CIBALO CAKWIIYA 3
LWIIMBO 35 “Amusinizye Zintu Ziyandika Kapati”
Amupange Zyakusala Izimukkomanisya Jehova
“Kuyoowa Jehova ngamatalikilo aabusongo, alimwi kumuzyiba Ooyo Uusalalisya ngamaano.”—TUS. 9:10
ZILAAYIIGWE
Mbotukonzya kubelesya luzyibo, maano alimwi abupampu kutegwa tupange zyakusala zili kabotu.
1. Mbuyumuyumu nzi toonse mbotujana?
BUZUBA ABUZUBA tuyandika kupanga zyakusala. Zyakusala zimwi tazikatazyi, mbuli kusala ncotuyanda kulya kuseeni naa ciindi cakuunka kukoona. Pele zintu zimwi zilakatazya kusala. Nkaambo zilakonzya kubujatikizya buumi bwesu, lukkomano lwesu, bayandwa besu alimwi buya abukombi bwesu. Tuyanda kuti nzyotusala kazitugwasya alimwi buya kazibagwasya abanamukwasyi. Pele kwiinda zyoonse, tuyanda kuti kazimukkomanisya Jehova.—Rom. 12:1, 2.
2. Ncinzi cikonzya kumugwasya kutegwa musale kabotu?
2 Mulakonzya kusala kabotu ikuti (1) mwazyiba twaambo twamasimpe, (2) mwalanga-langa Jehova mbwaabona makani aayo mpoonya (3) mwakuyeeyesya kusala kumwi akumwi. Cibalo eeci cilabandika twaambo ootu alimwi cilatugwasya kubona mbotukonzya kwaayiisya maano eesu.—Heb. 5:14.
AMUZYIBE TWAAMBO TWAMASIMPE
3. Amupe cikozyanyo citondezya kaambo ncomweelede kuzyiba twaambo twamasimpe kamutanapanga cakusala.
3 Cintu cakusaanguna ncomweelede kucita nkuzyiba twaambo twamasimpe. Nkaambo nzi eeci ncociyandika kapati? Amweezeezye kuti mulwazi waunka kuli dokota akaambo kakuti ulaciswa kapati. Sena dokota ooyo inga wamupa buyo musamu mulwazi kakunyina kusaanguna kumulanga-langa naa kumubuzya mibuzyo? Peepe. Mbubwenya buyo, andinywe mulakonzya kusala kabotu ikuti mwasaanguna kutulanga-langa twaambo twamasimpe twalo itweendelana abukkale bwanu. Ino inga mwacita buti oobo?
4. Kweelana alugwalo lwa Tusimpi 18:13, mbuti mbomukonzya kuzyiba twaambo twamasimpe? (Amubone acifwanikiso.)
4 Kanji-kanji mulakonzya kuzyiba twaambo twamasimpe kwiinda mukubuzya mibuzyo. Mucikozyanyo, amweezeezye kuti mwatambwa kupobwe. Sena mweelede kuyoojanika? Ikuti kamutamuzyi iwabamba pobwe eelyo naa zintu nzyabambide, mweelede kumubuzya sikumutamba mibuzyo mbuli yakuti: “Ndilili alimwi nkookuli pobwe eelyo nkoliyoocitikila? Ino kunooli bantu banji buti? Nguni uyoolyeendelezya? Mbaani bayoojanika? Nzintu nzi ziyoocitika? Sena kunooli bukoko?” Kujana bwiinguzi kumibuzyo eeyi, kulakonzya kumugwasya kusala kabotu.—Amubale Tusimpi 18:13.
