CIBALO CAKWIIYA 5
LWIIMBO 108 Luyando lwa Leza Lutamani
Mbotugwasyigwa Aluyando lwa Jehova
“Kristo Jesu wakaboola munyika kutegwa afwutule basizibi.” —1TIM. 1:15.
ZILAAYIIGWE
Mbotugwasyigwa acinunuzyo alimwi ambotukonzya kutondezya kuti tulamulumba Jehova.
1. Ncinzi ncotweelede kucita kutegwa tumukkomanisye Jehova?
AMWEEZEEZYE kuti mwapa muntu umwi ngomuyanda cipego caalubazu, cibotu alimwi ciyandika kapati. Eelo kaka mulakonzya kutyompwa kapati, kuti mwajana kuti muntu ooyo wakaile kuciyobola buyo cipego eeco alimwi kunyina nacibikkila maano! Kulubazu lumbi, inga mwakkomana kapati kuti mwajana kuti ulacibelesya cipego eeco alimwi wakatondezya kulumba akaambo kancico. Ino cikozyanyo eeci ciswaangene buti acipego ca Jehova cacinunuzyo? Jehova wakapa Mwanaakwe kuti atufwide. Eelo kaka ulakkomana kapati ciindi notutondezya kulumba akaambo kacipego eeci citaliboteli alimwi aluyando lwakwe lwalo ilwakamukulwaizya kuti atupe cinunuzyo!—Joh. 3:16; Rom. 5:7, 8.
2. Ncinzi ncotutiibandike mucibalo eeci?
2 Mukuya kwamyaka, tulakonzya kucileka kutondezya kulumba kujatikizya cipego eeci cacinunuzyo. Pele ikuti twaleka kulumba kujatikizya cinunuzyo, cilakonzya kuba mbuli kubikka cipego eeci citaliboteli ncaakatupa Leza mubusena mwalo motutakonzyi kuciyeeya naa kucibona buya. Kutegwa eeci citacitiki, lyoonse tweelede kunooyeeya kujatikizya cintu ncaakatucitila Leza alimwi a Kristo. Cibalo eeci cilatugwasya kucita oobo. Tulabandika kujatikizya mbotugwasyigwa acinunuzyo mazuba aano alimwi ambotuyoogwasyigwa kumbele akaambo kancico. Kunze lyaboobo, tulalanga-langa ncotweelede kucita kutegwa tutondezye kulumba kuluyando lwa Jehova, kwaambisya ciindi cino ca Ciibalusyo.
MBOTUGWASYIGWA LINO
3. Ino tugwasyigwa buti akaambo kacinunuzyo lino?
3 Tulagwasyigwa kale akaambo kacipaizyo cacinunuzyo ca Kristo. Mucikozyanyo, akaambo kacinunuzyo, Jehova ulatulekelela zibi zyesu. Tasinikizyigwi buya kutulekelela pele uliyandila buya. Mwami Davida wakatondezya kulumba akaambo kakulekelela kwa Jehova. Wakaamba kuti: “Nkaambo yebo, O Jehova uli mubotu alimwi ulilibambilide kulekelela zibi.”—Int. 86:5; 103:3, 10-13.
4. Ino Jehova wakapa bani cinunuzyo? (Luka 5:32; 1 Timoteyo 1:15)
4 Bamwi balakonzya kulimvwa kuti tabeeleli kulekelelwa a Jehova. Mubwini, toonse buya tatweeleli. Mwaapostolo Paulo wakalimvwa kuti ‘tanaakali kweelela kwiitwa kuti mwaapostolo.’ Pele wakaamba kuti: “Kwiinda muluzyalo lwa Leza ndili boobu mbondibede lino.” (1Kor. 15:9, 10) Ikuti tweempwa zibi zyesu, Jehova ulilibambilide kutulekelela. Nkaambo nzi? Ulacita oobo ikutali akaambo kakuti tuleelela, pele akaambo kakuti ulatuyanda. Ikuti zimwi ziindi kamulimvwa kuti tamweeleli kulekelelwa zibi zyanu, kamuyeeya kuti Jehova wakapa cinunuzyo kubantu basizibi ibeempwa ikutali kubantu balondokede.—Amubale Luka 5:32; 1 Timoteyo 1:15.
