1-2. Mapenzi nzi ngobakonzya kujana babelesi ba Jehova basyomeka?

 CIINDI notwacitikilwa cintu cimwi cibyaabi kapati, buumi bwesu bulakonzya kucinca cakutayeeyela. Mucikozyanyo, mukwesu umwi uujisi lusyomo luyumu wazina lya Luis a wakajanwa abulwazi bwakkansa. Dokota wakamwaambila kuti ujisi buyo myezi misyoonto yakupona. Mucizyi Monika amulumaakwe bakajisi bubi kucita milimo yakumuuya. Mpoonya bumwi buzuba, wakazyiba kuti mulumaakwe walo iwakali mwaalu, wakali kucita zibi cakusisikizya kwamyaka minji. Ba Olivia, mucizyi uutakwetwe, bakaambilwa kusiya ŋanda yabo akaambo kaguwo pati ilyakali kulangilwa. Nobakapiluka, bakajana kuti ŋanda yabo yakanyonyoonwa aguwo. Cakutayeeyela, buumi bwaba Luis, ba Monika, alimwi aba Olivia bwakacinca cakumaninina. Sena andinywe kuli cintu cibyaabi icakamucitikila calo cakacinca buumi bwanu cakutayeeyela?

² Nokuba kuti tuli babelesi ba Jehova basyomeka, tulajana mapenzi alimwi akuciswa mbubonya mbuli bantu boonse. Kuyungizya waawo, tuyandika kuliyumya kukukazyigwa alimwi akupenzyegwa kuzwa kuli baabo batabayandi bantu ba Leza. Nokuba kuti Jehova kunyina naalesya mapenzi aali boobu kutucitikila, utusyomezya kutugwasya. (Is. 41:10) Kwiinda mukugwasyigwa anguwe, tulakonzya kuzumanana kukkomana, kusala kabotu alimwi akuzumanana kusyomeka kulinguwe nomuba mubukkale bukatazya kapati. Mucibalo eeci, tulalanga-langa nzila zyone Jehova mbwatugwasya ciindi notwacitikilwa zintu zibyaabi kapati. Alimwi tulalanga-langa ncotukonzya kucita kutegwa tugwasyigwe alugwasyo ndwatupa Jehova.

JEHOVA UYOOMUKWABILILA

3. Ciindi notwacitikilwa zintu zibyaabi kapati, ncinzi ncotukonzya kwaalilwa kucita?

³ Buyumuyumu. Ciindi notwacitikilwa zintu zibyaabi kapati, cilakonzya kutukatazya kuyeeya kabotu alimwi akusala cabusongo. Nkaambo nzi? Akaambo kakuti inga tuluuside kapati alimwi akulibilika. Inga tulinyongene kapati cakuti tatucizyi acakucita. Amubone bacizyi bobilo baambwa kale mbobakalimvwa ciindi nobakalijana mubukkale bukatazya. Ba Olivia bakaamba kuti: “Ciindi guwo nolyakanyonyoona ŋanda yangu, ndakanyongana kapati akutyompwa.” Kujatikizya kutasyomeka kwamulumaakwe, mucizyi Monika wakaamba kuti: “Ndakatyompwa kapati. Ndakalimvwa mbuli kuti kuli wandiyasa naifi. Ndakacinyina anguzu zyakucita tulimo-limo tumwi. Tiindakali kuyeeyela kuti eeci inga candicitikila.” Ino Jehova usyomezya kutugwasya buti ciindi notwatyompwa?

4. Kweelana alugwalo lwa Bafilipi 4:​6, 7, ino Jehova utusyomezya nzi?

⁴ Ncacita Jehova. Utusyomezya kutupa ceeco Bbaibbele ncoliita kuti “luumuno lwa Leza.” (Amubale Bafilipi 4:​6, 7.) Luumuno oolu lwaamba ikuliiba kuboola akaambo kakuba acilongwe cibotu anguwe. Oolu nduumuno “lwiinda maano oonse”; ndubotu kapati kwiinda mbotuyeeyela. Mucikozyanyo, sena kuli ciindi nomwakapaila camoyo woonse kuli Jehova mpoonya akulimvwa kukkalwa moyo kapati nomwakamana kucita boobo? Oolo lwakali “luumuno lwa Leza.”