Amuzyibe twaambo twamasimpe kwiinda mukubuzya mibuzyo (Amubone muncali 4) a
5. Ncinzi ncomweelede kucita mwamana kuzyiba twaambo twamasimpe?
5 Mwamana kuzyiba twaambo twamasimpe, amuzinzibale kuyeeya kujatikizya bukkale boonse. Mucikozyanyo, mbuti kuti mwazyiba kuti bantu batatobeli zyeelelo zyamu Bbaibbele bayoojanika kupobwe eelyo, naa kuti kunooli bukoko pele kunoonyina muntu unoolanganya bantu kutegwa kabataciindizyi kunywa? Sena muyeeya kuti eeli lilangilwa kuyooba pobwe liteendelezyeki? (1Pet. 4:3) Alimwi mbuti kuti kujanika kupobwe eelyo kuyoomupa kutajanika kumuswaangano wambungano naa kuunka mumulimo wakukambauka? Ikuti mwatuyeeyesya twaambo twamasimpe toonse kujatikizya bukkale oobu, ciyoomuubila kupanga cakusala cili kabotu. Pele kuli cintu acimbi ncomweelede kucita. Inga kamuzyi mbomulimvwa kujatikizya bukkale oobu, pele amulibuzye kuti, ‘Ino walo Jehova ulimvwa buti?’—Tus. 2:6.
AMULANGE-LANGE JEHOVA MBWAABONA MAKANI AAYO
6. Kweelana alugwalo lwa Jakobo 1:5, nkaambo nzi ncotweelede kupailila lugwasyo lwa Jehova?
6 Amumulombe Jehova kuti amugwasye kuzyiba mbwayeeya. Jehova utusyomezya kutupa busongo kutegwa atugwasye kuzyiba naa kusala kwesu kulamukkomanisya. Busongo oobu ulabupa ‘cabuuya alimwi kakunyina kusampaula.’—Amubale Jakobo 1:5.
7. Mbuti mbomukonzya kuzyiba mbwayeeya Jehova? Amupe cikozyanyo.
7 Mwamana kupailila busolozi bwa Jehova, amubikkile maano kubona mbwamwiingula. Mucikozyanyo, ikuti mwasweeka, mulakonzya kulomba muntu wakubusena ooko kutegwa amugwasye. Pele sena inga mwatalika kweenda katanamanizya kumupandulwida? Peepe. Mulamuswiilila cakubikkila maano. Mbubwenya buyo, mwamana kupailila busongo bwa Jehova amusole kubona milawo yamu Bbaibbele anjiisyo zikonzya kubeleka mubukkale bwanu. Mucikozyanyo, ciindi nomuyanda kusala kuyoojanika kupobwe lyaambwa kale, mulakonzya kulanga-langa ncolyaamba Bbaibbele kujatikizya mapobwe aatali kabotu, kuyanzana kubyaabi alimwi ambociyandika kubikka zintu zya Bwami mubusena bwakusaanguna muciindi cazintu nzyotuyanda.—Mt. 6:33; Rom. 13:13; 1Kor. 15:33.
8. Ncinzi ncomukonzya kucita kutegwa mujane makani ngomuyandaula? (Amubone acifwanikiso.)
8 Nokuba boobo, zimwi ziindi inga mwayandika lugwasyo kutegwa mujane makani ngomuyandaula. Mukwesu naa mucizyi uusimide kumuuya ulakonzya kumugwasya. Pele inga mwagwasyigwa kapati kwiinda mukulivwuntauzizya nobeni. Mulakonzya kujana makani manji aagwasya muzibelesyo zyakwiiya mbuli Bbuku Ligwasya Kuvwuntauzya lya Bakamboni ba Jehova alimwi alya Magwalo Aagwasya Kupona Buumi bwa Bunakristo. Kamuyeeya kuti mbaakani yanu njakupanga cakusala ciyoomukkomanisya Jehova.
