1, 2. Ino nkaambo nzi ncokunooli bacete lyoonse mubweende bwazintu oobu?

ZINTU mazuba aano zyayuma alimwi kuli kutalulama kutaambiki. Bakubusi balasolekesya kuyandaula milimo yakumubili pele tabazwidilili pe. Bantu banji balibikka muntenda kwiinda mukulongela kumasi aavwubide. Bucete bulimwaikide nyika yoonse, nomuba mumasi aavwubide. Bavwubi bazumanana kuvwuba kakuli bacete balo bacetaalila limwi. Kweelana akuvwuntauzya kwakacitwa lino-lino, 1 pesenti yabantu bavwubide kapati munyika bajisi lubono lunji ilweelene alubono lwabantu boonse munyika kulusanganya antoomwe. Nokuba kuti nciyumu kwaasinizya makani aaya, kunyina uukonzya kukazya kuti mabbiliyoni aabantu mbacete kapati, kakuli bamwi balijisi lubono lunji ilukonzya kutola myaka minji kutegwa lumane. Jesu wakazyiba kujatikizya bukkale oobu naakaamba kuti: “Bacete munooli limwi lyoonse.” (Mk. 14:7) Ino nkaambo nzi ncokuli kwiindana kuli boobo akati kabavwubi abacete?

² Jesu wakalizyi kuti bukkale oobu ibuliko tabukacinci pe, kusikila mane Bwami bwa Leza bukaboole. Cibeela camapolitikisi alimwi abukombi, makwebo aamunyika eezyo iziimininwa ‘abasambazi’ ibaambidwe kulugwalo lwa Ciyubunuzyo 18:3, zipanga cibeela canyika ya Saatani. Nokuba kuti bantu ba Leza balalyaandanya cakumaninina kutwaambo twacisi alimwi akubukombi bwakubeja, pele ibanji akati kabo  tabalyaandaanyi cakumaninina kucibeela camakwebo canyika ya Saatani.

3. Ino mibuzyo nzi njotutiilange-lange?

³ Mbotuli Banakristo, tweelede kulilingula kujatikizya mbotwaabona makwebo aamunyika eeyi mazuba aano kwiinda mukulibuzya mibuzyo mbuli yakuti: ‘Ino mbuti mbondikonzya kubelesya zintu zyangu zyakumubili ikutondezya kuti ndilasyomeka kuli Leza? Ino mbuti mbondikonzya kucesya-cesya kubikkila maano kapati kumakwebo aamunyika? Ino nzyakuluula nzi ziliko izitondezya kuti bantu ba Leza balamusyoma cakumaninina nomuba mubukkale oobu bukatazya?’

4, 5. (a) Ino mubanzi mucikozyanyo ca Jesu wakalijana mubukkale buli buti? (b) Ino Jesu wakabakulwaizya kucita nzi basikumutobela?

⁴ Amubale Luka 16:1-9. Cikozyanyo ncaakapa Jesu camubanzi uutaluleme cipa kukkala ansi kuyeeya. Nobakamubejelezya kunyonyoona lubono, mubanzi ooyu “wakacita cabusongo” kwiinda ‘mukujana balongwe’ ibakali kuyoomugwasya aakusweekelwa mulimo wakwe wabubanzi. * Masimpe, Jesu tanaakali kukulwaizya basikwiiya bakwe kucita cakutalulama kutegwa bazwidilile munyika eeyi. Bukkale oobo wakabwaamba kuti mbukkale ‘bwabana bamubweende bwazintu oobu,’ pele wakabelesya cikozyanyo eeci kutegwa akankaizye kaambo kamwi.

⁵ Jesu wakalizyi kuti mbubwenya mbuli mubanzi iwakajanika mubukkale bukatazya, basikutobela Jesu banji bakali kuyooyandika zintu zyakubagwasya kutegwa bazumanane kupona mubukkale bwamunyika eeyi imuli kutalulama mumakani aamakwebo. Aboobo wakabakulwaizya kuti: “Amujane balongwe kwiinda mukubelesya lubono lutaluleme kutegwa lwaakubula mpindu, bakamutambule [Jehova alimwi a Jesu] mumasena aakukkala aatamani.” Ino ncinzi ncotukonzya kwiiya kululayo lwa Jesu?

