1. Nkaambo nzi buzuba bwa Ciibalusyo ncobuyandika kapati mumwaka? (Luka 22:​19, 20)

 KUBANTU ba Jehova, buzuba bwa Ciibalusyo ca lufwu lwa Kristo, mbuzuba buyandika kapati mumwaka. Mbobuzuba bulikke Jesu mbwaakalailila basikumutobela kuti kababuyeeya. (Amubale Luka 22:​19, 20.) Kuli twaambo tunji tutupa kucilangila Ciibalusyo. Atutulange-lange twaambo tumwi.

2. Ntwaambo nzi tumwi itutupa kucilangila Ciibalusyo?

² Ciibalusyo cilatugwasya kuzinzibala kuyeeya kujatikizya mbociyandika kapati cinunuzyo. Inga cituyeezya nzila mbotukonzya kutondezya kulumba kwesu akaambo kacipaizyo ca Jesu. (2Kor. 5:​14, 15) Alimwi cilatupa coolwe ‘cakuyumizyanya’ abakwesu abacizyi. (Rom. 1:12) Mwaka amwaka, bakwesu abacizyi banji batacisungweede balajanika ku Ciibalusyo. Akaambo kambobatambulwa munzila yaluyando, bamwi basala kupiluka kuli Jehova. Kuyungizya waawo, bantu banji bajisi luyandisisyo balakulwaizyigwa kutalika kwiiya Bbaibbele akaambo kazintu nzyobabona alimwi akumvwa. Twaambo toonse ootu tupa kuti Ciibalusyo kaciyandika kapati kulindiswe.

3. Mbuti Ciibalusyo mbocitukamantanya? (Amubone acifwanikiso.)

³ Tulacilangila Ciibalusyo akaambo kakuti tulizyi kuti mubuzuba oobu, tulakamantana abakwesu abacizyi nyika yoonse. Bakamboni ba Jehova balaswaangana munyika yoonse kutegwa bacite Ciibalusyo nolyaabbila zuba. Tulaswiilila kumakani aalo aapandulula mbociyandika kapati cinunuzyo. Tulaimba nyimbo zyobilo zyakutembaula, kulainzyigwa zitondezyo alimwi akwaamba camoyo woonse kuti “ameni” kumipailo yone iipegwa. Mumawoola aali 24, mbungano zyoonse inga zilimanizyide kale kucita Ciibalusyo. Amweezeezye buyo mbwakkomana Jehova a Jesu, nobatubona toonse calukamantano katutondezya bulemu kulimbabo munzila eeyi.

4. Ncinzi ncotutiilange-lange mucibalo eeci?

⁴ Mucibalo eeci tulalanga-langa mibuzyo eeyi iitobela: Mbuti mbotukonzya kulibambila mumoyo kujatikizya Ciibalusyo? Mbuti mbotukonzya kupa bamwi kuti bagwasyigwe? Alimwi ino inga twabagwasya buti aabo batacisungweede? Bwiinguzi bwamibuzyo eeyi bulatugwasya kuba bantu balibambilide kujatikizya buzuba oobu buyandika kapati.

MBUTI MBOTUKONZYA KULIBAMBILA MUMOYO KUJATIKIZYA CIIBALUSYO?

5. (a) Nkaambo nzi ncotweelede kuzinzibala kuyeeya mbociyandika kapati cinunuzyo? (Intembauzyo 49:​7, 8) (b) Ncinzi ncomwakaiya kuvidiyo yakuti Ino Jesu Wakafwida Nzi?

⁵ Nzila imwi iiyandika kapati mbotukonzya kulibambila mumoyo kujatikizya Ciibalusyo, nkwiinda mukuzinzibala kuyeeya mbociyandika kapati cipaizyo cacinunuzyo ca Jesu Kristo. Kayi notwatakacikonzya kulifwutula lwesu tobeni kuzwa kucibi alufwu. (Amubale Intembauzyo 49:​7, 8; amubone avidiyo yakuti Ino Jesu Wakafwida Nzi?) a Aboobo, Jehova wakapanga bubambe bwakuti Jesu aabe buumi bwakwe kutegwa tufwutulwe. Masimpe Jehova a Jesu bakatondezya kulyaaba kupati. (Rom. 6:23) Ikuti katujana ciindi cinji cakuzinzibala kuyeeya kujatikizya kulyaaba kwa Jehova alimwi a Jesu, tunoolumba kapati akaambo kacinunuzyo. Aboobo tulalanga-langa zintu zimwi zikatazya kapati zyalo Jehova a Jesu nzyobakalibambilide kutucitila. Pele kusaanguna, ino cinunuzyo cakali kubikkilizya nzi?