Amulange-lange Jehova mbwaabona makani aayo (Amubone muncali 8) b
9. Mbuti mbotukonzya kuba masimpe kuti zyakusala zyesu zilamukkomanisya Jehova? (Baefeso 5:17)
9 Mbuti mbotukonzya kuba masimpe kuti nzyotusala zilamukkomanisya Jehova? Cakusaanguna tweelede kumuzyiba kabotu. Bbaibbele lyaamba kuti: “Kumuzyiba Ooyo Uusalalisya ngamaano.” (Tus. 9:10) Masimpe, kuba amaano ncobeni kulaboola kwiinda mukuzyiba bube bwa Jehova, makanze aakwe, zintu nzyayanda alimwi anzyasulide. Aboobo, amulibuzye kuti: ‘Kweelana ambondimuzyi Jehova, ncakusala nzi cikonzya kumukkomanisya?’—Amubale Baefeso 5:17.
10. Nkaambo nzi njiisyo zyamu Bbaibbele ncoziyandika kapati kwiinda mizeezo yabanamukwasyi naa zilengwa zyakubusena nkotukkala?
10 Kutegwa tumukkomanisye Jehova, zimwi ziindi inga twayandika kucita zintu zikonzya kubatyompya aabo mbotuyanda kapati. Mucikozyanyo, bazyali bamwi ibajisi makanze mabotu, balakonzya kusungilizya mwanaabo kukwatwa kumuntu uuvwubide uukonzya kubapa mali manji aacikwati, nokuba kuti muntu ooyo tabikkili maano kuzintu zyakumuuya. Masimpe kuti bazyali inga kabayanda kuti mwanaabo akakkale kabotu, pele mwana ooyo weelede kulibuzya kuti, sena mwaalumi ooyu uyoondigwasya kuba acilongwe ciyumu a Jehova? Ino Jehova waabona buti makani aaya? Tulabujana bwiinguzi kulugwalo lwa Matayo 6:33. Kulugwalo oolu, Banakristo bakulwaizyigwa kuzumanana “kusaanguna kuyandaula Bwami.” Aboobo nokuba kuti tulabalemeka bazyali besu alimwi abantu bamucilawo motukkala, makanze eesu ngakukkomanisya Jehova.
AMUKUYEEYESYE KUSALA KUMWI AKUMWI
11. Mbube nzi bwaambidwe kulugwalo lwa Bafilipi 1:9, 10 bukonzya kumugwasya kusala kabotu?
11 Mwamana kulanga-langa njiisyo zyamu Bbaibbele kujatikizya cintu ncomuyanda kusala, muyandika kuzinzibala kuyeeya kusala kumwi akumwi. (Amubale Bafilipi 1:9, 10.) Bube bwakumvwisya bulakonzya kumugwasya kuzyiba cikonzya kuzwa mpawo kukusala ooko kumwi akumwi. Zyakusala zimwi tazikatazyi. Pele zimwi zilakatazya. Aboobo kumvwisya kulakonzya kumugwasya kusala kabotu nomuba mubukkale bukatazya.
12-13. Ino kumvwisya inga kwamugwasya buti kusala kabotu mulimo wakumubili?
12 Amweezeezye bukkale oobu. Muyandaula mulimo uukonzya kumugwasya kujana nzyouyandika mukwasyi. Mpoonya mwajana milimo yobilo. Mwalanga-langa twaambo toonse tujatikizyidwe, mbuli musyobo wamulimo, ciindi ncomunoobeleka ancomunakweenda kuya kumulimo azimwi buyo. Alimwi yoonse ili buyo kabotu ku Munakristo. Pele ambweni mwakkomanina umwi akaambo kamusyobo wamulimo naa akaambo kakuti uvwolwa mali manji. Nokuba boobo, kuli azintu zimwi nzyomweelede kulanga-langa kamutanapanga cakusala.
13 Mucikozyanyo, sena umwi akati kamilimo eeyo unoomupa kuti kamutajaniki kumiswaangano yambungano imwi naa kumumanina ciindi ncomweelede kuba abanamukwasyi? Kulibuzya mubuzyo ooyu kulakonzya kumugwasya “kusinizya zintu ziyandika kapati,” nkokuti bukombi bwanu azintu nzyouyandika mukwasyi wanu muciindi cakubikkila maano kukuyanda kujana mali manji. Aboobo, mulakonzya kupanga cakusala cikonzya kupa kuti Jehova amulongezye.
