1. Nkaambo nzi ncotukonzya kuyoowa zimwi ziindi?

 TOONSE tulaakuyoowa zimwi ziindi. Pele akaambo kakuti tulizyi ncolyaamba Bbaibbele, tatubayoowi bantu bafwide, tatuyoowi madaimona naa zintu iziyoocitika kumbele. Nokuba aboobo, tupona muziindi zikatazya kapati, aboobo tulakonzya kuyoowa akaambo kankondo, bugwebenga alimwi amalwazi. (Lk. 21:11) Kunze lyaboobo, tulakonzya kuyoowa bantu mbuli beendelezi bamfwulumende ibatudyaaminina naa banamukwasyi ibakazya bukombi bwakasimpe. Ibamwi balalibilika kuti ambweni inga tiibacikonzya kuliyumya kupenzi ndyobajisi lino naa eelyo ndyobakonzya kujana kumbele.

2. Amwaambe mbwaakalimvwide Davida ciindi naakali ku Gati.

² Awalo Davida wakali kuyoowa zimwi ziindi. Mucikozyanyo, ciindi Mwami Saulo naakali kumuvwima kuti amujaye, Davida wakatijila kumunzi waba Filisiti wa Gati. Kalitanalampa, Akisi imwami wa Gati, wakazyiba kuti Davida wakali sikalumamba singuzu iwakajaya “makumi aazyuulu” zyaba Filisiti. Akaambo kaceeci, Davida “wakayoowa kapati.” (1Sam. 21:​10-12) Wakalibilika kujatikizya ncaakali kuyoomucita Akisi. Pele ncinzi cakagwasya Davida kuba sicamba akuleka kuyoowa?

3. Kweelana a Intembauzyo 56:​1-3, 11, ncinzi cakagwasya Davida kuleka kuyoowa?

³ Kulugwalo lwa Intembauzyo 56, Davida wakapandulula mbwaakalimvwide ciindi naakali ku Gati. Mu Intembauzyo eeyi, Davida wakaamba kaambo ncaakayoowede alimwi acakamugwasya kuleka kuyoowa. Ciindi naakayoowa, Davida wakasyoma Jehova. (Amubale Intembauzyo 56:​1-3, 11.) Davida wakalijisi twaambo tubotu itwakali kumupa kusyoma Jehova. Kwiinda mukugwasyigwa a Jehova, Davida wacita cintu cimwi cigambya. Wakalicengeezya kuba muntu uusondokede calo icakamugwasya. Muciindi cakuyanda kumujaya, Akisi wakamutanda Davida, aboobo Davida wakacikonzya kutija.—1Sam. 21:13–22:1.

4. Mbuti mbotukonzya kumusyoma Jehova cakumaninina? Amupe cikozyanyo.

⁴ Andiswe tulakonzya kuleka kuyoowa kwiinda mukusyoma Jehova. Pele mbuti mbotukonzya kumusyoma Jehova cakumaninina, kwaambisya ciindi notuyoowede? Amubone cikozyanyo eeci. Ikuti mwazyiba kuti mujisi bulwazi bumwi, kumatalikilo inga mwayoowa kapati. Nokuba boobo, mulakonzya kucesya kuyoowa ikuti kamumusyoma dokota wanu. Ambweni dokota ooyo wakasilika kale bantu ibakali kuciswa bulwazi buli mbuli bwanu. Alimwi ciindi nomumupandulwida mbomulimvwide, wamuswiilila kabotu-kabotu calo icamupa kulimvwa kuti ulamubikkila maano. Aboobo ulakonzya kumupa musamu iwakabagwasya kapati bamwi. Mbubwenya buyo, tulakonzya kumusyoma Jehova cakumaninina kwiinda mukuzinzibala kuyeeya zintu nzyaakacita kale, nzyacita lino alimwi anzyayootucitila kumbele. Eeci ncaakacita Davida. Ciindi notulanga-langa majwi amwi aali ku Intembauzyo 56, amubone andinywe mbomukonzya kumusyoma Jehova cakumaninina akuleka kuyoowa.

NZINTU NZI NZYAAKACITA KALE JEHOVA?

