1-2. Nkaambo nzi ncotujanika ku Ciibalusyo mwaka amwaka?

 MYAKA iitandila ku 2,000 yainda, Jesu wakaaba buumi bwakwe akaambo kandiswe, ikujalula nzila yakuti tukajane buumi butamani. Busiku katanafwa, Jesu wakalailila basikumutobela kuyeeya cintu caluyando ncaakacita, kwiinda mukucita pobwe litakatazyi lijatikizya cinkwa alimwi awaini.—1Kor. 11:23-26.

² Tulaatobela malailile aa Jesu akaambo kakuti tulamuyanda kapati. (Joh. 14:15) Mwaka amwaka ciindi ca Ciibalusyo, tulatondezya kulumba kwiinda mukujana ciindi cakuzinzibala kuyeeya alimwi akupaila kuzwa ansi amoyo kujatikizya lufwu lwakwe ncolwaamba kulindiswe. Kuyungizya waawo, tulakkomana kutola lubazu cabusungu mumulimo wakukambauka, kutamba bantu banji kutegwa bakatusangane kumuswaangano ooyu waalubazu. Amana buya, tulikanzide kutalekela cintu cili coonse kutulesya kuyoojanika ku Ciibalusyo.

3. Ncinzi ncotutiilange-lange mucibalo eeci?

³ Mucibalo eeci, tulalanga-langa bantu ba Jehova mbobasolekesya kucita kufwumbwa ncobakonzya kutegwa kabacita Ciibalusyo calufwu lwa Jesu. Tulabandika (1) mbobacita Ciibalusyo mbubwenya Jesu mbwaakacita, (2) mbobatamba bantu ku Ciibalusyo, alimwi (3) ambobacita Ciibalusyo nomuba mubukkale bukatazya.

4. Ino ntwaambo nzi tubandikwa mwaka amwaka lya Ciibalusyo, alimwi nkaambo nzi ncotweelede kutubikkila maano? (Luka 22:19, 20)

⁴ Mwaka amwaka lya Ciibalusyo, tulaswiilila kumakani aayeeme a Bbaibbele alo aapa bwiinguzi busalede kumibuzyo  yiindene-indene. Tulaiya kaambo ncotuyandika cinunuzyo alimwi alufwu lwamuntu omwe mbolukonzya kubbadelela zibi zyabantu banji. Tulayeezyegwa ncowiiminina mukamu awaini alimwi abaabo beelede kulya akunywa zitondezyo eezyi. (Amubale Luka 22:19, 20.) Kuyungizya waawo, tulazinzibala kuyeeya kujatikizya zilongezyo nzyobayoojana aabo bajisi bulangizi bwakuyoopona kukabe kutamani anyika. (Is. 35:5, 6; 65:17, 21-23) Ootu twaambo tweelede kutubikkila maano kapati. Bantu banji tabatuzyi twaambo ootu, tabamvwisyi mbociyandika kapati cipaizyo ca Jesu. Alimwi buya tabaciti Ciibalusyo calufwu lwakwe munzila njaakayiisya basikumutobela kuti kabacita. Nkaambo nzi ncocili boobo?

5. Mbobakamanina buyo kufwa baapostolo, ino bantu bakatalika kulwiibaluka buti lufwu lwa Jesu?

⁵ Mbobakamanina buyo kufwa baapostolo ba Jesu, Banakristo bakubeja bakaba cibeela cambungano. (Mt. 13:24-27, 37-39) Bakatalika kuyiisya “zintu zipilingene kutegwa balikwelele basikwiiya.” (Mil. 20:29, 30) Cintu cimwi ‘cazintu zipilingene’ Banakristo bakubeja ncobakatalika kuyiisya mukuya kwaciindi ncakuti, Jesu tanaakaaba mubili wakwe “ciindi comwe buyo kuti abweze zibi zyabanji,” kweelana a Bbaibbele mbolyaamba. Muciindi caboobo, bakali kuyiisya kuti cipaizyo cakwe ceelede kucitwa cakwiinduluka-induluka. (Heb. 9:27, 28) Mazuba aano bantu banji balaisyoma njiisyo eeyi yakubeja. Balaunka kuzikombelo nsondo ansondo, zimwi ziindi abuzuba, kuyakwiibaluka cipaizyo ca Jesu, calo bacikombelo ca Katolika ncobaamba kuti ‘Mulalilo Uusetekene.’ b Mpoonya muzikombelo zimwi balo tabaibaluki lufwu lwa Jesu nsondo ansondo naa abuzuba, pele tabamvwisyi cini ncocaamba cipaizyo ca Jesu. Bamwi balakonzya kulibuzya kuti, ‘Sena masimpe kuti lufwu lwa Jesu lulakonzya kupa kuti zibi zyangu zilekelelwe?’ Nkaambo nzi ncobalibuzya mubuzyo ooyu? Nkaambo kakuti bakeenwa abantu basyoma kuti zibi tazikonzyi kulekelelwa kwiinda mulufwu lwa Jesu. Ino basikutobela Jesu balo bakacita buti kujatikizya makani aaya?

