CIBALO CAKWIIYA 4
“Muuya Ooyo Ulazuminana Amuuya Wesu”
“Muuya ooyo ulazuminana amuuya wesu kuti tuli bana ba Leza.”—ROM. 8:16.
LWIIMBO 25 Ciinga Cilibedelede
IZILI MUCIBALO *
Jehova wakatila muuya wakwe uusalala munzila yamaleele lya Pentekoste kunkamu ya Banakristo ibatandila ku 120 (Amubone muncali 1-2)
1-2. Maleele nzi aakacitika mubuzuba bwa Pentekoste 33 C.E.?
MWAKALI Munsondo mafwumofwumo ku Jerusalemu. Mumwaka wa 33 C.E., alimwi bwakali buzuba bwa Pentekoste. Nkamu yabasikwiiya ibatandila ku 120 bakalibungene muŋanda yamujulu. (Mil. 1:13-15; 2:1) Kakusyeede mazuba masyoonto, Jesu wakalibalailide kuti bazumanane kukkala mu Jerusalemu nkaambo bakali kuyootambula cipego cilibedelede. (Mil. 1:4, 5) Ino ncinzi icakacitika kuzwa waawo?
2 “Ndilyonya kujulu kwakamvwugwa muzuzumo uuli mbuli waguwo lyuungisya.” Muzuzumo wakazuzya ŋanda yoonse. Mpoonya, “milaka iili mbuli mulilo” yakalibonya atala aamitwe yabasikwiiya, eelyo boonse “bakazula muuya uusalala.” (Mil. 2:2-4) Munzila eeyo yamaleele, Jehova wakatila muuya wakwe uusalala ankamu eeyo. (Mil. 1:8) Basikwiiya aaba mbobakasaanguna kunanikwa amuuya uusalala * akupegwa bulangizi bwakuyoolela antoomwe a Jesu kujulu.
NCINZI CICITIKA CIINDI UMWI NAANANIKWA?
3. Nkaambo nzi aabo ibakajanika mubuzuba bwa Pentekoste ncobatakadooneka kuti bakananikwa amuuya uusalala?
3 Ikuti nomwakali umwi wabasikwiiya aabo ibakabungene muŋanda yamujulu buzuba oobuya, nobuli buzuba butalubiki kulindinywe. Cintu cimwi icakali kulibonya mbuli mulaka uuli mbuli mulilo cakakkala amutwe wanu, mpoonya mwakatalika kwaambaula mumyaambo! (Mil. 2:5-12) Nomwatakadooneka kuti mwakananikwa amuuya uusalala. Pele sena boonse aabo ibananikidwe amuuya uusalala balananikwa munzila yamaleele alimwi aciindi comwe? Peepe. Ino tuzyi buti oobo?
4. Sena bananike boonse mumwaanda wamyaka wakusaanguna bakananikwa aciindi comwe? Amupandulule.
4 Atulange-lange kujatikizya ciindi muntu nakonzya kuba munanike. Nkamu ya Banakristo ibatandila ku 120 tabali buyo mbabo balikke ibakananikwa amuuya uusalala lya Pentekoste 33 C.E. Kumamanino mubuzuba oobo, abambi ibatandila ku 3,000 abalo bakatambula muuya uusalala. Bakananikwa ciindi nobakabbapatizyigwa. (Mil. 2:37, 38, 41) Pele mumyaka yakatobela, tabali boonse Banakristo bananike ibakananikwa ciindi nobakabbapatizyigwa. Bana Samariya bakananikwa nokwakainda ciindi kuzwa nobakabbapatizyigwa. (Mil. 8:14-17) Alimwi kunanikwa kwa Korneliyo abamuŋanda yakwe kwakali kugambya, nkaambo balo bakananikwa kabatana akubbapatizyigwa.—Mil. 10:44-48.