5. Ino Davida wakali kuzinzibala kuyeeya nzi ciindi naakayoowede? (Intembauzyo 56:​12, 13)

⁵ Nokuba kuti buumi bwa Davida bwakali muntenda, wakazumanana kuyeeya zintu zibotu nzyaakacita kale Jehova. (Amubale Intembauzyo 56:​12, 13.) Eeci ncaakali kucita mubuumi bwakwe boonse. Mucikozyanyo, zimwi ziindi wakali kuzinzibala kuyeeya zintu nzyaakalenga Jehova calo icakali kumuyeezya nguzu zinji zyajisi akuti ulabayanda kapati bantu. (Int. 65:​6-9) Alimwi Davida wakali kuzinzibala kuyeeya zintu Jehova nzyaakabacitila bamwi. (Int. 31:19; 37:​25, 26) Kunze lyaboobo, wakali kuzinzibala kuyeeya zintu nzyaakamucitila kale Jehova lwakwe kumugama. Mucikozyanyo, wakali kumugwasya akumukwabilila Davida kuzwa ciindi naakali muvwanda. (Int. 22:​9, 10) Amweezeezye buyo kuzinzibala kuyeeya zintu eezyi mbokwakamugwasya Davida kumusyoma Jehova cakumaninina.

6. Ciindi notwayoowa, ncinzi cikonzya kutugwasya kumusyoma Jehova cakumaninina?

⁶ Ciindi nomwayoowa, amulibuzye kuti, ‘Nzintu nzi Jehova nzyaakacita kale?’ Amuzinzibale kuyeeya zintu nzyaakalenga. Mucikozyanyo, “amulangisye” Jehova mbwalanganya bayuni amaluba-luba nokuba kuti tanaakalengwa mucinkozya cakwe alimwi taakonzyi kumukomba. Kuzinzibala kuyeeya zintu eezyi kulakonzya kutugwasya kuba masimpe kuti ulakonzya kutulanganya andiswe alimwi akumusyoma cakumaninina. (Mt. 6:​25-32) Kunze lyaboobo, amuzinzibale kuyeeya zintu Jehova nzyaakabacitila bakombi bakwe. Mulakonzya kwiiya muntu uumwi uulembedwe mu Bbaibbele iwakatondezya lusyomo luyumu, naa kubala cakuluula camubelesi umwi wa Jehova wamazuba aano. a Kuyungizya waawo, amuzinzibale kuyeeya Jehova mbwamulanganya nywebo lwanu kumugama. Ino wakamugwasya buti kutegwa mukaiye kasimpe? (Joh. 6:44) Ino wakayiingula buti mipailo yanu? (1Joh. 5:14) Mbuti mbomugwasyigwa buzuba abuzuba akaambo kacipaizyo ca Mwanaakwe?—Ef. 1:7; Heb. 4:​14-16.

7. Ino cikozyanyo camusinsimi Daniele cakabagwasya buti ba Vanessa kuleka kuyoowa?

⁷ Ba Vanessa, b imucizyi waku Haiti, bakali mubukkale buyoosya kapati. Mwaalumi umwi wamucilawo mobakali kukkala wakali kubatumina mafooni akubalembela tugwalo abuzuba, ikubasinikizya kuti basyabane. Ba Vanessa bakamwaambila cakutainda mumbali mwaalumi ooyu kuti tabayandi. Akaambo kaceeci, mwaalumi ooyu wakanyema kapati mane buya akutalika kubakonga. Ba Vanessa bakaamba kuti: “Ndakayoowa kapati.” Ino bakacita buti kutegwa bacileke kuyoowa? Bakacita kufwumbwa ncobakali kukonzya kutegwa balikwabilile. Mwaalu umwi wakabagwasya kuti babandike abeendelezi bamfwulumende. Pele alimwi ba Vanessa bakazinzibala kuyeeya Jehova mbwaakabagwasya babelesi bakwe kaindi. Bakaamba kuti: “Muntu wakusaanguna ngondakayeeya musinsimi Daniele. Wakawaalwa mumulindi imwakali basyuumbwa bakafwide nzala nokuba kuti kunyina cibi cili coonse ncaakacita. Pele Jehova wakamulanganya. Aboobo, ndakalomba Jehova kuti andigwasye kupenzi ndyondakajisi. Nondakamana kucita boobo, tiindakacili kuyoowa kabili.”—Dan. 6:​12-22.

NZINTU NZI NZYACITA LINO JEHOVA?

