1-2. (a) Nkaambo nzi ncotutagambwi ciindi notwasikilwa mapenzi? (b) Ncinzi ncotutiibandike mucibalo eeci?

 MBOTULI babelesi ba Jehova, tatugambwi ciindi notwasikilwa mapenzi. Nkaambo tulizyi kuti Bbaibbele lyaamba kuti, “tweelede kwiinda mumapenzi manji kutegwa tukanjile mu Bwami bwa Leza.” (Mil. 14:22) Alimwi tulizyi kuti mapenzi aamwi ngotujisi taakonzyi kumana lino mane kusikila tukanjile munyika mpya ya Leza, mwalo ‘lufwu molutakabi limbi, akwalo koomoka, kulila nokuba kucisa mozitakabi limbi.’—Ciy. 21:4.

² Jehova kunyina nalesya mapenzi kutucitikila. Pele ulatugwasya kuliyumya. Amubone Mwaapostolo Paulo ncaakaambila Banakristo bakali kukkala mu Roma. Cakusaanguna wakaamba mapenzi aayindene-indene ngaakajana walo a Banakristonyina. Mpoonya wakalemba kuti: “Tulazunda cakumaninina kwiinda muliyooyo wakatuyanda.” (Rom. 8:35-37) Eeci citondezya kuti Jehova ulakonzya kumugwasya kuti muzwidilile nociba ciindi nomuli mubukkale bukatazya. Lino atubandike kujatikizya Jehova mbwaakamugwasya Josefa alimwi ambwakonzya kumugwasya andinywe.

3. Ino nkucinca kuli buti kwakamucitikila Josefa?

³ Jakobo wakatondezya caantangalala kuti wakali kumuyanda kapati mwanaakwe Josefa. (Matl. 37:3, 4) Akaambo kaceeci, bana ba Jakobo bapati bakatalika kumufwida munyono Josefa. Mpoonya nobakajana coolwe, bakamusambala Josefa kuli basimakwebo bana Midiyani. Basimakwebo aaba bakatola Josefa ku Egepita kwakali kulamfwu kapati, kwalo nkobakamusambala alimwi kuli Potifara, silutwe wabalindizi ba Farao. Eelo kaka buumi bwa Josefa bwakacinca cakutayeeyela, imwana wakali kuyandwa kapati abausyi lino wakaba muzike mu Egepita!—Matl. 39:1.

4. Ino mapenzi nzi ngotukonzya kujana?

 ⁴ Bbaibbele lyaamba kuti ‘toonse buyo tulasikilwa ziindi zyamapenzi.’ (Muk. 9:11) Zimwi ziindi tulasikilwa mapenzi ‘aabacitikila abamwi.’ (1Kor. 10:13) Pele zimwi ziindi tulakonzya kupenga akaambo buyo kakuti tuli basikwiiya ba Jesu. Mucikozyanyo, tulakonzya kufwubaazyigwa, kukazyigwa naa ambweni buya kupenzyegwa akaambo kalusyomo lwesu. (2Tim. 3:12) Kufwumbwa mapenzi ngomukonzya kujana, Jehova ulakonzya kumugwasya kuzwidilila. Ino mbuti mbwaakacita oobo kuli Josefa?

5. Ncinzi Potifara ncaakazyiba naakabona kuzwidilila kwa Josefa? (Matl 39:2-6)

⁵ Amubale Matalikilo 39:2-6. Potifara wakabona kuti Josefa wakali mwaalumi musongo alimwi uubeleka canguzu. Alimwi wakalizyi kaambo ncocakali boobo. Potifara wakabona kuti “Jehova wakali kupa kuti [Josefa] kazwidilila muzintu zyoonse nzyaakali kucita.” b Aboobo, mukuya kwaciindi wakabikka Josefa kuba sikumukutaukila. Alimwi wakamubikka kuti abe mupati muŋanda yakwe akulanganya zintu zyakwe zyoonse. Akaambo kaceeci, Potifara wakazwidilila.

6. Ino kweelede kuti ncinzi ncaakali kuyanda Josefa naakali mubukkale oobu?

⁶ Amweezeezye buyo Josefa mbwaakalimvwide naakali mubukkale oobu. Ino muyeeya kuti ncinzi ncaakali kuyandisya kapati aciindi aawa? Sena nkuyanda kukkomaninwa a Potifara naa kulumbulwa? Kweelede kuti Josefa wakali kuyanda buyo kuti agusyigwe mubuzike akujokela kuli bausyi. Amana buya, nokuba kuti wakajisi zyoolwe zyoonse eezyi muŋanda ya Potifara, wakacili muzike wamuntu iwatakali kukomba Jehova. Pele Jehova tanaakapa kuti Potifara amugusye mubuzike Josefa. Alimwi aciindi aawa bukkale bwa Josefa bwakali kuyanda kwiindila buya kubija.

