1, 2. (a) Nkaambo nzi ncocili camaano kuba kulubazu lwa Jehova? (b) Ino ncinzi ncotutiilange-lange mucibalo eeci?

NCAMAANO kukakatila kuli Jehova. Kunyina muntu ulaanguzu, musongo, naa ulaaluyando kwiinda Leza wesu! Nguni akati kesu uutayandi kuba kulubazu lwakwe? (Int. 96:4-6) Nokuba boobo, bakombi ba Jehova bamwi balaalilwa kusala cabusongo ciindi nobalijana mubukkale mobayandika kusala kuba kulubazu lwa Jehova.

² Mucibalo eeci, tulalanga-langa zikozyanyo zyabantu bamwi ibakali kulitaminina kuba kulubazu lwa Jehova pele kumwi kabacita zintu zitamukkomanisyi. Zibalo eezyi zijisi ziiyo ziyandika kapati izikonzya kutugwasya kuzumanana kusyomeka kuli Jehova.

3. Nkaambo nzi Jehova ncaakabandika a Kaini, alimwi ino ncinzi ncaakamwaambila?

³ Amubone makani aajatikizya Kaini. Kunyina naakalitaminina kukomba leza uuli woonse kunze buyo lya Jehova. Nokuba boobo, bukombi bwa Kaini tiibwakatambulika kuli Leza. Kuli zintu zibyaabi nzyaakali kuyeeya mumoyo wakwe. (1Joh. 3:12) Jehova wakabandika a Kaini akumwaambila kuti: “Ikuti naa wacinca akutalika  kucita kabotu, sena tokakkomaninwi? Pele kuti utacinci akucita kabotu, kozyiba kuti cibi cilikukkalilide amulyango, alimwi ciyanda kukweendelezya; pele sena uyoocizunda?” (Matl. 4:6, 7) Munzila imwi, Jehova wakali kwaambila Kaini kuti, “Ikuti naa weempwa akuba kulubazu lwangu, andime ndiyooba kulubazu lwako.”

4. Nokuba kuti wakapegwa coolwe cakuba kulubazu lwa Jehova, ino ncinzi Kaini ncaakacita?

⁴ Jehova wakali kuyoomukkomanina Kaini lilikke buyo kuti naakacinca mbwaakali kuyeeya. Pele Kaini tanaakaluswiilila lulayo. Kuyeeya kubyaabi alimwi azisusi zyakwe mwini zyakapa kuti acite cibi. (Jak. 1:14, 15) Kali mukubusi, kweelede kuti Kaini kunyina naakali kuyeeyela kuti wakali kuyoomuzangila Jehova. Pele mukuya kwaciindi, wakacita cintu catakali kuyeeyelwa, wakamuzangila Leza alimwi akujaya mwanookwabo!

5. Ino mizeezo iili buti iikonzya kupa kuti tuleke kukkomaninwa a Jehova?

⁵ Mbubwenya mbuli Kaini, Munakristo mazuba aano ulakonzya kuti kacita zintu zibyaabi pele kumwi kalitaminina kukomba Jehova. (Jud. 11) Mucikozyanyo, umwi ulakonzya kutalika kuba amizeezo yakutalilemeka, mizeezo yabusyaacivwulemwangu, naa kubikkilila Banakristonyina. (1Joh. 2:15-17; 3:15) Mizeezo iili boobu ilakonzya kusololela kukucita zintu zibyaabi. Pele muntu ulakonzya kuti kwaciindi coonse eeci kali musungu mumulimo wamumuunda alimwi akujanika lyoonse kumiswaangano yambungano. Bantu bamwi balakonzya kuti kabatazyi nzyotuyeeya alimwi abukkale bwesu, pele walo Jehova ulabona zintu zyoonse alimwi ulazyiba ikuti naa katutali kulubazu lwakwe camoyo woonse.—Amubale Jeremiya 17:9, 10.

