1. Ncinzi bantu banji ncobabikkila kapati maano mazuba aano?

 AMBWENI mulabona kuti bantu banji mazuba aano balibikkila kapati maano lwabo beni kwiinda bamwi. Mucikozyanyo, bamwi babelesya Intaneti kutegwa balibonesye alimwi akulisumpula akaambo kazintu nzyobacita. Pele mbasyoonto buyo bayanda kupa Jehova bulemu bumweelede. Aboobo mucibalo eeci, tulabandika ncocaamba kupa Jehova bulemu alimwi akaambo ncotweelede kucitila boobo. Alimwi tulaiya mbotukonzya kumupa bulemu bumweelede ambwayoolisalazya zina lyakwe kumbele.

INO CAAMBA NZI KUPA JEHOVA BULEMU?

2. Ino Jehova wakabutondezya buti bulemu bwakwe a Cilundu ca Sinai? (Amubone acifwanikiso icili.)

² Ino bulemu ninzi? Mu Bbaibbele, ibbala lyakuti “bulemu” lilakonzya kwaamba cintu cili coonse cikonzya kupa muntu umwi kulibonya kuti ulaanguzu kapati. Jehova wakabutondezya bulemu bwakwe nokwakainda buyo ciindi cisyoonto kuzwa naakagwisya bana Israyeli mubuzike ku Egepita. Amweezeezye buyo cakacitika: Mamiliyoni aabana Israyeli akabungana aafwaafwi a Cilundu ca Sinai kutegwa bamvwe ncaakali kuyanda kubaambila Leza. Kumane cilundu cakavwumbwa akkumbi lisiya mbi. Mpoonya cakutayeeyela cakatalika kusuka busi. Kumane kwakaba muzuzumo mupati wanyika, ndabo alimwi akulila kupati kwamweembo. (Kul. 19:​16-18; 24:17; Int. 68:8) Ciindi Jehova naakacita zintu eezyi, kweelede kuti bana Israyeli bakagambwa kapati kubona mbwali singuzu.

3. Muunzila nzi motukonzya kumupa bulemu Jehova?

³ Mbuti kujatikizya bantu? Sena tulakonzya kumupa bulemu Jehova? Inzya tulakonzya. Nzila imwi mbotukonzya kucita boobo, nkwiinda mukwaambila bamwi kujatikizya nguzu nzyajisi alimwi abube bwakwe butaliboteli. Kuyungizya waawo, tulakonzya kumulemeka Leza ciindi notupa kuti atembaulwe nguwe akaambo kazintu nzyatugwasya kucita. (Is. 26:12) Mwami Davida ncikonzyanyo cibotu kapati camuntu iwakapa Jehova bulemu. Mumupailo  ngwaakapaila kumbele lyambungano yabana Israyeli, Davida wakaambila Leza kuti: “Yebo O Jehova, bupati, nguzu, bweebesi, lulemeko abulemu nzizyako, nkaambo zintu zyoonse kujulu alimwi aanyika nzizyako.” Aboobo naakamana kupaila, “mbungano yoonse yakatembaula Jehova.”—1Mak. 29:​11, 20.

4. Mbuti Jesu mbwaakamupa bulemu Jehova?

⁴ Jesu naakali anyika, wakabalemeka Bausyi kwiinda mukwaambila bantu kuti mbabakali kumupa nguzu zyakucita maleele. (Mk. 5:​18-20) Kunze lyaboobo, wakamulemeka Jehova kwiinda muzintu nzyaakali kwaamba kujatikizya nguwe alimwi ambwaakali kubeendelezya bamwi. Aciindi cimwi, Jesu wakali kuyiisya mucikombelo. Mpoonya akati kabaabo ibakali kumuswiilila, kwakali mukaintu umwi iwakanjidwe daimona kwamyaka iili 18. Alimwi daimona eeli lyakamupa koongomana, cakuti tanaakali kukonzya koololoka naaceya. Eelo kaka eeci cakali kweetezya! Akaambo kakumufwida lweetelelo, Jesu wakamusikila mukaintu ooyu akumwaambila munzila yaluzyalo kuti: “Omukaintu, waangululwa kubulwazi bwako.” Kumane wakabikka maanza aakwe alinguwe, eelyo ndilyona wakoololoka “akutalika kutembaula Leza.” Eelo kaka mukaintu ooyu wakamulumba kapati Jehova akaambo kakumuponya! (Lk. 13:​10-13) Tacidoonekwi buya kuti mukaintu ooyu wakalijisi kaambo kabotu kakumupa bulemu Jehova, mbubwenya buyo andiswe tulijisi twaambo tubotu ncotweelede kucitila boobu.