6. Kuzikusika mu 1872, ino ncinzi ncobakamvwisya basikwiiya Bbaibbele?

⁶ Kumamanino amwaanda wamyaka wa 19, basikwiiya Bbaibbele kabasololelwa a Charles Taze Russell bakatalika kwiiya Magwalo cakulomya. Bakali kuyanda kuzyiba kasimpe kujatikizya ncocaamba cipaizyo ca Jesu alimwi alufwu lwakwe mbolweelede kuyeeyegwa. Kuzikusika mu 1872, bakamvwisya kuti masimpe Jesu wakapa cinunuzyo ikunununa bantu boonse. Kunyina nobakabasisa bamwi kujatikizya zintu nzyobakaiya. Muciindi caboobo, bakabaambila kwiinda mukubelesya mabbuku, manyuzipepa alimwi amamagazini. Kuzwa waawo, kwiinda mukwiiya Banakristo bamumwaanda wamyaka wakusaanguna, bakatalika kucita Ciibalusyo ciindi comwe buyo amwaka.

7. Ino tugwasyigwa buti azintu nzyobakaiya basikwiiya Bbaibbele?

⁷ Mazuba aano, tulagwasyigwa azintu eezyo nzyobakaiya Banakristo aaba myaka minji yainda. Mubuti? Jehova watugwasya kumvwisya ncocaamba cipaizyo ca Jesu alimwi ambocitugwasya toonse. (1Joh. 2:1, 2) Alimwi twaiya kuti Bbaibbele lyaamba zyabulangizi bobilo mbobajisi aabo bamukkomanisya Leza, nkokuti bamwi bajisi bulangizi bwakuyoopona kujulu, mpoonya banji bajisi bulangizi bwakuyoopona mane kukabe kutamani aano anyika. Cilongwe cesu a Jehova cilayuma kapati ciindi notubona mbwatuyanda alimwi ambotugwasyigwa  swebo lwesu kutugama acipaizyo ca Jesu. (1Pet. 3:18; 1Joh. 4:9) Aboobo mbubwenya mbuli bakwesu basyomeka bakaindi, tulabatamba bamwi kutusangana ciindi notucita Ciibalusyo kubelesya nzila njoonya njaakabelesya Jesu.

8. Ninzila nzi bantu ba Jehova njobakatalika kubelesya ikutamba bantu ku Ciibalusyo? (Amubone cifwanikiso.)

⁸ Kwamyaka minji, bantu ba Jehova bali kutamba bantu ku Ciibalusyo. Mu 1881, bakwesu abacizyi ku United States bakatambwa kuti baswaangane antoomwe kuŋanda yamukwesu ku Allegheny, Pennsylvania, kutegwa bacite Ciibalusyo. Mpoonya kumbele, imbungano imwi aimwi yakatalika kulicitila Ciibalusyo. Mu March 1940, basikumwaya bakaambilwa kuti bakali kukonzya kutamba muntu uuli woonse iwakali kutondezya luyandisisyo mucilawo cabo. Mu 1960, kwaciindi cakusaanguna, Ofesi ya Mutabi yakatalika kupa mbungano tupepa tusimbidwe twakutamba bantu ku Ciibalusyo. Kuzwa ciindi eeco, kulamwaigwa tupepa tunji kapati twakutamba bantu ku Ciibalusyo. Nkaambo nzi ncotubeleka canguzu kutamba bantu ku Ciibalusyo?

9-10. Mbaani bagwasyigwa akaambo kakusolekesya nkotucita kutamba bantu ku Ciibalusyo? (Johane 3:16)

⁹ Kaambo kamwi ncotubatambila bantu ku Ciibalusyo nkakuti, tuyanda kuti aabo ibatusangana kwaciindi cakusaanguna baiye kasimpe kujatikizya ncaakatucitila Jehova alimwi a Jesu. (Amubale Johane 3:16.) Tulangila kuti nzyobayakwiiya alimwi akumvwa lya Ciibalusyo, ziyoobagwasya kwiiya zinji kutegwa babe babelesi ba Jehova. Pele kuli abambi bagwasyigwa.

