1. Ncinzi ciboola mumizeezo yanu mwayeeya kujatikizya Jehova?

 SENA kuli nomwakasolede kale kweezyeezya mbwabede Jehova? Ciindi nomwapaila kulinguwe, ncinzi ciboola mumizeezo yanu? Nokuba kuti Jehova talibonyi, Bbaibbele lilamupandulula munzila ziindene-indene. Jehova waambwa kuti “ndizuba alimwi nintobo” akuti “mulilo uumpa cakumaninina.” (Int. 84:11; Heb. 12:29) Ezekieli wakapandulula Jehova mucilengaano kuti uli mbuli bbwe liyandisi lyasafilo, lubulo lumweka alimwi akumweka kwafulicoongo. (Ezk. 1:​26-28) Bupanduluzi bumwi bwa Jehova bulakonzya kutugambya alimwi akutupa kulimvwa kubula mpindu.

2. Ncinzi cikonzya kupa bamwi kuti cibakatazye kuba acilongwe a Jehova?

² Akaambo kakuti tatukonzyi kumubona Jehova, cilakonzya kutukatazya kusyoma kuti ulatuyanda. Bamwi bayeeya kuti Jehova takonzyi kubayanda akaambo kazibi nzyobakacita musyule. Cili boobu akaambo kakuti ambweni tiibakali kuyandwa abausyi. Jehova ulamvwisya mbotulimvwa alimwi ulizyi kaambo ncocikonzya kutukatazya kuba acilongwe anguwe. Pele kutegwa atugwasye, ulabuyubununa bube bwakwe bubotu mu Bbaibbele.

3. Nkaambo nzi ncotweelede kulubikkila kapati maano luyando ndwajisi Jehova?

³ Ibbala lyomwe limupandulula kabotu Jehova ndyakuti luyando. (1Joh. 4:8) Bbaibbele lyaamba kuti Leza nduyando. Zyoonse nzyacita zyeendelezyegwa aluyando. Luyando ndwajisi Leza ndupati cakuti ulabayanda nobaba baabo batamuyandi. (Mt. 5:​44, 45) Mucibalo eeci, tulabikkila kapati maano kulanga-langa Jehova alimwi aluyando lwakwe. Ikuti twaiya zinji kujatikizya Leza, cilakonzya kutupa kumuyanda kapati.

JEHOVA ULATUYANDA KAPATI

4. Ino luyando lwa Jehova lumupa kulimvwa buti? (Amubone acifwanikiso.)

⁴ “Taata mwini ulamuyanda.” (Joh. 16:27) Mu Bbaibbele, Jehova ulikozyanisya kumutumbu siluyando. (Is. 66:​12, 13) Amweezeezye buyo mutumbu mbwamulanganya caluyando mwanaakwe. Ulamusumpaula caluyando alimwi akumwaambauzya ajwi libombe. Ciindi notutyompedwe, tweelede kuzyiba kuti Jehova ulatuyanda kapati. Sintembauzyo wakalemba kuti: “Mizeezo minji iilibilisya neyakandikatazya, yebo wakanduumbulizya akunditontozya.”—Int. 94:19.

5. Ino luyando lwa Jehova lwaamba nzi kulindinywe?

⁵ Jehova ulasyomeka. (Int. 103:8) Kunyina naleka kutuyanda ciindi notwalubizya. Bana Israyeli bakamunyemya Jehova cakwiinduluka-induluka, nokuba boobo, wakatondezya kuti wakali kubayanda kapati bantu aabo bakeempwa kwiinda mukubaambila kuti: ‘Mwakali kuyandika kapati mumeso aangu, mwakalemekwa, alimwi mebo ndakamuyanda.’ (Is. 43:​4, 5) Leza kunyina naleka kutondezya luyando. Lyoonse tulakonzya kusyoma kuti ulatuyanda. Nokuba kuti twacita zibi zipati, Jehova kunyina natulekelezya. Ciindi notweempwa akupiluka kulinguwe, ulazumanana kutuyanda. Usyomezya ‘kutulekelela cakumaninina.’ (Is. 55:7) Bbaibbele lyaamba kulekelela ooku kuti kuleta “ziindi zyakukatalukwa . . . kuzwa kuli Jehova lwakwe.”—Mil. 3:19.

