1. Ncinzi citondezya kuti mumikwasyi minji tabayandani kapati mazuba aano?

BBAIBBELE lyakasinsima kuti kumazuba aamamanino, bantu banoonyina “luyando lwakuzyalwa andulo.” (2Tim. 3:1, 3) Tulabubona businsimi oobu kabuzuzikizyigwa mazuba aano. Mucikozyanyo, bazyali banji balalekana, alimwi inga tabacimvwani calo cipa bana babo kulimvwa kutayandwa. Nobaba banamukwasyi bakkala muŋanda yomwe inga kabatamvwani. Mucikozyanyo, sikupa lulayo kumikwasyi umwi wakaamba kuti: “Bazyali abana tabajisi ciindi cakubandika, nkaambo ciindi cinji bacimanina amakkompyuta, matabbuleti, mafooni naa kuuma mavidiyo geemu. Nokuba kuti aaba banamukwasyi bakkala muŋanda yomwe, inga tabazyibene kabotu pe.”

2-3. (a) Kweelana alugwalo lwa Baroma 12:10, mbaani mbotweelede kuyanda kapati? (b) Ncinzi ncotutiilange-lange mucibalo eeci?

² Tatuyandi kuba mbuli bantu banji munyika eeyi ibatayandani. (Rom. 12:2) Muciindi caboobo, tweelede kwiiya kubayanda kapati banamukwasyi alimwi abakwesu abacizyi mumbungano. (Amubale Baroma 12:10.) Ino kuyandana kapati caamba nzi? Caamba bube ibupandulula cilongwe cipati cili akati kabanamukwasyi. Oobu mbobube mbotweelede kutondezya kubakwesu abacizyi mumbungano. Ciindi notuyandana kapati, tupa kuti boonse calukkomano bamubelekele Jehova caantoomwe.—Mik. 2:12.

³ Kutegwa katuyandana kapati, atulange-lange ncotukonzya kwiiya kuzwa kuzikozyanyo zyamu Bbaibbele.

4. Ino lugwalo lwa Jakobo 5:11 lutugwasya buti kubona mboluli lupati luyando lwa Jehova?

⁴ Bbaibbele lilatwaambila bube bubotu mbwajisi Jehova. Mucikozyanyo, lyaamba kuti “Leza nduyando.” (1Joh. 4:8) Ciindi notwiiya kaambo aaka kujatikizya Jehova, citupa kuyanda kuba acilongwe anguwe. Pele alimwi Bbaibbele lyaamba kuti Jehova “ulaalubomba kapati.” (Amubale Jakobo 5:11.) Eelo kaka oobu mbupanduluzi bubotu kujatikizya mbwatuyanda kapati Jehova!

5. Mbuti Jehova mbwatondezya luse alimwi inga twamwiiya buti?

⁵ Lugwalo lwa Jakobo 5:11 lwaamba lubomba lwa Jehova alimwi abube bumbi ibutupa kuba acilongwe anguwe, nkokuti luse lwakwe. (Kul. 34:6) Nzila imwi Jehova mbwatutondezya luse nkwiinda mukutulekelela zibi zyesu. (Int. 51:1) Mu Bbaibbele, luse lujatikizya zintu zinji kunze buyo lyakulekelela muntu iwakatulubizyila. Lubikkilizya mbwalimvwa muntu ciindi nabona muntu umwi uuli mumapenzi alimwi akubweza ntaamu yakumugwasya. Jehova waamba kuti luyandisisyo ndwajisi lwakutugwasya lulainda aamutumbu mbwaalimvwa kujatikizya mwanaakwe. (Is. 49:15) Ciindi notuli mumapenzi, luse lwa Jehova lumupa kutugwasya. (Int. 37:39; 1Kor. 10:13) Tulakonzya kutondezya luse kubakwesu abacizyi kwiinda mukubalekelela alimwi akutaba amfwundilili kulimbabo ciindi nobatutyompya. (Ef. 4:32) Pele nzila iiyandika kapati mbotukonzya kutondezya luse nkwiinda mukubagwasya bakwesu abacizyi mumapenzi ngobajisi. Ciindi luyando nolutukulwaizya kubafwida luse bamwi, twiiya Jehova, walo uutondezya cikozyanyo cibotu kapati cakuba alubomba.—Ef. 5:1.