8. Ncinzi Davida ncaakali masimpe? (Intembauzyo 56:8)

⁸ Nokuba kuti Davida wakali muntenda mpati ciindi naakali ku Gati, tanaakabikkila maano kuyeeya zintu izyakali kumupa kuyoowa. Muciindi caboobo, wakabikkila maano kuyeeya zintu nzyaakali kumucitila Jehova aciindi eeco. Akaambo kaceeci, Davida wakabona kuti Jehova ngowakali kumusololela akumukwabilila alimwi akuti wakalizyi mbwaakali kulimvwa. (Amubale Intembauzyo 56:8.) Kunze lyaboobo, Davida wakalijisi balongwe babotu mbuli Jonatani a Mupaizi Mupati Ahimeleki, balo ibakali kumuyumya-yumya alimwi akumugwasyilizya. (1Sam. 20:​41, 42; 21:​6, 8, 9) Aboobo, nokuba kuti Mwami Saulo wakali kuyanda kumujaya, Davida wakacikonzya kutija. Wakali masimpe kuti Jehova wakalicizyi cini icakali kumucitikila alimwi ambwaakali kulimvwa.

9. Ncinzi ncazyi Jehova kujatikizya umwi aumwi wesu?

⁹ Ciindi nomwajana penzi limupa kuyoowa, amuyeeye kuti Jehova ulilibwene penzi eelyo alimwi ambolimupa kulimvwa. Mucikozyanyo, Jehova tanaakabona buyo mbobatakali kweendelezyegwa kabotu bana Israyeli mu Egepita, pele alimwi wakalaazyi ‘amapenzi aabo.’ (Kul. 3:7) Davida wakaimba kuti Jehova wakakubona “kupenga” kwakwe ‘amapenzi aakwe mapati.’ (Int. 31:7) Alimwi nociba ciindi bantu ba Leza nobakali kupenga akaambo kakutasala kabotu, “wakali kupenga mumoyo awalo.” (Is. 63:9) Aboobo ciindi nomwayoowa, Jehova inga ulizyi mbomulimvwide alimwi uliyandide kumugwasya kuleka kuyoowa.

10. Ncinzi cimupa kusyoma kuti Jehova ulimubwene akuti uyoomugwasya kulwana penzi lili lyoonse ndyomukonzya kujana?

¹⁰ Ikuti kamujisi penzi liyoosya kapati, mulakonzya kwaalilwa kubona mbwamugwasyilizya Jehova. Ino inga mwacita buti? Amumulombe kuti amugwasye kubona mbwamugwasyilizya. (2Bam. 6:​15-17) Mpoonya amusole kuyeeya twaambo ootu: Sena kuli makani naa bwiinguzi bumwi ibwakamukulwaizya kapati kumiswaangano yambungano? Sena kuli cakumwaya cimwi, vidiyo naa lwiimbo lumbi ilwakamuyumya-yumya? Sena kuli kaambo naa lugwalo lumwi ndwaakamwaambila mukwesu naa mucizyi umwi ilwakamukulwaizya kapati? Zimwi ziindi, tulakonzya kwaalilwa kubona mbotugwasyigwa akaambo kaluyando ndobatutondezya bakwesu abacizyi alimwi acakulya cakumuuya ncotutambula. Pele bwini mbwakuti, eezyi nzipego zitaliboteli kuzwa kuli Jehova. (Is. 65:13; Mk. 10:​29, 30) Zitondezya kuti ulamubikkila maano kapati. (Is. 49:​14-16) Alimwi akuti mweelede kumusyoma cakumaninina.

