1. Ino tugwasyigwa buti akaambo kakujanika ku Ciibalusyo calufwu lwa Kristo calo cicitwa mwaka amwaka?

 CAKUTADOONEKA mulazumina kuti cinunuzyo ncipego citaliboteli kapati. (2Kor. 9:15) Akaambo kakuti Jesu wakaaba buumi bwakwe, cakapa kuti cikonzyeke kulindinywe kuba acilongwe a Jehova Leza. Alimwi mulakonzya kuba abulangizi bwakuyoopona kukabe kutamani. Eelo kaka tulijisi twaambo tunji ncotweelede kumulumba Jehova, walo iwakatupa cinunuzyo akaambo kakuti ulatuyanda kapati! (Rom. 5:8) Kutegwa atugwasye kuzumanana kulumba akutaluba ceeco Jehova alimwi a Jesu ncobakatucitila, Jesu wakatulailila kuti katujanika ku Ciibalusyo calufwu lwakwe mwaka amwaka.—Lk. 22:​19, 20.

2. Ncinzi ncotutiibandike mucibalo eeci?

² Mwaka uuno Ciibalusyo ciyoocitwa mu Mujibelo, April 12, 2025. Tacidoonekwi buya kuti toonse tuliyandide kuyoojanika. Pele tuyoogwasyigwa kapati kuti twajana ciindi cakuzinzibala kuyeeya a kujatikizya Jehova a Mwanaakwe lya Ciibalusyo. Mucibalo eeci, tulabandika cinunuzyo ncocituyiisya kujatikizya Jehova alimwi a Mwanaakwe. Mpoonya mucibalo citobela, tuyoobandika mbotukonzya kugwasyigwa acinunuzyo alimwi ambotukonzya kutondezya kulumba akaambo kancico.

CINUNUZYO NCOCITUYIISYA KUJATIKIZYA JEHOVA

3. Mbuti lufwu lwamuntu omwe mbolwakali kukonzya kwaangununa mamiliyoni aabantu? (Amubone acifwanikiso.)

³ Cinunuzyo cituyiisya kujatikizya bululami bwa Jehova. (Dt. 32:4) Ciindi Adamu naakazangila Leza wakaba sizibi, mpoonya  mukuya kwaciindi wakafwa. Aboobo akaambo kakuti tuli bana bakwe, andiswe tuli basizibi alimwi tulafwa. (Rom. 5:12) Kutegwa atwaangunune kucibi alufwu, Jehova wakatuma Jesu kutegwa azikupe cinunuzyo. Pele mbuti cipaizyo camuntu omwe uulondokede mbocakali kukonzya kunununa mamiliyoni aabantu? Mwaapostolo Paulo wakaamba kuti: “Nkaambo mbubonya ibanji mbobakaba basizibi kwiinda mukutamvwida kwamuntu omwe [Adamu], mbubonya buyo kwiinda mukumvwida kwamuntu omwe [Jesu] ibanji bayooba balulami.” (Rom. 5:19; 1Tim. 2:6) Paulo wakali kwaamba kuti bantu boonse mbaasizibi akaambo kakuti muntu omwe wakazangila Leza. Aboobo kutegwa twaangununwe kucibi alufwu, muntu omwe uulondokede wakeelede kumvwida Leza.

4. Nkaambo nzi Jehova ncaatakalekela buyo bana ba Adamu ibakamumvwida kupona kukabe kutamani?

⁴ Sena ncobeni Jesu wakeelede kufwa kutegwa atununune? Nkaambo nzi Jehova ncaatakalekela buyo kuti bana ba Adamu ibakamumvwida kabazumanana kupona kukabe kutamani? Kubantu batalondokede, eeco inga calibonya mbuli kuti ncecakali cintu cibotu kucita. Pele kuli Jehova eeco nocakaba cintu citaluzi. Akaambo kakuti nocakaboneka mbuli kuti Adamu kunyina naakacita cibi cipati akuti bana bakwe balilondokede. Pele oobo tabusyi mbocakabede.

5. Nkaambo nzi ncotukonzya kuba masimpe kuti Jehova lyoonse unoocita ciluzi?

⁵ Ikuti Jehova naatakapa cinunuzyo akulekela bana ba Adamu kuti bapone mane kukabe kutamani nokuba kuti tiibakalondokede, nkokuti naakatondezya kuti tazibikkili maano zyeelelo zyakwe zijatikizya ciluzi acitaluzi. Akaambo kaceeci, bantu bakali kukonzya kulibilika kuti ambweni takazibikkili maano zyeelelo zyakwe alimwi akutacita ceeco ncaakaamba kuti uyoocita kumbele. Mucikozyanyo, bantu bakali kukonzya kutalika kudooneka kuti naa uyoozizuzikizya zyoonse nzyaakasyomezya. Pele tatweelede kulibilika kuti eeco inga cacitika. Mbwaanga Jehova wakacita ciluzi mane buya akwaaba Mwanaakwe, tulakonzya kuba masimpe kuti lyoonse unoocita ciluzi.