6. Amupandulule cilongwe cakaliko akati ka Jonatani a Davida?

⁶ Bbaibbele lilijisi makani aabantu batalondokede ibakali kuyandana kapati. Amubone cikozyanyo ca Jonatani a Davida. Bbaibbele lyaamba kuti: “Jonatani a Davida bakamvwana kapati, eelyo Jonatani wakatalika kumuyanda  Davida mbubonya mbwaliyanda mwini.” (1Sam. 18:1) Davida wakananikwa kuba mwami mubusena bwa Saulo. Kuzwa waawo, Saulo wakaba amunyono kapati kuli Davida alimwi wakali kuyanda kumujaya. Pele Jonatani, mwana wa Saulo kunyina naakabasangana bausyi ciindi nobakali kusola kuti bamujaye Davida. Jonatani a Davida bakasyomezyanya kuti bakali kuyoozumanana kuba balongwe alimwi akugwasyanya lyoonse.—1Sam. 20:42.

7. Nkaambo nzi kamwi ikakali kukonzya kupa Jonatani a Davida kuti batabi balongwe?

⁷ Cilagambya kubona mbobakali kumvwana kapati Jonatani a Davida nkaambo kuli zintu zinji izyakali kukonzya kupa kuti batabi balongwe. Mucikozyanyo, Jonatani wakali mupati kuli Davida amyaka iisika ku 30. Aboobo Jonatani ambweni naakayeeya kuti takonzyi kuba acilongwe amwana muniini alimwi uutajisi luzyibo lunji mubuumi. Pele Jonatani tanaakayeeya boobo. Wakali kumulemeka kapati Davida.

8. Nkaambo nzi ncomuyeeya kuti Jonatani wakali mulongwe mubotu kapati kuli Davida?

⁸ Jonatani ambweni naakamufwida munyono Davida. Mbwaanga wakali mwana wa Mwami Saulo, Jonatani naakaamba kuti nguwakeelede kuba mwami uutobela. (1Sam. 20:31) Pele Jonatani wakali muntu uulicesya alimwi uusyomeka kuli Jehova. Aboobo wakakutobela kusala kwa Jehova kwakuti Davida nguwakeelede kuba mwami. Kuyungizya waawo, wakali kusyomeka kuli Davida, nokuba kuti eeci cakali kumunyemya kapati Saulo.—1Sam. 20:32-34.

9. Ino tuzyi buti kuti Jonatani wakanyina munyono kuli Davida?

⁹ Jonatani wakali kumuyanda kapati Davida, aboobo kunyina naakamufwida munyono. Jonatani wakalicibwene kumutwe kubelesya buta alimwi wakali sikalumamba sicamba. Walo alimwi abausyi ba Saulo, bakazyibidwe kuti “bakali alubilo kwiinda basikwaze” alimwi “bakali anguzu kwiinda basyuumbwa.” (2Sam. 1:22, 23) Aboobo Jonatani naakalisumpula kujatikizya zintu nzyaakali kucita cabusicamba. Nokuba boobo, Jonatani wakanyina muuya wakuzundana naa munyono. Muciindi caboobo, Jonatani wakali kumuyanda Davida akaambo kabusicamba bwakwe alimwi akusyoma Jehova. Mucikozyanyo, ciindi Davida naakajaya Goliati, Jonatani wakatalika kumuyanda kapati mbubonya mbwaakali kuliyanda mwini. Mbuti mbotukonzya kutondezya luyando luli boobu kubakwesu abacizyi?