14. Mbuti kumvwisya akutondezya luyando mbokuyootugwasya kweeleba kulebya bamwi?
14 Kumvwisya alimwi kulakonzya kutugwasya kulanga-langa kusala kwesu mbokukonzya kubajatikizya bamwi kutegwa ‘tutabalebyi.’ (Flp. 1:10) Eeci cilayandika kapati notusala mumakani aansamino akulibamba. Mucikozyanyo, tulakonzya kuti katukkomanina nsamino imwi naa kulibamba munzila imwi. Pele ino mbuti kuti nsamino naa kulibamba ooko kakukonzya kubatyompya bakwesu abacizyi naa aabo ibatali Bakamboni? Kumvwisya kuyootugwasya kulemeka mbobalimvwa. Luyando luyootukulwaizya kuyandisya kugwasya “bamwi” akusama cabulemu. (1Kor. 10:23, 24, 32; 1Tim. 2:9, 10) Aboobo, tuyoosala munzila iyootondezya kuti tulabayanda akubalemeka bamwi.
15. Ncinzi ncomweelede kuyeeya kamutanapanga cakusala ciyandika kapati?
15 Ikuti kamuyanda kupanga cakusala cipati, amuyeeye ncomweelede kucita kutegwa mucizuzikizye. Jesu wakatuyiisya kuti tweelede “kusaanguna kukkala ansi akubona mali aayandika.” (Lk. 14:28) Munzila imwi, muyandika kulanga-langa ciindi ciyandika, zintu ziyandika alimwi akusolekesya nkomuyandika kucita kutegwa cakusala canu cizwidilile. Zimwi ziindi, inga mwayandika kubandika abanamukwasyi kujatikizya ncayelede kucita umwi aumwi kutegwa cakusala eeco cizwidilile. Nkaambo nzi kucita boobu ncokugwasya? Kulakonzya kumugwasya kubona kuti kuli mumwi muyandika kubambulula naa kusala nzila imbi iikonzya kugwasya kapati. Aboobo, ikuti mwababikkilizya banamukwasyi alimwi akuswiilila mizeezo yabo, tacidoonekwi buya kuti bayoomugwasya kutegwa cakusala canu cizwidilile.—Tus. 15:22.
AMUPANGE CAKUSALA ICIYOOZWIDILILA
16. Ninzila nzi zikonzya kumugwasya kutegwa mupange cakusala iciyoozwidilila? (Amubone akabbokesi kakuti “ Mbomukonzya Kusala Cabusongo.”)
16 Ikuti mwazitobela nzila zyaambwa atala aawa, nkokuti muyoosala kabotu. Nkaambo munooli mwatuzyiba kale twaambo twamasimpe alimwi akulanga-langa njiisyo zikonzya kumugwasya kutegwa mupange cakusala icikonzya kumukkomanisya Jehova. Aboobo lino mulakonzya kumulomba Jehova kuti amugwasye kutegwa cakusala canu cizwidilile.
17. Ncinzi ciyandika kutegwa musale kabotu?
17 Nokuba kuti kaindi mwakapanga zyakusala izyakazwidilila, kamuyeeya kuti icikonzya kumugwasya kusala kabotu nkusyoma busongo bwa Jehova ikutali maano aanu naa luzyibo. Alikke nguukonzya kumupa luzyibo lwini-lwini, maano alimwi abupampu buyandika kutegwa mube basongo. (Tus. 2:1-5) Jehova ulakonzya kumugwasya kutegwa mupange zyakusala zikonzya kumukkomanisya.—Int. 23:2, 3.
LWIIMBO 28 Ikumvwana a Jehova