NKAAMBO NZI NCOTWEELEDE KUMULEMEKA JEHOVA?

5. Ntwaambo nzi tumwi tutupa kuti katumulemeka Jehova?

⁵ Tulamulemeka Jehova akaambo kakuti ngu Leza uugambya. Tulijisi twaambo tunji itutupa kuti katumulemeka. Mucikozyanyo, Jehova ngusinguzuzyoonse, ulakonzya kucita kufwumbwa ncayanda alimwi takatali pe. (Int. 96:​4-7) Alimwi busongo bwakwe bugambya bulalibonya caantangalala muzintu nzyaakalenga. Wakatupa buumi azintu zyoonse nzyotuyandika kutegwa tuzumanane kupona. (Ciy. 4:11) Ulasyomeka. (Ciy. 15:4) Zintu zyoonse nzyacita zilazwidilila, alimwi kufwumbwa nzyaasyomezya ulazizuzikizya. (Jos. 23:14) Nkakaambo kaako musinsimi Jeremiya wakaamba boobu kujatikizya Jehova: “Akati kabasongo boonse bamumasi alimwi aakati kamami aabo oonse, kunyina naba omwe uuli mbuli nduwe”! (Jer. 10:​6, 7) Masimpe, tulijisi twaambo tubotu itweelede kutupa kumulemeka Taateesu wakujulu. Nokuba boobo, tatugoleli buyo akumulemeka Jehova, pele alimwi tulamuyanda.

6. Nkaambo nzi ncotumuyanda Jehova?

⁶ Tulamulemeka Jehova akaambo kakuti tulamuyanda kapati. Amubone bube bumwi ibupa kuti katumuyanda. Jehova ngusiluse alimwi ngusilubomba. (Int. 103:13; Is. 49:15) Ngusilweetelelo, aboobo cilamucisa nabona katupenga. (Zek. 2:8) Kunze lyaboobo, ulatugwasya kumuzyiba alimwi akuba balongwe bakwe. (Int. 25:14; Mil. 17:27) Ulalicesya, aboobo ‘ulooka kuti alange julu anyika, akubusya muntu uupengede kuzwa mulusuko.’ (Int. 113:​6, 7) Akaambo katwaambo toonse ootu, tuyanda kumulemeka Leza wesu.—Int. 86:12.

7. Ncoolwe nzi caalubazu ncotujisi?

⁷ Tulamulemeka Jehova akaambo kakuti tuyanda kuti abambi bamuzyibe. Bantu banji tabakazyi kasimpe kajatikizya Jehova. Nkaambo nzi? Akaambo kakuti Saatani woofwaazya mizeezo yabo kwiinda mukwaamba makani aakubeja kujatikizya nguwe. (2Kor. 4:4) Saatani wapa bantu kusyoma kuti Jehova ngu Leza mukali, uutatubikkili maano alimwi akuti nguupa kuti katupenga. Pele swebo tulikazyi kasimpe kajatikizya Leza wesu. Aboobo tulijisi coolwe cakwaambila bantu bwini mbwabede, calo icikonzya kupa kuti abalo batalike kumulemeka. (Is. 43:10) Lugwalo lwa Intembauzyo  96 lubikkila maano kukumupa bulemu Jehova. Aboobo twanoobandika majwi aamwi aali muntembauzyo eeyi, amubone nzila zimwi mbomukonzya kumupa bulemu bumweelede Jehova.

MBUTI MBOTUKONZYA KUPA JEHOVA BULEMU BUMWEELEDE?

