Bamwi bakakomenena mumasena bamaalumi mobabona bamakaintu kuti mbaansi kapati. Mucikozyanyo, ba Hans, mulangizi wabbazu waku Bolivia, bakaamba kuti: “Bamaalumi bamwi bakakomenena mumasena mobakulwaizyigwa kulisumpula. Bamaalumi aaba inga basyoma kuti balo balisumpukide kapati kwiinda bamakaintu alimwi kanji-kanji balabaubaula.” Ba Shengxian, mwaalu ku Taiwan, bakaamba kuti: “Kubusena nkondikkala, bamaalumi banji balimvwa kuti mukaintu teelede kupa mizeezo. Ikuti mwaalumi wabelesya muzeezo wapegwa amukaintu, beenzinyina inga bamubona kuti tali mwaalumi.” Bamaalumi bamwi balatondezya kuti tababalemeki bamakaintu munzila zimwi. Mucikozyanyo, balaamba masesya aasampuzya bamakaintu.

Cikkomanisya ncakuti, mwaalumi ulakonzya kucinca tacikwe makani akubusena nkwaakakomenena naa mbwaakakomezyegwa. Ulakonzya kucizunda cilengwa cakubona bamakaintu kuti mbaansi. (Ef. 4:​22-24) Ulakonzya kucita oobo kwiinda mukwiiya cikozyanyo ca Jehova. Mucibalo eeci, tulabandika Jehova mbwababona bamakaintu, bakwesu mbobakonzya kumwiiya alimwi abaalu mbobakonzya kuba cikozyanyo cibotu mukulemeka bacizyi.

INO JEHOVA UBABONA BUTI BAMAKAINTU?

Jehova ulapa cikozyanyo cibotu citondezya mbobeelede kweendelezyegwa bamakaintu. Mbwali Taateesu siluzyalo, ulabayanda bana bakwe boonse. (Joh. 3:16) Mpoonya bamakaintu basyomeka, bali mbuli bana bakwe bayandwa. Amubone nzila eezyi zitobela Jehova mwatondezya kuti ulabayanda akubalemeka bamakaintu.

Kunyina nabasalulula. Jehova wakalenga bamaalumi abamakaintu mucinkozya cakwe. (Matl. 1:27) Kunyina naakalenga bamaalumi kuti kabali basongo kapati naa kabajisi luzyibo lwakucita zintu kwiinda bamakaintu. Kayi boonse buyo ulabayanda. (2Mak. 19:7) Wakalenga mwaalumi amukaintu munzila yakuti boonse kabacikonzya kumvwisya kasimpe kamu Bbaibbele alimwi akucikonzya kwiiya bube bwakwe bubotu. Kunze lyaboobo, Jehova ubona bamaalumi abamakaintu basyomeka kuti baleelene kufwumbwa naa bajisi bulangizi bwakuyoopona kukabe kutamani muparadaiso anyika naa kuyoolela kabali bami abapaizi kujulu. (2Pet. 1:1) Masimpe kuti, Jehova tabasalululi bamakaintu naaceya.

Ulabaswiilila. Jehova ulabikkila maano mbobalimvwa bamakaintu alimwi amapenzi ngobajisi. Mucikozyanyo, wakaiswiilila akuyiingula mipailo ya Rakele alimwi a Hana. (Matl. 30:22; 1Sam. 1:​10, 11, 19, 20) Kunze lyaboobo, Jehova wakasololela balembi ba Bbaibbele kubikkilizya zibalo zyabamaalumi ibakabaswiilila bamakaintu. Mucikozyanyo, Abrahamu wakaatobela malailile aa Jehova aakuti amuswiilile mukaintu wakwe Sara. (Matl. 21:​12-14) Mwami Davida wakamuswiilila Abigayeli. Mubwini, wakalimvwa kuti Jehova nguwakamutuma kuti abandike anguwe. (1Sam. 25:​32-35) Jesu, iwakabwiiya cakulondoka bube bwabausyi, wakamuswiilila Mariya, banyina. (Joh. 2:​3-10) Zikozyanyo eezyi zitondezya kuti nzila imwi Jehova mbwabalemeka bamakaintu nkwiinda mukubaswiilila.

