1. Nkaambo nzi ncotuyandika kulibambila kujatikizya kupenzyegwa?

MUBUSIKU katanajaigwa Mwami wesu Jesu, wakaamba kuti boonse aabo ibasala kuba basikwiiya bakwe bayoosulaikwa. (Joh. 17:14) Kusikila lino, Banakristo basyomeka balapenzyegwa abaabo ibakazya bukombi bwakasimpe. (2Tim. 3:12) Mbwaayabuswena mamanino aabweende bwazintu obuno, tulangila kuyoopenzyegwa kapati abasinkondoma.—Mt. 24:9.

2-3. (a) Ncinzi ncotweelede kuzyiba kujatikizya kuyoowa? (b) Ino tulaiya nzi mucibalo eeci?

² Ncinzi ncotweelede kucita lino kutegwa tukacikonzye kuliyumya kukupenzyegwa? Tatweelede kweezeezya kujatikizya zintu zyoonse izikonzya kutucitikila. Ikuti naa twacita oobo, tulakonzya kuyoowa kapati cakuti inga twacileka kubelekela Jehova katutanasikilwa penzi lili lyoonse. (Tus. 12:25; 17:22) Kuyoowa ncibelesyo cilaanguzu kapati ‘sinkondoma, Diabolosi,’ ncasola kubelesya kulindiswe. (1Pet. 5:8, 9) Ncinzi ncotukonzya kucita lino kutegwa tulibambile?

³ Mucibalo eeci, tulaiya kujatikizya mbotukonzya kuyumya cilongwe cesu a Jehova alimwi akaambo ncociyandika kapati kucita boobo lino. Kuyungizya waawo, tulabandika kujatikizya ncotweelede kucita kutegwa tube basicamba kapati. Mpoonya camamanino, tulanga-langa ncotweelede kucita ciindi bantu nobatusulaika.

4. Kweelana alugwalo lwa Bahebrayo 13:5, 6, ncinzi ncotweelede kusyoma alimwi nkaambo nzi?

⁴ Amusyome kuti Jehova ulamuyanda alimwi takamulekelezyi pe. (Amubale Bahebrayo 13:5, 6.) Kaindi, Ngazi Yamulindizi imwi yakati: “Imuntu uumuzyi kabotu Leza, ngonguwe uuyoomusyoma kapati ciindi camasunko.” Eelo kaka nkamasimpe kaambo aaka! Kutegwa tuliyumye ciindi notupenzyegwa, tweelede kumuyanda  Jehova akumusyoma cakumaninina alimwi tatweelede kudooneka kuti ulatuyanda.—Mt. 22:36-38; Jak. 5:11.

5. Ncinzi ciyoomugwasya kuzyiba kuti Jehova ulamuyanda?

⁵ Amubale Bbaibbele abuzuba kamujisi makanze aakuyumya cilongwe canu a Jehova. (Jak. 4:8) Ciindi nomubala, amubikkile maano kubube bubotu mbwajisi Jehova. Amusoleke kuzyiba mbwamuyanda ciindi nomubala kujatikizya zintu nzyaamba alimwi akucita. (Kul. 34:6) Bamwi cilakonzya kubakatazya kusyoma kuti Leza ulabayanda akaambo kakuti kunyina nobakatondezyedwe kale luyando. Kuti naa mbomulimvwa oobo, abuzuba amusole kulemba nzila mwalo Jehova mwatondezya luse alimwi aluzyalo kulindinywe. (Int. 78:38, 39; Rom. 8:32) Ciindi nomulanga-langa izyakamucitikila alimwi akuzinzibala kuyeeya nzyomubala mu Jwi lya Leza, muyoocikonzya kulemba zintu zinji nzyaakamucitila Jehova. Ikuti kamutondezya kulumba kuzintu nzyamucitila Jehova, cilongwe canu anguwe cilayuma kapati.—Int. 116:1, 2.