5. Kweelana alugwalo lwa 2 Bakorinto 1:21, 22, ncinzi cicitika ciindi umwi naananikwa amuuya uusalala?
5 Atulange-lange icicitika ciindi muntu naananikwa amuuya uusalala. Bananike bamwi kumatalikilo ambweni cilakonzya kubayumina kuzumina kuti Jehova wakabasala. Balakonzya kulibuzya kuti, ‘Ino ncinzi cakapa kuti Leza andisale?’ Bamwi ambweni inga tiibalimvwa boobo. Kufwumbwa mbocibede, mwaapostolo Paulo ulapandulula cicitika kuli baabo boonse ibananikidwe, waamba kuti: “Alimwi kwiinda mulinguwe, nomwakasyoma, mwakabikkwa ciganto * camuuya uusalala wakasyomezyegwa, muuya uusalala ooyu ncisinizyo cakuti tuyoopegwa lukono lwesu kumbele.” (Ef. 1:13, 14; bupanduluzi buyungizidwe.) Aboobo Jehova ubelesya muuya wakwe uusalala kutegwa acisalazye ku Banakristo aaba kuti wakabasala. Munzila eeyi, muuya uusalala ‘ncisinizyo naa [ncisyomezyo]’ icipegwa kulimbabo kutegwa babe masimpe kuti kumbele bayoopona kujulu mane kukabe kutamani ikutali anyika.—Amubale 2 Bakorinto 1:21, 22.
6. Ncinzi ncayelede kucita Munakristo munanike kutegwa akabutambule bulumbu bwakwe bwakujulu?
6 Ikuti naa Munakristo ulinanikidwe, sena caamba kuti ziyume zitete uyakuunka kujulu? Peepe. Tadooneki kuti wakasalwa kuunka kujulu. Nokuba boobo, weelede kuyeeya kucenjezya ooku kwakuti: “Bakwesu, amusungwaale kapati ikutegwa mubusinizye bwiite alimwi akusalwa kwanu, nkaambo ikuti naa mwazumanana kuzicita zintu eezyi, kunyina nomuyakwaalilwa pe.” (2Pet. 1:10) Aboobo nokuba kuti Munakristo munanike wakasalwa, naa kwiitwa kuunka kujulu, uyoobutambula bulumbu bwakwe lilikke buyo kuti wazumanana kusyomeka.—Flp. 3:12-14; Heb. 3:1; Ciy. 2:10.
MBUTI MUNTU MBWAKONZYA KUZYIBA KUTI MUNANIKE?
7. Ino bananike inga bazyiba buti kuti bakatambwa kuunka kujulu?
7 Pele ino mbuti muntu mbwakonzya kuzyiba kuti ulitambidwe kuunka kujulu? Bwiinguzi bulalibonya caantangalala mumajwi Paulo ngaakalembela baabo ibakali mu Roma aabo “ibakaitwa kuba basalali.” Wakabaambila kuti: “Tiimwakatambula muuya wabuzike uumupa kuyoowa alimwi pe, pele mwakatambula muuya uumupa kuba bana ba Leza, muuya ooyo uutupa koompolola kuti: ‘Abba, Taata!’ Muuya ooyo ulazuminana amuuya wesu kuti tuli bana ba Leza.” (Rom. 1:7; 8:15, 16) Aboobo kwiinda mumuuya wakwe uusalala, Leza ulacisalazya kubananike kuti bakaitwa kujulu.—1Tes. 2:12.
8. Mbuti lugwalo lwa 1 Johane 2:20, 27 mbolutondezya kuti Banakristo bananike tabayandiki kwaambilwa buya amuntu uuli woonse kuti mbananike?
8 Jehova ulacisalazya kabotu-kabotu mumizeezo alimwi amumyoyo yabaabo ibakatambwa kuunka kujulu. (Amubale 1 Johane 2:20, 27.) Aboobo, Banakristo bananike bayandika kuyiisyigwa a Jehova kwiinda mumbungano mbubwenya buyo mbuli bantu boonse. Pele tabayandiki kwaambilwa buya amuntu uuli woonse kuti mbananike. Jehova wakabelesya muuya wakwe uusalala, iwiinda nguzu mububumbo boonse ikucisalazya kulimbabo kuti mbananike!
