1-2. (a) Ino kuzinzibala kuyeeya buumi bwa Jesu alimwi amulimo wakwe inga kwatupa kulimvwa buti? (b) Ncinzi ncotutiibandike mucibalo eeci?

 CIINDI notwafwidwa muyandwa wesu, inga tulamuyeeya kapati. Kumatalikilo, inga kacitucisa kapati twayeeya mazuba aayo naakacili kupona, kwaambisya kuti naa wakapenga kapati naakali kuyanda kufwa. Pele mukuya kwaciindi, inga tulatalika alimwi kukkomana twayeeya cintu cimwi cibotu ncaakatuyiisya, kutucitila naa ncaakaamba kutegwa atukulwaizye akutupa kukkomana.

² Mbubwenya buyo, cilatucisa kapati twabala mbwaakapenga Jesu alimwi akufwa. Ciindi ca Ciibalusyo, nceciindi notuyeeyesya mbociyandika kapati cipaizyo cakwe. (1Kor. 11:24, 25) Nokuba boobo, tulakkomana kapati twayeeya zintu zyoonse nzyaakaamba Jesu alimwi akucita ciindi naakali anyika. Tulakulwaizyigwa kapati twayeeya ncacita lino ancayootucitila kumbele. Kuzinzibala kuyeeya zintu zili boobu alimwi aluyando ndwajisi kulindiswe, kulakonzya kutukulwaizya kutondezya kulumba kweelana ambotutiibone mucibalo eeci.

3. Ntwaambo nzi itweelede kutupa kulumba kujatikizya cinunuzyo?

³ Tulalumba kapati ciindi notuzinzibala kuyeeya buumi bwa Jesu alimwi alufwu lwakwe. Ciindi naakali kucita mulimo wakwe anyika, wakayiisya bantu kujatikizya zintu zibotu nzyobuyoocita Bwami bwa Leza. Tulakakkomanina kapati kasimpe aaka ikajatikizya Bwami. Tulalumba kapati akaambo kacinunuzyo nkaambo cipa kuti tucikonzye kuba acilongwe cibotu a Jehova alimwi a Jesu. Kuyungizya waawo, aabo ibajisi lusyomo muli Jesu balijisi bulangizi bwakuyoopona kukabe kutamani  akuyoobonana abayandwa babo bakafwa. (Joh. 5:28, 29; Rom. 6:23) Kunyina ncotwakacita kutegwa tweelele kupegwa zilongezyo eezyi; alimwi kunyina ncotukozya kumupa Leza a Kristo akaambo kazintu nzyobakatucitila. (Rom. 5:8, 20, 21) Pele tulakonzya kutondezya kuti tulalumba kapati. Mbuti mbotukonzya kucita oobo?

4. Ino Mariya Magadalene wakatondezya buti kulumba akaambo kacintu ncaakamucitila Jesu? (Amubone cifwanikiso.)

⁴ Amuyeeye kujatikizya mukaintu mu Juda uutegwa Mariya Magadalene. Wakali mubukkale bukatazya kapati nkaambo wakanjidwe madaimona aali 7 alo aakali kumupenzya kapati. Ambweni wakali kuyeeya kuti kunyina wakali kukonzya kumugwasya. Pele amuyeeye buyo mbwaakakkomana ciindi Jesu naakaagwisya madaimona aayo. Aboobo kutegwa atondezye kulumba, wakaba sikutobela wa Jesu akutalika kubelesya ciindi cakwe, nguzu alimwi azintu nzyaakajisi kugwasyilizya mulimo wa Jesu. (Lk. 8:1-3) Nokuba kuti Mariya wakalumba kapati akaambo kacintu ncaakamucitila Jesu, kweelede kuti tanaakazyi kuti kuli acimbi cintu cipati ncaakali kuyoomucitila kumbele. Jesu wakali kuyakwaaba buumi bwakwe akaambo kabantu “kutegwa muntu uuli woonse uumusyoma atanyonyoonwi, pele abe abuumi butamani.” (Joh. 3:16) Nokuba boobo, Mariya wakatondezya kulumba kwakwe kwiinda mukuzumanana kusyomeka kuli Jesu. Ciindi Jesu naakali kupenga acisamu cakupenzezya, Mariya wakaliimvwi munsi nkaambo wakali kumuyanda kapati Jesu alimwi wakali kuyanda kubaumbulizya bamwi. (Joh. 19:25) Naakafwa Jesu, Mariya abamakaintu bambi bobilo bakaleta tununkilizyo kucuumbwe kutegwa ananikwe katanazikkwa. (Mk. 16:1, 2) Mariya wakalumbulwa kapati akaambo kakuzumanana kusyomeka kuli Jesu. Wakaba acoolwe cakubonana alimwi akubandika a Jesu naakabusyigwa, nkokuti coolwe ncobatakaba ancico basikwiiya banji.—Joh. 20:11-18.