6. Ino mbuti Jehova mbwatugwasya ‘kuzunda’ kutalondoka kwesu ikuti naa twazumanana kuba kulubazu lwakwe?

⁶ Nokuba boobo, Jehova ulatukkazikila moyo. Ciindi muntu nacita zintu zimupa kutantamuka kuli Leza, Jehova ulamwaambila kuti: ‘Jokela kulindime, eelyo andime ndilaboola kulinduwe.’ (Malk. 3:7) Kwaambisya ciindi notulwana akutalondoka kwesu, Jehova uyanda kuti katubutantamuka bubi. (Is. 55:7) Kuti twacita oobo, awalo uyooba kulubazu lwesu kwiinda mukutupa nguzu nzyotuyandika kumuuya, mumizeezo alimwi akumubili kutegwa ‘tukuzunde’ kutalondoka kwesu.—Matl. 4:7.

7. Ino ncinzi cakapa kuti Solomoni asweekelwe cilongwe cakwe a Jehova?

⁷ Tulakonzya kwiiya zinji kuzwa kucikozyanyo ca Mwami Solomoni. Naakacili mwana, Solomoni wakali kusyoma busolozi bwa Jehova. Leza wakamupa busongo alimwi wakamusyoma kwiinda mukumupa mulimo wakuyaka tempele lyeebeka mu Jerusalemu. Pele Solomoni wakasweekelwa cilongwe cakwe a Jehova. (1Bam. 3:12; 11:1, 2) Mulawo wa Leza cacigaminina wakali kukasya mwami muna Hebrayo “kukwata bamakaintu banji kutegwa moyo wakwe utaleyi.” (Dt. 17:17) Pele Solomoni tanaakamvwida, mukuya kwaciindi wakakwata bamakaintu ibali 700. Alimwi wakaleta abamwanakasuwa bali 300 muŋanda yakwe. (1Bam. 11:3) Bunji bwabamakaintu bakwe tiibakali bana Israyeli, alimwi bakali kukomba baleza bakubeja. Aboobo, Solomoni awalo wakaunduluzya mulawo wa Leza kwiinda mukukwata bamakaintu beenzu.—Dt. 7:3, 4.

8. Mbuti Solomoni mbwaakamubisizya kapati Jehova?

⁸ Ikuleya kwa Solomoni kuzwa kuzyeelelo zya Jehova ooko ikwakacitika asyoonto-syoonto, kwakamupa kuti mukuya kwaciindi acite cibi cipati. Solomoni wakayaka cipaililo caleza mukaintu wabana Asitoreti alimwi acipaililo acimbi caleza wakubeja wabana Kemosi. Mpoonya wakabasangana bamakaintu bakwe mubukombi bwakubeja kuzipaililo eezyo. Amuciyeeyele  buyo, akati kamasena oonse aakaliko, wakayaka zipaililo eezyo acilundu icakalangene a Jerusalemu, ooko nkwaakayakila tempele lya Jehova! (1Bam. 11:5-8; 2Bam. 23:13) Ambweni Solomoni wakalyeena kayeeya kuti Jehova wakali kuyookulanga buyo kutasyomeka kwakwe kufwumbwa buyo kuti wazumanana kutuula zituuzyo kutempele.

9. Ino ncinzi cakacitika akaambo kakuti Solomoni tanaakamvwida kucenjezya kwa Leza?

⁹ Pele Jehova kunyina nakulanga buyo kulubizya. Bbaibbele lyaamba kuti: “Jehova wakakalala akaambo ka Solomoni, nkaambo moyo wakwe wakaleya kuzwa kuli Jehova . . . , ooyo iwakalibonya kulinguwe ziindi zyobilo, alimwi wakalimucenjezyede kujatikizya makani aaya, kuti teelede kutobela baleza bambi. Pele walo tanaakatobela ncaakamulailila Jehova.” Akaambo kaceeci, Leza tanaakacili kumukkomanina alimwi wakaleka kumugwasya. Basimulyazina ba Solomoni bakasweekelwa coolwe cakuba abwami bwa Israyeli bukamantene alimwi eeci cakaleta mapenzi manji kumazyalani aakali kutobela.—1Bam. 11:9-13.