8. Muunzila nzi motukonzya kumulemeka Jehova? (Intembauzyo 96:​1-3)

⁸ Amubale Intembauzyo 96:​1-3. Tulakonzya kumulemeka Jehova kwiinda muzintu nzyotwaamba kujatikizya nguwe. Tupango ootu tutwaambila ‘kwiimbila Jehova, kutembaula zina lyakwe, kwaambilizya makani mabotu aalufwutuko lwakwe,’ alimwi ‘akwaambilizya bulemu bwakwe akati kamasi.’ Zyoonse eezyi ninzila nzyotukonzya kumupa bulemu Taateesu wakujulu. Ba Juda basyomeka alimwi a Banakristo bamumwaanda wamyaka wakusaanguna, kunyina nobakawayawaya kwaambila bamwi kujatikizya zintu zibotu zyoonse nzyaakabacitila Jehova alimwi abube bwakwe bubotu. (Dan. 3:​16-18; Mil. 4:29) Mbuti mbotukonzya kucita oobo andiswe?

9-10. Ncinzi ncomwaiya kucakuluula caba Angelena? (Amubone acifwanikiso.)

⁹ Amumvwe cakuluula caba Angelena, a mucizyi umwi uukkala ku United States. Cabusicamba, bakaamba bube bubotu mbwajisi Jehova kubusena nkobabelekela. Mbwaanga bakazwide akutalika mulimo ooyu, balo antoomwe abeenzinyina bambi bapya bakatambwa kuti bakajanike kumuswaangano umwi. Kumuswaangano ooyu, umwi aumwi wakeelede kwaamba kujatikizya mbwaakakomena. Ba Angelena bakalibambila kuti bakatondezye mafwoto amwi aatondezya mbobakakkomene akaambo kakuba umwi wa Bakamboni ba Jehova. Nokuba boobo, kakusyeede buyo ciindi cisyoonto kuti cisike ciindi cabo cakwaambaula, mubelesinyina umwi wakaamba kuti wakakomezyegwa abazyali ibakali Bakamboni ba Jehova. Kumane wakatalika kwaamba zintu zibi kujatikizya Bakamboni ba Jehova alimwi azintu nzyobasyoma. Ba Angelena bakaamba kuti: “Moyo wangu wakazwa, ndakayoowa kapati. Pele ndakalyaambauzya kuti: ‘Inga tiindalekela muntu kwaamba zintu zyakubeja kujatikizya Jehova. Ndeelede kubaambila masimpe.’”

¹⁰ Ciindi mubelesinyina ooyu naakamana kwaambaula, ba Angelena bakapaila mupailo mufwaafwi cakaumuumu. Kumane caluzyalo bakaambila mubelesinyina ooyu kuti: “Bukkale bwangu bulikozyenye abwanu. Andime ndakakomezyegwa abazyali Bakamboni alimwi ndicizumanana  kusikila sunu.” Nokuba kuti bwakali bukkale bukatazya, ba Angelena bakazumanana kukkazika moyo. Bakabatondezya babelesinyina mafwoto ngobakali antoomwe abeenzinyina kababelekela Jehova calukkomano. Mpoonya cabulemu bakapandulula nzyobasyoma. (1Pet. 3:15) Ncinzi cakazwa mpawo? Nobakamana kwaambaula ba Angelena, mubelesinyina ulya wakazingimana. Mane buya wakaamba zyakuluula zimwi zibotu nzyaakajisi ciindi naakali kuyanzana a Bakamboni ba Jehova kacili mwana. Ba Angelena bakaamba kuti: “Tweelede kumwiiminina Jehova. Alimwi ncoolwe cilibedelede kwaambila bamwi kasimpe kajatikizya nguwe.” Andiswe tulijisi coolwe cakumutembaula Jehova alimwi akupa kuti alemekwe noliba leelyo bamwi nobatamulemeki.