Ulabasyoma. Mucikozyanyo, Jehova wakatondezya kuti ulamusyoma Eva kwiinda mukumupa mulimo wakugwasyilizya kulanganya nyika. (Matl. 1:28) Kwiinda mukucita boobo, wakatondezya kuti tanaakali kubona Eva kuti ngwaansi kwiinda mulumaakwe Adamu, pele kuti wakali mugwasyi uujisi mulimo uuyandika kapati. Alimwi Jehova wakatondezya kuti wakali kumusyoma musinsimi mukaintu Debora a Hulida kwiinda mukubapa mulimo wakulaya bantu bakwe, kubikkilizya amubetesi a mwami. (Bab. 4:​4-9; 2Bam. 22:​14-20) Mazuba aano, Jehova watondezya kuti ulabasyoma bamakaintu Banakristo kwiinda mukubapa mulimo wakucita kuyanda kwakwe. Bacizyi aaba basyomeka, balabeleka kabali basikumwaya, bapainiya alimwi abamisyinali. Balagwasyilizya kuyaka akubamba Maanda aa Bwami alimwi amitabi. Bamwi babelekela a Beteli, mpoonya bamwi kumaofesi aabasanduluzi. Bacizyi aaba bali mbuli nkamu mpati yabasikalumamba yalo Jehova njabelesya kuzuzikizya makanze aakwe. (Int. 68:11) Masimpe kuti, Jehova kunyina nabona bamakaintu kuti tabakonzyi kucita cili coonse.

MBUTI BAKWESU MBOBAKONZYA KWIIYA KWEENDELEZYA BAMAKAINTU MBULI MBWACITA JEHOVA?

Bakwesu, kutegwa tuzyibe naa tweendelezya bamakaintu mbuli mbwacita Jehova, tweelede kulingula mbotuyeeya alimwi ambotucita zintu cakusitikila. Kutegwa tucite oobo, tuyandika lugwasyo. Mbubwenya muncini wa X-ray mboukonzya kugwasya kuzyiba penzi lili mumoyo, mulongwe mubotu alimwi a Jwi lya Leza zilakonzya kutugwasya kuzyiba bube bumwi butali kabotu mbotukonzya kuba aambubo kujatikizya bamakaintu. Ncinzi ncotweelede kucita kutegwa tugwasyigwa azintu eezyi?

Amubuzye mulongwe mubotu. (Tus. 18:17) Tulakonzya kubuzya mulongwe ngotusyoma, uulaaluzyalo alimwi uunyoneka kuti: “Ino ubona kuti ndibeendelezya buti bacizyi? Sena balimvwa kuti ndilabalemeka? Sena kuli ncondikonzya kucita kutegwa kandibeendelezya kabotu?” Ikuti mulongwe wanu wamwaambila mbazu zimwi momuyandika kubelekela, tamweelede kutalika kupa twaambo twakulitamizya. Muciindi caboobo, amusolekesye kubelekela mumo.

Amwiiye Jwi lya Leza. Nzila yiinda kubota njotukonzya kubelesya kutegwa tuzyibe naa tubeendelezya kabotu bamakaintu, nkwiiya Jwi lya Leza. (Heb. 4:12) Ciindi notwiiya Bbaibbele, tulaiya kujatikizya bamaalumi balo ibakabeendelezya kabotu bamakaintu alimwi abaabo ibatakacita boobo. Kumane tulakonzya kweezyanisya zikozyanyo eezyo ambotubeendelezya bamakaintu swebo. Kuyungizya waawo, kweezyanisya tupango twamu Bbaibbele kulakonzya kutukwabilila kukutabelesya Magwalo kujana twaambo takulitamizya kujatikizya mbotubeendelezya bamakaintu. Mucikozyanyo, kweelana alugwalo lwa 1 Petro 3:​7, mukaintu weelede ‘kupegwa bulemu mbubonya mbuli cibelesyo cipwaika buyo.’ a Sena eeci caamba kuti mukaintu tajisi luzyibo twamweezyanisya amwaalumi? Peepe! Amweezyanisye majwi aa Petro kulugwalo lwa Bagalatiya 3:​26-29 lwalo lutondezya kuti Jehova wakasala bamakaintu alimwi abamaalumi kutegwa bakabe balelinyina a Jesu kujulu. Ikuti twaiya Jwi lya Leza alimwi akubuzya mulongwe kujatikizya mbotubeendelezya bamakaintu, tulakonzya kwiiya kubalemeka bacizyi.

