“MULIMO wakutebula mupati, pele babelesi mbasyoonto. Aboobo, amulombe Simalelo wabutebuzi kuti atume babelesi mumulimo wakwe wakutebula.” (Lk. 10:2) Majwi aaya aakaambwa a Jesu myaka iili 2,000 yainda alabupandulula kabotu bukkale buli ku Myanmar mazuba aano. Nkaambo nzi? Ku Myanmar, kuli buyo basikumwaya ibali 4,200 ibakambauka makani mabotu akati kabantu ibali 55 miliyoni.

Nokuba boobo, “Simalelo wabutebuzi,” Jehova, wapa kuti bakwesu abacizyi banji ibazwa mumasi aayindene-indene, baunke kucisi eeci icili ku Southeast Asia kutegwa bakagwasyilizye mumulimo wakukambauka. Ino ncinzi cakabapa kuti basiye zisi zyabo? Mbuti mbobakagwasyigwa kutegwa bacikonzye kulonga kuya ku Myanmar? Alimwi ino nzilongezyo nzi nzyobakajana? Atubone.

Myaka minji yainda, ba Kazuhiro, bapainiya baku Japan, bakasuntuka, mpoonya bakatolwa kucibbadela. Badokotela bakabaambila kuti bacileke kweenzya mootokala kwamyaka yobilo. Ba Kazuhiro bakagambwa. Bakalibuzya kuti, ‘Ino ndilacikonzya buti kucita cintu ncondiyandisya, bupainiya?’ Bakapaila camoyo woonse, kulomba Jehova kuti abajalwide nzila yakuzumanana kubeleka kabali bapainiya.

Ba Kazuhiro bakaamba kuti: “Nokwakainda mwezi omwe, mweenzuma iwakali kubelekela ku Myanmar wakalimvwa penzi lyangu. Wakanditumina fooni akundaambila kuti: ‘Kuno ku Myanmar tubelesya kapati mabbaasi kweendela. Ikuti mwaboola kuno, mulakonzya kuzumanana amulimo wanu wamumuunda kakunyina kubelesya mootokala wanu.’ Aboobo ndakabuzya badokotela ikuti naa inga ndalongela ku Myanmar nokuba kuti ndilaakasuntu. Cakutayeeyela, badokotela bakaamba kuti: ‘Syaazibwene mumakani aambobubeleka bongo waku Myanmar nkwali kuno ku Japan. Ndilamwaambila kujatikizya penzi lyanu. Ikuti naa mukasuntuke alimwi, uyoomulanganya.’ Ndakabona kuti nzyobakaamba badokotela bwakali bwiinguzi bwamupailo wangu kuzwa kuli Jehova.”

Mpoonya-mpoonya, ba Kazuhiro bakatuma e-mail kuofesi yamutabi waku Myanmar akubaambila luyandisisyo balo alimwi abakaintu babo ndobakajisi lwakuyoobelekela kucisi eeco kabali bapainiya. Kwakainda buyo mazuba osanwe, bakumutabi bakaingula kuti, “Amuboole, tuyanda bapainiya banji kuno!” Ba Kazuhiro abakaintu babo ba Mari, bakasambala myootokala yabo, bakabweza ma visa alimwi akuula matiketi aandeke. Mazuba aano, balabeleka calukkomano mukabunga kabelesya mwaambo wakutambaika mudolopo lya Mandalay.  Ba Kazuhiro bakaamba kuti: “Kwiinda muzintu zyakatucitikila, tulimvwa kuti lusyomo lwesu lwakayumizyigwa mucisyomezyo ca Leza eeci cijanika mulugwalo lwa Intembauzyo 37:5: ‘Bikka nzila yako mumaanza aa Jehova; komusyoma, eelyo walo ulakugwasya.’”

Mu 2014, Bakamboni ba Jehova ku Myanmar bakaba acoolwe cakuba amuswaangano wacooko waalubazu mucisi cabo. Bantu banji ibazwa kumasi aambi bakajanika kumuswaangano ooyu. Umwi wabo, Monique, imucizyi uujisi myaka iili 34 uuzwa ku United States, wakati: “Nondakapiluka kuzwa kumuswaangano, ndakapaila kuli Jehova kujatikizya ntaamu iitobela njondakeelede kubweza mubuumi bwangu. Kuyungizya waawo, ndakabandika abazyali bangu kujatikizya mbaakani zyangu zyakumuuya. Toonse twakabona kuti ndakeelede kupiluka ku Myanmar, pele cakanditolela ciindi cilamfwu alimwi ndakapaila mipailo minji kanditanasala cakucita.” Mucizyi Monique wakapandulula ncaakacitila boobo.