10. Ncinzi cikonzya kunyonganya cilongwe ncotujisi a Jehova?

¹⁰ Mbubwenya mbocakacitika kuli Solomoni, intenda mpati iikonzya kunyonganya muntu kumuuya, nkupanga cilongwe abaabo ibatazizyi naa kuzilemeka zyeelelo zya Jehova. Ibamwi balakonzya kuti kabayanzana ambungano pele kabataciti kabotu kumuuya. Bamwi inga kabali babbululu besu, basimukoboma, babelesima, naa basicikoloma ibatali bakombi ba Jehova. Mubukkale buli boobu, ikuti balongwe besu kabatazilemeki zyeelelo zya Jehova, nkokuti balakonzya kunyonganya cilongwe cibotu ncotujisi a Leza.

11. Ino ncinzi cikonzya kutugwasya kuzyiba naa tweelede kucimana cilongwe abamwi?

¹¹ Amubale 1 Bakorinto 15:33. Bantu bamwi balijisi bube bubotu, alimwi banji, nokuba kuti tabakombi Jehova tabalinjizyi mumicito iitali kabotu. Ikuti naa oobo mbocibede kubantu mbomuyanzana limwi, sena inga mwaamba kuti mbalongwe bali kabotu? Amulibuzye kujatikizya kuyanzana ooko mbokukonzya kucijatikizya cilongwe canu a Jehova. Sena kuyoociyumya? Ino nzintu nzi nzyobayeeya? Mucikozyanyo, sena mibandi yabo iyeeme aakuba azisani zili mufasyoni, zintu zisumpukide zipangwa mazuba aano mbuli matabbuleti, mafooni, makkompyuta, naa kuba azintu zimwi buyo zyakumubili? Sena mibandi yabo kanji-kanji ibikkilizya kwaamba zintu zibyaabi kujatikizya bamwi naa kwaamba masesya aajatikizya zintu zitondwa? Jesu wakacenjezya kuti: “Nkaambo mulomo waamba zizwide mumoyo.” (Mt. 12:34) Ikuti mwabona kuti bantu mbomuyanzana limwi banyonganya cilongwe canu a Jehova, amubweze ntaamu kwiinda mukucesya ciindi cakuba ambabo alimwi kuti kacikonzyeka, amuleke kuyanzana ambabo.—Tus. 13:20.

12. (a) Ino ncinzi Jehova ncaakabaambila bana Israyeli kakwiindide buyo ciindi cisyoonto kuzwa nobakazwa mu Egepita? (b) Ino bana Israyeli bakacita buti kuceelelo ca Jehova cakukomba buyo nguwe alikke?

¹² Kuli ciiyo acimbi ncotukonzya kwiiya kuzwa kuli cakacitika kakwiindide buyo ciindi cisyoonto kuzwa ciindi bana Israyeli nobakazwa mu Egepita. Bantu bakabungana kumbele aa Cilundu ca Sinai. Ookuya Jehova wakalibonya kulimbabo kwiinda mucitondezyo. Camaleele kwakalibonya kkumbi lisiya mbi. Jehova wakaleta muzuzumo, ndabo, busi, alimwi acakali kuzumanana kulila mbuli mweembo. (Kul. 19:16-19) Aciindi aawa, Jehova wakaliyubununa kubana Israyeli kuti ngu ‘Leza uuyanda kuti bantu kabakomba buyo nguwe alikke.’ Wakabasyomezya kuti wakali kuyoosyomeka kuli baabo ibamuyanda alimwi akutobela milawo yakwe. (Amubale Kulonga 20:1-6.) Munzila iimwi, Jehova wakali kwaambila bantu bakwe kuti, “Ikuti mwaba kulubazu lwangu, andime ndiyooba kulubazu lwanu.” Ino inga mwacita buti kucisyomezyo ca Jehova eeci? Cakutadooneka mulakonzya kucita mbubwenya mbobakacita bana Israyeli. Boonse “bakaingula antoomwe kuti: ‘Zyoonse nzyaamba Jehova tulazicita.’” (Kul. 24:3) Nokuba boobo, muciindi buyo cisyoonto, kwakacitika cintu cimwi icatakali kuyeeyelwa calo icakasunka lusyomo lwabana Israyeli.