6. Ino cinunuzyo ninzi? Nkaambo nzi Jesu ncaakapa cinunuzyo eeci?

⁶ Cinunuzyo muulo uubbadelwa kutegwa cintu cimwi cipilusyigwe. Muntu wakusaanguna, Adamu, wakalilondokede ciindi naakalengwa. Ciindi naakabisya, wakasweekelwa bulangizi bwakupona buumi butamani, walo abana bakwe boonse. Kutegwa apilusye ceeco ncaakasweekelwa Adamu, Jesu wakaaba buumi bwakwe bulondokede. Mubuumi bwakwe boonse bwaanyika, Jesu “tanaakacita cibi, alimwi kunyina lweeno lwakajanwa mukanwa lyakwe.” (1Pet. 2:22) Ciindi Jesu naakafwa, wakalilondokede mbubwenya mbuli Adamu mbwaakabede katanabisya. Aboobo, kwiinda mukwaaba buumi bwakwe, wakabbadelela buumi mbwaakasowa Adamu.—1Kor. 15:45; 1Tim. 2:6.

7. Masunko nzi amwi Jesu ngaakajana ciindi naakali anyika?

⁷ Naakali anyika, Jesu wakazumanana kumumvwida Jehova muzintu zyoonse nociba ciindi nocakali kukatazya kapati kucita boobo. Kacili mwana, Jesu wakali kulibombya kubweendelezi bwabazyali bakwe batalondokede nokuba kuti walo wakalilondokede. (Lk. 2:51) Naakali mukubusi, Jesu wakeelede kukaka kuyungwa kuli koonse kwakutamvwida bazyali bakwe naa kutasyomeka kuli Jehova. Alimwi naakakomena, Jesu wakeelede kwaazunda masunko aa Saatani Diabolosi, kubikkilizya ayaayo ngaakamusunka cacigaminina kutegwa acileke kusyomeka kuli Leza. (Mt. 4:​1-11) Saatani wakaliyandide kapati kupa kuti Jesu abisye kutegwa citakonzyeki kupa cinunuzyo.

8. Masunko nzi aambi Jesu ngaakaliyumya?

⁸ Ciindi naakali kucita mulimo wakwe aano anyika, Jesu wakaliyumya kumasunko aambi. Basinkondonyina bakali kumupenzya akuyanda kumujaya. (Lk. 4:​28, 29; 13:31) Wakeelede kuliyumya kukutalondoka kwabasikumutobela. (Mk. 9:​33, 34) Ciindi naakali kubetekwa, wakaumwa akusampaulwa. Kumane wakajaigwa mbuli cigwebenga, ilufwu lucisa kapati. (Heb. 12:​1-3) Wakeelede kuliyumya kukupenzyegwa ikwakamucitikila kumamanino aabuumi bwakwe bwaanyika, kakunyina kugwasyigwa a Jehova. b—Mt. 27:46.

9. Ino tulimvwa buti kujatikizya kulyaaba kwa Jesu? (1 Petro 1:8)

⁹ Masimpe, Jesu wakapenga kapati kutegwa aabe buumi bwakwe kacili cinunuzyo. Ciindi notuzinzibala kuyeeya zintu zyoonse nzyaakalyaabide kutucitila Jesu, citupa kumuyanda kapati.—Amubale 1 Petro 1:8.

10. Ncinzi Jehova ncaakacita cakuliyandila kutegwa ape cinunuzyo?

¹⁰ Ncinzi Jehova ncaakacita cakuliyandila kutegwa aabe Jesu kacili cinunuzyo? Jehova a Jesu balijisi cilongwe ciyumu kapati icili mbuli ceeco ciba akati kamwana musankwa abausyi. (Tus. 8:30) Amuciyeeyele buyo mbwaakalimvwide Jehova ciindi naakali kulangilila Jesu kapenga kapati aanyika. Tacidoonekwi buya kuti cakumucisa kapati kumubona kapenga.

11. Amupe cikozyanyo citondezyo Jehova mbwaakalimvwa ciindi Jesu naakajaigwa.

¹¹ Muzyali uli woonse iwakafwidwa mwanaakwe ulizyi mbocicisa kapati kufwidwa. Tulijisi lusyomo luyumu kapati lwakuti kuyooba bubuke, pele cilatucisa kapati ciindi muyandwa wesu naafwa. Cikozyanyo eeci citugwasya kumvwisya mbwaakalimvwa Jehova ciindi naakali kulangilila Mwanaakwe kapenga alimwi akufwa mu 33 C.E. c—Mt. 3:17.