6. Ninzila nzi imwi cinunuzyo mocitondezya luyando lwa Jehova? (1 Johane 4:​9, 10)

⁶ Nokuba kuti cinunuzyo citugwasya kubona kuti Jehova mululami, cilatugwasya alimwi kuzyiba mbwatuyanda kapati. (Joh. 3:16; amubale 1 Johane 4:​9, 10.) Jehova wakatuma Mwanaakwe kuzootufwida kutegwa tukapone mane kukabe kutamani alimwi uyanda kuti tube cibeela camukwasyi wakwe. Ciindi Adamu naakabisya, tanaakacili cibeela camukwasyi wa Jehova. Akaambo kaceeci, toonse twakazyalwa katutali mumukwasyi wa Leza. Pele akaambo kakuti cinunuzyo cakapegwa, bantu  boonse bamumvwida alimwi bamusyoma bayooba cibeela camukwasyi wakwe. Noliba lino tulakonzya kuba acilongwe cibotu a Jehova alimwi abakombima. Masimpe, Jehova ulatuyanda kapati.—Rom. 5:​10, 11.

7. Mbuti kupenga kwa Jesu mbokutugwasya kumvwisya Jehova mbwatuyanda kapati?

⁷ Tulakonzya kumvwisya mbwatuyanda kapati Jehova ciindi notuyeeya mbocakamucisa kubona Mwanaakwe kapenga. Saatani wakaamba kuti kunyina mubelesi wa Leza uukonzya kuzumanana kusyomeka ciindi nocikatazya kucita boobo. Kutegwa atondezye kuti Saatani mubeji, Jehova wakazumizya Jesu kuti apenge katanafwa. (Job. 2:​1-5; 1Pet. 2:21) Jehova wakabona bantu kabamusampaula Jesu, basikalumamba kabamuuma akumugagaila aacisamu. Kumane Jehova wakali kulangilila Mwanaakwe kafwa lufwu lucisa kapati. (Mt. 27:​28-31, 39) Naakayanda, naakazilesya zyoonse eezyi kuti zitacitiki. Mucikozyanyo, ciindi bantu nobakaamba kuti: “Amumuleke [Leza] lino amuvwune ikuti kamuyanda,” Jehova naakamuvwuna. (Mt. 27:​42, 43) Pele ikuti naakamuvwuna, cinunuzyo nocatakapegwa alimwi notwanyina bulangizi. Aboobo, Jehova wakazumizya Mwanakwe kupenga kusikila naakafwa.

8. Sena Jehova cakamucisa kubona Mwanaakwe kapenga? Amupandulule. (Amubone acifwanikiso.)

⁸ Tatweelede kuyeeya kuti mbwaanga Leza ngusinguzuzyoonse, kunyina mbwalimvwa. Twakalengwa mucinkozya cakwe, calo icipa kuti katucikonzya kulimvwa munzila imwi. Aboobo cileelela kwaamba kuti awalo kuli mbwalimvwa. Bbaibbele lyaamba kuti ‘ulacisigwa moyo’ alimwi ‘ulausa.’ (Int. 78:​40, 41) Amubone cibalo caamba Abrahamu a Izaka. Jehova wakaambila Abrahamu kutuula mwanaakwe kali cipaizyo. (Matl. 22:​9-12; Heb. 11:​17-19) Amuyeeye mbocakamucisa kapati Abrahamu ciindi naakali kulibambila kujaya mwanaakwe. Amweezeezye buyo mbocakamucisa kapati Jehova kubona bantu kabapenzya Mwanaakwe alimwi akumujaya!—Amubone vidiyo yakuti Amwiiye Lusyomo Lwabo—Abrahamu, Cibeela 2 a jw.org.

9. Ncinzi ncomukonzya kwiiya kulugwalo lwa Baroma 8:​32, 38, 39 kujatikizya luyando lwa Jehova?

⁹ Cinunuzyo cituyiisya kuti Jehova ulatuyanda kapati kwiinda bacibbululu naa mulongwe ngotumvwana kapati. (Amubale Baroma 8:​32, 38, 39.) Tulakonzya kuba masimpe kuti Jehova ulatuyanda kapati kwiinda mbotuliyanda tobeni. Sena mulayanda kupona kukabe kutamani? Jehova uliyandide kapati kuti mukacite oobo. Sena mulayanda kuti zibi zyanu zilekelelwe? Jehova uliyandide kapati kumulekelela. Ncayanda buyo ncakuti tutondezye kulumba kuli ceeco ncaakatucitila, kuba alusyomo muli nguwe akumumvwida. Masimpe cinunuzyo ncipego citaliboteli citondezya mbwatuyanda kapati Jehova. Alimwi munyika mpya, tuyakwiiya zintu zinji nzyaakatucitila  izitondezya kuti ulatuyanda kapati.—Muk. 3:11.