5. Mbuti mbotukonzya kutondezya kulumba akaambo kazintu zyoonse nzyaatucitila Jehova a Jesu?

 ⁵ Andiswe tulakonzya kutondezya kulumba akaambo kazintu zyoonse nzyaatucitila Jehova a Jesu kwiinda mukubelesya ciindi cesu, nguzu alimwi amali eesu kugwasyilizya mulimo wa Bwami. Mucikozyanyo, tulakonzya kulyaaba kugwasyilizya mumulimo wakuyaka alimwi akubambulula masena aakukombela.

6. Nkaambo nzi ncotukonzya kwaamba kuti cinunuzyo ncipego cimugeme umwi aumwi wesu?

⁶ Twayeeya Jehova a Jesu mbobatuyanda kapati, citupa kuti andiswe tubayande. (1Joh. 4:10, 19) Alimwi twayeeya kuti Jesu wakafwida ndiswe kutugama citupa kuti tubayande kapati. Mwaapostolo Paulo wakakazumina kaambo aaka, alimwi wakatondezya kulumba kwakwe ciindi naakalembela bana Galatiya kuti: ‘Mwana wa Leza, wakandiyanda akulyaaba akaambo kandime.’ (Gal. 2:20) Kwiinda mucinunuzyo, Jehova wakamukwela nywebo kulinguwe kutegwa mube balongwe bakwe. (Joh. 6:44) Kweelede kuti cilamukkomanisya kapati kuzyiba kuti kuli cintu cimwi cibotu Jehova ncaakabona mulindinywe alimwi akuti wakabbadela muulo waatala kapati kutegwa mweelele kuba mulongwe wakwe. Alimwi buya eeci cimupa kuyumya luyando ndomujisi kuli Jehova a Jesu. Aboobo inga cabota kulibuzya kuti, ‘Ino luyando oolu lweelede kundikulwaizya kucita nzi?’

7. Kweelana ambotwabona mucifwanikiso, ino inga twatondezya buti luyando ndotujisi kuli Jehova a Jesu? (2 Bakorinto 5:14, 15; 6:1, 2)

⁷ Luyando ndotujisi kuli Leza alimwi a Kristo, lutukulwaizya kubayanda bamwi. (Amubale 2 Bakorinto 5:14, 15; 6:1, 2.) Nzila imwi mbotutondezya luyando lwesu nkwiinda mukutola lubazu cabusungu mumulimo wakukambauka. Tweelede kubandika amuntu uuli woonse ngotwajana. Tatweelede kusalulula muntu uuli woonse akaambo buyo kamubala wakwe naa  musyobo. Tweelede kubandika abantu boonse kufwumbwa naa mbavwubi naa mbacete akuti naa baliyiide naa pe. Kwiinda mukucita boobo, nkokuti tulabeleka kweelana amakanze aa Leza aakuti “bantu boonse bafwutulwe akuba aluzyibo lwini-lwini lwakasimpe.”—1Tim. 2:4.

8. Ino inga twatondezya buti kuti tulabayanda bakwesu abacizyi?

⁸ Kunze lyaboobo, tulatondezya luyando ndotujisi kuli Leza a Kristo kwiinda mukubayanda bakwesu abacizyi. (1Joh. 4:21) Tweelede kubabikkila maano kapati alimwi akubagwasya ciindi nobali mumapenzi. Tweelede kubaumbulizya nobafwidwa muyandwa wabo, kubaswaya ciindi nobacisidwe alimwi akubakulwaizya ciindi nobatyompedwe. (2Kor. 1:3-7; 1Tes. 5:11, 14) Kuyungizya waawo, tweelede kuzumanana kubapailila nkaambo tulizyi kuti “mupailo wakukombelezya wamuntu mululami ulabeleka canguzu kapati.”—Jak. 5:16.

9. Ino ninzila nzi imwi motukonzya kutondezya kuti tulabayanda bakwesu abacizyi?

⁹ Alimwi tulatondezya kuti tulabayanda bakwesu abacizyi kwiinda mukusolekesya kukkala muluumuno ambabo. Tweelede kusolekesya kwiiya cikozyanyo ca Jehova cakulekelela. Jehova wakalisungula kwaaba Mwanaakwe kuti afwe akaambo kazibi zyesu. Aboobo andiswe tweelede kulyaaba kulekelela bakwesu abacizyi ciindi nobatulubizyila. Tatweelede kuba mbuli muzike mubi wamucikozyanyo ca Jesu cimwi. Nokuba kuti simalelaakwe wakamulekelela cikwelete cipati ncaakajisi, walo wakaalilwa kulekelela muzikenyina iwakajisi cikwelete cisyoonto buyo. (Mt. 18:23-35) Aboobo, ikuti naa mwakaimpana amuntu umwi mumbungano, mbuti kuti mwasaanguna ndinywe kubweza ntaamu yakubamba luumuno kacitanasika Ciibalusyo? (Mt. 5:23, 24) Ikuti mwacita oobo, muyootondezya kuti mulamuyanda kapati Jehova alimwi a Jesu.

