1. Nkaambo nzi kamwi Jehova ncaakatupeda cipego cacikwati?

 JEHOVA ngu “Leza uukkomene” alimwi uyanda kuti andiswe katukkomene. (1Tim. 1:11) Watupa zipego zinji kutegwa katubukkomanina buumi. (Jak. 1:17) Cimwi cazipego eezyo, ncikwati. Ciindi mulumi amukaintu nobakwatana, inga basyomezyanya kuti banooyandana alimwi akulemekana. Ikuti mulumi amukaintu bazumanana kuyandana ncobeni, tacidoonekwi buya kuti banookkomene kapati.—Tus . 5:18.

2. Ncinzi cicitika muzikwati zinji mazuba aano?

² Cuusisya ncakuti banabukwetene banji mazuba aano, baciluba cisyomezyo ncobakasyomezya buzuba nobakakwatana. Akaambo kaceeci, tabakkomene. Lipooti imwi kuzwa kumbunga ya World Health Organization, yakaamba kuti balumi banji balabauma bamakaintu babo, kubafwubaazya alimwi akubatundulula munzila zimwi. Balumi bali boobo inga balitondezya kuti balabalemeka bamakaintu babo ciindi nobali abantu pele nobali kuŋanda inga balabatundulula. Kunze lyaboobo, balumi banji baleebelela zintu ziletela muzeezo wakoonana calo cipa kuti mukaintu alimvwe kutayandwa alimwi akutakkomana.

3. Ntwaambo nzi tumwi itupa kuti balumi kabatabeendelezyi kabotu bamakaintu babo?

³ Nkaambo nzi balumi bamwi ncobatabeendelezyi kabotu bamakaintu babo? Akaambo kakuti bamwi bakakomezyegwa abausyi ibakali basilunya, balakonzya kuyeeya kuti cili buyo kabotu kutabeendelezya kabotu bamakaintu babo. Bamwi balakonzya kuti kabatabeendelezyi kabotu bamakaintu babo akaambo kakuti ncilengwa buya cakubusena ooko. Balumi aaba balakonzya kulimvwa kuti kweendelezya bamakaintu babo calunya cilakonzya kupa kuti bamakaintu babo bazyibe kuti oobu mbobusankwa. Kunze lyaboobo, balumi bamwi tiibakayiisyigwa kulyeendelezya, calo cibikkilizya kulyeendelezya kukunyema. Bamwi bajisi cilengwa cakweebelela zintu ziletela muzeezo wakoonana, calo cipa kuti kabatabalangi munzila iiluzi bamakaintu alimwi amakani aakoonana. Kuyungizya waawo,  malipooti atondezya kuti akaambo kabulwazi bwa COVID-19, capa kuti mapenzi aaya aindile buya. Bwini mbwakuti, kunyina twaambo akati katootu itukonzya kupa kuti balumi kababeendelezya munzila iitali kabotu bamakaintu babo.

4. Ncinzi balumi Banakristo ncobeelede kucenjelela? Nkaambo nzi?

⁴ Balumi Banakristo beelede kukucenjelela kuyeeya kutaluzi kujatikizya nyika mboibabona bamakaintu. a Nkaambo nzi? Kaambo kamwi nkakuti nzyayeeya muntu zilakonzya kupa kuti acite zintu munzila imwi. Mwaapostolo Paulo wakacenjezya Banakristo bananike ku Roma kuti, ‘baleke kutobela ziyanza zyabweende bwazintu obuno.’ (Rom. 12:​1, 2) Ciindi Paulo naakalembela bana Roma, tacidoonekwi buya kuti aabo ibakali mumbungano eeyo bakali kale Banakristo kwamyaka minji. Majwi aa Paulo atondezya kuti bamwi mumbungano bakacili kweendelezyegwa amizeezo alimwi azilengwa zyamunyika. Nkakaambo kaako wakabakulwaizya kuti bacince mizeezo yabo alimwi abukkale. Lulayo oolu lulabeleka akuli balumi Banakristo mazuba aano. Cuusisya ncakuti, bamwi bayungwa amizeezo yanyika alimwi akutalika kutabeendelezya kabotu bamakaintu babo. b Pele ino Jehova uyanda kuti balumi kababeendelezya buti bamakaintu babo? Tulabujana bwiinguzi mulugwalo luyeeme acibalo eeci.