CINUNUZYO NCOCITUYIISYA KUJATIKIZYA JESU

10. (a) Nkaambo nzi Jesu ncaakauside kujatikizya lufwu lwakwe? (b) Muunzila nzi Jesu mwaakalisumpula zina lya Bausyi? (Amubone kabbokesi kakuti “ Kusyomeka kwa Jesu Kwakapa Kuti Zina lya Jehova Lisalazyigwe.”)

¹⁰ Jesu ulabikkila maano kapati kujatikizya mpuwo ya Bausyi. (Joh. 14:31) Jesu wakausa kapati kuti mulandu ngwaakapegwa wakusampaula Leza alimwi akubukila cisi wakali kuyooleta masampu kuzina lya Bausyi. Nkakaambo kaako wakapaila kuti: “Taata, ikuti naa cilakonzyeka, nkapu eeyi aizwe kulindime.” (Mt. 26:39) Kwiinda mukuzumanana kusyomeka kuli Jehova kusikila kulufwu, Jesu wakapa kuti zina lya Bausyi lisumpulwe.

11. Ino Jesu wakatondezya buti kuti ulabayanda kapati bantu? (Johane 13:1)

¹¹ Cinunuzyo alimwi cituyiisya kuti Jesu ulababikkila maano kapati bantu, kwaambisya basikwiiya bakwe. (Tus. 8:31; amubale Johane 13:1.) Mucikozyanyo, Jesu wakalizyi kuti zintu nzyaakeelede kucita anyika zyakali kukatazya kapati kwaambisya kufwa lufwu lucisa kapati. Pele Jesu wakacita zintu zyoonse eezyi zikatazya ikutali buyo akaambo kakuti ncencico Jehova ncaakali kuyanda kuti acite, pele akaambo kakuti wakali kubayanda bantu. Jesu wakatondezya kuti ulabayanda kapati bantu kwiinda mukubakambaukila, kubayiisya akubagwasya. Nobuba busiku katanafwa, wakajana ciindi cakusanzya maulu abaapostolo bakwe, kubayiisya akubakulwaizya. (Joh. 13:​12-15) Kumane nociba ciindi Jesu naakali kupenga akuyanda kufwa acisamu cakupenzyezya, wakacipa bulangizi cigwebenga icakagagailidwe kumbali lyakwe, kwiinda mukucaambila kuti cakali kuyooba muparadaiso. Alimwi wakatondezya kuti wakali kubabikkila maano banyina kwiinda mukulomba  Johane kuti kabalanganya. (Lk. 23:​42, 43; Joh. 19:​26, 27) Aboobo, Jesu tanaakatondezya buyo kuti ulabayanda kapati bantu kwiinda mukubafwida, pele alimwi wakacita oobo kwiinda mukubeendelezya caluyando acaluzyalo.

12. Ncinzi Jesu ncatucitila lino?

¹² Nokuba kuti Jesu wakafwa “ciindi comwe mane kukabe kutamani,” ucizumanana kutucitila zintu zibotu. (Rom. 6:10) Mubuti? Wazumanana kubeleka kutegwa atupe zintu zinji zyalo zikonzyeka akaambo kacinunuzyo. Amubone ncajisi bubi kucita. Ulabeleka kali Mwami, Mupaizi Mupati alimwi kali mutwe wambungano. (1Kor. 15:25; Ef. 5:23; Heb. 2:17) Kunze lyaboobo, uluujisi kubunganya bananike abankamu mpati, mulimo uyoomanizyigwa kakuceede buyo ciindi cisyoonto kuti mapenzi mapati amane. b (Mt. 25:32; Mk. 13:27) Alimwi waba masimpe kuti babelesi bakwe basyomeka balasaninwa kabotu kumuuya mumazuba aaya aamamanino. (Mt. 24:45) Ciindi anootweendelezya mu Myaka Iili 1,000, uyoozumanana kutulanganya. Aboobo Jehova naakatupa Mwanaakwe, tanaakatupeda buyo kuti atufwide pele kuti atucitile zintu zibotu zinji.