10-11. Ino baalu inga batondezya buti kuti balamuyanda Jehova a Jesu? (1 Petro 5:1, 2)

¹⁰ Ino baalu inga batondezya buti kuti balamuyanda Jehova alimwi a Jesu? Nzila imwi iiyandika kapati mbobakonzya kucita oobo nkwiinda mukuzilanganya kabotu mbelele zya Jesu. (Amubale 1 Petro 5:1, 2.) Jesu wakakasalazya kaambo aaka kuli Petro. Naakamana kumukaka Jesu ziindi zyotatwe, kweelede kuti Petro wakaliyandide kutondezya kuti ulamuyanda kapati Jesu. Naakabusyigwa, Jesu wakabuzya Petro kuti: “Simoni omwana wa Johane, sena ulandiyanda?” Kweelede kuti Petro wakalilibambilide kucita cili coonse kutegwa atondezye luyando ndwaakajisi kuli Simalelaakwe. Mpoonya Jesu wakaambila Petro kuti: “Koembela tubelele twangu.” (Joh. 21:15-17) Alimwi mubuumi bwakwe boonse, Petro wakazilanganya caluyando mbelele zya Mwami, ikutondezya kuti wakali kumuyanda Jesu.

¹¹ Nobaalu, mbuti mbomukonzya kutondezya kuti majwi aa Jesu ngaakaambila Petro alayandika kapati akulindinywe ciindi ca Ciibalusyo? Mulakonzya kutondezya mbomumuyanda kapati Jehova a Jesu, kwiinda mukutola lubazu mumulimo wabweembezi alimwi akusolekesya kugwasya baabo batacisungweede kupilukila kuli Jehova. (Ezk. 34:11, 12) Alimwi mulakonzya kusola kubakulwaizya basikwiiya Bbaibbele, abantu bajisi luyandisisyo aabo ibajanika ku Ciibalusyo kutegwa balimvwe kutambulwa, nkaambo tulizyi kuti bumwi buzuba inga baakuba basikutobela Jesu.

12. Nkaambo nzi kuzinzibala kuyeeya majwi Jesu ngaakaamba katanafwa ncokutupa kuba basicamba? (Johane 16:32, 33)

¹² Busiku katanafwa, Jesu wakaambila basikwiiya bakwe kuti: “Munyika munoojisi mapenzi, pele amube basicamba! Mebo ndaizunda  nyika.” (Amubale Johane 16:32, 33.) Ciindi basinkondonyina nobakamukonga, ncinzi cakagwasya Jesu kuba sicamba alimwi akuzumanana kusyomeka kusikila kulufwu? Nkusyoma Jehova. Mbwaanga wakalizyi kuti basikumutobela abalo bakali kuyoojana masunko aakozyenye aakwe, Jesu wakalomba Jehova kuti abakwabilile. (Joh. 17:11) Nkaambo nzi eeci ncocitupa kuba basicamba? Nkaambo kakuti Jehova ulaanguzu kapati kwiinda basinkondoma bali boonse. (1Joh. 4:4) Ulabona zintu zyoonse. Aboobo tuli masimpe kuti, ikuti naa twasyoma Jehova, ulakonzya kutugwasya kuba basicamba akuleka kuyoowa.

13. Mbuti Josefa waku Aremateya mbwaakatondezya busicamba?

¹³ Amuyeeye kujatikizya Josefa waku Aremateya. Muntu ooyu wakali kulemekwa kapati aba Juda. Alimwi wakali wamu Nkuta Mpati Yaba Juda. Pele ciindi Jesu naakali kucita mulimo wakwe waanyika, Josefa tanaakali muntu sicamba pe. Johane wakaamba kuti wakali “sikwiiya wa Jesu iwakali kulisisa akaambo kakuyoowa ba Juda.” (Joh. 19:38) Nokuba kuti Josefa wakali kuukkomanina mulumbe wa Bwami, wakalisisa kuli bamwi kuti wakali kumusyoma Jesu. Kweelede kuti wakali kuyoowa kuti bantu balaleka kumulemeka kuti naa bazyiba kuti ngusikwiiya wa Jesu. Kufwumbwa mbocakabede, Bbaibbele litwaambila kuti naakafwa Jesu, Josefa “wakalisungula kuunka kuli Pilato akuyoolomba mubili wa Jesu.” (Mk. 15:42, 43) Lino tanaakacili kulisisa kuti wakali sikwiiya wa Jesu.