12. Ncinzi ncotweelede kucita munsondo zisyoonto kabutanasika buzuba bwa Ciibalusyo?

¹² Kabutanasika buzuba bwa Ciibalusyo, amusole kwiiya zinji kujatikizya cinunuzyo ciindi nomucita ciiyo canu nobeni naa nomukomba mumukwasyi. Amubelesye Bbuku Ligwasya Kuvwuntauzya lya Bakamboni ba Jehova naa zibelesyo zimbi izigwasya kwiiya Bbaibbele kutegwa mwiiye zinji kujatikizya cinunuzyo. d Alimwi amutobelezye mulongo wakubala Bbaibbele wa Ciibalusyo uujanika mu Kabbuku kamuswaangano Wabuumi Amulimo Wesu wa Bunakristo. Mpoonya mubuzuba bwa Ciibalusyo, amukajane ciindi cakweebelela Kukomba Kwamafwumofwumo. Ikuti twalibambila mumoyo kujatikizya ciibalusyo, tuyoocikonzya kupa kuti bamwi bagwasyigwe abalo.—Ezr. 7:10.

AMUPE KUTI BAMWI BAGWASYIGWE

13. Nintaamu nzi yakusaanguna njotukonzya kubweza kutegwa tupe bamwi kugwasyigwa aa Ciibalusyo?

¹³ Ino mbuti mbotukonzya kupa bamwi kuti bagwasyigwe ku Ciibalusyo? Ntaamu yakusaanguna, nkwiinda mukubatamba kuti bakajanike. Kunze buyo lyakutamba baabo mbotujana lyoonse mumulimo wamumuunda, tulakonzya kupanga mulongo wamazina aabantu mbotuzyi kutegwa abalo tukabatambe. Bantu aaba balakonzya kubikkilizya bacibbululu, babelesima, basicikoloma alimwi abambi buyo. Nokuba kuti tatujisi tupepa twakutamba bantu tusimbidwe, tulakonzya kubatumina liinki yakapepa kali aawebbusaiti. Tulakonzya kugambwa kubona bunji bwabantu ibayoojanika.—Muk. 11:6.

14. Amupe cikozyanyo citondezya mbokugwasya kutamba kwacigaminina.

¹⁴ Ikuti mwabatamba bamwi cacigaminina ku Ciibalusyo, balakonzya kukulwaizyigwa kujanika. Mucizyi umwi uukwetwe kumulumi uutali Kamboni, wakagambwa kapati ciindi mulumaakwe naakamwaambila kuti ulaunka anguwe ku Ciibalusyo. Nkaambo nzi? Akaambo kakuti ziindi zinji musyule wakali kumukulwaizya kujanika, pele kunyina naakali kubweza ntaamu. Ino ncinzi cakapa kuti lino abweze ntaamu yakujanika? Wakaamba kuti: “Ndakapegwa kapepa kakutamba bantu ku Ciibalusyo kasimbidwe.” Mwaalu uumwi ngobakazyibene ngowakamutamba. Mulumi ooyu wakajanika ku Ciibalusyo mwaka ooyo alimwi wakazumanana kujanika kwamyaka minji iyakatobela.

15. Ncinzi ncotweelede kuyeeya ciindi notutamba bantu ku Ciibalusyo?

¹⁵ Tweelede kuyeeya kuti aabo mbotutamba balakonzya kuba amibuzyo, ikwaambisya kuti naa kunyina nobakajanikide kale kumiswaangano yesu. Aboobo tulakonzya kuyeeyela limwi mibuzyo njobakonzya kutubuzya akulibambila kubaingula. (Kol. 4:6) Mucikozyanyo, bamwi balakonzya kubuzya kuti: ‘Ncinzi ciyoocitika kumuswaangano ooyu?’ ‘Ino uyootola ciindi cilamfwu buti?’ ‘Ino ndeelede kusama buti?’ ‘Sena kuli mali abbadelwa kutegwa ndikanjile?’ ‘Sena kunooli kupa milumbo?’ Ciindi notutamba muntu umwi ku Ciibalusyo, tulakonzya kumubuzya kuti, “Sena kuli mibuzyo iili yoonse njomujisi?” kumane akumwiingula ikuti kajisi. Kuyungizya waawo, tulakonzya kubelesya vidiyo yakuti Amuyeeye Lufwu lwa Jesu alimwi ayakuti Ino Ncinzi Cicitika ku Ŋanda ya Bwami? kutegwa tugwasye umwi kuzyiba mboicitwa miswaangano yesu. Kunze lyaboobo, ciiyo 28 cabbuku lya Amupone Kukabe Kutamani! cilijisi twaambo tunji tubotu ntotukonzya kubelesya.