6. Kweelana alugwalo lwa Intembauzyo 94:17-19, ino mupailo uuzwa ansi aamoyo inga wamugwasya buti?

⁶ Amupaile lyoonse. Amweezeezye kuti bausyi bamukumbata caluyando mwanaabo musankwa. Mwana walimvwa kukwabililwa cakuti waanguluka kubaambila bausyi zintu zibotu alimwi azibi izyamucitikila buzuba oobo. Andinywe mulakonzya kuba acilongwe cili boobu ikuti mwayumya cilongwe canu a Jehova kwiinda mukupaila abuzuba kuzwa ansi aamoyo. (Amubale Intembauzyo 94:17-19.) Ciindi nomupaila, ‘zyoonse zili mumoyo wanu amuzitile kuli Jehova mbubonya mbuli maanzi’ alimwi amumwaambile Uso siluyando zintu zyoonse izimupa kuyoowa alimwi akulibilika. (Malo. 2:19) Ino ncinzi ciyoocitika ikuti naa mwacita oobo? Muyooba aceeco Bbaibbele ncolyaamba kuti “luumuno lwa Leza oolo lwiinda maano oonse.” (Flp. 4:6, 7) Kwiinda mukupaila munzila eeyi, muyoolimvwa kuti cilongwe canu a Jehova cayuma kapati.—Rom. 8:38, 39.

7. Nkaambo nzi ncomweelede kusyoma kuti zisyomezyo nzyaakasyomezya Leza kujatikizya Bwami bwakwe ziyoozuzikizyigwa ncobeni?

⁷ Amusyome kuti zilongezyo zya Bwami bwa Leza ziyoozuzikizyigwa ncobeni. (My. 23:19) Ikuti kamudooneka kuti zisyomezyo zya Leza ziyoozuzikizyigwa, ciyooba cuubauba kuli Saatani alimwi abaabo mbeendelezya kumukonga. (Tus. 24:10; Heb. 2:15) Mbuti mbomukonzya kuyumya lusyomo lwanu kujatikizya Bwami bwa Leza lino? Amube abubambe bwakwiiya zisyomezyo zya Leza izijatikizya Bwami bwakwe alimwi atwaambo ncomukonzya kuba masimpe kuti ziyoozuzikizyigwa ncobeni. Ino eeci ciyoomugwasya buti? Amubone cikozyanyo caba Stanley Jones, aabo ibakaangwa muntolongo kwamyaka iili ciloba akaambo kalusyomo lwabo. * Ncinzi cakabagwasya kutegwa baliyumye cakusyomeka? Bakaamba kuti: “Lusyomo lwangu lwakali luyumu akaambo kakuti ndakalibuzyi  Bwami bwa Leza, ncobwakali kuyoozuzikizya alimwi kunyina nondakali kubudooneka. Aboobo kunyina iwakali kukonzya kundipa kuti ndimusiye Jehova.” Ikuti kamujisi lusyomo luyumu muzisyomezyo zya Leza, muyooba acilongwe ciyumu a Jehova alimwi tamukalekeli kuyoowa kuti kumulesye kumubelekela.—Tus. 3:25, 26.