“Jesu wakakulwaizya basikumutobela ‘kubona mali aayandika.’ Aboobo ndakalibuzya kuti: ‘Sena inga ndacikonzya kulonga? Sena ndiyoocikonzya kupona kucisi eeciya kakunyina kubeleka ciindi cilamfwu mumulimo wakumubili?’” Wakaamba kuti: “Cakufwambaana ndakabona kuti tiindakajisi mali aayandika kutegwa ndilongele kucisi cimbi.” Aboobo, ino mbuti mbwaakacikonzya kulonga?—Lk. 14:28.

Monique wakaamba kuti: “Bumwi buzuba sikundilemba mulimo wakandilomba kuti ndimubone. Ndakalibilika, kandiyeeya kuti ambweni uyanda kundaambila kuti ndileke kubeleka. Pele muciindi caboobo, sikundilemba mulimo wakandilumbaizya akaambo kakubeleka kabotu. Mpoonya wakandaambila kuti wakabamba bubambe bwakuti ndipegwe mali ayungizyidwe, aayo aakeelene amweelwe wamali ngweenya ngondakali kuyanda kutegwa nduule zintu zyakumubili zyakali kuyandika!”

Monique wali kubeleka ku Myanmar kuzwa mu December 2014. Ino ulimvwa buti kujatikizya mulimo wakwe kali kubusena kubulide? Wakaamba kuti: “Ndilikkomene kapati kuba kokuno. Ndisololela ziiyo zya Bbaibbele zyotatwe. Akati kaziiyo eezyi, kuli bacembele bajisi myaka yakuzyalwa iili 67. Bacembele aaba lyoonse balandaanzya kwiinda mukundimwetela-mwetela alimwi akundikumbata. Nobakazyiba kuti Leza zina lyakwe ngu Jehova, bakalila. Bakaamba kuti: ‘Nkakusaanguna mubuumi bwangu kumvwa kuti Leza zina lyakwe ngu Jehova. Uli mwana muniini kapati kulindime, pele wandiyiisya cintu ciyandika kapati ncondatakali kukonzya kwiiya.’ Kanditajisi cakwaamba, andime ndakalila. Zintu zicitika mbuli ceeci zipa kuti kubelekela kubusena kubulide kakukkomanisya mubuumi.” Caino-ino, Monique wakaba acoolwe cakunjila Cikolo Cabakambausi ba Bwami.

Acimbi icakabakulwaizya bamwi kuunka ku Myanmar ndi Bbuku Lyaamwaka lya Bakamboni ba Jehova Lyamu 2013 ilijisi makani aajatikizya cisi eeci. Mucizyi umwi uujisi myaka iinda ku 30 wazina lya Li wakalikkede kale ku Southeast Asia. Wakali kubeleka mulimo wakumubili, pele makani aali mu Bbuku Lyaamwaka akamukulwaizya kuba amuzeezo wakuyoobelekela ku Myanmar. Wakaamba kuti: “Mu 2014 nondakajanika kumuswaangano wacooko waalubazu ku Yangon, ndakazyibana abanabukwetene ibakali kubelelekela kubusena kubulide nkobabelesya mwaambo waci Chinese ku Myanmar. Mbwaanga ndiluuzyi mwaambo waci Chinese, ndakasala kulongela ku Myanmar kutegwa ndikagwasyilizye kabunga kaci Chinese. Ndakamusangana Monique, mpoonya twakalongela ku Mandalay. Jehova wakatulongezya kwiinda mukutugwasya kujana mulimo wabwiiyi acikolo comwe alimwi twakali kubeleka buyo mawoola masyoonto, alimwi twakajana akaanda mwakukkala afwaafwi buyo acikolo. Nokuba kuti kulapya alimwi tulacitikilwa azintu zimwi izyatakali kuyeeyelwa, ndilaukkomanina mulimo wangu okuno. Bantu ku Myanmar bapona buumi buuba-uba, balaabulemu alimwi balayanda kwaaba ciindi cabo kutegwa baswiilile makani mabotu. Cilakkomanisya kubona Jehova mbwaapa kuti mulimo wakwe ucitwe cakufwambaana. Ndilisinizyide kuti nkuyanda kwa Jehova kuti mebo kandili kokuno ku Mandalay.”