6. Ino lugwalo lwa Zekariya 2:8 lutuyiisya nzi kujatikizya Jehova?

⁶ Amubale Zekariya 2:8. Akaambo kakuti ulatuyanda, Jehova ulamvwisya mbotulimvwa alimwi uliyandide kutukwabilila. Ulausa ciindi notuli mumapenzi. Aboobo tulakonzya kuba masimpe kuti uyootwiingula ikuti twapaila kuti: “Kondibamba mbuli imboni yaliso.” (Int. 17:8) Liso ncibeela camubili ciyandika kapati. Aboobo ciindi Jehova natweezyanisya amboni yaliso lyakwe, cili mbuli kuti utwaambila kuti, ‘Kufwumbwa uumulwana nobantu bangu, ulwana cintu ciyandisi kulindime.’

7. Nkaambo nzi ncotweelede kuyumya lusyomo lwesu lwakuti Jehova ulatuyanda?

⁷ Jehova uyanda kuti tube alusyomo lwakuti ulatuyanda. Pele ulizyi kuti, akaambo kazibi nzyotwakacita musyule, zimwi ziindi tulakonzya kudooneka kuti naa ulatuyanda. Ambweni lino tuli mubukkale butupa kudooneka luyando lwa Jehova. Aboobo ncinzi cikonzya kuyumya lusyomo lwesu? Nkwiinda mukwiiya Jehova mbwatondezya luyando kuli Jesu, bananike alimwi akulindiswe toonse.

MBWATONDEZYA LUYANDO JEHOVA

8. Nkaambo nzi Jesu ncaakasinizyide kuti Bausyi balamuyanda kapati?

⁸ Jehova a Mwanaakwe bali kukkala antoomwe kwamyaka minji kwiinda cintu cili coonse. Ciindi coonse ncobakali antoomwe kujulu, bakaba balongwe beni-beni ibayandana kapati. Jehova wakatondezya mbwamuyanda kapati Jesu kulugwalo lwa Matayo 17:5. Kulugwalo oolu, Jehova naakaamba buyo kuti, ‘Ooyu ngonguwe ngwekkomanina.’ Nokuba boobo, wakayanda kuti swebo tuzyibe mbwamuyanda kapati Jesu, aboobo wakamwiita kuti “Mwanaangu ngweyandisya.” Jehova wakamukkomanina Jesu ikwaambisya akaambo kakuti wakali kuyanda kwaaba buumi bwakwe. (Ef. 1:7) Awalo Jesu tanaakali kudooneka kuti Bausyi bakali kumuyanda. Wakalisinizyide kuti Bausyi bakali kumuyanda kapati. Cakwiinduluka-induluka wakali kwaamba kujatikizya mbobakali kumuyanda.—Joh. 3:35; 10:17; 17:24.

9. Ndibbala nzi litondezya kuti Jehova ulabayanda kapati bananike? Amupandulule. (Baroma 5:5)

⁹ Jehova ulabayanda abalo bananike. (Amubale Baroma 5:5.) Atubone ncolyaamba bbala lyakuti ‘kuzuzya.’ Bbuku limwi lyaamba kuti “luyando lwakwe kubananike lulaanguzu kapati mbuli mulonga, lwalo luzuzya myoyo yabo.” Masimpe majwi aaya atondezya Jehova mbwabayanda kapati bananike. Bananike balizyi kuti ‘balayandwa a Leza.’ (Jud. 1) Mwaapostolo Johane wakatondezya mbobalimvwa ciindi naakalemba kuti: “Amubone mboluli lupati luyando ndwaatutondezya Taata, mukutupa coolwe cakwiitwa kuti bana ba Leza!” (1Joh. 3:1) Sena Jehova uyanda buyo bananike balikke? Peepe, Jehova wakatondezya kuti ulatuyanda toonse.