MBUTI BAALU MBOBATONDEZYA BULEMU KUBACIZYI?

Bakwesu mumbungano alimwi balakonzya kwiiya kubeendelezya kabotu bacizyi kwiinda mukwiiya cikozyanyo cabaalu basiluyando. Mbuti baalu mbobali cikozyanyo cibotu cakulemeka bacizyi? Amubone nzila eezyi zyacigaminina.

Baalu balabalumbaizya bacizyi. Mwaapostolo Paulo wakasiya cikozyanyo cibotu ncobakonzya kwiiya baalu. Wakalumbaizya bacizyi bali mbobabede cacigaminina mulugwalo ndwaakalembela mbungano yaku Roma. (Rom. 16:12) Eelo kaka kweelede kuti bakakkomana kapati bacizyi aabo ciindi lugwalo lwa Paulo nolwakabalwa kumbungano! Mbubwenya buyo, baalu balabalumbaizya bacizyi akaambo kabube bwabo bubotu alimwi amulimo ngobamucitila Jehova. Eeci cipa bacizyi kulimvwa kulemekwa alimwi akuyandwa. Majwi aakulwaizya aamwaalu alakonzya kubagwasya kapati bacizyi ciindi nobazumanana kubelekela Jehova cakusyomeka.—Tus. 15:23

Ciindi nobalumbaizya bacizyi, baalu balacita oobo cakutainda mumbali. Nkaambo nzi? Mucizyi wazina lya Jessica wakaamba kuti: “Eelo kaka ncibotu ikuti bakwesu baambila mucizyi kuti ‘mwawoonda mulimo’! Pele cilatukulwaizya kapati ciindi bakwesu nobatulumbaizya kwiinda mukwaamba cintu cigaminide ncotwacita kabotu, mbuli kugwasya bana besu kukkalikila lyamiswaangano naa kulyaaba kuyoobweza sikwiiya Bbaibbele kumuleta kumiswaangano.” Aboobo, ciindi baalu nobabalumbaizya bacizyi munzila eeyi, inga babapa kulimvwa kuyandwa akuti balayandika mumbungano.

Balabaswiilila bacizyi. Baalu balicesya balizyi kuti tabali mbabo balikke bajisi mizeezo mibotu. Aboobo balabalomba bacizyi kuti baambe mizeezo njobajisi alimwi balabaswiilila cakubikkila maano ciindi nobaambaula. Nobacita boobu, bacizyi balakulwaizyigwa kapati alimwi abalo baalu balagwasyigwa. Mubuti? Mwaalu wazina lya Gerardo, uubelekela a Beteli wakaamba kuti: “Ciindi nondilomba mizeezo kuzwa kubacizyi cipa kuti kandibeleka kabotu. Amana buya, kanji-kanji kujanika kuti bacizyi babeleka kwaciindi cilamfwu kwiinda bakwesu.” Mumbungano, bacizyi banji balabeleka kabali bapainiya, calo cipa kuti kabazyi zinji kujatikizya bantu bamucilawo. Mwaalu wazina lya Bryan wakaamba kuti: “Bacizyi balijisi bube bubotu kapati alimwi aluzyibo luyandika mumbunga. Aboobo amugwasyigwe aluzyibo lwabo.”