‘BALAZYALWA ALIMWI’
9. Kweelana alugwalo lwa Baefeso 1:18, ciindi muntu naananikwa, kucinca kuli buti nkwaba aankuko?
9 Bunji bwababelesi ba Leza mazuba aano cilakonzya kubakatazya kumvwisya cicitika kumuntu ciindi Leza naamunanika. Eeci cilalimvwisya akaambo kakuti balo tabananikidwe. Leza wakalenga bantu kuti kabakkala anyika mane kukabe kutamani, ikutali kujulu. (Matl. 1:28; Int. 37:29) Pele Jehova wakasala bamwi kuyoopona kujulu. Aboobo ciindi naabasala, ulabucinca bulangizi bwabo alimwi amizeezo yabo mpoonya-mpoonya, kutegwa babe aabulangizi bwakuyoopona kujulu.—Amubale Baefeso 1:18.
10. Ino ‘kuzyalwa alimwi’ caamba nzi? (Amubone abupanduluzi buyungizyidwe.)
10 Ciindi Banakristo nobananikwa amuuya uusalala, ‘balazyalwa alimwi,’ naa ‘kuzyalwa kuzwa kujulu.’ * Jesu awalo wakatondezya kuti tacikonzyeki kuli umwi uutananikidwe kupandulula bwini mbocimvwika “kuzyalwa alimwi” naa ‘kuzyalwa kumuuya.’—Joh. 3:3-8.
11. Amupandulule kucinca mukuyeeya ikuba ciindi muntu naananikwa.
11 Ino nkucinca kuli buti mukuyeeya ikucitika ciindi Banakristo nobananikwa? Kataninga bananika Banakristo aaba Jehova, bakalikkomene abulangizi bwakuyoopona anyika mane kukabe kutamani. Bakali kulangila kumbele iciindi Jehova aakugusya bubi boonse alimwi akucinca nyika kuba paradaiso. Ambweni bakali kweezeezya kutambula banamukwasyi naa balongwe babo ibakafwide. Pele nobakamana kunanikwa, bakatalika kuyeeya bumbi. Nkaambo nzi? Eeci tacaambi kuti tiibakakkutilide abulangizi bwabo bwaanyika. Tiibakacinca mizeezo yabo akaambo kakutyompwa naa kupenga kapati. Tiibakalimvwa kuti kupona anyika mane kukabe kutamani kunoolendelezya. Muciindi caboobo, Jehova wakabelesya muuya wakwe uusalala kucinca mizeezo yabo alimwi abulangizi mbobakali kukkomanina.
12. Kweelana alugwalo lwa 1 Petro 1:3, 4, ino Banakristo bananike balimvwa buti kujatikizya bulangizi bwabo?
12 Muntu iwananikwa ulakonzya kulimvwa kuteelela kupegwa coolwe eeci citaliboteli. Pele kunyina nadooneka naaceya kuti Jehova wakamusala. Muciindi caboobo, ulakkomana kapati alimwi akulumba ciindi nayeeya kujatikizya bulangizi bwakwe bwakuyoopona kujulu.—Amubale 1 Petro 1:3, 4.
13. Ino bananike balimvwa buti kujatikizya buumi bwabo aano anyika?
13 Aboobo sena eeci caamba kuti bananike balalombozya kufwa? Mwaapostolo Paulo ulawiingula mubuzyo ooyu. Wakakozyanisya mibili yabo yanyama kutente akwaamba kuti: “Mubwini, swebo notuli mutente eeli tulatongela, tulalibilika kapati, nkaambo tatuyandi kuti tulisamunune eeli pe, pele tuyanda kusama leelyo limbi ikutegwa eeli ilifwa limenwe abuumi.” (2Kor. 5:4) Banakristo aaba tabalendeledwe abuumi bwaanyika akuti bayanda kufwa cakufwambaana. Muciindi caboobo, balakomana alimwi balayanda kubelesya buzuba bumwi abumwi kubelekela Jehova amikwasyi yabo alimwi abalongwe. Aboobo kufwumbwa ncobacita, lyoonse balayeeya kujatikizya bulangizi butaliboteli mbobajisi kumbele.—1Kor. 15:53; 2Pet. 1:4; 1Joh. 3:2, 3; Ciy. 20:6.