10. Ino caamba nzi ‘kuyandana kapati kuzwa ansi aamoyo’?

¹⁰ Bbaibbele litukulwaizya ‘kuyandana kapati kuzwa ansi aamoyo.’ (1Pet. 1:22) Jehova ulatupa cikozyanyo cibotu. Luyando ndwajisi kulindiswe ndupati kapati cakuti, ikuti naa twazumanana kusyomeka kulinguwe, kunyina cikonzya kulumana luyando oolo. (Rom. 8:38, 39) Ibbala lya Chigiliki ilisandululwa kuti “kapati,” lipa muzeezo wamuntu uuli mukusolekesya canguzu kutondezya luyando. Zimwi ziindi tacili cuubauba kutondezya luyando kubakwesu abacizyi. Ciindi bamwi nobatunyemya, tweelede kuzumanana ‘kweengelelana caluyando. Kusoleka camoyo woonse kuzumanana alukamantano lwamuuya mucaanzyo caluumuno.’ (Ef. 4:1-3) Ciindi notusolekesya kubamba “caanzyo caluumuno,” tatukabikkili maano kukulubizya kwabakwesu. Tuyoosolekesya kubona bakwesu mbubonya mbwababona Jehova.—1Sam. 16:7; Int. 130:3.

11. Nkaambo nzi zimwi ziindi ncocikonzya kukatazya kutondezya luyando?

¹¹ Talili lyoonse nocili cuubauba kubayanda bakwesu abacizyi, ikapati kuti katutuzyi tumpenda  twabo. Kulangilwa kuti eeli ndelyakali penzi ku Banakristo bamwi bamumwaanda wamyaka wakusaanguna. Mucikozyanyo, kulibonya kuti Yuwodiya a Sintike bakanyina penzi “kubeleka canguzu [a Paulo] kujatikizya makani mabotu.” Pele akaambo katwaambo tumwi, bakaba abuyumuyumu bwakutamvwana. Aboobo Paulo wakabakulwaizya “kuti babe amuzeezo omwe mu Mwami.”—Flp. 4:2, 3.

12. Mbuti mbotukonzya kutondezya luyando kubakwesu abacizyi?

¹² Mbuti mbotukonzya kutondezya luyando kubakwesu abacizyi mazuba aano? Kuti twabazyiba kabotu basyomima, cilakonzya kutuubila kubamvwisya alimwi akubayanda. Tulakonzya kuba acilongwe ambabo nokuba kuti mbapati, mbana naa bakakkomenena mubukkale bwiindene. Amuyeeye kuti, Jonatani wakali mupati amyaka iisika ku 30 kwiinda Davida; pele wakaba acilongwe anguwe. Sena kuli umwi mumbungano yanu, mupati naa musyoonto kwiinda ndinywe ngomukonzya kuba acilongwe anguwe? Kwiinda mukucita boobo, mulakonzya kutondezya kuti ‘mulijisi luyando kuciinga coonse cabakwesu.’—1Pet. 2:17.

13. Nkaambo nzi ncocitakonzyeki kuba acilongwe ciyumu kuli boonse mumbungano?

¹³ Sena kuyanda basyomima caamba kuti tunoojisi cilongwe ciyumu kuli boonse mumbungano? Eeco tacikonzyeki pe. Tacilubide kumvwana kapati abamwi kwiinda bambi akaambo kakuba azintu zikozyenye nzyotukkomanina. Jesu wakaamba baapostolo bakwe boonse kuti bakali ‘beenzinyina,’ pele Johane wakali kumuyandisisya kapati kwiinda bamwi. (Joh. 13:23; 15:15; 20:2) Nokuba boobo, Jesu kunyina naakatondezya kuti Johane wakali kuyandika kapati kwiinda bamwi. Mucikozyanyo, ciindi Johane amwanookwabo Jakobo nobakalomba zyuuno zisumpukide mu Bwami bwa Leza, Jesu wakabaambila kuti: “Kujatikizya makani aakukkala kujanza lyangu lyalulyo naa kujanza lyangu lyalumwensyi tandili ndime ndisala pe.” (Mk. 10:35-40) Mbubwenya mbuli Jesu, tatweelede kubasalulula bamwi kwiinda mukuyandisisya baabo mbotumvwana limwi. (Jak. 2:3, 4) Ikuti twacita  boobo, inga twaleta muuya wakwaandaana, uutayandiki mumbungano ya Bunakristo.—Jud. 17-19.