Baalu basongo balaibikkila maano mizeezo iipegwa abacizyi. Nkaambo nzi? Mwaalu wazina lya Edward wakaamba kuti: “Luzyibo alimwi amizeezo njobapa bacizyi ilakonzya kumugwasya mukwesu kwaamvwisya kabotu makani amwi alimwi akumugwasya kuzyiba mbobalimvwa bamwi.” (Tus. 1:5) Aboobo, nokuba kuti mwaalu takonzyi kwiibelesya mizeezo yapegwa amucizyi, inga cabota kumulumba kumizeezo njaapa alimwi aluzyibo lwakwe.

Balabayiisya bacizyi. Baalu basongo balajana nzila yakuyiisya bacizyi. Mucikozyanyo, balabayiisya mbobakonzya kusololela miswaangano yakulibambila mulimo wamumuunda kuti kakunyina mukwesu uubbapatizyidwe uuliko. Balabayiisya mbobakonzya kubelesya mincini naa zibelesyo zimbi kutegwa bagwasyilizye mumilimo yakubambulula alimwi ayamayake. Ku Beteli bakwesu basololela balabayiisya bacizyi milimo yiindene-indene, mbuli kubambulula, kuula ziyandika, makkompyuta alimwi aimwi buyo. Aboobo, ciindi baalu nobayiisya bacizyi batondezya kuti balabasyoma alimwi akuti inga bacikonzya.

Bacizyi banji balalubelesya lwiiyo ndobakatambula kuzwa kubaalu kugwasya bamwi. Mucikozyanyo, bacizyi bamwi babelesya luzyibo ndobakajana mumulimo wamayake kugwasya bamwi kuyakulula maanda aabo nokwacitika ntenda. Bamwi babelesya luzyibo ndobakajana mubukambausi bwakubuleya kuyiisya bacizyi banji kutegwa abalo kabatola lubazu. Ino bacizyi bababona buti baalu ibakabayiisya? Mucizyi wazina lya Jennifer wakaamba kuti: “Ciindi nitwakali kuyaka Ŋanda ya Bwami imwi, mukwesu iwakali kutusololela wakandiyiisya cakukkazika moyo. Naakabona mbondakali kucita, wakandilumbaizya. Ndakali kukkomana kubeleka anguwe nkaambo ndakali kulimvwa kubikkilwa maano alimwi akusyomwa.”

BUBOTU BWAKUBEENDELEZYA KABOTU BACIZYI

Mbubwenya mbuli Jehova, andiswe tulabayanda bacizyi basyomeka. Aboobo, tubabona mbuli banamukwasyi. (1Tim. 5:​1, 2) Tulabayanda kapati alimwi tulakkomana kubeleka antoomwe ambabo. Kunze lyaboobo, tulakkomana ciindi nobazyiba kuti tulabayanda alimwi akubagwasya. Mucizyi wazina lya Vanessa wakaamba kuti: “Ndilamulumba kapati Jehova akaambo kakuba cibeela cambunga yakwe, mwalo imuli bakwesu banji bandikulwaizya kapati.” Mucizyi umwi waku Taiwan wakaamba kuti: “Eelo kaka ndilamulumba Jehova ambunga yakwe akaambo kakutubikkila maano tobamakaintu alimwi akulemeka mbotulimvwa! Eeci cipa kuti lusyomo lwangu luyume akuzumanana kumulumba akaambo kacoolwe cakuba cibeela cambunga ya Jehova.”

Eelo kaka Jehova ulakkomana ciindi nabona bamaalumi basyomeka kabasolekesya kubona alimwi akweendelezya bamakaintu mbuli mbwacita walo! (Tus. 27:11) Mwaalu waku Scotland wazina lya Benjamin wakaamba kuti: “Bamaalumi banji munyika mazuba aano tababalemeki bamakaintu naaceya. Aboobo ciindi bacizyi nobali a Ŋanda ya Bwami, tuyanda kuti kabalubona lwiindano.” Toonse buyo atusolekesye kumwiiya Jehova kwiinda mukubeendelezya caluyando bacizyi besu alimwi akubapa bulemu bubeelede.—Rom. 12:10.