10. Ncintu nzi cipati citondezya kuti Jehova ulatuyanda?

¹⁰ Ncintu nzi cipati citondezya kuti Jehova ulatuyanda? Ncinunuzyo. Kwiinda mukupa cinunuzyo, Jehova wakatondezya luyando lupati lutanatondezyedwe amuntu uuli woonse. (Joh. 3:16; Rom. 5:8) Jehova wakaaba Mwanakwe ngwayandisya, kumuzumizya kuti afwide bantu boonse kutegwa tulekelelwe zibi zyesu akuti tucikonzye kuba balongwe bakwe. (1Joh. 4:10) Ciindi notuzinzibala kuyeeya muulo Jehova a Jesu ngobakabbadela, tuyoomvwisya mbobamuyanda kapati umwi aumwi wesu. (Gal. 2:20) Cinunuzyo tiicakabbadelwa akaambo buyo kakuyanda kuti bululami bwa Jehova bucitwe. Pele ncipego caluyando. Jehova wakatondezya kuti ulatuyanda kwiinda mukwaaba mwanaakwe ngwayandisya kapati, nkokuti Jesu. Mane buya wakazumizya kuti Mwanaakwe apenge akufwa akaambo kandiswe.

11. Ncinzi ncotwiiya kulugwalo lwa Jeremiya 31:3?

¹¹ Mbubwenya mbotwabona, Jehova tagoleli buyo akuzyiba kuti ulatuyanda, pele ulatwaambila mbwatuyanda kapati. (Amubale Jeremiya 31:3.) Jehova ulatutamba kuti tube balongwe bakwe akaambo kakuti ulatuyanda. (Amweezyanisye a Deuteronomo 7:​7, 8.) Kunyina cintu cili coonse cikonzya kutwaandaanya kuluyando lwakwe. (Rom. 8:​38, 39) Ino luyando oolu lumupa kulimvwa buti? Amubale Intembauzyo 23 kutegwa mubone Davida mbwaakalimvwa kujatikizya luyando lwa Jehova alimwi andinywe mbomukonzya kulimvwa.

INO LUYANDO LWA JEHOVA LUMUPA KULIMVWA BUTI?

12. Ino inga mwayipandulula buti Intembauzyo 23?

¹² Amubale Intembauzyo 23:​1-6. Intembauzyo 23 ndwiimbo lutondezya lusyomo muluyando lwa Jehova alimwi ambwatulanganya. Mulembi wantembauzyo eeyi Davida, ulapandulula mbocakali ciyumu cilongwe ncaakajisi amweembezi wakwe, Jehova. Davida wakali kulimvwa kukwabililwa ciindi naakali kuzumizya Jehova kuti amusololele alimwi wakali kumusyoma cakumaninina. Amana buya Davida wakalizyi kuti Jehova wakali kuyoozumanana kumuyanda mazuba oonse abuumi bwakwe. Ino ncinzi cakali kumupa kuba alusyomo luli boobu?

13. Nkaambo nzi Davida ncaakasinizyide kuti Jehova wakali kuyoomulanganya?

¹³ “Kunyina ncondiyoobula pe.” Davida wakali kulimvwa kubikkilwa maano akaambo kakuti Jehova lyoonse wakali kumupa nzyaakali kuyandika. Kunze lyaboobo, Davida wakalizyi kuti Jehova mulongwe wakwe alimwi akuti wakali kumukkomanina. Nkakaambo kaako ncaakasinizyide kuti kufwumbwa cakali kuyoomucitikila mubuumi, Jehova wakali kuyoozumanana kumupa nzyaakali kuyandika. Akaambo kakuti Davida wakali kusyoma kuti Jehova wakali kumuyanda kapati akumulanganya, cakamupa kutalibilika, kuba alukkomano alimwi akukkutila.—Int. 16:11.