SENA JEHOVA WAKAMUNANIKA?
14. Ino nzintu nzi izitatondezyi kuti muntu wakananikwa amuuya uusalala?
14 Ambweni tamuzyi kabotu naa mwakananikwa amuuya uusalala. Ikuti kacili boobo, amuyeeye kujatikizya mibuzyo eeyi iiyandika kapati: Sena mulayandisya kapati kucita kuyanda kwa Jehova? Sena mulimvwa kuti mulaubikkila maano kapati mulimo wakukambauka? Sena mulayandisisya kwiiya Jwi lya Leza kujatikizya “zintu zisisidwe zya Leza”? (1Kor. 2:10) Sena mulimvwa kuti Jehova wamulongezya kapati mumulimo wakukambauka? Sena mulimvwa kuti mukuli wanu kugwasya bamwi kuti baiye kujatikizya Jehova? Sena mwalibonena bumboni bugaminide bwakuti Jehova wamugwasya munzila zinji mubuumi bwanu? Ikuti mwaingula kuti inzya kumibuzyo eeyi, sena eeci citondezya kuti mujisi bwiite bwakujulu? Peepe, tacaambi boobo pe. Nkaambo nzi? Nkaambo kakuti babelesi ba Leza boonse balakonzya kulimvwa munzila eeyi, tacikwe makani mbananike naa pe. Kwiinda mumuuya wakwe uusalala, Jehova ulakonzya kupa mubelesi wakwe uuli woonse nguzu, tacikwe makani abulangizi mbwajisi. Alimwi buya, ikuti naa muladooneka kuti mwakananikwa amuuya uusalala, kudooneka ooko kutondezya kuti tamunanikidwe. Aabo bakaitwa a Jehova tabadooneki kuti bakananikwa naa pe! Balizyi kuti bakananikwa!
Jehova wakabelesya muuya wakwe uusalala kupa Abrahamu, Sara, Davida alimwi a Johane Mubbapatizi nguzu zyakucita zintu zigambya, pele tanaakabelesya muuya ooyo kubapa kuba aabulangizi bwakuyoopona kujulu (Amubone muncali 15-16) *
15. Ino tuzyi buti kuti tabali boonse ibakatambula muuya wa Leza ibakasalwa kuunka kujulu?
15 Mu Bbaibbele, kuli zikozyanyo zinji zyabamaalumi basyomeka ibakatambula muuya uusalala; nokuba boobo kunyina nobakajisi bulangizi bwakuyoopona kujulu. Davida wakasololelwa amuuya uusalala. (1Sam. 16:13) Muuya uusalala wakamugwasya kumvwisya makani aasisidwe aajatikizya Jehova alimwi wakamusololela kulemba zibeela zimwi zyamu Bbaibbele. (Mk. 12:36) Mane buya mwaapostolo Petro wakaamba kuti Davida “kunyina naakaunka kujulu.” (Mil. 2:34) Johane Mubbapatizi ‘wakazwide muuya uusalala.’ (Lk. 1:13-16) Jesu wakaamba kuti kunyina muntu wakali mupati kwiinda Johane, pele alimwi wakaamba kuti Johane takabi cibeela ca Bwami bwakujulu. (Mt. 11:10, 11) Jehova wakabelesya muuya wakwe uusalala kupa bamaalumi aaba nguzu zyakucita zintu zigambya, pele tanaakabelesya muuya ooyo kubasala kuti bakapone kujulu. Sena eeci caamba kuti bakajisi lusyomo lusyoonto kwiinda baabo ibakasalwa kuyoolela kujulu? Peepe. Caamba buyo kuti Jehova uyoobabusya kuti bakapone mu Paradaiso anyika.—Joh. 5:28, 29; Mil. 24:15.