5. Kweelana alugwalo lwa 1 Petro 3:​7, ino mulumi weelede kumweendelezya buti mukaintu wakwe?

⁵ Amubale 1 Petro 3:7. Jehova uyanda kuti balumi kababalemeka bamakaintu babo. Balumi ibalemeka bamakaintu babo balabeendelezya munzila yaluzyalo alimwi ayaluyando. Mucibalo eeci, tulabona mulumi mbwakonzya kutondezya bulemu kumukaintu wakwe. Pele cakusaanguna tulabandika kujatikizya zintu mulumi nzyateelede kusola kucita kumukaintu wakwe.

AMWEELEBE KUCITA CINTU CILI COONSE ICIKONZYA KUMUPA KULIMVWA BUBI MUKAINTU WANU

6. Ino Jehova ulimvwa buti kujatikizya balumi ibauma bamakaintu babo? (Bakolose 3:19)

⁶ Mulumi tayelede kumuuma mukaintu wakwe. Jehova ulimusulide muntu sinkondo. (Int. 11:5) Tabakkomanini balumi ibatabeendelezyi kabotu bamakaintu babo. (Malk. 2:16; amubale Bakolose 3:19.) Kweelana alugwalo lwa 1 Petro 3:7 ayeeme cibalo, ikuti naa mulumi katamweendelezyi kabotu mukaintu wakwe, cilongwe ncajisi a Jehova cilakonzya kunyongana. Mane buya Jehova takonzyi kunooyiswiilila mipailo yakwe.

7. Kweelana alugwalo lwa Baefeso 4:​31, 32, ino niŋambawido iili buti balumi njobeelede kweeleba? (Amubone a “Bupanduluzi Bwamabala.”)

⁷ Mulumi tayelede kubwenta naa kwaamba zintu zibi kumukaintu wakwe. Balumi bamwi balaambaula cabukali kuli bamakaintu babo alimwi akubaambila zintu zikonzya kubanyemya kapati. Pele Jehova ulibusulide “bukali, kunyema, kubwenta alimwi amajwi aakusampaula.” c (Amubale Baefeso 4:​31, 32.) Jehova ulazimvwa zyoonse. Mulumi mbwaambaula kumukaintu wakwe nociba ciindi nobali balikke, Jehova ulamvwa. Mulumi waambaula calunya kumukaintu wakwe, tanyonganyi buyo cikwati cabo, pele acilongwe cakwe a Jehova.—Jak. 1:26.

8. Ino Jehova ulimvwa buti kujatikizya zintu ziletela muzeezo wakoonana? Nkaambo nzi?

⁸ Mulumi tayelede kweebelela zintu ziletela muzeezo wakoonana. Ino Jehova ulimvwa buti kujatikizya zintu ziletela muzeezo wakoonana? Ulizisulide kapati. Mulumi iweebelela zintu zili boobu unyonganya cilongwe cakwe a Jehova alimwi  akutamulemeka mukaintu wakwe. d Jehova uyanda kuti balumi kabasyomeka kuli bamakaintu babo ikutali buyo mumicito pele amumizeezo yabo. Jesu wakaamba kuti mwaalumi uulangisisya mukaintu uumbi cakumunyomenena, wacita kale bumambe anguwe “mumoyo wakwe.” e—Mt. 5:​28, 29.

9. Nkaambo nzi Jehova ncatakkomani ciindi mulumi natundulula mukaintu wakwe mumakani aakoonana?

⁹ Mulumi tayelede kutundulula mukaintu mumakani aakoonana. Balumi bamwi balabasungilizya bamakaintu babo koonana munzila iikonzya kubapa kuti bapenzyegwa amanjezyeezya aabo naa kulimvwa kutayandwa. Jehova uliisulide micito iili boobu yalo iitondezya kuliyanda alimwi akutabikkila maano bamwi. Uyanda kuti mulumi kamuyanda mukaintu wakwe, kamweendelezya caluzyalo alimwi akwaalemeka manjezyeezya aakwe. (Ef. 5:​28, 29) Mbuti kuti mulumi Munakristo katamweendelezyi kale kabotu mukaintu wakwe naa keebelela zintu ziletela muzeezo wakoonana? Mbuti mbwakonzya kucinca mbwayeeya alimwi amicito yakwe?

MULUMI MBWAKONZYA KULEKA BUKKALE BUTALI KABOTU

10. Mbuti balumi mbobakonzya kugwasyigwa acikozyanyo ca Jesu?

¹⁰ Ncinzi cikonzya kugwasya mulumi kutalika kumweendelezya kabotu mukaintu wakwe? Weelede kusolekesya kwiiya cikozyanyo ca Jesu. Nokuba kuti Jesu tanaakakwete, mbwaakali kubeendelezya basikwiiya bakwe, ncitondezyo kuli balumi mbobeelede kubeendelezya bamakaintu babo. (Ef. 5:25) Mucikozyanyo, amubone balumi ncobakonzya kwiiya kuli Jesu kujatikizya nzila mbwaakali kubeendelezya basikwiiya bakwe alimwi ambwaakali kubandika ambabo.