7. Ino bukkale bwa Josefa bwakaindila buti kubija? (Matalikilo 39:14, 15)

⁷ Kweelana ambokwaambidwe ku Matalikilo caandaano 39, mukaintu wa Potifara wakali kumunyomenena Josefa, alimwi cakwiinduluka-induluka wakasola kuti awone anguwe. Lyoonse naakali kusola kucita boobo, Josefa wakali  kukaka. Aboobo, wakanyema kapati cakuti wakatamikizya Josefa kuti wakali kuyanda kumujata. (Amubale Matalikilo 39:14, 15.) Ciindi Potifara naakamvwa makani aaya, wakanyema kapati cakuti wakamubikka muntolongo Josefa, mwalo mwaakakkala kwamyaka iili mboibede. (Matl. 39:19, 20) Ino ntolongo eeyi yakali buti? Ibbala lya Chihebrayo Josefa ndyaakabelesya ilyakasandululwa kuti “ntolongo” lilakonzya kwaamba “mugoti” naa “cilindi”, ikutondezya kuti mwakanyina mumuni alimwi taakajisi bulangizi. (Matl. 40:15; bupanduluzi buyungizyidwe.) Alimwi Bbaibbele litondezya kuti maulu aakwe akaangidwe muziliba ansingo yakwe yakanjizyidwe munsimbi. (Int. 105:17, 18) Bukkale bwa Josefa bwakali kuyaabwiindila buya kubija. Imuntu wakali muzike uusyomwa wakaba mwaange.

8. Nokuba kuti bukkale bwaindila buya kubija, ncinzi ncotukonzya kuba masimpe?

⁸ Sena kuli nomwakalijana kale mubukkale bukatazya bwalo ibwakali kuyaabwiindila buya kubija nokuba kuti mwakali kupaila cakutaleka? Eeci cilakonzya kucitika. Jehova kunyina naalesya kutucitikila mapenzi aali munyika eeyi yeendelezyegwa a Saatani. (1Joh. 5:19) Nokuba boobo, tulakonzya kuba masimpe kuti: Jehova ulaazyi mapenzi oonse ngotujisi, alimwi ulatubikkila maano. (Mt. 10:29-31; 1Pet. 5:6, 7) Kuyungizya waawo, usyomezya kuti: “Ziyume zitete tandikakusiyi pe, alimwi tandikakulekelezyi pe.” (Heb. 13:5) Jehova ulakonzya kumugwasya kuzumanana kuliyumya nociba ciindi bukkale bwanu nobwalibonya mbuli kuti tabukonzyi kucinca. Lino atubone mbwaakacita oobo kuli Josefa.

9. Ncinzi citondezya kuti Jehova wakali a Josefa ciindi naakali muntolongo? (Matalikilo 39:21-23)

⁹ Amubale Matalikilo 39:21-23. Nociba ciindi naakali muntolongo, Jehova wakapa kuti Josefa azwidilile. Munzila nzi? Mukuya kwaciindi, Josefa wakatalika kusyomwa alimwi akulemekwa amupati wantolongo, mbubwenya mbocakabede kacili muŋanda ya Potifara. Kalitanalampa, mupati wantolongo wakabikka Josefa kuti kalanganya basintolongo boonse. Mane buya, Ibbaibbele lyaamba kuti “imupati wantolongo kunyina mulimo uliwoonse ngwaakacili kubeleka ooyo wakali mumaanza aa Josefa.” Aboobo lino Josefa wakaba amulimo mubotu wakubeleka. Eelo kaka ooku kwakali kucinca kutayeeyelwi! Amuciyeeyele buyo, mbuti muntu wakaangidwe muntolongo akaambo kakutamikizyigwa kujata mukaintu wamupati wababelesi bamwami, mbwaakali kukonzya kupegwa mulimo uuli boobu? Kuli buyo bwiinguzi bomwe. Kweelana ambolwaamba lugwalo lwa Matalikilo 39:23, “Jehova wakali a Josefa alimwi Jehova wakapa kuti kufwumbwa zintu nzyaakali kucita kazwidilila.”