6. Ino tuzyi buti kuti makwebo aacitika mazuba aano tanaakali cibeela camakanze aa Leza?

⁶ Nokuba kuti Jesu tanaakapandulula ikaambo ncaakaambila kuti lubono ‘talululeme,’ Bbaibbele lilakasalazya ikaambo kakuti kucita makwebo tanaakali cibeela camakanze aa Leza. Jehova wakapa Adamu a Eva zintu zyoonse nzyobakali kuyandika. (Matl. 2:15, 16) Kumbele, ciindi muuya uusalala nowakabeleka kubananike bamumbungano yamumwaanda wamwaka wakusaanguna, “kunyina naba omwe akati kabo iwakali kwaamba kuti zintu nzyaakajisi zyakali zyakwe alikke, pele bakali kwaabana zintu zyoonse.” (Mil. 4:32) Musinsimi Isaya wakaamba kujatikizya ciindi eelyo bantu boonse nobayoolikwaya kubelesya zintu zyakumubili zyamunyika eeyi. (Is. 25:6-9; 65:21, 22) Pele nocitanasika ciindi eeco, basikutobela Jesu beelede ‘kucita cabusongo’ kutegwa bajane zintu zikonzya kubagwasya kwiinda mukubelesya “lubono lutaluleme” lwamunyika eeyi, kumwi kababikkilide maano kukkomanisya Leza.

7. Ino ndulayo nzi ilujanika kulugwalo lwa Luka 16:10-13?

⁷ Amubale Luka 16:10-13. Mubanzi mucikozyanyo ca Jesu wakapanga balongwe kutegwa aligwasye lwakwe mwini. Nokuba boobo, Jesu wakakulwaizya basikumutobela kupanga zilongwe kujulu kabajisi makanze mabotu ikutali kuyanda kuligwasya lwabo beni. Tupango itutobela cikozyanyo eeci tuswaanganya kubelesya “lubono lutaluleme” akusyomeka kuli Leza. Ikaambo Jesu nkaakali kwaamba aawa nkakuti, tulakonzya ‘kutondezya kuti tulasyomeka’ katujisi lubono oolo akuti inga twalweendelezya kabotu ikuti katulujisi. Mbuti mbotukonzya kucita oobo?

8, 9. Amupe zikozyanyo zitondezya bamwi mbobasyomeka munzila mbobalubelesya lubono lutaluleme.

⁸ Inzila iitadoonekwi buya mbotukonzya kutondezya kuti tulasyomeka azintu zyesu zyakumubili nkwiinda mukusanga mali kumulimo  wakukambauka munyika yoonse ooyo Jesu ngwaakaamba kuti uyoocitika. (Mt. 24:14) Mwana musimbi umwi kucisi ca India wakajisi kabbokesi kasyoonto kakubikkila mali mpoonya asyoonto-asyoonto wakali kubikka tukkobili mukabbokesi aaka, mane buya akubikka mali ngaakeelede kuula zidooli zyakusobanya. Ciindi kabbokesi nokakazula, wakaasanga mali oonse kutegwa abelesyegwe kumulimo wakukambauka. Mukwesu umwi kucisi ca India uujisi faamu yama coconuts, wakasanga micelo eeyi minji kapati kuofesi yabasanduluzi nkobasandulula Chimalayalam, kayeeya kuti akaambo kakuti bakuofesi eeyi bayandika kuula micelo eeyi, ikuti walo wabatolela njiyo nkokuti kucita boobo kuyoogwasya kapati kwiinda kusanga mali. Ooku nkucita zintu cabusongo. Mbubwenya buyo, bakwesu kucisi ca Greece kanji-kanji inga basanga mafwuta aamaolifa, cciizi alimwi azilyo buyo zimbi kumukwasyi wa Beteli.

⁹ Mukwesu umwi wakucisi ca Sri Lanka, iwakalongela kucisi cimbi, wakaaba ŋanda yakwe njaakasiya ku Sri Lanka kuti kabacitila miswaangano yambungano, miswaangano mipati alimwi akuti kabakkala mumo bakwesu babeleka mulimo waciindi coonse. Mukwesu ooyu naakapanga mali manji, pele wakasala kuti abagwasye buyo basikumwaya bakubusena oobo balo ibapengede kapati. Mumasi mulimo wesu wakukambauka moukasyidwe, bakwesu balaaba maanda aabo kutegwa kaabelesyegwa mbuli Maanda aa Bwami, calo icapa bapainiya banji alimwi abamwi buyo ibatajisi kabotu kumubili kuti bacikonzye kuba abusena bwakuswaanganina kakunyina kubbadela.