13. Ino mbukkale buli buti bwakasunka lusyomo lwabana Israyeli?

¹³ Bana Israyeli bakayoowa akaambo kakkumbi lisiya mbi, ndabo, alimwi azintu zimwi zigambya izyakazwa kuli Leza. Kweelana akulomba kwabo, Musa wakazumina kubaiminina kuli Jehova mumubandi woonse aa Cilundu ca Sinai. (Kul. 20:18-21) Musa wakali acilundu kwaciindi cilamfwu. Sena aciindi aawa bana Israyeli bakapenga munkanda kakunyina musololi wabo ngobakali kusyoma? Kulibonya kuti lusyomo lwabantu lwakayeeme kapati aali Musa kumugama. Bakalibilika akwaambila Aroni kuti: “Kotupangila leza uutiitusololele, nkaambo tatuzyi camucitikila Musa ooyu iwakatusololela kuzwa mucisi ca Egepita.”—Kul. 32:1, 2.

14. Muunzila nzi bana Israyeli mobakalyeena, alimwi ino Jehova wakacita buti?

¹⁴ Bantu bakalizyi kuti kukomba mituni cakali cibi cipati kuli Jehova. (Kul. 20:3-5) Pele muciindi buyo cisyoonto, bakatalika kukomba moombe wangolida! Nokuba kuti bakatyola mulawo wa Jehova acaali, munzila iimwi, bana Israyeli bakalyeena kwiinda mukuyeeya kuti bakacili kulubazu lwa Jehova. Amuciyeeyele buyo, Aroni wakaamba bukombi bwabo bwamoombe kuti “pobwe lya Jehova”! Ino Jehova wakalimvwa buti? Wakausa kapati. Jehova wakaambila Musa kuti bantu ‘bakalisofwaazya’ alimwi ‘bakasiya nzila njaakabalailila kuti batobele.’ Kwiinda ‘mubukali bwakwe buyaka mbuli mulilo,’ Jehova mane wakayeeya kuunyonyoona musyobo mupya wa Israyeli.—Kul. 32:5-10.

15, 16. Mbuti Musa a Aroni mbobakatondezya cakaanzambwene kuti bakali kulubazu lwa Jehova? (Amubone cifwanikiso icili kumatalikilo aacibalo.)

¹⁵ Jehova wakasala kutabanyonyoona bana Israyeli. Luse lwakwe lwakapa bakombi basyomeka coolwe cakuzumanana kuba kulubazu lwakwe. (Kul. 32:14) Naakabona micito yabantu yakutalijata, nkokuti kuyobeka, kwiimba alimwi akuzyana kumbele lyamutuni, Musa wakapwayaula moombe wangolida kusikila waba busu. Mpoonya wakaamba kuti: “Nguni uuli kulubazu lwa Jehova? Aaboole kulindime!” Aboobo “ba Levi boonse bakabungana kulinguwe.”—Kul. 32:17-20, 26.

¹⁶ Nokuba kuti kumatalikilo Aroni wakatola lubazu mukupanga mutuni ooyo, wakeempwa akubasangana ba Levi boonse kulubazu lwa Jehova. Bantu aaba ibasyomeka, tiibakali kubweza buyo ntaamu yakuba kulubazu lwa Jehova,  pele alimwi bakali kulyaandaanya kuli basizibi aabo. Eeyo yakali ntaamu yabusongo; buzuba oobo bantu banji bakafwa akaambo kakukomba mituni. Nokuba boobo, aabo ibakali kulubazu lwa Jehova bakapegwa cisyomezyo cakulongezyegwa.—Kul. 32:27-29.