10. Amupandulule kaambo Josefa ncaatakali kukonzya kulimvwa kuti wakali kuzwidilila muzintu zyoonse.

¹⁰ Amusole alimwi kuyeeya mbwaakalimvwide Josefa. Ciindi naakatamikizyigwa makani aakubeja mpoonya akubikkwa muntolongo, sena muyeeya kuti wakacili kulimvwa kuti wazwidilila muzintu zyoonse? Ino muyeeya kuti Josefa ncinzi ncaakali kuyandisisya kapati aciindi aawa? Sena nkuyanda kukkomaninwa amupati wantolongo? Kweelede kuti, Josefa wakali kuyanda buyo kuti agusyigwe muntolongo. Mane buya, wakalomba mwaange umwi iwakali afwaafwi kugusyigwa muntolongo kuti akaambile Farao kujatikizya nguwe kutegwa akazwe mubusena oobu ibwakali bubyaabi. (Matl. 40:14) Nokuba boobo, mwaalumi ooyu tanaakacikonzya kwaambaula a Farao mpoonya-mpoonya. Akaambo kaceeci, Josefa wakazumanana kukkala muntolongo kwamyaka iimbi yobilo. (Matl. 40:23; 41:1, 14) Pele Jehova wakazumanana kumugwasya kuzwidilila. Mubuti?

11. Ncintu nzi caalubazu Jehova ncaakagwasya Josefa kucita, alimwi ino eeci cakapa buti kuti makanze aa Jehova azuzikizyigwe?

 ¹¹ Ciindi Josefa naakali muntolongo, Jehova wakapa mwami wa Egepita kulota ziloto zyobilo zikatazya. Farao wakaliyandide kapati kuzyiba ncozyakali kwaamba. Ciindi mwami naakazyiba kuti Josefa wakali kukonzya kupandulula ziloto, wakamwiita. Kwiinda mukugwasyigwa a Jehova, Josefa wakazipandulula ziloto alimwi Farao wakakkomana kapati akaambo kazintu zigwasya nzyaakaambilwa kuti acite. Farao naakabona kuti Jehova wakali a Josefa, wakamusala kulanganya zyakulya mucisi coonse ca Egepita. (Matl. 41:38, 41-44) Kumbele, kwakaba nzala mpati mu Egepita alimwi amucisi ca Kanana, oomo bamukwasyi wa Josefa mobakali kukkala. Aboobo lino Josefa wakali kukonzya kugwasya bamukwasyi wakwe kuti batafwi akaambo kanzala akukwabilila luzubo mwaakali kuyoozyalilwa Mesiya.

12. Muunzila nzi Jehova mwaakapa kuti Josefa azwidilile?

¹² Amuyeeye buyo zintu zigambya izyakacitika mubuumi bwa Josefa. Nguni wakapa kuti Potifara amubikkile maano Josefa, imuntu wakali muzike buyo? Nguni wakapa kuti mupati wantolongo amukkomanine Josefa, imuntu wakali mwaange? Ino nguni wakapa kuti Farao alote ziloto zikatazya kapati akupa Josefa kucikonzya kuzipandulula? Alimwi nguni wakapa kuti Farao asale Josefa kulanganya cakulya mucisi coonse ca Egepita? (Matl. 45:5) Tacidoonekwi buya kuti, Jehova ngowakapa kuti zyoonse nzyaakali kucita Josefa zizwidilile. Nokuba kuti banabokwabo Josefa bakali kuyanda kumujaya, Jehova wakacinca bukkale bwakwe ikutegwa azuzikizye makanze aakwe.

13. Sena Jehova ulanjilila muzintu zyoonse zitucitikila mubuumi? Amupandulule

¹³ Ncinzi ncotukonzya kwiiya kucibalo ca Josefa? Jehova kunyina nanjilila muzintu zyoonse zitucitikila. Alimwi kunyina napa kuti zintu zyoonse zibyaabi izitucitikila mubuumi, kazicitika kutegwa azuzikizye makanze amwi. (Muk. 8:9; 9:11) Pele nkaaka kaambo nkotweelede kuyeeya: Ciindi notwajana mapenzi, Jehova inga ulizyi alimwi ulamvwa ciindi notumukwiilila kulomba lugwasyo. (Int. 34:15; 55:22; Is. 59:1) Kuyungizya waawo, Jehova ulakonzya kutugwasya kutegwa tucikonzye kuliyumya. Munzila nzi?