5. Sena kuli weelede kulimvwa kweelela kulekelelwa a Jehovah? Amupandulule.
5 Kunyina akati kesu iweelede kulimvwa kuti ulakonzya kulekelelwa a Jehova akaambo buyo kakuti wamubelekela kwamyaka minji. Masimpe kuti Jehova ulalumba akaambo kakumubelekela cakusyomeka. (Heb. 6:10) Pele wakatupa cinunuzyo kacili cipego ikutali kutubbadela akaambo kamilimo njotumubelekela. Aboobo, cililubide kuyeeya kuti akaambo kakuti twamubelekela Jehova kwamyaka minji tuleelela kulekelelwa. Ikuti twayeeya boobo, nkokuti eeci inga caamba kuti tatuyandiki cinunuzyo.—Amweezyanisye a Bagalatiya 2:21.
6. Nkaambo nzi Paulo ncaakalitakata kumubelekela Jehova?
6 Paulo wakalizyi kuti noivwula buti milimo njaakamubelekela Jehova, tiiyakali kumupa kweelela kulekelelwa a Jehova. Pele nkaambo nzi ncaakalitakata kumubelekela Jehova? Wakacita oobo kutegwa atondezye kulumba akaambo kaluzyalo lwa Jehova. (Ef. 3:7) Mbubwenya mbuli Paulo, tuyanda kuzumanana kuba basungu ikutali akaambo kakuyanda kuti Jehova atufwide luse, pele kutegwa tutondezye kulumba.
7. Muunzila nzi aimwi motugwasyigwa acinunuzyo lino? (Baroma 5:1; Jakobo 2:23)
7 Nzila aimwi motugwasyigwa acinunuzyo njakuti tulakonzya kuba acilongwe a Jehova. a Mbubwenya mbokwakabandikwa mucibalo cainda, ciindi notwakazyalwa tiitwakajisi cilongwe a Leza. Pele akaambo kacinunuzyo, tulakonzya kuba “muluumuno a Leza” calo cipa kuti tube acilongwe anguwe.—Amubale Baroma 5:1; Jakobo 2:23.
8. Nkaambo nzi ncotweelede kumulumba Jehova akaambo kacipego camupailo?
8 Kupaila kuli Jehova ncintu cimwi caalubazu ncotukonzya kucita akaambo kacilongwe ciyumu ncotujisi anguwe. Jehova taswiilili buyo mipailo yakubuleya njotupaila ciindi notwaswaangana antoomwe, pele ulaswiilila ayeeyo njotupaila katuli tolikke. Mupailo ulatugwasya kukkalwa moyo akuba aluumuno lwamumizeezo. Pele eeco tacili ncecintu cilikke ncougwasya. Ulakonzya kuyumya cilongwe cesu a Leza. (Int. 65:2; Jak. 4:8; 1Joh. 5:14) Naakali anyika, Jesu wakali kuvwula kupaila nkaambo wakalizyi kuti Jehova wakali kuswiilila alimwi akuti mupailo wakali kukonzya kumugwasya kutegwa azumanane kuba acilongwe ciyumu a Bausyi. (Lk. 5:16) Eelo kaka tulalumba kapati nkaambo kwiinda mucipaizyo ca Jesu, tulakonzya kuba balongwe ba Jehova mane buya akubandika anguwe mumupailo!
MBOTUYOOGWASYIGWA KUMBELE
9. Mbuti bakombi basyomeka mbobayoogwasyigwa akaambo kacinunuzyo kumbele?
9 Mbuti bakombi ba Jehova basyomeka mbobayoogwasyigwa acinunuzyo kumbele? Bayoopegwa buumi butamani. Pele bantu banji bayeeya kuti eeci tacikonzyeki akaambo kakuti bantu banji bali kufwa kuzwa kaindi. Pele makanze aa Jehova akali aakuti bakapone kukabe kutamani. Ikuti Adamu naatakabisya, kunyina wakali kukonzya kuyeeya kuti kupona kukabe kutamani takukonzyeki. Nokuba kuti cilakatazya kweezeezya kujatikizya kupona kukabe kutamani lino, tulakonzya kusyoma kuti ciyoocitika akaambo kakuti Jehova wakabbadela muulo waatala kapati nkokuti ibuumi bwa Mwanaakwe ngwayandisya kapati.—Rom. 8:32.