8. Ncinzi ncotukonzya kwiiya ciindi notulanga-langa mbotwiibona miswaangano lino? Amupandulule.

⁸ Amujanike kumiswaangano ya Bunakristo lyoonse. Miswaangano ilatugwasya kuba acilongwe ciyumu a Jehova. Kujanika kumiswaangano kutondezya mbotuyoocikonzya kuliyumya kumapenzi aaboola kumbele. (Heb. 10:24, 25) Nkaambo nzi ncotwaambila boobo? Mazuba aano, tulakonzya kulekela tuntu tusyoonto-syoonto kutupa kwaalilwa kujanika kumiswaangano. Ino ncinzi ciyoocitika kumbele ciindi notuyooyandika kubikka buumi bwesu muntenda kutegwa katuswaangana antoomwe abasyomima? Kulubazu lumwi, ikuti naa katujisi makanze aakujanika kumiswaangano lino, tatukaleki ciindi basikukazya baakusola kutulesya kubungana antoomwe. Ecino nceciindi ncotweelede kwiiyandisisya kapati miswaangano yesu. Ikuti naa katuyandisya kujanika kumiswaangano, kunyina basikukazya bali boonse, nouba mulawo wamfwulumende uukasya miswaangano yesu, uyootupa kumvwida bantu muciindi cakumvwida Leza.—Mil. 5:29.

9. Nkaambo nzi kupeta magwalo ncoili nzila mbotu yakulibambila kupenzyegwa?

⁹ Amwaapete magwalo ngomuyandisya. (Mt. 13:52) Ambweni mulafwambaana kuluba, pele Jehova ulakonzya kubelesya muuya wakwe uusalala alimwi uulaanguzu kumuyeezya magwalo aayo ngomwakabala. (Joh. 14:26) Mucikozyanyo, mukwesu umwi wakabikkidwe alikke muntolongo ku East Germany. Mukwesu ooyu wakaamba kuti: “Eelo kaka ndakalikkomene kapati akaambo kakuti aciindi eeco ndakalipetede magwalo manji! Nokuba kuti ndakali ndelikke, ndakajisi bubi kuzinzibala kuyeeya zibalo zinji zyamu Bbaibbele.” Aboobo magwalo aayo akamugwasya mukwesu ooyu kuzumanana kuba acilongwe ciyumu a Jehova alimwi akuliyumya cakusyomeka.

10. Nkaambo nzi ncotweelede kupeta nyimbo?

¹⁰ Amuzipete alimwi akuziimba nyimbo izitembaula Jehova. Ciindi Paulo a Sila nobakali muntolongo ku Filipi, bakaimba nyimbo zyakutembaula Jehova eezyo nzyobakapetede. (Mil. 16:25) Mbubwenya buyo, ciindi bakwesu mucisi icakali kwiitwa kuti Soviet Union nobakatandilwa ku Siberia, mbuti mbobakaliyumya? Mucizyi wazina lyakuti Mariya Fedun wakaamba kuti: “Twakali kuziimba nyimbo zyoonse nzyotwakazyi  mubbuku lyanyimbo.” Mucizyi ooyu wakaamba kuti nyimbo eezyo zyakabakulwaizya boonse alimwi akuyumya cilongwe cabo a Jehova. Sena andinywe mulayumizyigwa ciindi nomwiimba nyimbo nzyomuyandisya kapati? Aboobo amuzipete nyimbo eezyo lino!—Amubone kabbokesi kakuti “ Kondipa Busicamba.”

11-12. (a) Kweelana alugwalo lwa 1 Samuele 17:37, 45-47, ncinzi cakagwasya Davida kuba sicamba? (b) Ino cikozyanyo ca Davida cituyiisya ciiyo nzi ciyandika kapati?

¹¹ Muyandika busicamba kutegwa muliyumye ciindi nomupenzyegwa. Aboobo ikuti naa mulimvwa kuti tamubujisi bube oobu, ino ncinzi ncomukonzya kucita? Amuyeeye kuti busicamba bwini-bwini tabuyeeme aciimo ncomujisi, nguzu naa luzyibo. Amubone cikozyanyo camulombe Davida ciindi naakali kuyanda kulwana Goliati. Goliati wakali mubbabbani, pele Davida wakali muniini kapati, tanaakajisi nguzu zinji alimwi tanaakajisi zilwanyo ziyandika. Davida tanaakajisi noliba panga. Nokuba boobo, wakali sicamba kapati. Cabusicamba, wakabalika kuyoolwana mubbabbani ooyo iwakali kulisumpula.