¹⁰ Kunze lyaboobo, tulabatamba abaabo  ibakaleka kubelekela Jehova. Tulacita oobo ikubayeezya kuti Leza ucibayanda. Ibanji balakuzumina kutambwa ooku alimwi tulakkomana kapati ciindi notubabona. Kujanika ku Ciibalusyo kubayeezya lukkomano ndobakajisi ciindi nobakali kubelekela Jehova kaindi. Amumvwe cakuluula caba Monica. c Bakaba basikumwaya basungweede alimwi lyabulwazi bwa COVID-19. Nobakamana kujanika ku Ciibalusyo camu 2021, bakaamba kuti: “Ciibalusyo eeci candigwasya kapati. Kwainda myaka iili 20, kanditabakambaukili bantu alimwi akubatamba ku Ciibalusyo, pele lino ndatalika alimwi. Ndilasolekesya kusikila mpondigolela kutamba bantu ku Ciibalusyo akaambo kakuti ndilalumba kapati kuli ncaakandicitila Jehova alimwi a Jesu.” (Int. 103:1-4) Kufwumbwa naa bantu balakuzumina kutamba kwesu naa pe, tulasolekesya kusikila mpotugolela kubatamba ku Ciibalusyo, nkaambo tulizyi kuti Jehova ulalumba kapati akaambo kakusolekesya kwesu.

11. Mbuti Jehova mbwaakulongezya kusolekesya nkotucita ikutamba bantu ku Ciibalusyo? (Hagai 2:7)

¹¹ Jehova wakulongezya kapati kusolekesya nkotucita kutamba bantu ku Ciibalusyo. Mu 2021, nokuba kuti kwali buyumuyumu akaambo kabulwazi bwa COVID-19, bantu ibakajanika ku Ciibalusyo bakali 21,367,603. Mweelwe wa Bakamboni ba Jehova nyika yoonse ulatandila kunjila ziindi zyobilo acisela kumweelwe ooyu wabantu ibakajanika ku Ciibalusyo! Bwini mbwakuti, Jehova tabikkili buyo maano kumweelwe wabantu bajanika. Muciindi caboobo, ulamubikkila maano muntu umwi aumwi kumugama. (Lk. 15:7; 1Tim. 2:3, 4) Tulisinizyide kuti Jehova ubelesya mulimo wesu wakutamba bantu kutugwasya kujana bantu babombe myoyo.—Amubale Hagai 2:7.

12. Ino mbukkale nzi bukonzya kupa kuti cituyumine kucita Ciibalusyo? (Amubone cifwanikiso.)

¹² Jesu wakasinsima kuti kumazuba aamamanino, tuyoojana buyumuyumu bunji bwiindene-indene, mbuli kukazyigwa abanamukwasyi, kupenzyegwa, nkondo, zilwazi alimwi azimwi buyo. (Mt. 10:36; Mk. 13:9; Lk. 21:10, 11) Zimwi ziindi, bukkale oobu bulakonzya kupa kuti twaalilwe kucita Ciibalusyo calufwu lwa Jesu. Ncinzi bakwesu abacizyi ncobacita kutegwa bazunde buyumuyumu oobu, alimwi mbuti Jehova mbwaabagwasya?

13. Mbuti Jehova mbwaakabagwasya ba Artem kucita Ciibalusyo nokuba kuti bakali muntolongo?

¹³ Kwaangwa. Bakwesu abacizyi ibali muntolongo balasolekesya kucita cili coonse ncobakonzya kutegwa bacite Ciibalusyo calufwu lwa Jesu. Amumvwe cakuluula caba Artem. Ciindi ca Ciibalusyo mu 2020, bakali kwaangidwe mukaseelo kasyoonto kapati alimwi mwakali kuba baange babalilwa kuli bosanwe aciindi comwe. Nokuba kuti bakalaangidwe, bakacikonzya kujana zitondezyo zyakuyoobelesya a Ciibalusyo alimwi bakalibambila kuyoolipeda makani aa Ciibalusyo kutegwa bakagwasyigwe. Pele mukaseelo oomu mwakali baangenyina ibakajisi cilengwa cakufweba akubelesya majwi aakusampaula. Ino bakacita buti mubukkale oobu? Bakabalomba kuti naa inga baleka kufweba alimwi akubelesya majwi aakusampaula kwawoola lyomwe buyo. Cakabagambya kapati ba Artem ncakuti, baangenyina bakazumina kuti tabakafwebi alimwi akubelesya majwi aakusampaula ciindi ca Ciibalusyo. Ba Artem bakaamba kuti: “Ndakabalomba kuti ndibaambile makani aajatikizya Ciibalusyo.” Nokuba kuti bakaambide kuti tabayandi kumvwa  makani aajatikizya Ciibalusyo, pele nobakabona ba Artem mbobakacita Ciibalusyo, bakabalomba kuti babapandulwide kujatikizya ncico.