11. Ino Jesu wakali kubeendelezya buti baapostolo bakwe?

¹¹ Jesu lyoonse wakalijisi luzyalo kubaapostolo bakwe alimwi wakali kubeendelezya cabulemu. Kunyina naakali kubeendelezya calunya. Nokuba kuti wakalijisi nguzu zinji kwiinda mbabo, kunyina naakazibelesya kuti abape kulimvwa kubula mpindu naa kumuyoowa. Muciindi caboobo, cakulicesya wakali kubabelekela. (Joh. 13:​12-17) Wakaambila basikwiiya bakwe kuti: ‘Amwiiye kulindime, nkaambo ndili mubombe moyo, alimwi ndilalicesya, eelyo mulakatalusyigwa.’ (Mt. 11:​28-30) Amubone kuti Jesu wakali mubombe moyo. Takuli kuti muntu mubombe moyo tajisi nguzu pe. Muciindi caboobo, ulijisi nguzu zyakulilesya. Ciindi bamwi nobamunyemya, ulazumanana kukkazika moyo akulilesya.

12. Ino Jesu wakali kubandika buti abamwi?

¹² Kwiinda mumajwi aakwe, Jesu wakali kubakulwaizya alimwi akubaumbulizya bamwi. Kunyina naakali kwaambaula calunya kuli basikumutobela. (Lk. 8:​47, 48) Nociba ciindi basikumukazya nobakali kumutukila akumunyemya, “kunyina naakatalika kutukila awalo.” (1Pet. 2:​21-23) Zimwi ziindi, Jesu wakali kusola kuumuna buyo muciindi cakubbodola. (Mt. 27:​12-14) Eelo kaka eeci ncikozyanyo cibotu kubalumi Banakristo!

13. Kweelana alugwalo lwa Matayo 19:​4-6, mbuti mulumi mbwakonzya ‘kukakatila kumukaintu wakwe’? (Amubone acifwanikiso.)

¹³ Jesu wakalailila balumi kuti kabazumanana kusyomeka kuli bamakaintu babo. Wakazubulula majwi ngobakaamba Bausyi aakuti mulumi weelede ‘kukakatila kumukaintu wakwe.’ (Amubale Matayo 19:​4-6.) Ibbala lya Chigiriki ilyakasandululwa kuti “kukakatila” lyaamba “kunamatika.” Aboobo luyando iluli akati kamulumi amukaintu lweelede kuti kaluli luyumu mbuli kuti bakanamatikwa antoomwe. Ikuti umwi wacita cintu cikonzya kupenzya ngobakwetene limwi, boonse balapenga. Mulumi uumuyanda ncobeni mukaintu wakwe, weelede kweeleba zintu zili zyoonse ziletela muzeezo wakoonana. Cakufwambaana, weelede  kukaka ‘kulangilila cintu cili coonse cabuyo.’ (Int. 119:37) Mbubwenya mbuli Jobu, ulikanzide kutalangilila mukaintu uuli woonse cakumunyomenena.—Job. 31:1.

14. Nzintu nzi mulumi uutundulula mukaintu wakwe nzyayelede kucita kutegwa abambulule cilongwe cakwe a Jehova alimwi amukaintu wakwe?

¹⁴ Mulumi uutundulula mukaintu wakwe kwiinda mukumuuma naa mumajwi, weelede kucita zintu zili mbozibede kutegwa abambulule cilongwe cakwe a Jehova alimwi amukaintu wakwe. Ino zintu nzi eezyo? Cakusaanguna, weelede kuzyiba kuti ncacita tacili kabotu. Taakwe cisisidwe mumeso aa Jehova. (Int. 44:21; Muk. 12:14; Heb. 4:13) Cabili, weelede kucileka kumutundulula mukaintu wakwe akucinca bukkale bwakwe. (Tus. 28:13) Catatu, weelede kulilekelela kumukaintu wakwe akuli Jehova akaambo kakubalubizyila. (Mil. 3:19) Kunze lyaboobo, weelede kumulomba Jehova kuti amupe kuba amakanze aakucinca, akumugwasya kweendelezya mizeezo yakwe, ŋambawido alimwi amicito yakwe. (Int. 51:​10-12; 2Kor. 10:5; Flp. 2:13) Cane, ulacita kweelana amipailo yakwe kwiinda mukusulaika zintu zyoonse zijatikizya nkondo alimwi aŋambawido iitali kabotu. (Int. 97:10) Casanu, weelede kuunka kubaalu kutegwa bamugwasye. (Jak. 5:​14-16) Canamba 6, weelede kubamba pulogilamu yalo iikonzya kumugwasya kutegwa atakainduluki kucita zintu eezyi zibyaabi. Mbubwenya buyo, mulumi weebelela zintu ziletela muzeezo wakoonana weelede kubweza ntaamu nzizyonya eezyi. Jehova uyookulongezya kusolekesya kwakwe kwakuti acince bukkale bwakwe. (Int. 37:5) Kuli azintu zimbi mulumi nzyayelede kucita kunze buyo lyakuleka bukkale bubyaabi. Weelede kwiiya kumupa bulemu mukaintu wakwe. Mbuti mbwakonzya kucita oobo?