Bantu banji ibabelekela mumasena aabulide bakabona nguzu nzyoujisi mupailo. Atubone cikozyanyo caba Jumpei, ibajisi myaka iili 37 alimwi abakaintu babo ba Nao, ibajisi myaka iili 35. Bakali kubeleka mumbungano yamwaambo wakutambaika ku Japan. Ino ncinzi cakabapa kulongela ku Myanmar? Ba Jumpei bakaamba kuti: “Mebo abakaintu bangu lyoonse twakajisi makanze aakuyoobelekela kubusena kubulide kucisi cimbi. Mukwesu wamumbungano yesu yamwaambo wakutambaika ku Japan wakalongela ku Myanmar. Nokuba kuti twakayobwede buyo mali masyoonto, mu May 2010 andiswe twakalonga. Bakwesu abacizyi ku Myanmar bakatutambula amaanza obilo!” Ino balimvwa buti kujatikizya cilawo camwaambo wakutambaika ku Myanmar? Bakaamba kuti, “Bantu balaaluyandisisyo. Ciindi notubatondezya mavidiyo aamumwaambo wakutambaika, basinke matwi mbotujana mumaanda balagambwa. Tulikkomene kapati kuti twakasala kuboola kuzoobelekela Jehova okuno!”

Ino ba Jumpei alimwi aba Nao bakacikonzya buti kuliyumya kupenzi lyamali? Bakaamba kuti, “Nokwakainda myaka yotatwe, mali ngotwakayobwede akamana alimwi tiitwakacijisi mali aayandika kubbadelela leenti yamwaka iwakali kutobela. Mebo abakaintu bangu twakapaila mipailo minji camoyo woonse. Cakutayeeyela, twakatambula lugwalo kuzwa kuofesi yamutabi ilwakali kutuzyibya kuti twatambwa kubeleka katuli bapainiya baalubazu kwaciindi cisyoonto! Twakamusyoma Jehova, alimwi twakabona kuti wakali aandiswe. Ulatulanganya lyoonse munzila iili yoonse.” Caino-ino, ba Jumpei alimwi aba Nao abalo bakanjila Cikolo Cabakambausi ba Bwami.

Ino ncinzi cakakulwaizya ba Simone, ibajisi myaka iili 43, ibazwa ku Italy, alimwi abakaintu babo ba Anna, ibajisi myaka iili 37, ibazwa ku New Zealand, kulongela ku Myanmar? Ba Anna bakaingula kuti, “Makani aamba zyaku Myanmar aali mu Bbuku Lyaamwaka lyamu 2013!” Ba Simone bakaamba kuti: “Eelo kaka ncilongezyo cipati kukkala ku Myanmar! Buumi kuno mbuuba-uba kapati, alimwi ndilacikonzya kubeleka ciindi cinji mumulimo wa Jehova. Cilakkomanisya kubona mbwatulanganya Jehova ciindi notubelekela mumasena aabulide.” (Int. 121:5) Ba Anna bakati: “Kunyina nondakabede aalukkomano mbuli ndondijisi lino. Tupona buumi buuba-uba. Ndilijisi ciindi cinji cakuba antoomwe abalumi bangu, alimwi cilongwe cesu cayuma kapati. Alimwi twakajana abalongwe bapya ibali kabotu. Bantu kuno tabajisi lusalululo kuli Bakamboni, alimwi luyandisisyo ndobajisi bantu mumuunda lulagambya!” Munzila nzi?

Ba Anna bakaamba kuti: “Bumwi buzuba, ndakakambaukila sicikolo wakuyunivesiti kumusika alimwi twakapanga bubambe bwakuti tukaswaangane alimwi. Nondakacita oobo, sicikolo ooyu wakaboola amweenzinyina. Lweendo lwakatobela, wakaboola abeenzinyina bambi. Mukuya kwaciindi, wakaleta abambi banji. Lino bosanwe ndilabayiisya Bbaibbele.” Ba Simone bakaamba kuti: “Bantu mucilawo mbalongwe alimwi balayanda kuzyiba zinji. Banji balaaluyandisisyo. Nkuti buyo ciindi cakuti tubayiisye boonse cilaceya.”