14. Ino Jehova utugwasya buti muziindi zyamapenzi?

 ¹⁴ Nzila imwi Jehova mbwatugwasya, nkwiinda mukutupa luumbulizyo akutukulwaizya, alimwi kanji-kanji ulacita oobo aciindi ceelede. (2Kor. 1:3, 4) Eeci ncecakamucitikila mukwesu Eziz, waku Turkmenistan walo wakaangwa muntolongo kwamyaka yobilo akaambo kalusyomo lwakwe. Mukwesu Eziz wakaamba kuti: “Buzuba mbondakali kubetekwa kuseeni, mukwesu umwi wakandibalila lugwalo lwa Isaya 30:15 ilwaamba kuti: ‘Mulaba anguzu kufwumbwa buyo kuti mubatame akuba alusyomo.’ Lugwalo oolu lwakandigwasya kuzumanana kukkazika moyo alimwi akusyoma Jehova muzintu zyoonse. Kuzinzibala kuyeeya lugwalo oolu, kwakandigwasya ciindi coonse ncondakali muntolongo.” Sena inga mwayeeya ciindi Jehova naakamugwasya mubuumi bwanu kwiinda mukumukulwaizya akumupa luumbulizyo aciindi ceelede?

15-16. Ncinzi ncomwiiya kujatikizya cakabacitikila ba Tori?

¹⁵ Kanji-kanji, inga tatuboni Jehova mbwatugwasya kuliyumya mupenzi limwi ccita mane lyamana. Eeci ncecakamucitikila mucizyi Tori. Mwanaakwe musankwa uutegwa Mason, wakali kuciswa bulwazi bwakkansa kwamyaka iili 6 kusikila naakafwa. Tacidoonekwi buya kuti, eeci cakabacisa kapati ba Tori. Bakaamba kuti: “Ndiyeeya kuti eeci ncecintu cakandicisa kapati mbuli muzyali. Ndisyoma kuti abazyali bambi inga bazumina kuti ikubona mwanaako kapenga cilacisa kapati kwiinda kuti nduwe oopenga.”

¹⁶ Nokuba kuti cakali kubacisa kapati ba Tori kubona mwanaabo kapenga, bakali kuzinzibala kuyeeya kujatikizya Jehova mbwaakali kubagwasya kuliyumya mubukkale oobu. Bakaamba kuti: “Ndayeeya kujatikizya ciindi eeciya, ndilabona Jehova mbwaakandigwasya ciindi coonse mwanaangu ncaakali kuciswa. Mucikozyanyo,  nociba ciindi Mason naakacisidwe kapati cakuti taakali kukonzya kubabona basikumuswaya, ibakwesu abacizyi bakali kweenda musinzo mulamfwu kuboola kucibbadela. Lyoonse kwakali kuba bantu ibakali kuboola kumubona, kabalibambilide kugwasya. Alimwi bakwesu abacizyi, bakali kutupa nzyotwakali kuyandika kumubili. Noliba leelyo zintu nozyakali kukatazya kapati, kunyina notwakabulide zintu nzyotwakali kuyandika.” Masimpe Jehova wakabapa zintu nzyobakali kuyandika ba Tori ikutegwa bacikonzye kuliyumya, alimwi wakacita mbubwenya oobo akuli Mason.—Amubone kabbokesi kakuti “ Jehova Wakatupa Zintu Zyoonse Nzyotwakali Kuyandika.”

17-18. Ncinzi ciyootugwasya kubona Jehova mbwatugwasya ciindi notuli mumapenzi alimwi akumulumba? (Intembauzyo 40:5)

¹⁷ Amubale Intembauzyo 40:5. Ciindi muntu nayaka ŋanda, makanze aakwe inga ngakuti ayimane akulongela mumo. Pele ayaka kusika antaamu imwi, ulaima kutegwa abone kuyaambele nkwaacita. Mbubwenya buyo, lyoonse amujane ciindi cakuzinzibala kuyeeya Jehova mbwaamugwasya kuti muzwidilile, nociba ciindi nomuliyumya kupenzi limwi. Kumamanino aabuzuba abumwi, amulibuzye kuti: ‘Ino Jehova wandigwasya buti sunu? Nokuba kuti penzi liciliko, ino Jehova undigwasya buti kuliyumya?’ Amuyeeye naa mulakonzya kucibona cintu cimwi Jehova ncaacita kutegwa muzwidilile.

¹⁸ Masimpe kuti, ambweni mulapaila kuti penzi ndyomujisi limane. Eeco cilamvwika alimwi cileelela. (Flp. 4:6) Pele alimwi tweelede kuyeeya zilongezyo nzyotujisi lino. Amana buya, Jehova usyomezya kutupa nguzu akutugwasya kuliyumya. Aboobo lyoonse mweelede kuzumanana kulumba kujatikizya Jehova mbwamugwasya. Mbubwenya mbuli Josefa, muyoobona Jehova mbwamugwasya kuzwidilila nociba ciindi nomuli mumapenzi.—Matl. 41:51, 52.