11. Kuzwa kaindi, mbuti bakombi bakasimpe mbobali kwiitobela njiisyo iili kulugwalo lwa Intembauzyo 96:8?

¹¹ Amubale Intembauzyo 96:8. Tulakonzya kumulemeka Jehova azintu zyesu ziyandisi. Bakombi ba Jehova bakasimpe bali kucita oobo lyoonse munzila eeyi. (Tus. 3:9) Mucikozyanyo, bana Israyeli bakasanga mali azintu zyabo ziyandisi kutegwa tempele liyakwe akubambululwa. (2Bam. 12:​4, 5; 1Mak. 29:​3-9) Basikwiiya ba Jesu bamwi bakamukutaukila walo abaapostolo bakwe “kwiinda mukubelesya lubono lwabo.” (Lk. 8:​1-3) Alimwi Bbaibbele lyaamba kuti ciindi Banakristo bamwi nobakapenga akaambo kanzala, bakwesu abacizyi ibakali kukkala mumasena aambi bakabatumina mali. (Mil. 11:​27-29) Mazuba aano, andiswe tulakonzya kumulemeka Jehova kwiinda mukusanga cakuliyandila.

12. Mbuti zyakusanga zyesu mbozipa kuti Jehova alemekwe? (Amubone acifwanikiso.)

¹² Amumvwe cakuluula cimwi icitondezya zyakusanga zyesu mbozipa kuti Jehova alemekwe. Mu 2020, kwakali cilanga icakatola ciindi cilamfwu kapati mu Zimbabwe. Bantu banji bakafwutukila kumpela aalwala akaambo kakubula cakulya, kubikkilizya amucizyi uutegwa Prisca. Nokuba kuti kwakali cilanga, mucizyi Prisca wakazumanana kuunka mumulimo wakukambauka muli Bwatatu amuli Bwasanu nociba ciindi cakulima. Aboobo basimukobonyina bakatalika kumufwubaazya akaambo kakuunka mumulimo wakukambauka muciindi cakuunka kumuunda kabaamba kuti: “Iyoomujaya nzala nywebo.” Cabusicamba, ba Prisca bakali kubaingula kuti: “Jehova kunyina nabalekelezya babelesi bakwe.” Kalitanalampa, bakatambula zyakulya azintu zimbi nzyobakali kuyandika kuzwa kumbunga yesu. Eeci cakakonzyeka akaambo kazyakusanga zyesu. Basimukobonyina bakagambwa  kapati, mane bakabaambila kuti: “Masimpe Leza kunyina naamulekelezya, aboobo andiswe tuyanda kwiiya zinji kujatikizya nguwe.” Cikkomanisya ncakuti, basimukobonyina bali 7 bakatalika kujanika kumiswaangano yambungano.

13. Ino bukkale bwesu inga bwamulemeka buti Jehova? (Intembauzyo 96:9)

¹³ Amubale Intembauzyo 96:9. Tulakonzya kumulemeka Jehova kwiinda mubukkale bwesu. Mucikozyanyo, bapaizi ibakali kubelekela atente lyakuswaanganina kumane kumbele kutempele lya Jehova, bakeelede kusalala kumubili. (Kul. 40:​30-32) Mbubwenya buyo, andiswe tweelede kusalala ikutali buyo kumubili pele alimwi akweeleba kucita cintu cili coonse ncasulide Jehova. (Int. 24:​3, 4; 1Pet. 1:​15, 16) Bbaibbele lyaamba kuti tweelede ‘kusamununa buntu bwakaindi’ mpoonya ‘akusama buntu bupya.’ Eeci caamba kuti tweelede kucita kufwumbwa ncotukonzya kweeleba mizeezo iitaluzi alimwi abukkale butamukkomanisyi Jehova. Pele tweelede kuyeeya akucita zintu munzila iitondezya kuti twiiya Jehova alimwi abube bwakwe bubotu. (Kol. 3:​9, 10) Kwiinda mukugwasyigwa a Jehova, nobaba bantu batalilemeki alimwi basinkondo balakonzya kucinca akusama buntu bupya.