14. Kweelana alugwalo lwa Bafilipi 2:3, ncinzi cikonzya kutugwasya kutantamuka muuya wakuzundana?

¹⁴ Ikuti katutondezya luyando kuli umwi amweenzinyina, tuyoopa kuti kutabi muuya wakuzundana mumbungano. Amuyeeye kuti Jonatani kunyina naakasola kuzundana a Davida, kumubona kuba sinkondonyina akaambo kacuuno cabwami. Toonse tulakonzya kwiiya cikozyanyo ca Jonatani. Mutanooboni babelesinyoko kuba basinkondo akaambo kazintu nzyobakonzya kucita, “pele amucite zintu zyoonse cakulicesya akubona bamwi kuti balamwiinda.” (Amubale Bafilipi 2:3.) Kamuyeeya kuti muntu uuli woonse mumbungano ulakonzya kucita cintu cimwi icikonzya kugwasya mbungano. Ikuti twazumanana kulicesya, tuyoocikonzya kubona bube bubotu mbobajisi bakwesu abacizyi alimwi akugwasyigwa kuzikozyanyo zyabo zibotu.—1Kor. 12:21-25.

15. Ncinzi ncomwiiya kucakuluula caba Tanya amukwasyi wabo?

¹⁵ Ciindi nitwacitikilwa cintu cibyaabi mubuumi, Jehova ulakonzya kutuumbulizya kwiinda muluyando alimwi alugwasyo lwacigaminina ndotutambula kuzwa kubakwesu abacizyi. Atulange-lange cakacitikila mukwasyi umwi nobakamanizya pulogilamu ya Buzuba Bwabili, ya Muswaangano Wamasi umwi ku United States wamu 2019 wakuti, “Luyando Talumani.” Ba Tanya imuzyali uujisi bana botatwe bakaamba kuti, “Ciindi notwakali kujokela kuhotela, mootokala umwi wakauma mootokala wesu. Kunyina wakalicisa, twakazwa mumootokala akwiimikila mumugwagwa  katugambidwe. Muntu umwi kulubazu lumwi lwamugwagwa wakali kutwiita kuti tunjila mumootokala wakwe kutegwa tukwabililwe. Ani wakali umwi wabakwesu iwakazwa kumuswaangano awalo. Alimwi tali buyo nguwe alikke iwakaima. Bakamboni bosanwe ibazwa ku Sweden abalo bakaima. Ibacizyi bakandikumbata mebo amwanaangu musimbi, cintu icakatupa kulimvwa kabotu. Ndakabaambila kuti tulaba buyo kabotu, pele tiibakatusiya pe. Bakakkala andiswe nociba ciindi nobakamana kutulanga-langa basilisi, alimwi buya bakabeleka canguzu kutupa zyoonse nzyotwakali kuyandika. Muciindi eeci cikatazya, twakalimvwa kuyandwa a Jehova. Cakuluula eeci cakayumya luyando lwesu kubakwesu abacizyi, alimwi cakayumya luyando lwesu kuli Jehova akutupa kumulumba kapati. Sena mulayeeya ciindi nomwakali kuyandika lugwasyo, kumane musyominyoko wakatondezya luyando kwiinda mukumugwasya?

16. Ntwaambo nzi tutupa kuyandana kapati?

¹⁶ Amuyeeye buyo zintu zibotu zicitika ciindi notutondezyanya luyando. Tulabaumbulizya bakwesu abacizyi ciindi nobasikilwa mapenzi. Tulabagwasya bakwesu abacizyi kubelekela Jehova calukamantano. Tulatondezya kuti tuli basikwiiya ba Jesu alimwi eeci cilabakwelelezya babombemyoyo kubukombi bwakasimpe. Kwiinda zyoonse, tulamulemeka “Taata siluse a Leza siluumbulizyo loonse,” Jehova. (2Kor. 1:3) Toonse atuzumanane kuba aluyando alimwi akulutondezya!