14. Ncinzi ncomweelede kucita kuti kamujisi penzi lyakuyoowa bantu?

¹⁴ Sena andinywe kuli nomuyoowa bantu mbuli mbwaakacita Josefa? Ciindi nomuli kucikolo naa kumulimo, sena zimwi ziindi mufwa nsoni kwaambila bamwi kuti muli umwi wa Bakamboni ba Jehova? Sena mulawayawaya kuba sikumwaya naa kubbapatizyigwa akaambo kakuyoowa bantu? Tamweelede kulekela zintu zili boobu kumupa kuleka kucita cintu ncomuzyi kuti cililuzi. Amupaile kuli Jehova cakuzwa ansi amoyo. Amumulombe kuti amugwasye kuba basicamba mukucita kuyanda kwakwe. Aboobo, mbomunooyaabubona Jehova mbwaayiingula mipailo yanu, muyoozumanana kuba basicamba.—Is. 41:10, 13.

15. Ciindi Jesu naakalibonya kuli basikwiiya bakwe, ino lukkomano lwakabapa kucita nzi? (Luka 24:52, 53)

¹⁵ Basikwiiya bakausa kapati ciindi naakafwa Jesu. Amuciyeeyele buyo kuti nomwakali ndinywe mubukkale oobu. Basikwiiya aaba tiibakasweekelwa buyo mulongwe wabo, pele alimwi bakalimvwa kubula bulangizi. (Lk. 24:17-21) Nokuba boobo, ciindi Jesu naakalibonya  kulimbabo, wakasoleka kubagwasya kuti babone mbwaakabuzuzikizya businsimi bwamu Bbaibbele. Kunze lyaboobo, wakabapa amulimo uuyandika kapati. (Lk. 24:26, 27, 45-48) Kuzikusika ciindi naakali kuunka kujulu kakwiindide mazuba aali 40, basikwiiya tiibakacili kuuside pe, pele bakalikkomene kapati. Akaambo kakuzyiba kuti Simalelaabo wakali muumi alimwi wakalilibambilide kubagwasya kuzuzikizya mulimo wabo mupya, cakabapa kukkomana kapati. Aboobo, eeci cakabapa kuzumanana kumutembaula Jehova.—Amubale Luka 24:52, 53; Mil. 5:42.

16. Mbuti mbotukonzya kubayiya basikwiiya ba Jesu?

¹⁶ Mbuti mbotukonzya kubayiya basikwiiya ba Jesu? Tulakonzya kujana lukkomano kwiinda mukukomba Jehova ciindi coonse, ikutali buyo ciindi ca Ciibalusyo. Eeci caamba kuti tuyandika kubikka zintu zya Bwami mubusena bwakusaanguna mubuumi bwesu. Mucikozyanyo, banji bacinca mulongo wabo wakucita zintu kutegwa kabatola lubazu mumulimo wakukambauka, kabajanika kumiswaangano alimwi akucita kukomba kwamumukwasyi lyoonse. Mane bamwi basala kuliimya zintu zimwi zyakumubili kutegwa babelesyegwe kapati mumbungano naa kutegwa bakabelekele kubusena bubulide basikumwaya ba Bwami. Nokuba kuti tuyandika kuliyumya kutegwa tuzumanane kumubelekela Jehova, usyomezya kuti uyootulongezya kapati ikuti twasaanguna kubikka zintu zya Bwami mubusena bwakusaanguna mubuumi bwesu.—Tus. 10:22; Mt. 6:32, 33.

17. Ino makanze nzi ngomujisi muciindi cino ca Ciibalusyo? (Amubone cifwanikiso.)

¹⁷ Tuliyandide kuyoojanika ku Ciibalusyo muli Bwabili, April 4. Nokuba boobo, ecino nceciindi cakutalika kuzinzibala kuyeeya buumi bwa Jesu alufwu alimwi aluyando ndwaakatutondezya walo a Jehova, ikutali kulindila ciindi eeco. Mpoonya ciindi ca Ciibalusyo, amukaziyeeyesye kapati zintu eezyi. Mucikozyanyo, mulakonzya kubikka ciindi cakubala akuzinzibala kuyeeya kujatikizya zintu zyakacitika izyaambidwe muccaati yakuti “Nsondo Yamamanino Yabuumi bwa Jesu Bwaanyika” iijanika mucibeela ca Makani Aayungizyidwe B12 mu Bbaibbele lya Busanduluzi Bwanyika Mpya. Nomubala, amuyandaule tupango twamu Bbaibbele tumupa kulumba kapati, tuyumya luyando lwanu, busicamba alimwi alukkomano. Mpoonya amusole kujana nzila zigaminide mbomukonzya kutondezya kulumba kuzwa ansi aamoyo. Amube masimpe kuti Jesu uyookkomana kapati akaambo kakusolekesya koonse nkomucita kutegwa kamumuyeeya ciindi eeci ca Ciibalusyo.—Ciy. 2:19.