5. Mbuti luumuno lwa Leza mbolukwabilila mizeezo alimwi amyoyo yesu?

⁵ Lugwalo ndomunya lwaamba kuti luumuno lwa Leza “luyookwabilila myoyo yanu amizeezo yanu.” Ibbala lyakasandululwa kuti ‘kukwabilila’ lyakali kwaamba basikalumamba ibakali kukwabilila munzi kuli basinkondonyina. Bantu ibakali kukkala mumunzi ooyu bakali koona caluumuno akaambo kakuzyiba kuti basikalumamba bakali kubakwabilila. Mbubwenya buyo, ciindi luumuno lwa Leza nolukwabilila myoyo yesu alimwi amizeezo yesu, tulimvwa kukkalwa moyo, nkaambo tulizyi kuti tulikwabilidwe. (Int. 4:8) Mbubwenya mbuli Hana, nokuba kuti bukkale bwesu tabukonzyi kucinca mpoonya-mpoonya, tulakonzya kuba aluumuno. (1Sam. 1:​16-18) Alimwi ciindi notulimvwa kukkalwa moyo, kanji-kanji ncuuba-uba kuyeeya kabotu akusala cabusongo.

6. Ncinzi ncotweelede kucita kutegwa tugwasyigwe aluumuno lwa Leza? (Amubone acifwanikiso.)

⁶ Ncotweelede kucita. Ciindi nomwalijana mumapenzi, amumulombe Jehova kuti amugwasye. Mbuti mbomukonzya kucita oobo? Amupaile kusikila mwaba aluumuno lwa Leza. (Lk. 11:9; 1Tes. 5:17) Mukwesu Luis, iwaambidwe kale ulapandulula walo abakaintu bakwe ba Ana, mbobakaliyumya ciindi nobakazyiba kuti wakajisi buyo myezi misyoonto yakupona. Wakaamba kuti: “Ciindi noli mubukkale buli boobu, nciyumu kapati kupanga zyakusala kujatikizya busilisi alimwi amakani aambi. Pele twakacikonzya kuba aluumuno mubukkale oobu bukatazya kapati kwiinda mukupaila.” Mukwesu Luis amukaintu wakwe bakaamba kuti bakali kupaila kuzwa ansi aamoyo alimwi cakwiinduluka-induluka, kulomba Jehova kuti abape luumuno lwamumizeezo, kukkalwa moyo alimwi abusongo kutegwa bacikonzye kusala kabotu. Alimwi buya wakabagwasya. Ikuti kamuli mubukkale bukatazya, amupaile cakutaleka, eelyo muyoobona luumuno lwa Jehova mboluyookwabilila moyo wanu amizeezo yanu.—Rom. 12:12.

JEHOVA UYOOMWIIMIKA NJI

7. Mbuti mbotukonzya kulimvwa ciindi notwalijana mumapenzi?

⁷ Buyumuyumu. Ciindi notwalijana mumapenzi, inga tulaleka kuyeeya kabotu naa kucita zintu mbuli mbotwali kucita lyoonse. Tulakonzya kulimvwa mbuli kuti tutontwa buya kuzwa kupenzi limwi kuya kupenzi limbi. Ba Ana ibaambwa kale, bakaamba kuti bakatyompwa kapati ciindi nobakafwa balumi babo ba Luis. Bakaamba kuti: “Zimwi ziindi ndakali kulimvwa bubi kapati akutalika kulipa mulandu. Alimwi ndakali kunyema akaambo kakuti balumi bangu bakafwa.” Kuyungizya waawo, ba Ana bakali kulimvwa kulendelelwa alimwi akunyongana akaambo kakuti lino bakeelede kulipangila zyakusala, imulimo ngobakali kucita kabotu ba Luis. Zimwi ziindi, bakali kutyompwa kapati cakuti bakali kulimvwa mbuli kuti batontwa aaguwo lyamulwizi. Aboobo, ino Jehova utugwasya buti ciindi notwatyompwa kapati?