17. Ino majwi ngaakalemba Paulo aajatikizya moombe wangolida atuyiisya nzi?

¹⁷ Mwaapostolo Paulo wakaamba kujatikizya moombe wangolida akucenjezya kuti: “Zintu eezyi zyakaba zikozyanyo kulindiswe, kutegwa . . . tutabi basikukomba mituni, mbubonya bamwi babo mbobakacita. [Zikozyanyo] zyakalembelwa kutucenjezya swebo notupona kumamanino aabweende bwazintu bwiindene-indene. Aboobo ooyo uuyeeya kuti wiimvwi kabotu acenjele kutegwa atawi.” (1Kor. 10:6, 7, 11, 12) Kweelana ambwaakaamba Paulo, nobaba bakombi bakasimpe balakonzya kujatikizyigwa muzilengwa zibyaabi. Aabo ibazundwa asunko balakonzya kuyeeya kuti bacijisi cilongwe cibotu a Jehova. Pele kuyanda kuba mulongwe wa Jehova naa kulitaminina kusyomeka kulinguwe tacaambi kuti umwi ulakkomaninwa a Jehova.—1Kor. 10:1-5.

18. Ino ncinzi cikonzya kutupa kuleya kuzwa kuli Jehova, alimwi ncinzi cikonzya kucitika?

¹⁸ Mbubwenya mbuli bana Israyeli mbobakalibilika ciindi Musa naakamuka kuseluka kuzwa a Cilundu ca Sinai, Banakristo mazuba aano balakonzya kulibilika kujatikizya kumuka kwabuzuba bwa Jehova bwalubeta alimwi akuboola kwanyika mpya. Kuzuzikizyigwa kwazisyomezyo eezyi inga kwalibonya mbuli kuti kucili kule naa kuti zisyomezyo eezyo tazikazuzikizyigwi. Kuti tiitwacenjela, kuyeeya kuli boobo kulakonzya kutupa kuti katubikka zintu zyakumubili mubusena bwakusaanguna muciindi cakucita kuyanda kwa Jehova. Mukuya kwaciindi, tulakonzya kuleya kuzwa kuli Jehova alimwi akutalika kucita zintu nzyotwatakali kuyeeya kuti inga twazicita ciindi notwakali bayumu kumuuya.

19. Ino nkaambo nzi kamasimpe nkotuteelede kuluba, alimwi nkaambo nzi?

¹⁹ Tatweelede kuluba kuti Jehova uyanda kuti katumumvwida amoyo wesu woonse alimwi akukomba buyo nguwe alikke. (Kul. 20:5) Kuleya kuli koonse kuzwa kubukombi bwa Jehova caamba kucita kuyanda kwa Saatani, alimwi kucita boobo kuletela buyo mapenzi. Aboobo Paulo ulatuyeezya kuti: “Tamukonzyi kunoonywida munkapu ya Jehova amunkapu yamadaimona; tamukonzyi kunoolida “atebulu lya Jehova” alimwi aatebulu lyamadaimona.”—1Kor. 10:21.

20. Nokuba kuti twalubizya, mbuti Jehova mbwakonzya kutugwasya?

²⁰ Zibalo zyamu Bbaibbele izijatikizya Kaini, Solomoni, alimwi abana Israyeli a Cilundu ca Sinai zilikozyenye. Bantu aaba bakalijisi coolwe ‘cakweempwa akusanduka.’ (Mil. 3:19) Cakutadooneka, Jehova ulabakkazikila moyo aabo ibalubizya. Mbuli Aroni, Jehova wakamulekelela. Mazuba aano, kucenjezya kuzwa kuli Jehova kulakonzya kuboola kwiinda mucibalo camu Bbaibbele, mumabbuku aamba zyamu Bbaibbele, naa kwiinda mululayo kuzwa ku Munakristoma. Ikuti twalutobela lulayo, Jehova uyootufwida luse.

21. Ncinzi ncotweelede kucita ciindi kusyomeka kwesu kuli Jehova nokwasunkwa?

²¹ Luzyalo lwa Jehova lulijisi mulimo. (2Kor. 6:1) Lutupa coolwe ‘cakukaka bukkale bwakutayoowa Leza azisusi zyanyika.’ (Amubale Tito 2:11-14.) Kufwumbwa buyo kuti katucipona “mubweende bwazintu obuno,” tuyoolijana mubukkale ibuyoosunka bukombi bwesu kuli Jehova. Atube bantu balibambilide lyoonse kuzumanana kuba kulubazu lwa Jehova, nkaambo ‘tweelede kuyoowa Jehova Leza wesu, kumubelekela, akukakatila kulinguwe’!—Dt. 10:20.