AMUZUMANANE KWIIYA

13. Ino kuzinzibala kuyeeya inga kwatugwasya buti kuzumanana kwiiya kujatikizya luyando Leza a Kristo ndobajisi kulindiswe?

¹³ Mulakonzya kuzumanana kwiiya kujatikizya luyando Jehova Leza a Jesu Kristo ndobajisi kulindiswe, ikuti mwazumanana kuzinzibala kuyeeya zintu nzyobamucitila. Ambweni lya Ciibalusyo, amukajane ciindi cakubala bbuku lyomwe lya Makani Mabotu naa kwiinda waawo. Tamweelede kunoobala zyaandaano zinji aciindi comwe. Muciindi caboobo, amubale cakutabinda akulangaula twaambo tumbi ncotweelede kumuyanda Jehova a Jesu. Alimwi amusolekesye kusikila mpomugolela kwaambila bamwi nzyomwiiya.

14. Kweelana alugwalo lwa Intembauzyo 119:97 abupanduluzi buyungizyidwe, mbuti kuvwuntauzya mbokukonzya kutugwasya kwiiya zinji kujatikizya cinunuzyo alimwi anjiisyo zimbi? (Amubone acifwanikiso.)

¹⁴ Ikuti naa mwali mukasimpe kwamyaka minji, mulakonzya kudooneka naa kuli zintu zipya nzyomukonzya kwiiya kujatikizya bululami bwa Leza, luyando lwakwe acinunuzyo. Pele bwini mbwakuti, lyoonse tunoojisi zintu zinji zyakwiiya kujatikizya zintu eezyi. Aboobo, ncinzi ncomukonzya kucita? Amubale twaambo tunji tujanika mumabbuku eesu. Ikuti naa mwabala cibalo  ncomwatamvwisya, amuvwuntauzye. Mpoonya buzuba boonse, amuzinzibale kuyeeya zintu nzyomwaiya ncozimwaambila kujatikizya Jehova, Mwanaakwe alimwi aluyando ndobajisi kulindinywe.—Amubale Intembauzyo 119:97 alimwi abupanduluzi buyungizyidwe.

15. Nkaambo nzi ncotweelede kuzumanana kuyandaula zintu zipya kuzwa mu Bbaibbele?

¹⁵ Mutatyompwi pe ikuti naa timwajana cintu cipya naa cikkomanisya ciindi nomubala naa kuvwuntauzya. Amulibone mbuli muntu uuyandaula ngolida. Kanji-kanji, muntu uuyandaula ngolida ulatola mawoola manji naa mazuba buya kutegwa ajane ngolida imwi. Pele tatyompwi alimwi cakukkazika moyo ulazumanana kuyandaula nkaambo notuba tubeela tusyoonto twangolida ntwakonzya kujana, tulayandika kapati kulinguwe. Cintu cipya cili coonse ncotukonzya kwiiya mu Bbaibbele cilayandika kapati kwiinda ngolida. (Int. 119:127; Tus. 8:10) Aboobo, atuzumanane kubala Bbaibbele akuyandaula zintu zipya nzyotukonzya kwiiya.—Int. 1:2.

16. Mbuti mbotukonzya kumwiiya Jehova a Jesu?

¹⁶ Ciindi nomwiiya, amubone mbomukonzya kuzibelesya zintu nzyomwiiya. Mucikozyanyo, amwiiye bululami bwa Jehova kwiinda mukubeendelezya bamwi cakutasalulula. Amwiiye luyando Jesu ndwajisi kuli Bausyi akuli bamwi kwiinda mukulisungula kupenga akaambo kazina lya Jehova alimwi akugwasya bamwi nokuba kuti zimwi ziindi kucita boobo kulakonzya kupa kuti buumi bumuyumine. Kuyungizya waawo, amumwiiye Jesu kwiinda mukubakambaukila bamwi kutegwa bakonzye kuba acoolwe cakuzyiba zintu zibotu Jehova nzyaali kubacitila bantunsi akutondezya lusyomo mucinunuzyo.

17. Ncinzi ncotuyoolanga-langa mucibalo citobela?

¹⁷ Ciindi notuzumanana kwiiya zinji kujatikizya cinunuzyo, tuyoomuyanda kapati Jehova a Mwanaakwe. Eeci ciyoopa kuti batuyande kapati andiswe. (Joh. 14:21; Jak. 4:8) Aboobo, atuzumanane kulibelesya Bbaibbele azyakumwaya nzyoitupa mbunga yesu kutegwa tuzumanane kwiiya kujatikizya cinunuzyo. Mucibalo citobela, tuyoolanga-langa mbotukonzya kugwasyigwa akaambo kacinunuzyo ambotukonzya kutondezya kulumba akaambo kaluyando lwa Jehova.