi bukkale bwanu. Amumulombe kutegwa amugwasye kubulanga munzila yeelede bukkale bwanu. Mpoonya amubale mulumbe wamu Bbaibbele uumbulizya. Amubikkile maano kuzibalo izitondezya Jehova mbwababikkila maano babelesi bakwe. Nomucita boobo, muyoobona kuti Jehova ulababikkila maano aabo boonse ibamubelekela cakusyomeka.—Int. 84:11.

13. Mbuti silutwe wamukwasyi mbwakonzya kulimvwa ikuti naa watandwa mulimo?

¹³ Silutwe wamukwasyi uuli woonse ulayanda kubajanina nzyobayandika bamukwasyi wakwe. Amweezyeezye kuti, kakunyina ncaalubizya, watandwa mulimo. Nokuba kuti wasolekesya kuyandaula mulimo uumbi, kunyina naaujana. Kuba mubukkale oobu, inga kwamupa kulimvwa kubula mpindu. Ino mbuti kubikkila maano kuzisyomezyo zya Jehova mbokukonzya kumugwasya?

14. Ino ntwaambo nzi itupa kuti Jehova kazuzikizya zisyomezyo zyakwe?

¹⁴ Jehova lyoonse ulazuzikizya zisyomezyo zyakwe. (Jos. 21:45; 23:14) Ulacita oobo akaambo katwaambo tunji. Kaambo kamwi nkakuti izina lyakwe libotu naa mpuwo, ilajatikizyigwa. Jehova wakasyomezya kuti unoobalanganya babelesi bakwe basyomeka alimwi ulakkomana kucizuzikizya cisyomezyo eeci. (Int. 31:1-3) Kuyungizya waawo, Jehova ulizyi kuti swebo, mbwaanga tuli cibeela camukwasyi wakwe, tulakonzya kuusa alimwi akutyompwa ikuti katatulanganyi. Wakasyomezya kuti unootupa zintu nzyotuyandika kumubili akumuuya alimwi kunyina icikonzya kumulesya kuzuzikizya cisyomezyo eeco!—Mt. 6:30-33; 24:45.

15. (a) Mbuyumuyumu nzi mbobakajana Banakristo bamumwaanda wamyaka wakusaanguna? (b) Ino lugwalo lwa Intembauzyo 37:18, 19 lutupa kuba alusyomo nzi?

 ¹⁵ Ciindi notuyeeya twaambo itumupa kuzuzikizya zisyomezyo zyakwe Jehova, tulakonzya kuba alusyomo lwakuti uyootugwasya ciindi notujisi penzi lyakujana mali aayandika. Amubone cikozyanyo ca Banakristo bamumwaanda wamyaka wakusaanguna. Ciindi mbungano iyakali mu Jerusalemu noyakatalika kupenzyegwa kapati, ‘basikwiiya boonse bakamwaika, kwakasyaala buyo baapostolo.’ (Mil. 8:1) Amuyeeya buyo icakacitika akaambo kaceeci. Bukkale bwakayuma! Kweelede kuti Banakristo bakasweekelwa maanda aabo alimwi amakwebo. Nokuba boobo, Jehova kunyina naakabalekelezya; alimwi lukkomano lwabo kunyina nolwakamana. (Mil. 8:4; Heb. 13:5, 6; Jak. 1:2, 3) Jehova wakabagwasya Banakristo aaba basyomeka, andiswe uyootugwasya.—Amubale Intembauzyo 37:18, 19.

16. Ncinzi cikonzya kutupa kuyeeya kuti ambweni bukombi bwesu tabuyandiki kuli Jehova?

¹⁶ Ciindi notuyaabucembaala, tulakonzya kutalika kulimvwa kuti tatukonzyi kumupa zinji Jehova. Ambweni Mwami Davida awalo mbwaakali kulimvwa mbubwenya oobu ciindi naakali kuyaabucembaala. (Int. 71:9) Ino Jehova inga watugwasya buti?

17. Ino ncinzi ncotwaiya kucikozyanyo camucizyi Jheri?

¹⁷ Amubone cikozyanyo camucizyi wazina lya Jheri. Wakatambwa kuti ajanike Ŋanda ya Bwami kucibeela calwiiyo lwakubambulula mayake aabelesyegwa mumulimo wa Jehova, pele tanaakali kuyanda kuunka. Wakaamba kuti: “Ndilicembeede, ndili mukamufwu alimwi tandijisi luzyibo luli loonse ndondikonzya kubelesya mumulimo ooyu. Ndinyina mpindu.” Busiku cikolo kacitanatalika, wakapaila kuli Jehova kuzwa ansi aamoyo. Naakasika ku Ŋanda ya Bwami  buzuba bwakatobela, wakacili kulibuzya naa wakaleelede ncobeni kujanika. Nobakali kwiiya, mwaambi umwi wakaamba kuti luzyibo ilwakali kuyandika kapati nkulyaaba kwesu kutegwa tuyiisyigwe a Jehova. Mucizyi Jheri wakaamba kuti: “Ndakati, ‘luzyibo oolo ndililujisi!’ Ndakatalika kulila ciindi nondakazyiba kuti Jehova wakawiingula mupailo wangu. Wakandipa kuba alusyomo lwakuti kuli cintu cimwi iciyandika kapati ncondikonzya kupa alimwi akuti wakalilibambilide kundiyiisya!” Alanga musyule, waamba kuti: “Ndakanjila mu Ŋanda ya Bwami kandiyoowede, kandityompedwe alimwi akulimvwa kubula mpindu. Pele nondakazwa ndakalaangulukide, kukulwaizyigwa alimwi akulimvwa kuba ampindu!”

18. Mbuti Bbaibbele mbolitondezya kuti Jehova ulazumanana kububikkila maano bukombi bwesu ciindi notwacembaala?

¹⁸ Nokuba kuti tuyaabucembaala, tulakonzya kuba masimpe kuti kuli mulimo Jehova ngwaciyanda kuti tucite. (Int. 92:12-15) Jesu wakatuyiisya kuti nokuba kuti zintu nzyotukonzya kucita zilibonya kuti taziyandiki kapati kulindiswe, Jehova ulabikkila maano kucintu cili coonse ncotukonzya kucita mumulimo wakwe. (Lk. 21:2-4) Aboobo kamubikkila buyo maano kuzintu nzyomukonzya kucita. Mucikozyanyo, mulakonzya kwaamba makani aajatikizya Jehova, kupailila bakwesu alimwi akukulwaizya bamwi kuti bazumanane kusyomeka. Jehova umubona kuti muli basimilimonyina, ikutali akaambo kazintu nzyomukonzya kucita, pele akaambo kakulyaaba kwanu kumumvwida.—1Kor. 3:5-9.

19. Ino lugwalo lwa Baroma 8:38, 39, lutupa kuba alusyomo nzi?

¹⁹ Eelo kaka tulikkomene kukomba Jehova, Leza uubabikkila maano kapati aabo ibamubelekela! Wakatulenga kutegwa katucita kuyanda kwakwe, alimwi bukombi bwakasimpe mbobutuletela lukkomano mubuumi. (Ciy. 4:11) Nokuba kuti nyika ilakonzya kutubona kuti tunyina mpindu, Jehova kunyina natubona boobo pe. (Heb. 11:16, 38) Ciindi notutyompwa akaambo kakuciswa, kubula mali aayandika naa kucembaala, atuyeeye kuti kunyina cintu cili coonse icikonzya kutwaandaanya kuluyando lwa Taateesu wakujulu.—Amubale Baroma 8:38, 39.