MBOMUKONZYA KUTONDEZYA KUTI MULAMULEMEKA MUKAINTU WANU

15. Mbuti mulumi mbwakonzya kutondezya kuti ulamuyanda mukaintu wakwe?

¹⁵ Amumutondezye kuti mulamuyanda. Bamwi bakwesu bakkomene mucikwati cabo, baba masimpe kuti abuzuba balacita cintu cimwi icitondezya mbobamuyanda kapati mukaintu wabo. (1Joh. 3:18) Mulumi ulakonzya kutondezya kuti ulamuyanda mukaintu wakwe kwiinda mukucita tuntu tusyoonto-syoonto mbuli kumujatilila kukwaanza naa kumukumbata. Ulakonzya kumutumina  kagwalo akumwaambila kuti “Ndakuyeeya” naa kumubuzya kuti “Bukweendela buti buzuba?” Ciindi aciindi ulakonzya kumutondezya mbwamuyanda kwiinda mukumupa maluba-luba naa cipego cimwi. Ikuti mulumi wazicita zintu eezyi utondezya kuti ulamulemeka mukaintu wakwe alimwi ulaciyumya cikwati cabo.

16. Nkaambo nzi mulumi ncayelede kumulumba mukaintu wakwe?

¹⁶ Amumulumbe. Mulumi uumuyanda mukaintu wakwe ulamwaambila kaambo ncamuyandila kapati alimwi akumupa kulimvwa kabotu. Nzila imwi mbwakonzya kucita oobo nkwiinda mukumulumba akaambo kazintu zyoonse nzyacita kumugwasyilizya. (Kol. 3:15) Ciindi mulumi namulumba mukaintu wakwe kuzwa ansi aamoyo, eeci cilamukkomanisya kapati alimwi cimupa kulimvwa kukwabililwa, kuyandwa akulemekwa kapati.—Tus. 31:28.

17. Mbuti mulumi mbwakonzya kutondezya bulemu kumukaintu wakwe?

¹⁷ Amube aluzyalo alimwi abulemu. Mulumi uumuyanda kapati mukaintu wakwe, ulamubikkila maano alimwi akumubamba kabotu. Umubona kuti ncipego citaliboteli kuzwa kuli Jehova. (Tus. 18:22; 31:10) Akaambo kaceeci, ulamweendelezya caluzyalo alimwi acabulemu nociba ciindi noboonana. Tayelede kumusinikizya kucita micito yakoonana yalo iikonzya kumupa kulimvwa kutundululwa, kutaanguluka naa kupenzya manjezyeezya aakwe. f Mbubwenya buyo, awalo mulumi tayelede kucita cintu cili coonse cikonzya kupenzya manjezyeezya aakwe ciindi noboonana.—Mil. 24:16.

18. Ncinzi balumi ncobeelede kukanza kucita? (Amubone akabbokesi kakuti “ Nzila Zyone Zikonzya Kupa Kuti Mube Mulumi Ulaabulemu.”)

¹⁸ Nobalumi, amuzyibe kuti Jehova ulabona alimwi ulalumba akaambo kakusolekesya nkomucita kulemeka bamakaintu banu mumbazu zyoonse zyabuumi bwanu. Amutondezye kuti mulamulemeka mukaintu wanu kwiinda mukutantamuka bukkale butali kabotu, kuba aluzyalo, bulemu alimwi akutondezya luyando. Ikuti mwacita oobo, muyootondezya kuti mulamuyanda kapati. Kwiinda mukumulemeka mukaintu wanu, muyookwabilila cilongwe ciyandika kapati, nkokuti cilongwe canu a Jehova.—Int. 25:14.