14. Ncinzi ncomwaiya kucakuluula caba Jack? (Amubone acifwanikiso.)

¹⁴ Amumvwe cakuluula caba Jack ibakali cigwebenga cibyaabi alimwi ciyoosya kapati, balo ibakapedwe zina lyakuti Daimona. Akaambo kamilandu yabo, bakapegwa cisubulo cakujaigwa. Pele nobakali kulindila kujaigwa, mukwesu umwi iwakali kuswaya ntolongo wakabaambila zyaciiyo ca Bbaibbele. Kumane ba Jack bakazumina kutalika kwiiya. Nokuba kuti bukkale bwabo tiibwakali kabotu kaindi, ba Jack bakabusamununa buntu bwabo bwakaindi, mpoonya mukuya kwaciindi bakeelela kubbapatizyigwa. Bakacinca kapati cakuti nobwakasika buzuba mbobakali kujaigwa, basikugatela ntolongo bamwi yakabeenda misozi ciindi nobakali kulayana ambabo. Sikalumamba umwi iwakali kubelekela muntolongo wakaamba kuti: “Ba Jack bakali bantu babyaabi kapati mubusena obuno. Lino mbantu bali kabotu kapati.” Nsondo yakatobela kuzwa ba Jack nobakajaigwa, bakwesu ibakaunka kuyoosololela muswaangano wansondo ansondo, bakaswaangana amwaange umbi iwakajanika amuswaangano ciindi cakusaanguna. Ncinzi cakapa kuti ajanike? Wakagambwa kapati kubona mbobakacinca ba Jack aboobo wakali kuyanda kuzyiba  ncaakeelede kucita kutegwa kakomba Jehova. Masimpe, bukkale bwesu bulakonzya kupa kuti Taateesu wakujulu alemekwe.—1Pet. 2:12.

MBUTI JEHOVA MBWAYOOPA KUTI ZINA LYAKWE LILEMEKWE?

15. Mbuti Jehova mbwayoopa kuti zina lyakwe lilemekwe? (Intembauzyo 96:​10-13)

¹⁵ Amubale Intembauzyo 96:​10-13. Tupango ootu twamamanino twalugwalo lwa Intembauzyo 96 twaamba Jehova kuti Mubetesi alimwi Mwami mululami. Pele mbuti Jehova mbwayoopa kuti zina lyakwe lilemekwe? Uyoocita oobo kwiinda mulubeta lwakwe lululeme. Ino-ino uyoomunyonyoona Babuloni Mupati akaambo kakuleta masampu kuzina lyakwe lisalala. (Ciy. 17:​5, 16; 19:​1, 2) Bamwi ibayoolibonena kunyonyoonwa kwa Babuloni Mupati ambweni bayootusangana mubukombi bwakasimpe. Mpoonya lya Amagedoni, Jehova uyoobunyonyoona bweende bwazintu boonse bwa Saatani, akubanyonyoona aabo boonse bamukazya akusampaula zina lyakwe. Pele uyoobafwutula aabo boonse bamuyanda, bamumvwida alimwi akumulemeka. (Mk. 8:38; 2Tes. 1:​6-10) Mpoonya waakwiinda musunko wamamanino, kumamanino aa Bulelo bwa Kristo bwa Myaka Iili 1,000, Jehova unooli walisalazya zina lyakwe cakumaninina. (Ciy. 20:​7-10) Aciindi eeco, “nyika iyoozula luzyibo lwabulemu bwa Jehova mbubonya maanzi mbwaazuzya lwizi.”—Hab. 2:14.

16. Ino mukanzide kucita nzi? (Amubone acifwanikiso.)

¹⁶ Eelo kaka cinookkomanisya kapati ciindi bantu boonse ibanoopona nobayoopa Jehova bulemu bweelede zina lyakwe! Pele noliba lino, tulakonzya kucita kufwumbwa ncotukonzya kwaambila bamwi kujatikizya Leza wesu alimwi akupona munzila iikonzya kupa kuti alemekwe. Kukankaizya kaambo aaka kayandika kapati, bamu Kabunga Keendelezya bakasala lugwalo lwa Intembauzyo 96:8 kuba lugwalo lwesu lwamwaka wa 2025, ilwaamba kuti: “Amupe Jehova bulemu ibweelede zina lyakwe.”