Ino mbuti kujatikizya nzila zigwasya izijatikizyidwe mukusala kulongela ku Myanmar? Ba Mizuho, ibazwa ku Japan, bakaamba kuti: “Mebo abalumi bangu ba Sachio,  Iyoonse twakali kuyanda kuyoobelekela kubusena kubulide kucisi cimbi, pele bakali kulibuzya kuti, ino inga twaunka kuli? Notwakamana kubala makani aamba zyaku Myanmar aali mu Bbuku Lyaamwaka lyamu 2013, twakakulwaizyigwa kapati azyakuluula zikkomanisya cakuti twakatalika kuyeeya naa inga twacikonzya kuyoobelekela ku Myanmar.” Ba Sachio bakayungizya kwaamba kuti: “Twakasala kuyooswaya kwansondo yomwe ku Yangon, dolopo mpati ku Myanmar, munzila imwi, ikuyoobona mbokubede. Kuswaya ooku kwakatugwasya kubona kuti tuleelede kulonga.”

Ba Rodney alimwi abakaintu babo ba Jane, ibazwa ku Australia, boonse ibajisi myaka yakuzyalwa iili kuma 50, mwanaabo musankwa Jordan alimwi amusimbi Danica, balabeleka kubusena kubulide ku Myanmar kuzwa mu 2010. Ba Rodney bakaamba kuti: “Cakatukkomanisya kapati kubona bantu mbobakayandide kwiiya kujatikizya Leza. Ndikulwaizya mikwasyi iimbi kuti ayalo ikasole kuyoobelekela kubusena kubulide mbubwenya mbuli ku Myanmar.” Nkaambo nzi? Bakazumanana kwaamba kuti, “Cilakkomanisya kubona kuti kubelekela kubusena kubulide kwaciyumya kapati cilongwe cesu a Jehova. Bakubusi banji bajisi bubi amafooni aabo, myootokala, milimo, azintu zimwi buyo. Pele bana besu bajisi bubi kwiiya mabala mapya aakubelesya mumulimo wakukambauka. Balasoleka kwiiya mbobakonzya kubandika abaabo batajisi luzyibo lwamu Bbaibbele, balaiya ambobakonzya kwiingula lyamiswaangano, alimwi bajisi bubi kapati muzintu zinji zyakumuuya izikkomanisya.”

Ba Oliver, ibajisi myaka iili 37, ibaku United States, balapandulula kaambo ncobaulumbaizya mulimo ooyu. Bakaamba kuti: “Kubelekela Jehova kubusena bwiindene abusena mbozyibide kwandigwasya munzila zinji kapati. Kulonga kuzwa kuŋanda kwakandigwasya kuliyumya alimwi akusyoma Jehova kufwumbwa mubukkale mondakali kulijana. Ndilabeleka abaabo mbondatakazyi kaindi pele tulikamantene mulusyomo. Bulikke Bwami bwa Leza mbobukonzya kucita boobo.” Mazuba aano, ba Oliver alimwi abakaintu babo ba Anna, bazumanana kubeleka cabusungu mucilawo camwaambo waci Chinese.

Ba Trazel, ibajisi myaka iili 52, ibaku Australia, balabeleka ku Myanmar kuzwa mu 2004. Bakaamba kuti: “Kuli baabo bajisi bukkale bubazumizya, ndilabakulwaizya kapati kuyoobeleka kubusena kubulide. Ndakabona kuti, ikuti kojisi luyandisisyo lwakubeleka, Jehova ulakulongezya kusoleka kwako. Kunyina nondakazyi kuti inga ndinoopona boobu. Ndipona buumi bulaampindu alimwi ibukkomanisya kapati mbondatakali kuyeeyela kuti inga ndapona.”

Tulaalusyomo lwakuti majwi aaya aakaambwa kuzwa ansi aamyoyo yabakwesu alimwi abacizyi ibabelekela kubusena kubulide ku Myanmar alamukulwaizya kuyoogwasyilizya bantu babombe myoyo muzilawo izitanabelekedwe. Inzya, aabo ibali mumasena aabulide balamutamba kwiinda mukwaamba kuti, “Akaka, amuzabukile okuno ku Myanmar mutugwasye!”