14. Ncinzi bantu ba Jehova ncobakacita kutegwa bacite Ciibalusyo nokuba kuti kwakali bulwazi bwa COVID-19?

¹⁴ Bulwazi bwa COVID-19. Ciindi bulwazi oobu nobwakatalika, bantu ba Jehova tiibakali kukonzya kucita Ciibalusyo kabali aantoomwe cacigaminina. Pele eeci tiicakabalesya kucita Ciibalusyo. d Ooko nkobakali kukonzya kubelesya Intaneti, imbungano zyakali kubelesya videoconference kucita Ciibalusyo. Pele ino mbuti kujatikizya bantu banji ibatakali kukonzya kubelesya Intaneti? Mumasi aamwi, kwakabikkwa bubambe bwakuti bantu beebelele makani aa Ciibalusyo a TV naa kwaaswiilila awailesi. Kuyungizya waawo, baku Ofesi ya Mutabi bakalekkooda makani mumyaambo yiinda ku 500 kutegwa nobaba bakwesu abacizyi bakkala muminzi bacikonzye kucita Ciibalusyo. Mpoonya bakwesu bakabikka bubambe bwakuti pulogilamu yakalekkoodwa itumwe kubakwesu ibakkala mumasena aaya.

15. Ncinzi ncomwaiya kucakuluula casikwiiya Bbaibbele wazina lyakuti Sue?

 ¹⁵ Kukazyigwa abanamukwasyi. Kuli bamwi, ibuyumuyumu bupati mbobakajana kutegwa bajanike ku Ciibalusyo nkukazyigwa abanamukwasyi. Amubone cakuluula casikwiiya Bbaibbele wazina lya Sue. Mu 2021, kakusyeede buyo buzuba bomwe kuti Ciibalusyo cicitwe, Sue wakaambila baabo ibakali kumuyiisya Bbaibbele kuti takajaniki ku Ciibalusyo akaambo kakuti bamukwasyi wakwe bamwi bakali kumukazya. Bayi bakwe bakamubalila lugwalo lwa Luka 22:44. Mpoonya bakamupandulwida kuti ciindi notwajana buyumuyumu, tweelede kwiiya cikozyanyo ca Jesu kwiinda mukupaila kuli Jehova alimwi akumusyoma cakumaninina. Buzuba bwakatobela, Sue wakabona masimpe kuti mukamu alimwi awaini nkozili, mpoonya akweebelela pulogilamu yamakani aalubazu aakukomba kwamafwumofwumo a jw.org. Kumangolezya aayo, wakaunka kubbedulumu yakwe kali alikke, akutalika kuswiilila makani aa Ciibalusyo afooni. Nocakamana Ciibalusyo, Sue wakalembela mucizyi iwakali kumuyiisya Bbaibbele kuti: “Mwakandikulwaizya kapati jilo. Ndacita zyoonse nzyondikonzya kutegwa ndicite Ciibalusyo alimwi awalo Jehova wandigwasya kapati. Ndilikkomene kapati akaambo kakuti ndacikonzya!” Sena muyeeya kuti Jehova ulakonzya kumugwasya andinywe kuti mwalijana mubukkale bukozyenye?

16. Nkaambo nzi ncotuli masimpe kuti Jehova uyookulongezya kusolekesya nkotuyoocita kutegwa tujanike ku Ciibalusyo? (Baroma 8:31, 32)

¹⁶ Jehova ulalumba kapati akaambo kakusolekesya nkotucita kutegwa tuyeeye lufwu lwa Jesu. Tulisinizyide kuti uyootulongezya kuti naa twatondezya kulumba kuli ceeco ncaakatucitila. (Amubale Baroma 8:31, 32.) Aboobo, atube amakanze aakuyoojanika ku Ciibalusyo camwaka uuno. Alimwi kakusyeede nsondo zisyoonto kuti Ciibalusyo cicitike alimwi anocamana, tuyanda kucita zinji mumulimo wa Jehova.