11. Ncinzi cakagwasya ba Aida kuleka kuyoowa?

¹¹ Ba Aida ibakkala ku Senegal, bakabikkila maano kubona Jehova mbwaakali kubagwasya ciindi nobakajisi penzi limwi. Mbwaanga mbabakali bapati akati kabanabokwabo, bazyali babo bakali kulangila kuti kababeleka mulimo uuvwolwa mali manji kutegwa kabacikonzya kulilanganya alimwi akubalanganya. Pele nobakaubya-ubya buumi bwabo kutegwa bacite bupainiya, ba Aida bakaba apenzi lyakubula mali. Akaambo kaceeci, banamukwasyi bakanyema kapati akutalika kubafwubaazya. Ba Aida bakaamba kuti: “Ndakatalika kulibilika kuti ambweni tandikoocikonzya kugwasya bazyali bangu alimwi akuti banamukwasyi boonse balandisulaika. Mane buya, ndakatalika kumupa mulandu Jehova akaambo kakulekela kuti zintu ziindile boobu kubija.” Mpoonya bumwi buzuba bakamvwa makani amwi kumiswaangano. Bakaamba kuti: “Mwaambi wakaamba kuti Jehova inga ulizizyi zintu zitupa kulibilika naa kuyoowa. Aboobo kwiinda mukugwasyigwa abaalu alimwi abamwi, asyoonto-syoonto ndakatalika alimwi kulimvwa kuti Jehova ulandiyanda. Ciindi nindakali kupaila kuli Jehova, tiindakacili kudooneka kuti ulandigwasya alimwi ndakali kulimvwa kuba aluumuno lwamumizeezo nondakali kubona mipailo yangu kayiingulwa.” Mukuya kwaciindi, ba Aida bakajana mulimo iwakali kubagwasya kujana mali aakuligwasya kutegwa bazumanane kucita bupainiya akugwasya bazyali babo. Bakaamba kuti: “Ndakaiya kumusyoma Jehova cakumaninina. Aboobo mazuba aano, kuyoowa inga kulamana ndamana kupaila.”

NZINTU NZI NZYAYOOCITA KUMBELE JEHOVA?

12. Kweelana a Intembauzyo 56:​9, ino Davida wakazyi nzi?

¹² Amubale Intembauzyo 56:9. Lugwalo oolu luyubununa cintu cimbi cakagwasya Davida ciindi naakayoowede. Nokuba kuti buumi bwakwe bwakacili muntenda, wakali kuzinzibala kuyeeya zintu Jehova nzyaakali kuyoomucitila kumbele. Davida wakalizyi kuti Jehova wakali kuyoomuvwuna aciindi ceelede. Mane buya, Jehova wakaambide kuti Davida wakali kuyooba mwami wa Israyeli. (1Sam. 16:​1, 13) Kuli Davida, kufwumbwa cintu Jehova ncaakamusyomezyede cakali mbuli kuti cazuzikizyigwa kale.

13. Ncinzi ncotuzyi kujatikizya Jehova?

¹³ Ino Jehova wakamusyomezya kumucitila nzi? Tatulangili kuti unootukwabilila kumapenzi oonse. c Nokuba boobo, kufwumbwa mapenzi ngotukonzya kujana mubweende bwazintu oobu, Jehova uyakwaamanizya munyika mpya. (Is. 25:​7-9) Kayi Mulengi wesu ulaanguzu kapati cakuti ulakonzya kubusya bafwide, kutuponya alimwi akunyonyoona basikutukazya boonse.—1Joh. 4:4.

14. Nzintu nzi nzyotweelede kunoozinzibala kuyeeya?

¹⁴ Ciindi nomwayoowa, amuzinzibale kuyeeya zintu Jehova nzyayoocita kumbele. Amusole kuyeeya mbomuyoolimvwa ciindi Saatani aakunyonyoonwa, ciindi bantu babi baakunjililwa busena abalulami alimwi akutalondoka nokunooyaabumana asyoonto-syoonto buzuba bumwi abumwi. Citondezyo cimwi icakali amuswaangano wacooko wamu 2014 cakatondezya mbotukonzya kuzinzibala kuyeeya kujatikizya bulangizi bwesu. Bausyi bakali kubandika amukwasyi wabo kujatikizya lugwalo lwa 2 Timoteyo 3:​1-5 mbolukonzya kubalwa kuti naa kalwaamba zintu mboziyooba mu Paradaiso. Bakaamba kuti: “Pele kozyiba kuti, munyika mpya kuyooba mazuba aakkomanisya ncobeni. Nkaambo bantu banooyandana, bayanda zintu zyakumuuya, batalidundi, batalisumpuli, bayandisya Leza, bamvwida bazyali, balumba, basyomeka, bajisi luyando kubanamukwasyi, banyoneka, lyoonse baamba zibotu kujatikizya bamwi, balilesya, babombe, bayanda bubotu, basyomeka kuli bamwi, balaika, batalitukumuni, bayandisya Leza kwiinda zyakulikondelezya, balyaabide ncobeni mubukombi; eelyo kokakatila kubantu bali boobu.” Sena mulabandika abanamukwasyi naa basyominyoko kujatikizya buumi mbobuyooba munyika mpya?