¹² Nkaambo nzi Davida ncaakali sicamba boobu? Akaambo kakuti wakali alusyomo luyumu lwakuti Jehova wakali anguwe. (Amubale 1 Samuele 17:37, 45-47.) Davida tanaakabikkila maano kujatikizya mbwaakali mupati Goliati kulinguwe. Muciindi caboobo, wakabikkila maano kujatikizya mbwaakali muniini kapati Goliati kuli Jehova. Ncinzi ncotwiiya kucibalo eeci? Tuyooba basicamba ikuti katujisi lusyomo luyumu lwakuti Jehova ulaandiswe alimwi akuti katusinizyide kuti basikutukazya mbaniini kapati kuli Leza Singuzuzyoonse. (2Mak. 20:15; Int. 16:8) Mbuti mbotukonzya kuba basicamba lino, kaatanasika mapenzi?

13. Mbuti mbotukonzya kuba basicamba kapati? Amupandulule.

¹³ Tulakonzya kuba basicamba kapati lino kwiinda mukukambaukila bamwi makani mabotu aa Bwami bwa Leza. Nkaambo nzi ncocili boobu? Nkaambo kakuti kukambauka kutuyiisya kusyoma Jehova alimwi akutayoowa bantu. (Tus. 29:25) Mbubwenya milambi mboikonzya kuyuma ciindi notunyanyaasya mubili, bukambausi bwakuŋanda aŋanda, mumasena aakubuleya, mukwiizya alimwi amumasena mucitilwa makwebo butupa kuba basicamba kapati. Ikuti katujisi busicamba bwakukambauka lino, tunoolibambilide kuzumanana kukambauka nokuba kuti mfwulumende yaulesya mulimo wesu.—1Tes. 2:1, 2.

14-15. Ino twiiya nzi kucikozyanyo caba Nancy Yuen alimwi aba Valentina Garnovskaya?

 ¹⁴ Cikozyanyo cabacizyi basyomeka bobilo ibakali basicamba kapati cilakonzya kutuyiisya zintu zinji. Nokuba kuti ba Nancy Yuen bakali kulampa buyo mamita aasika ku 1.5, bakali basicamba kapati. * Bakakaka kuleka kukambauka makani mabotu aa Bwami bwa Leza. Aboobo bakaangwa kwamyaka iinda ku 20 ku China. Beendelezi ibakali kubabuzya-buzya bakaamba kuti ba Nancy Yuen “mbobakali kwiinda kuba aankazi” mucisi cabo.

¹⁵ Mbubwenya buyo, abalo ba Valentina Garnovskaya bakaangwa myaka iili 21, ziindi zyotatwe ziindene-indene mucisi icakali kwiitwa kuti Soviet Union. * Ino bakaangilwa nzi? Nkaambo kakuti bakakanzide kuzumanana kukambauka. Aboobo beendelezi bakabaamba kuti “bakali cigwebenga cisyupide.” Ncinzi cakapa kuti bamakaintu bobilo basyomeka aaba babe basicamba? Bakalisinizyide kuti Jehova wakali aambabo.

16. Ninzila nzi ilikke iikonzya kutupa kuba abusicamba bwini-bwini?

¹⁶ Kweelana ambotwaiya, kutegwa tube basicamba, tatweelede kusyoma nguzu zyesu alimwi aluzyibo ndotujisi. Muciindi caboobo, tweelede kuba alusyomo lwakuti Jehova ulaandiswe alimwi akuti nguutulwanina. (Dt. 1:29, 30; Zek. 4:6) Eeyi nenzila ilikke iikonzya kutupa kuba abusicamba bwini-bwini.

17-18. Kweelana alugwalo lwa Johane 15:18-21, ncinzi Jesu ncaakatucenjezya? Amupandulule.