10. Ino bananike abambelele zimbi balangila nzi?
10 Nokuba kuti buumi butamani ncintu ciyoocitika kumbele, Jehova uyanda kuti katubuyeeya noliba lino. Bananike balangila kuyoopona buumi bubotu kujulu ciindi nobanoolela nyika antoomwe a Kristo. (Ciy. 20:6) Bambelele zimbi balangila kuyoopona kukabe kutamani anyika alo aatakabi kucisa, kuusa naa kupenga. (Ciy. 21:3, 4) Sena muli umwi wabambelele zimbi ibajisi bulangizi bwakuyoopona mane kukabe kutamani anyika? Jehova wakalenga bantu kuti kabapona kukabe kutamani anyika! Aboobo kupona kukabe kutamani anyika cinooli cintu cikkomanisya kapati.
11-12. Nzilongezyo nzi zimwi nzyotukonzya kulangila mu Paradaiso? (Amubone azifwanikiso.)
11 Amweezeezye buyo buumi mbomunoopona mu Paradaiso anyika. Kunyina nomunoolibilika kujatikizya kuciswa naa lufwu. (Is. 25:8; 33:24) Jehova uyoomupa zintu zibotu zyoonse nzyomuyanda. Nzintu nzi nzyomuyanda kuyooyiya? Sena inga mwayanda kuyooyiya zinji kujatikizya banyama, mbocibelesyegwa ciimbyo naa kudulowa? Muparadaiso tuyooyandika bantu bacizyi kupanga pulani yaŋanda alimwi akuyaka. Alimwi bantu bayooyandika kulima zyakulya, kuzibamba kuti ziligwe, kubamba zyakubelesya, kubotya masena alimwi akwaalanganya. (Is. 35:1; 65:21) Mwaakupona kukabe kutamani, muyooba aciindi cakucita zintu zyoonse eezyi mane buya aziinda waawo.
12 Eelo kaka cinookkomanisya kutambula bayandwa besu ibayoobusyigwa! (Mil. 24:15) Amweezeezye buyo mbomuyookkomana kwiiya zinji kujatikizya Jehova, kwiinda mukulanga-langa zintu nzyaakalenga. (Int. 104:24; Is. 11:9) Aboobo ciinda zyoonse, kunyina nomuyoobisya. Pele muyoomubelekela Jehova kakunyina kulomba kulekelelwa zibi. Sena inga mwayanda kwiindwa zyoolwe eezyi akaambo kakuyanda kulikkomanisya “muzyakulikondelezya zyakaindi kaniini buyo”? (Heb. 11:25) Peepe! Nkaambo zilongezyo nzyotuyoojana nzibotu kapati kwiinda kulyaaba kuli koonse nkotukonzya kucita lino. Kamuyeeya kuti Paradaiso tacili cintu ncotunoolangila lyoonse. Pele bumwi buzuba ciyoocitika. Zyoonse eezyi ziyookonzyeka akaambo kakuti Jehova wakatupa cinunuzyo nkaambo ulatuyanda kapati.
Ino nzilongezyo nzi nzyomulangila mu Paradaiso? (Amubone muncali 11-12)
AMUTONDEZYE KULUMBA AKAAMBO KALUYANDO LWA JEHOVA
13. Mbuti mbotukonzya kutondezya kulumba akaambo kaluyando lwa Jehova? (2 Bakorinto 6:1)
13 Mbuti mbotukonzya kutondezya kulumba kuli Jehova akaambo kakutupa cinunuzyo? Nkwiinda mukubikka mulimo wakwe mubusena bwakusaanguna mubuumi bwesu. (Mt. 6:33) Amana buya, Jesu wakatufwida “kutegwa aabo bapona kabataciliponeni beni, pele kabaponena yooyo iwakabafwida alimwi iwakabusyigwa.” (2Kor. 5:15) Aboobo tuyanda kutondezya kuti tulakamvwisya ikaambo Jehova ncaakatutondezya luzyalo akuti tulalumba kapati.—Amubale 2 Bakorinto 6:1.
14. Ino inga twatondezya buti kuti tulabusyoma busolozi bwa Jehova?
14 Nzila aimbi mbotukonzya kutondezya kulumba kuluyando lwa Jehova, nkwiinda mukumusyoma akutobela busolozi bwakwe. Mbuti mbotukonzya kucita oobo? Ciindi notupanga zyakusala kujatikizya mpotweelede kugolela mumakani aajatikizya lwiiyo lwakumubili naa kujatikizya musyobo wamulimo ngotweelede kuzumina, tweelede kulanga-langa Jehova ncayanda kuti tucite. (1Kor. 10:31; 2Kor. 5:7) Ciindi notupanga zyakusala zitondezya kuti tulamusyoma Jehova, lusyomo lwesu acilongwe cesu anguwe ziyooyuma kapati. Kumane bulangizi bwesu bwakupona kukabe kutamani buyooba bwini-bwini kulindiswe.—Rom. 5:3-5; Jak. 2:21, 22.