10. Ino nzilongezyo nzi zimwi nzyotujana ikuti naa twaba baabi?

¹⁰ Zitondezyo nzyotwabona zitondezya bantu ba Leza ‘mbobasyomeka mutuntu tusyoonto,’ nkokuti, mbobalubelesya lubono lwabo lwakumubili, lwalo ilutakonzyi kweelanisyigwa alubono lwakumuuya. (Lk. 16:10) Ino mbuti balongwe ba Leza aaba mbobalimvwa kujatikizya kulyaaba kuli boobu? Balizyi kuti ikuba mwaabi nenzila yakujana lubono “lwini-lwini.” (Lk. 16:11) Mucizyi umwi uusanga lyoonse kumulimo wa Bwami ulaamba kujatikizya mbwaalongezyegwa naamba kuti: “Kwiinda mukuba mwaabi kumubili, kwamyaka minji lino ndilimvwa kukkomana kapati. Ciindi nondisanga zintu zyakumubili kumulimo wa Bwami, ndijana kuti eeci cindipa kubayanda bamwi. Kuyungizya waawo, ndaiya kuba muntu uulekelela bamwi, uukkazika moyo, uutatyompwi nondalubizyilwa alimwi uutambula lulayo.” Bantu banji bajana kuti kuba mwaabi kupa kuyaambele kumuuya.—Int. 112:5; Tus. 22:9.

11. (a) Ino mbuti kuba baabi mbokutondezya “kucita cabusongo”? (b) Ino nkuzulizya nzi kucitika akati kabantu ba Leza? (Amubone cifwanikiso icili kumatalikilo aacibalo.)

¹¹ Kubelesya lubono lwesu lwakumubili ikutolaambele zintu zya Bwami ‘nkucita cabusongo’ munzila aimbi. Kutupa coolwe cakubelesya zintu nzyotujisi ikugwasya bamwi. Aabo ibajisi coolwe cakuba alubono lwamunyika iino pele ibatacikonzyi kutola lubazu mumulimo waciindi coonse naa kulongela kucisi cimbi, inga bakkomana kuzyiba kuti mali ngobasanga agwasya bamwi mumulimo wabo. (Tus. 19:17) Zyakusanga zyakuliyandila zigwasya kutola mabbuku alimwi akugwasyilizya mulimo wakukambauka mumasena oomo bantu mobapengede kapati pele ooko mulimo nkuuyaambele kapati. Kwamyaka minji, mumasi mbuli ku Congo, Madagascar, alimwi aku Rwanda, bakwesu kanji-kanji bakeelede  kusala akati kakuula cakulya camukwasyi wabo naa ma Bbaibbele, aalo aakali kuulwa mweelwe wamali muntu ngakonzya kuvwola abeleka nsondo yomwe naa mwezi woonse. Lino akaambo kakusanga kwabantu banji alimwi ‘akuzulizya kubulizya kwabamwi,’ mbunga ya Jehova yagwasya kuti kusandululwe ma Bbaibbele alimwi akupa umwi aumwi mumukwasyi abasikwiiya Bbaibbele ibajisi nzala yakumuuya. (Amubale 2 Bakorinto 8:13-15.) Aboobo aabo bapa alimwi abaabo ibatambula boonse balakonzya kuba balongwe ba Jehova.

12. Ino mbuti Abrahamu mbwaakatondezya kuti wakajisi lusyomo muli Leza?

¹² Nzila aimwi mbotukonzya kuba acilongwe a Jehova nkwiinda mukutatola lubazu cakumaninina mumakwebo aamunyika alimwi akubelesya zintu nzyotujisi kuyandaula lubono “lwini-lwini.” Abrahamu, mwaalumi iwakali kusyomeka lyansiku, wakamvwida kwiinda mukusiya bubotu bwamumunzi wa Uri kutegwa akaakukkale mumatente akuyumya cilongwe cakwe a Jehova . (Heb. 11:8-10) Lyoonse wakali kulanga kuli Leza kuti ngo Kasensa kalubono lwini-lwini, tanaakali kuyandaula zintu zyakumubili zyalo izyakali kunootondezya kubula lusyomo. (Matl. 14:22, 23) Jesu wakakulwaizya kuba alusyomo luli boobu, ciindi naakaambila mwaalumi muvwubi kuti: “Ikuti koyanda kulondoka, koya ukasambale zintu zyako akupa bacete, eelyo uyooba alubono kujulu; wamana uboole ube sikunditobela.” (Mt. 19:21) Mwaalumi ooyu tanaakajisi lusyomo mbuli lwa Abrahamu, pele bamwi balatondezya lusyomo muli Leza cakumaninina.