¹⁷ Tulabotelwa ciindi bantu nobatulemeka, pele tatweelede kuyeeya kuti tunyina mpindu ikuti naa bantu kabatatuyandi. Jesu wakati: “Mulikkomene nywebo kufwumbwa leelyo bantu nobamusula, nobamutanda akati kabo, nobamusampaula akumwaamba kuti muli babi akaambo ka Mwanaamuntu.” (Lk. 6:22) Ncinzi Jesu ncaakali kupandulula?

¹⁸ Jesu tanaakali kwaamba kuti Banakristo bakali kuyookukkomanina kusulaikwa. Muciindi caboobo, wakali kutucenjezya kujatikizya icakali  kuyootucitikila. Swebo tatuli banyika. Tupona kweelana anjiisyo zya Jesu alimwi akukambauka mulumbe ngwaakali kukambauka. Akaambo kaceeci, nyika ilitusulide. (Amubale Johane 15:18-21.) Pele swebo tuyanda kukkomanisya Jehova. Aboobo ikuti naa bantu kabatusulaika akaambo kakuti tulamuyanda Taateesu, nciindi cabo.

19. Mbuti mbotukonzya kwiiya cikozyanyo cabaapostolo?

¹⁹ Tatweelede kulekela cintu cili coonse ncobakonzya kucita naa kwaamba bantu kutupa kufwa nsoni akaambo kakuti tuli Bakamboni ba Jehova. (Mik. 4:5) Tulakonzya kukuzunda kuyoowa bantu kwiinda mukulanga-langa ncobakacita baapostolo mu Jerusalemu ciindi naakafwa Jesu. Bakalizyi mbobakasulaikidwe kapati abasololi bacikombelo caba Juda. (Mil. 5:17, 18, 27, 28) Nokuba boobo, bakazumanana kuunka kutempele abuzuba alimwi bakali kulizyibya kubuleya kuti mbaasikwiiya ba Jesu. (Mil. 5:42) Kuyoowa tiikwakapa kuti bacileke kuunka kutempele. Mbubwenya buyo, andiswe tulakonzya kuzunda cilengwa cakuyoowa bantu kwiinda mukulizyibya lyoonse kubantu kuti tuli Bakamboni ba Jehova, nkokuti notuli kumulimo, kucikolo alimwi amucilawo motukkala.—Mil. 4:29; Rom. 1:16.

20. Nkaambo nzi baapostolo ncobakakkomene nokuba kuti bakalisulaikidwe?

²⁰ Ncinzi cakapa kuti baapostolo kabakkomene? Bakalikazyi kaambo ncobakali kusulaikilwa alimwi bakakkomana kuti bakali kweelela kusampaulwa akaambo kakucita kuyanda kwa Jehova. (Lk. 6:23; Mil. 5:41) Mwaapostolo Petro kumbele wakalemba kuti: “Nokuba kuti mulakonzya kupenga akaambo kabululami, mulakkomana.” (1Pet. 2:19-21; 3:14) Ciindi notumvwisya kuti tulasulaikwa akaambo kakucita ciluleme, tatukacileki kubelekela Jehova akaambo kakuti bantu balitusulide.

21-22. (a) Ino ncinzi ncomukanzide kucita kutegwa mulibambile kujatikizya kupenzyegwa? (b) Ncinzi ncotuyoobandika mucibalo citobela?

²¹ Tatuzyi ciindi bantu nobayootalika kutupenzya naa ciindi mfwulumende noziyakuulesya mulimo wesu. Nokuba boobo, tulizyi kuti tulakonzya kulibambila lino kwiinda mukuyumya cilongwe cesu a Jehova, kuba basicamba alimwi akubona ncotweelede kucita ciindi bantu nobatusulaika. Kuti twalibambila lino, ciyootugwasya kuzumanana kumubelekela Jehova kumbele.

²² Mbuti kuti mulimo wesu walesyegwa? Mucibalo citobela, tuyoobandika njiisyo iziyootugwasya kuzumanana kubelekela Jehova nokuba kuti mulimo wesu walesyegwa.