15. Nokuba kuti mucizyi Tanja wakali kuyoowa, ncinzi cakamugwasya kuleka kuyoowa?

¹⁵ Mucizyi Tanja waku North Macedonia wakacikonzya kuleka kuyoowa kwiinda mukuzinzibala kuyeeya zilongezyo zyakumbele. Bazyali bakwe bakanyema kapati ciindi naakatalika kwiiya Bbaibbele. Wakaamba kuti: “Zintu zimwi nzyondakali kuyoowa kuti inga zyacitika, zyakacitika ncobeni. Baama bakali kunduuma citaambiki kufwumbwa buyo ndazwa kumiswaangano. Mane buya boonse bobilo abataata bakali kundikonga kuti bayoondijaya kuti naa ndikabe Kamboni wa Jehova.” Mukuya kwaciindi, bazyali bamucizyi ooyu bakamutanda aŋanda. Ino wakacita buti? Wakaamba kuti: “Ndakabikkila maano kuyeeya mbondakali kuyookkomana mane kukabe kutamani akaambo kakuzumanana kusyomeka kuli Jehova. Kunze lyaboobo, ndakayeeya bulumbu mbwayoondipa Jehova munyika mpya akaambo kacintu cili coonse ncondikonzya kusweekelwa mubweende bwazintu obuno alimwi azintu zibyaabi zyoonse mboziyoolubwa.” Mucizyi Tanja wakazumanana kusyomeka kuli Jehova, alimwi kwiinda mukugwasyigwa a Jehova, wakajana kwakukkala. Cikkomanisya ncakuti, lino mucizyi Tanja ulikwetwe kumukwesu uusyomeka alimwi boonse balikkomene kubelekela Jehova mumulimo waciindi coonse.

AMUMUSYOME JEHOVA CAKUMANININA

16. Ncinzi ciyootugwasya kuzumanana kuba basicamba twaakubona zintu nzyaambidwe kulugwalo lwa Luka 21:​26-28 kazicitika?

¹⁶ Ciindi camapenzi mapati, bantu banji “bayoonetuka akaambo kakuyoowa.” Pele bantu ba Leza bayoozumanana kubatama akuba basicamba. (Amubale Luka 21:​26-28.) Nkaambo nzi? Nkaambo tunooli twakaiya kale kumusyoma Jehova cakumaninina. Mucizyi Tanja iwaambwa kale, wakaamba kuti zintu izyakamucitikila kaindi zilamugwasya kuliyumya mubukkale bumbi bukatazya. Wakaamba kuti: “Ndaiya kuti Jehova ulakonzya kutugwasya kuliyumya mubukkale buli boonse motukonzya kulijana alimwi akutulongezya. Zimwi ziindi, inga calibonya mbuli kuti bamwi mbabajisi nguzu zyakweendelezya zintu, pele bwini mbwakuti Jehova ulaanguzu kwiinda mbabo. Alimwi nolikatazya buti penzi, inga lilamana. Kayi ncobakati, ciminya-minya buyo pele tacijayi.”

17. Ino lugwalo lwesu lwamwaka wa 2024 lulatugwasya buti? (Amubone cifwanikiso icili aacivwumbyo.)

¹⁷ Mazuba aano, kuli zintu zinji zikonzya kutupa kuyoowa. Pele mbubwenya mbuli Davida, tatweelede kulekela kuyoowa kuti kutweendelezye. Lugwalo lwesu lwamwaka wa 2024, mupailo ngwaakapaila Davida kuli Jehova naakati: “Ciindi nendiyoowede, ndisyoma nduwe.” (Int. 56:3) Amumvwe ncaakaamba sikwiiya zyamu Bbaibbele umwi kujatikizya lugwalo oolu. Wakaamba kuti: “Davida tanaakazumanana kuyeeya zintu izyakali kumuyoosya, naa mapenzi ngaakajisi. Muciindi caboobo, wakasyoma yooyo iwakali kukonzya kumuvwuna.” Aboobo mumyezi iiboola kumbele, amuzumanane kuzinzibala kuyeeya lugwalo lwesu lwamwaka, kwaambisya ciindi nomwalijana mubukkale buyoosya. Kunze lyaboobo, amujane ciindi cakuzinzibala kuyeeya zintu Jehova nzyaakacita kaindi, nzyacita lino alimwi anzyayoocita kumbele. Mpoonya mbubwenya mbuli Davida, mulakonzya kwaamba kuti: ‘Ngu Leza ngondisyoma; tandiyoowi pe.’—Int. 56:4.