14. Mbuti Jehova mbwatulanganya caluyando?

¹⁴ Jehova caluyando ulatubikkila maano, kwaambisya ciindi notwacitikilwa zintu zibyaabi. Ba Claire, a mucizyi iwabelekela a Beteli kwamyaka yiinda ku 20, tiibakazyi mbobakali kunga baugwasya mukwasyi wabo ciindi nowakacitikilwa mapenzi aatobelene. Bausyi bakalebuka mubili, mucizyi wabo umwi wakagwisyigwa mumbungano, kumane mukwasyi wabo wakaba apenzi lyakubula mali mpoonya bakubbanki bakabanyanga ŋanda yabo. Mbuti Jehova mbwaakabalanganya caluyando? Ba Claire bakaamba kuti: “Jehova wakali kubapa nzyobakali kuyandika banamukwasyi buzuba abuzuba. Bunji bwaziindi, Jehova wakali kubapa kwiinda aali zyeezyo nzyobakali kuyandika. Ziindi zinji ndilaakuyeeya Jehova mbwaakatugwasya alimwi tandikalulubi luyando ndwaakatutondezya. Kuyeeya zintu eezyi kwakandigwasya kuzumanana kubelekela Jehova calukkomano.”

15. Nkaambo nzi Davida ncaakalimvwa kukatalukwa? (Amubone acifwanikiso.)

¹⁵ “Ulandikatalusya.” Ziindi zimwi Davida wakali kutyompwa kapati akaambo kamapenzi ngaakali kujana. (Int. 18:​4-6) Nokuba boobo, luyando lwa Jehova alimwi ambwaakali kumulanganya zyakali kumukatalusya. Kunze lyaboobo, Jehova wakali kumusololela mulongwe wakwe iwakatyompedwe ‘kumacelelo aamweemvwe alimwi akumasena aakulyookezyela aajisi maanzi.’ Akaambo kaceeci, Davida wakayumizyigwa alimwi wakazumanana kumubelekela Jehova calukkomano.—Int. 18:​28-32.

16. Mbuti luyando lwa Jehova mbolumukatalusya?

¹⁶ Mbubwenya buyo amazuba aano, “nduyando lutamani lwa Jehova ilwapa kuti tutalobi” ciindi notwajana mapenzi. (Malo. 3:22; Kol. 1:11) Amubone cikozyanyo camucizyi Rachel. Wakatyompwa kapati ciindi mulumaakwe naakamusiya walo alimwi a Jehova lyabulwazi bwa COVID-19. Ino Jehova wakamucitila nzi? Wakaamba kuti: “Jehova wakanditondezya luyando. Wakandipa balongwe, ibakali kujana ciindi cakuba andime, kunduulila zyakulya, kunditumina tugwalo tuumbulizya, magwalo aakulwaizya, kumweta-mweta alimwi akuzumanana kundiyeezya kuti Jehova wakali kundibikkila maano. Lyoonse ndilamulumba kapati Jehova akaambo kakundipa mukwasyi mupati imuli bantu bajisi luyando.”

17. Nkaambo nzi Davida ‘ncaatakali kuyoowa cintu cili coonse’?

¹⁷ “Kunyina cintu cibi ncondiyoowa, nkaambo yebo ulaandime.” Bunji bwaziindi buumi bwa Davida bwakali muntenda, amana buya wakajisi basinkondonyina banji balaanguzu. Nokuba boobo, luyando lwa Jehova lwakapa Davida kulimvwa kukwabililwa. Davida wakali kulimvwa kuti lyoonse Jehova wakali anguwe, calo cakali kumupa kukkalwa moyo. Akaambo kaceeci wakali kukonzya kwiimba kuti: “[Jehova] wakandivwuna kuzintu zyoonse izyakali kundiyoosya.” (Int. 34:4) Aboobo, nokuba kuti Davida wakali kuyoowa, wakacikonzya kuliyumya akaambo kakuti wakalizyi kuti Jehova wakali kumuyanda.