13. (a) Ino ndulayo nzi Paulo ndwaakapa Timoteyo? (b) Ino lulayo lwa Paulo inga twalubelesya buti mazuba aano?

¹³ Timoteyo wakali mwaalumi iwakajisi lusyomo. Naakamana kwaamba Timoteyo kuti “sikalumamba mubotu wa Kristo Jesu,” Paulo wakamwaambila kuti: “Muntu uubeleka mulimo wabusikalumamba tatoli lubazu mumakwebo aabuumi obuno, kutegwa akkomanisye yooyo wakamunjizya busikalumamba.” (2Tim. 2:3, 4) Basikutobela Jesu mazuba aano, kubikkilizya ampi iinda ku 1 miliyoni yabakwesu ibabeleka mulimo waciindi coonse, balalutobela lulayo lwa Paulo kusikila bukkale bwabo mpobuzumizya. Ciindi nobakaka kuyungwa amakwebo alimwi azintu zili munyika eeyi, bayeeya njiisyo yakuti: “Sikukweleta muzike wayooyo uukweletesya.” (Tus. 22:7) Taakwe cimbi Saatani ncayanda kunze lyakuti tubelesye ciindi cesu coonse alimwi anguzu zyesu zyoonse kumubelekela munyika yakwe eeyi yamakwebo. Zyakusala izimbi inga zyatubikka mubuzike bwakuyandaula mali kwamyaka minji kapati. Zikwelete zyamali aakuyasya ŋanda, zikwelete zyakubbadelela basicikolo, mali aakubbadelela mootokala, mane buya amicado iidula zilakonzya kutunjizya mubukkale bwakuyandaula mali. Tulakonzya kutondezya kuti tucita zintu cabusongo kwiinda mukuubya-ubya buumi bwesu, kucesya zikwelete alimwi akucesya zintu nzyotuula. Twacita boobo, tuyoomubelekela Leza cakwaanguluka muciindi cakubelekela bweende oobu bwamakwebo.—1Tim. 6:10.

14. Ino nduyandisisyo luli buti luyandika? Amupe zikozyanyo.

¹⁴ Kuubya-ubya buumi bwesu kubikkilizya ikubikka zintu ziyandika mubusena bwakusaanguna. Banabukwetene bamwi bakajisi kkampani iyakali kupanga zintu alimwi yakali kucita kabotu kapati. Nokuba boobo, luyandisisyo ndobakajisi lwakutalika alimwi mulimo waciindi coonse lwakabapa kuti basambale kkampani yabo, bwato bwabo alimwi azintu zimbi. Mpoonya bakalisungula kugwasyilizya mumulimo wamayake aamaofesi mapati ku Warwick, New York. Cilongezyo caalubazu ncobakajana ncakubelekela ku Beteli amwanaabo musimbi alimwi amukwe wabo alimwi kwansondo zisyoonto bakabeleka abacembelenyina balo ibakatola lubazu mumulimo wakuyaka ku Warwick. Mucizyi umwi imupainiya ku Colorado, kucisi ca U.S.A., wakajana mulimo kubbanki uubelekwa mawoola masyoonto. Bapati bamulimo bakakkomana kapati ambwaakali kubeleka  cakuti bakamwaambila kuti balamunjizyila limwi mulimo wakubeleka mawoola aakkwene mpoonya akumusyomezya kuti banoomuvwozya mali aasika kuziindi zyotatwe aali yaayo ngaakali kuvwola kaindi. Nokuba boobo, akaambo kakuti mulimo ooyo wakali kuyoonyonganya mulimo wakwe wabukambausi, wakaukaka mulimo ooyu. Eezyi nzikozyanyo buyo zisyoonto zyakulyaaba nkobacita babelesi ba Jehova. Luyandisisyo luli boobu lwakubikka zintu zya Bwami mubusena bwakusaanguna lutondezya kuti tulacibikkila maano cilongwe cesu a Jehova alimwi alubono lwakumuuya kwiinda zintu nzyoikonzya kutupa nyika eeyi yamazuba aano.