8. Kweelana alugwalo lwa 1 Petro 5:​10, ino Jehova utusyomezya nzi?

⁸ Ncacita Jehova. Utusyomezya kuti uyakutwiimika nji. (Amubale 1 Petro 5:10.) Mucikozyanyo, ikuti kakuli guwo pati, bwato bulakonzya kuzungaana canguzu. Pele kutegwa bukkalikile, inga bulijisi tuntu tumwi kumabazu oonse obilo nkobuli kunsi. Tuntu ootu tulakonzya kupa kuti bwato kabutazungaani kapati, calo cikonzya kupa kuti basilweendo bakwabililwe. Nokuba boobo, tuntu ootu tulabeleka kabotu lilikke buyo ikuti bwato kabweenda kuya kumbele. Mbubwenya buyo, Jehova uyootwiimika nji ciindi notuzumanana kumubelekela cakusyomeka muziindi zikatazya.

9. Mbuti zibelesyo zigwasya kuvwuntauzya mbozitugwasya? (Amubone acifwanikiso.)

⁹ Ncotweelede kucita. Ciindi nomutyompedwe kapati akaambo kamapenzi, amuzumanane kupaila, kujanika kumiswaangano alimwi akukambauka. Masimpe ngakuti, tamukonzyi kucita zintu mbuli mbomwakali kucita kaindi, pele amuyeeye kuti Jehova talangili kuti katucita zintu kwiinda ali zyeezyo nzyotukonzya. (Amweezyanisye a Luka 21:​1-4.) Kuyungizya waawo, amujane ciindi cakucita ciiyo canu nobeni alimwi akuzinzibala kuyeeya. Nkaambo nzi? Kwiinda mumbunga yakwe, Jehova watupa zibalo zibotu kapati alimwi amavidiyo aakonzya kutugwasya kuliyumya ciindi notuli mumapenzi. Kutegwa mujane makani ngomuyanda, mulakonzya kubelesya zibelesyo zigwasya kuvwuntauzya iziliko mumwaambo wanu, mbuli JW Library^® app alimwi a Bbuku Ligwasya Kuvwuntauzya lya Bakamboni ba Jehova. Mucizyi Monika iwaambwa kale, wakaamba kuti wakali kuzibelesya zibelesyo eezyi zigwasya kuvwuntauzya mbwaatalikila buyo kulimvwa bubi. Mucikozyanyo, wakali kuvwuntauzya bbala lyakuti “kunyema.” Aciindi cimwi wakavwuntauzya bbala lyakuti “kutasyomeka.” Mucizyi ooyu wakali kubala kusikila walimvwa kabotu. Wakaamba kuti: “Nindakali kutalika kuvwuntauzya, ndakali kulibilika. Pele mbondakali kuyaabuzumanana kubala, ndakalimvwa mbuli kuti Jehova wakalindikumbatide. Ndakazyiba kuti Jehova wakalizyi mbondakali kulimvwa alimwi akuti wakali kundigwasya.” Lugwasyo ndwatupa Jehova lulakonzya kumugwasya kweendelezya mbomulimvwa kusikila mwaba aluumuno.—Int. 119:​143, 144.