15. Mbuti mbotukonzya kutondezya kuti tulalumba lya Ciibalusyo?
15 Kuli nzila aimbi mbotukonzya kutondezya kulumba akaambo kaluyando lwa Jehova. Tulakonzya kucita oobo kwiinda mukubelesya ciindi eeci ca Ciibalusyo kutondezya kuti tulamulumba kapati Jehova akaambo kacinunuzyo. Kunze buyo lyakulibambila tobeni kuyoojanika ku Ciibalusyo, tulakonzya kutamba abamwi kuti abalo bakajanike. (1Tim. 2:4) Amubapandulwide aabo mbomutamba kujatikizya ciyoocitika ku Ciibalusyo. Alimwi mulakonzya kubatondezya tuvidiyo tujanika a jw.org twakuti: Ino Jesu Wakafwida Nzi? alimwi akakuti Amuyeeye Lufwu lwa Jesu. Baalu beelede kuba masimpe kuti babatamba aabo batacisungweede. Amweezeezye buyo lukkomano luba kujulu aanyika ciindi mbelele zya Jehova zyakasweekede nozipiluka kubutanga! (Lk. 15:4-7) Ku Ciibalusyo, tatweelede buyo kwaanzyanya mulicesu tobeni, pele tweelede kubikkila kapati maano kwaanzya bapya alimwi abaabo ibatakali kujanika kwaciindi cilamfwu. Tuyanda kubapa kulimvwa kuti batambulwa amaanza obilo.—Rom. 12:13.
16. Nkaambo nzi ncotweelede kusola kuyungizya ciindi ncotukambauka lya Ciibalusyo?
16 Sena mulakonzya kuyungizya mulimo wanu kuli Jehova lya Ciibalusyo? Kucita boobo ninzila mbotu kapati yakutondezya kuti tulalumba akaambo kazintu zyoonse Jehova alimwi a Kristo nzyobakatucitila. Ikuti twayungizya ciindi ncotukambauka, tuyoobona Jehova mbwayootugwasya alimwi lusyomo lwesu mulinguwe luyooyuma kapati. (1Kor. 3:9) Kunze lyaboobo, amube masimpe kuti mwautobela mulongo wakubala Bbaibbele lya Ciibalusyo uujanika mukabbuku ka Kulingaula Magwalo Abuzuba naa mukabbuku kamuswaangano. Mane buya mulakonzya kubelesya tupango ootu twamu Bbaibbele kucita ciiyo canu nobeni.
17. Ncinzi cimukkomanisya Jehova? (Amubone akabbokesi kakuti “ Mbomukonzya Kutondezya Kulumba Akaambo Kaluyando lwa Jehova.”)
17 Bukkale bwanu ambweni inga tiibwamuzumizya kucita zyoonse nzyotwabandika mucibalo eeci. Pele ncomweelede kuyeeya ncakuti Jehova kunyina nayezyanisya nzyomucita anzyobacita bamwi, walo ubona zili mumoyo wanu. Ulakkomana kapati ciindi nabona kulumba kwanu kuzwa ansi aamoyo akaambo kacipego cilibedelede cacinunuzyo.—1Sam. 16:7; Mk. 12:41-44.
18. Nkaambo nzi ncotweelede kumulumba kapati Jehova Leza a Jesu Kristo?
18 Cinunuzyo ncecakapa kuti tukonzye kulekelelwa zibi zyesu, kuba acilongwe a Jehova alimwi akuba abulangizi bwakuyoopona kukabe kutamani. Aboobo, lyoonse atutondezye kulumba akaambo kaluyando lwa Jehova lwalo ilwakamupa kuti atupe zintu zyoonse eezyi zitaliboteli. (1Joh. 4:19) Alimwi atutondezye kuti tulamulumba awalo Jesu, iwakaaba buumi bwakwe akaambo kandiswe.—Joh. 15:13.
LWIIMBO 154 Luyando Talumani