16. Ino bunji bwababelesi ba Leza bajisi bulangizi nzi?
16 Bunji bwababelesi ba Leza bali aanyika mazuba aano tabajisi bulangizi bwakuyoopona kujulu. Mbubwenya mbuli Abrahamu, Sara, Davida, Johane Mubbapatizi alimwi abamaalumi abamakaintu bakaindi, bajisi bulangizi bwakuyoopona anyika ciindi Bwami bwa Leza bwaakulela.—Heb. 11:10.
17. Ino mibuzyo nzi njotuyoolanga-langa mucibalo citobela?
17 Akaambo kakuti bananike bamwi bacili aandiswe anyika, tulakonzya kuba amibuzyo. (Ciy. 12:17) Mucikozyanyo, ino bananike beelede kulibona buti? Kuti umwi mumbungano yanu watalika kulya cinkwa alimwi akunywa waini lya Ciibalusyo, ino mweelede kumweendelezya buti muntu ooyo? Alimwi ino mbuti kuti mweelwe wabaabo baamba kuti mbananike wazumanana kukomena? Sena mweelede kulibilika? Tuyooyiingula mibuzyo eeyi mucibalo citobela.
^ munc. 5 Kuzwa lya Pentekoste 33 C.E., kusikila lino, Jehova wakapa Banakristo bamwi bulangizi bukkomanisya kapati, nkokuti bulangizi bwakuyoolela antoomwe a Mwanaakwe kujulu. Pele ino mbuti Banakristo aaba mbobazyiba kuti bakapegwa coolwe eeci citaliboteli? Ncinzi cicitika ciindi Jehova naatamba muntu umwi kuya kujulu? Cibalo eeci ciyeeme aacibalo icili mu Ngazi Yamulindizi yamu January 2016. Cilayiingula mibuzyo eeyi iipa kuba aluyandisisyo.
^ munc. 2 BUPANDULUZI BWAMABALA: Kunanikwa amuuya uusalala: Jehova ubelesya muuya uusalala kusala muntu kuyoolela antoomwe a Jesu kujulu. Kwiinda mukubelesya muuya wakwe, Leza ulamupa muntu ooyo cisyomezyo, naa ‘cisinizyo cakumbele.’ (Ef. 1:13, 14) Banakristo aaba balakonzya kwaamba kuti muuya uusalala “ulazuminana,” naa ulasinizya kulimbabo kuti bulumbu bwabo buli kujulu.—Rom. 8:16.
^ munc. 5 BUPANDULUZI BWAMABALA: Ciganto. Kugantwa ooku takuli kwamamanino pe, nkaambo kugantwa kwamamanino kulacitwa lilikke buyo kuti muntu wazumanana kusyomeka mane kusikila kulufwu naa kusikila ciindi mapenzi mapati kaatanatalika.—Ef. 4:30; Ciy. 7:2-4; amubone “Mibuzyo Yabasikubala” mu Ngazi Yamulindizi yamu Chikuwa yamu April 2016.
^ munc. 10 Kutegwa muzyibe bupanduluzi bumbi bujatikizya ncocaamba “kuzyalwa alimwi,” amubone Ngazi Yamulindizi yamu July 1, 2009, peeji 3-12.
LWIIMBO 27 Kuyubununwa Kwabana ba Leza
^ munc. 57 BUPANDULUZI BWACIFWANIKISO: Nokuba kuti tuli muntolongo akaambo kalusyomo lwesu naa tulaangulukide kukambauka alimwi akuyiisya kasimpe, tulangila kumbele kuyoopona anyika ciindi Bwami bwa Leza bwaakutalika kutweendelezya.