18. Ino kuzyiba kuti Jehova ulamuyanda inga kwamuyumya buti ciindi nomwayoowa?

¹⁸ Ino cisyomezyo cakuti Jehova unootuyanda citugwasya buti notwalijana mubukkale buyoosya? Mupainiya wazina lya Susi ulapandulula walo amulumaakwe mbobakalimvwide ciindi mwanaabo naakalijaya, bakaamba kuti: “Ikuti mwacitikilwa cintu cibyaabi kapati mubuumi, cilatyompya alimwi inga camupa kulimvwa kubula lugwasyo. Pele luyando lwa Jehova lwatupa kulimvwa kukwabililwa. Ba Rachel ibaambwa kale bakaamba kuti: “Bumwi busiku nindakauside alimwi akuyoowa kapati, ndakapaila kuli Jehova kumwi kandilila. Nindakamana kucita boobo, ndakalimvwa kuti wakanditontozya moyo, mbubwenya mutumbu mbwacita kumwanaakwe, kumane ndakoona. Eelo kaka tandikacilubi eciya cakacitika!” Mwaalu wazina lya Tasos wakaangwa myaka yone akaambo kakukaka kunjila mulimo wabusikalumamba. Mbuti Jehova mbwaakatondezya kuti ulamuyanda akumulanganya? Wakaamba kuti: “Jehova wakali kundipa zyoonse nzyondakali kuyandika. Eeci cakandipa kuti kandimusyoma cakumaninina. Kunze lyaboobo, kwiinda mumuuya wakwe uusalala, Jehova wakandipa lukkomano nokuba kuti ntolongo mbusena butakkomanisyi. Aboobo, eeci cakandipa kusyoma kuti ciindi nondizumanana kumubelekela, ndilagwasyigwa kapati abubotu bwakwe. Kumane ndakatalika kubeleka kandili mupainiya waciindi coonse muntolongo.”

AMUBE ACILONGWE A LEZA WANU SILUYANDO

19. (a) Ino kuzyiba kuti Leza ulatuyanda inga kwazijatikizya buti zintu nzyotwaamba mumipailo yesu? (b) Mbupanduluzi nzi bwaluyando lwa Jehova mbomukkomanina kapati? (Amubone kabbokesi kakuti “ Magwalo Aatupa Kulimvwa Kuti Jehova Ulatuyanda Kapati.”)

¹⁹ Zyakuluula zyoonse nzyotwalanga-langa, zitondezya kuti Jehova, “Leza siluyando” ulaandiswe. (2Kor. 13:11) Ulamubikkila maano umwi aumwi wesu kumugama. Alimwi tulisinizyide kuti ‘tuzingulukidwe aluyando lwakwe lutamani.’ (Int. 32:10) Ciindi notuzinzibala kuyeeya mbwatondezya luyando lwakwe kulindiswe, tulalibonena kuti ulatulanganya ncobeni alimwi uba mulongwe wesu mwini-mwini. Aboobo tulakonzya kumusikila mumupailo cakulikwaya akumwaambila mbotukkomene akaambo kakuti ulatuyanda. Kunze lyaboobo, tulakonzya kumwaambila zyoonse zitulibilisya, katusinizyide kuti ulatumvwa alimwi akuti ulilibambilide kutugwasya.—Int. 145:​18, 19.

20. Mbuti luyando lwa Jehova mbolutupa kuba acilongwe anguwe?

²⁰ Mbubwenya mbotukwelelezyegwa akukasaala kwamulilo ciindi nokutontola, andiswe tulakwelelezyegwa aluyando lwa Jehova. Nokuba kuti Jehova ulaanguzu, pele alimwi uli aluyando kapati. Aboobo, amukkomane akaambo kakuti Jehova ulamuyanda. Mpoonya toonse atutondezye kuti tulalumba kuluyando ndwatutondezya kwiinda mukwaamba kuti: “Ndilamuyanda Jehova!”—Int. 116:1.