JEHOVA UYOOMUGWASYA

10. Ino inga twalimvwa buti ikuti twacitikilwa zintu zibyaabi kapati?

¹⁰ Buyumuyumu. Ikuti twacitikilwa zintu zibyaabi kapati, mazuba amwi tulakonzya kulimvwa kubula nguzu akutyompwa kapati. Tulakonzya kulimvwa mbuli sikubalika mumuzundano iwakali kubalika kapati pele lino uusunkuta akaambo kakulicisa. Cilakonzya kutwaalila nokuba kucita zintu nzyotwakali kucita kakunyina buyumuyumu naa kucileka kuba aluyandisisyo lwakucita zintu izyakali kutupa kukkomana. Mbubwenya mbuli Elija, cilakonzya kutwaalila buya akubuka, akuyanda buyo kuti katulede. (1Bam. 19:​5-7) Ncinzi Jehova ncasyomezya kucita ikuti naa twalimvwa kubula nguzu?

11. Kweelana a Intembauzyo 94:​18, ncinzi Jehova ncayootucitila?

¹¹ Ncacita Jehova. Usyomezya kutugwasya. (Amubale Intembauzyo 94:18.) Mbubwenya sikubalika iwakalicisa mbwayandika kugwasyilizyigwa abamwi, andiswe tulakonzya kuyandika kugwasyigwa kutegwa tuzumanane kubeleka kabotu mumulimo wa Jehova. Muziindi zili boobu, Jehova utusyomezya kuti: “Mebo nde Jehova Leza wako, ndilikujatide kujanza lyako lyalulyo, ndendime Yooyo uukwaambila kuti, ‘Utayoowi pe. Mebo ndilakugwasya.’” (Is. 41:13) Mwami Davida wakalubona lugwasyo oolu. Ciindi naakajana mapenzi alimwi akulwanwa abasinkondonyina, wakaambila Jehova kuti: “Ijanza lyako lyalulyo ndelindigwasya.” (Int. 18:35) Pele ino Jehova utugwasya buti?

12. Mbaani mbakonzya kubelesya Jehova kutugwasya ciindi notutyompedwe?

¹² Kanji-kanji, Jehova ulatugwasya kwiinda mukukulwaizya bamwi kuti batugwasye. Mucikozyanyo, ciindi Davida naakatyompedwe, mulongwe wakwe Jonatani wakamuswaya kutegwa amuyumye-yumye. (1Sam. 23:​16, 17) Mbubwenya buyo, Jehova wakabelesya Elisha kutegwa agwasye Elija. (1Bam. 19:​16, 21; 2Bam. 2:2) Mazuba aano, Jehova ulakonzya kutugwasya kwiinda mukubelesya banamukwasyi, balongwe naa baalu. Nokuba boobo, ciindi notutyompedwe kapati, tulakonzya kutalika kulitantamuna kuli bamwi. Tulakonzya kuyanda kuba buyo tolikke. Bwini mbwakuti tacilubide pe kucita boobo. Pele ncinzi ncotweelede kucita kutegwa tugwasyigwe a Jehova?

13. Ncinzi ncotweelede kucita kutegwa tugwasyigwe a Jehova? (Amubone acifwanikiso.)

¹³ Ncotweelede kucita. Tatweelede kulitantamuna kuli bamwi. Ciindi notulitantamuna kuli bamwi, tulakonzya kutalika kuyeeya buyo kujatikizya ndiswe alimwi amapenzi ngotujisi. Kuyeeya kuli boobu kulakonzya kutupa kwaalilwa kusala cabusongo. (Tus. 18:1) Masimpe, toonse tulayanda kujana ciindi cakuba tolikke, ikwaambisya ciindi notwacitikilwa zintu zibyaabi kapati. Nokuba boobo, ikuti twalitantamuna kuli bamwi kwaciindi cilamfwu, inga caba mbuli kuti tukaka lugwasyo ndwapa Jehova kwiinda mubantu mbabelesya. Aboobo tacikwe makani ambomukonzya kulimvwa ciindi nomujisi mapenzi, amusolekesye kulutambula lugwasyo lwabanamukwasyi, balongwe alimwi abaalu. Amubabone kuba nzila Jehova njabelesya kumugwasya.—Tus. 17:17; Is. 32:​1, 2.