16. Mibuzyo nzi aimbi njobakonzya kubuzya aabo ibajanika ku Ciibalusyo?

¹⁶ Camana Ciibalusyo, bamwi bapya ibajanika balakonzya kuba amibuzyo iimbi. Balakonzya kulibuzya kaambo ncokwanyina balya akunywa zitondezyo, naa ncokwakali buyo basyoonto ibacita boobo. Alimwi balakonzya kuyanda kuzyiba kuvwula kwaziindi nzyotucita Ciibalusyo. Kuyungizya waawo, balakonzya kuyanda kuzyiba naa miswaangano yoonse ya Bakamboni ba Jehova mboicitwa oobo. Cibalo icili a jw.org cakuti “Nkaambo Nzi Bakamboni ba Jehova Ncobacita Mulalilo wa Mwami Munzila Iindene Azikombelo Zimbi?” cilakonzya kutugwasya kwiingula mibuzyo imwi njobakonzya kubuzya. Tuyanda kucita kufwumbwa ncotukonzya kacitanatalika Ciibalusyo, caakutalika alimwi acaakwiinda kutegwa aabo ‘ibali amyoyo mibotu’ bakagwasyigwe.—Mil. 13:48.

KUGWASYA BATACISUNGWEEDE

17. Mbuti baalu mbobakonzya kubagwasya aabo batacisungweede? (Ezekieli 34:​12, 16)

¹⁷ Mbuti baalu mbobakonzya kugwasya baabo batacisungweede lya Ciibalusyo? Nkwiinda mukubabikkila maano. (Amubale Ezekieli 34:​12, 16.) Kabunatanasika buzuba bwa Ciibalusyo, amusolekesye kubandika abatacisungweede banji. Amubaambile kuti mulabayanda akuti muliyandide kubagwasya munzila iili yoonse njomukonzya. Amubatambe ku Ciibalusyo. Ikuti baakucikonzya kujanika, amukabatambule amaanza obilo. Cakwiinda Ciibalusyo, amukazumanane kubandika abakwesu abacizyi aaba, akubapa lugwasyo lwakumuuya luli loonse ndobayandika kutegwa bapiluke kuli Jehova.—1Pet. 2:25.

18. Mbuti toonse mbotukonzya kubagwasya aabo batacisungweede? (Baroma 12:10)

¹⁸ Boonse mumbungano balakonzya kubagwasya batacisungweede kujanika ku Ciibalusyo. Munzila nzi? Kwiinda mukubeendelezya caluyando, caluzyalo alimwi acabulemu. (Amubale Baroma 12:10.) Amuyeeye kuti tiicali cuuba-uba kubakwesu abacizyi aaba kujanika kumuswaangano. Ambweni bakali kuyoowa kuti tabakatambulwi kabotu. e Aboobo tamweelede kubabuzya mibuzyo iikonzya kubajazya nsoni naa kwaamba cintu cimwi cikonzya kubapa kulimvwa bubi. (1Tes. 5:11) Bakwesu abacizyi aaba mbakombima. Cilatukkomanisya kapati kutalika alimwi kukomba antoomwe ambabo.—Int. 119:176; Mil. 20:35.

19. Ino kuyeeya lufwu lwa Jesu kutugwasya buti?

¹⁹ Tulalumba kapati akaambo kakuti Jesu wakatwaambila kuti katuluyeeya lufwu lwakwe mwaka amwaka alimwi tulamvwisya kaambo ncociyandika kapati kucita boobo. Ikuti twajanika ku Ciibalusyo, tulagwasyigwa munzila zinji swebo lwesu kutugama alimwi abamwi. (Is. 48:​17, 18) Luyando ndotujisi kuli Jehova a Jesu lulakomena. Tulatondezya kulumba kapati akaambo kazintu nzyobakatucitila. Tulaba acilongwe ciyumu abakwesu abacizyi. Alimwi tulakonzya kugwasya bamwi kwiiya mbobakonzya kukkomana azilongezyo ziboola akaambo kacinunuzyo. Aboobo, atucite kufwumbwa ncotukonzya kulibambila Ciibalusyo camwaka uuno, ibuzuba bwalo buyandika kapati mumwaka.