15. Ino ndubono luli buti ilupa kukkutila kapati?

¹⁵ Kuba alubono lwakumubili tacili citondezyo cakulongezyegwa a Leza. Jehova ulabalongezya aabo “babeleka milimo mibotu minji.” (Amubale 1 Timoteyo 6:17-19.) Mucikozyanyo, ciindi ba Lucia * nobakazyiba kuti kuyandika bakambausi ba Bwami ku Albania, bakalongela nkuko kuzwa ku Italy mu 1993 kabatajisi mali aakubelesya pele kabasyomede buyo kuti Jehova uyoobalanganya. Bakawiiya mwaambo waku Albania alimwi bagwasya bantu bainda ku 60 ikuzyiba kasimpe mpoonya akubbapatizyigwa. Nokuba kuti bantu ba Leza banji tabakambaukili muzilawo zibotu boobu, kufwumbwa ncotukonzya kucita kugwasya bamwi kujana kasimpe akuzumanana kweenda munzila iitola kubuumi, ncecintu swebo alimwi ambabo ncotunookkomanina mane kukabe kutamani.—Mt. 6:20.

16. (a) Ino ncinzi ciyoocitikila makwebo aamunyika aaliko mazuba aano? (b) Ino zintu iziyoocitika kumbele zyeelede kutugwasya kubulanga buti buvwubi bwakumubili?

¹⁶ Jesu wakaamba kuti: “Lwaakubula mpindu [lubono lutaluleme,]” ikutali ‘ikuti naa lwabula mpindu.’ (Lk. 16:9) Kuwa kwamabbanki alimwi amakwebo ikwacitika mumazuba aano aamamanino nkusyoonto kapati tweezyanisya akooko ikuyoocitika munyika yoonse lino-lino. Bweende bwazintu bwa Saatani boonse, nkokuti mapolitikisi, zikombelo alimwi amakwebo, zyoonse tazikazwidilili pe. Musinsimi Ezekieli alimwi amusinsimi Zefaniya bakasinsima kuti ngolida ansiliva zyalo izyali kukamantanya basimakwebo munyika yoonse kwamyaanda yamyaka minji, ziyoobula mpindu. (Ezk. 7:19; Zef. 1:18) Ino inga twalimvwa buti ikuti twasika kumamanino aabuumi bwesu munyika iino mpoonya twajana kuti tiitwakabikkila maano kulubono lwini-lwini, pele muciindi caboobo twakaliyobweda “lubono lutaluleme” lunji kapati munyika iino? Inga twalimvwa mbuli mwaalumi iwakabelekela mali manji buumi bwakwe boonse, pele kumamanino waile kujana kuti mali aayo ngakubeja. (Tus. 18:11) Inzya, lubono luli boobu masimpe luyoobula mpindu, aboobo mutaimpyi coolwe cakulubelesya ‘kujana balongwe’ kujulu. Kufwumbwa ncotucita ikutolaambele zintu zya Bwami bwa Jehova kutupa kuvwuba kumuuya.

17, 18. Ino balongwe ba Leza balangila nzi kumbele?

¹⁷ Ciindi Bwami bwa Leza bwakuboola, maleenti alimwi azikwelete ziyakumana, zyakulya tazinakuulwi buya pe alimwi zinooli zinji alimwi kunoonyina kuciswa. Mukwasyi wa Jehova waanyika uyookkomana azintu zyoonse zinoojanika munyika. Ngolida, nsiliva alimwi amabwe mayandisi zinooli zyakulisakatizya ikutali kubelesyegwa mumakwebo. Mapulanga mabotu kapati, mabwe mayandisi alimwi azibulo zibotu zinooliko kutegwa tukayake maanda aayebeka. Balongwe besu banootugwasya kakunyina kulangila kuti tulababbadela pe. Akaambo kakuti kunooli zintu zinji, cilengwa cakupana zintu buyooba mbobukkale bwabuzuba abuzuba.

¹⁸ Eeci ncibeela cisyoonto buyo cazintu nzyobayookona aabo ibapanga zilongwe kujulu. Bakombi ba Jehova baanyika bayookkomana citaambiki baakumvwa majwi aa Jesu aakuti: “Amuboole, nywebo nomulelekedwe a Taata, amukone Bwami mbomwakabambilwa kuzwa kumatalikilo aanyika.”—Mt. 25:34.