JEHOVA UYOOMUUMBULIZYA

14. Muubukkale nzi buyoosya motukonzya kulijana?

¹⁴ Buyumuyumu. Zimwi ziindi tulakonzya kulijana mubukkale bukonzya kutupa kuyoowa kapati. Mu Bbaibbele, babelesi ba Leza basyomeka balaamba kujatikizya ziindi nobakapengede kapati alimwi akuyoowa akaambo kabasinkondonyina naa mapenzi amwi. (Int. 18:4; 55:​1, 5) Mbubwenya buyo, ambweni andiswe tulapenzyegwa kucikolo, kumulimo, kubanamukwasyi naa amfwulumende. Ambweni tulayoowa kuti inga twafwa akaambo kakuciswa. Muziindi zili boobu, tulakonzya kulimvwa kuti kunyina uukonzya kutugwasya. Pele ino Jehova inga watugwasya buti muziindi zili boobu?

15. Ino Intembauzyo 94:19 lutusyomezya nzi?

¹⁵ Ncacita Jehova. Ulatuumbulizya akututontozya. (Amubale Intembauzyo 94:19.) Majwi aaya atuyeezya kana kasimbi ikayoowede alimwi kaalilwa koona akaambo kakuzuma kupati kwamvwula. Tulakonzya kweezeezya bausyi kabaunka kuli nkako akukabweza, kumane akukabikka acamba kabakaumbulizya kusikila koona. Nokuba kuti kuzuma inga kakuciliko, kana kasimbi aako inga kakalimvwide kukwabililwa akuumbulizyigwa mumaanza aabausyi. Ciindi notwacitikilwa zintu zitupa kuyoowa, andiswe tulakonzya kuyandika Taateesu wakujulu kuti atukumbate munzila yacikozyanyo kusikila twaba aluumuno. Ncinzi ncotweelede kucita kutegwa tuumbulizyigwe a Jehova munzila eeyo?

16. Ncinzi ncotweelede kucita kutegwa tuumbulizyigwe a Jehova? (Amubone acifwanikiso.)

¹⁶ Ncotweelede kucita. Amujane ciindi cakuba a Jehova lyoonse munzila yacikozyanyo, nkokuti kwiinda mukupaila akubala Jwi lyakwe. (Int. 77:​1, 12-14) Ikuti kamucita oobo, cintu cakusaanguna ncomuyoocita mwaakuyoowa, muyoolanga kuli Uso wakujulu kuti amugwasye. Amumwaambile Jehova zintu zimupa kuyoowa alimwi akulibilika. Mpoonya amumuswiilile kwiinda mukubala Jwi lyakwe, eelyo muyoobona mbwayoomuumbulizya. (Int. 119:28) Kubala mabbuku amwi amu Bbaibbele kulakonzya kumuumbulizya kapati ciindi nomwayoowa. Mucikozyanyo, mulakonzya kukulwaizyigwa kubala bbuku lya Jobu, Intembauzyo, Tusimpi alimwi amajwi aa Jesu aajanika ku Matayo caandaano 6. Ciindi nomupaila kuli Jehova akubala Jwi lyakwe, muyoowumbulizyigwa kapati.

17. Ndusyomo nzi ndotujisi?

¹⁷ Tulijisi lusyomo lwakuti Jehova unootulanganya lyoonse muziindi zyamapenzi. Kunyina nayootulekelezya pe. (Int. 23:4; 94:14) Jehova utusyomezya kutukwabilila, kutwiimika nji, kutugwasya alimwi akutuumbulizya. Kujatikizya Jehova, lugwalo lwa Isaya 26:3 lwaamba kuti: “Yebo uunoobakwabilila bantu balanga kulinduwe muzintu zyoonse; uyoobapa luumuno lutamani, nkaambo basyoma mulinduwe.” Aboobo, amumusyome Jehova alimwi akucita kufwumbwa nzyomukonzya kutegwa mugwasyigwe anzila nzyabelesya kumugwasya. Ikuti mwacita oobo, muyooyumizyigwa nomuba muziindi zikatazya kapati.