MU BBAIBBELE tulabala kujatikizya baalumi basyomeka ibakali “kulimvwa mbubonya mbotulimvwa aswebo.” (Jak. 5:17) Mucikozyanyo, tulakonzya kucimvwisya ncaakali kupandulula Paulo ciindi naakaamba majwi aali kulugwalo lwa Baroma 7:21-24 aakuti: “Ciindi nendiyanda kucita cibotu, icibi cilaandime. . . . Maawe ndemucaangu!” Ciindi notuyandika kulwana kutalondoka kwesu, cilakulwaizya kuzyiba kuti mwaalumi iwakali kusyomeka Paulo awalo wakali kulimvwa mbubwenya oobu.

Paulo wakaamba alimwi kujatikizya mbwaakali kulimvwa. Kulugwalo lwa Bagalatiya 2:20, wakaamba cakusinizya kuti Jesu ‘wakali kumuyanda alimwi wakalyaaba akaambo kanguwe,’ kumugama! Sena andinywe mbomulimvwa oobo? Ambweni zimwi ziindi mulalimvwa oobo.

Ikuti katulimvwa bubi akaambo kakulubizya nkotwakacita musyule, cilakonzya kutuyumina kusyoma kuti Jehova ulatuyanda alimwi akuti wakatulekelela. Kuyungizya waawo, cilakonzya kutuyumina kubona cinunuzyo ca Jesu kuti ncipego kulindiswe kutugama. Sena ncobeni Jesu uyanda kuti katucibona boobu cinunuzyo? Ikuti naa mbocibede oobo, ino ncinzi cikonzya kutugwasya kucita boobo? Atwiilange-lange mibuzyo eeyi yobilo.

Mubwini, Jesu uyanda kuti cinunuzyo katucibona kuti ncipego kulindiswe kutugama. Ino inga twasinizya buti oobo? Amweezeezye kujatikizya bukkale ibuli kulugwalo lwa Luka 23:39-43. Mwaalumi uli acisamu cakupenzyezya afwaafwi a Jesu. Wamwaambila Jesu kuti uluuside akaambo kacibi ncaakacita. Kweelede kuti mulandu ooyu mupati nkaambo cisubulo cili boobu cakali kupegwa buyo kuzigwebenga. Mwaalumi ooyu ulilibilikide kapati, aboobo walomba Jesu kuti: “Ukandiyeeye waakunjila mu Bwami bwako.”

Ino Jesu wakacita buti? Amweezeezye mbwamvwide kucisa Jesu ciindi nacebuka kulanga mwaalumi ooyu. Nokuba kuti Jesu umvwide kucisa kapati, wamweta-mweta alimwi akumuumbulizya mwaalumi ooyu kwiinda mukumwaambila kuti: “Ncobeni sunu ndikwaambila kuti, uyooba andime mu Paradaiso.” Kuti Jesu naakayanda naakambila mwaalumi ooyu kuti, ‘mwanaamuntu wakaboola . . . kupa buumi bwakwe kuti bube cinunuzyo cakununuzya banji.’ (Mt. 20:28) Sena mwabona kuti caluzyalo Jesu wakakankaizya kapati kujatikizya ncocaamba cinunuzyo cakwe kumwaalumi ooyu kumugama? Wakaamba cabulongwe ciindi naakabelesya bbala lyakuti “uyooba” alimwi alyakuti “andime.” Kuyungizya waawo, wakaambila mwaalumi ooyu kuti wakalijisi bulangizi bwakuyoopona muparadaiso anyika.

Cakutadooneka, Jesu wakali kuyanda kuti mwaalumi ooyu azyibe kuti cinunuzyo ncaakali afwaafwi kupa Jesu cakali kuyoomugwasya awalo. Ikuti naa Jesu wakalimvwa boobu kujatikizya cigwebenga calo icatakali kumubelekela Leza, ino mbuti kujatikizya Munakristo uubbapatizyidwe uumubelekela Leza? Aboobo ino ncinzi cikonzya kutupa kusinizya kuti cinunuzyo ca Kristo ciyootugwasya andiswe kutugama nokuba kuti twakalubizya musyule?

Akaambo kakuti Jesu wakapa Paulo mulimo wakukambauka, Paulo wakazyiba kuti Jesu wakamufwida. Munzila nzi? Paulo wakaamba kuti: “Ndilamulumba Kristo Jesu Mwami wesu, ooyo wakandipa nguzu, nkaambo wakandibona kuti ndilasyomeka kwiinda mukundipa mulimo wakucita, nokuba kuti musyule ndakali sikusampaula Leza asikupenzya bantu bakwe alimwi asikasampusampu.” (1Tim. 1:12-14) Mulimo ngwaakapegwa Paulo wakamupa kusinizya luzyalo, luyando alimwi alusyomo ndwaakajisi Jesu mulinguwe. Mbubwenya buyo, umwi aumwi wesu Jesu wakamupa mulimo wakukambauka makani mabotu. (Mt. 28:19, 20) Sena mulimo wesu wakukambauka ulatugwasya kuzyiba kuti andiswe Jesu wakatufwida?

Ba Albert, ibakagusyidwe mumbungano kwamyaka iitandila ku 34 bakaamba kuti: “Cilandaalila kuziluba zintu zibi nzyondakacita. Pele ciindi nondili mumulimo wakukambauka, ndilimvwa kuti, mbubwenya mbuli mwaapostolo Paulo, andime Jesu ngowakandipa mulimo ooyu. Kuyeeya kuli boobu kundipa kuba alukkomano lunji, kububona munzila yeelede buumi bwangu alimwi abulangizi bwangu bwakumbele.”—Int. 51:3.

Kabatanaiya kasimpe ba Allan, bakacita zintu zinji zibyaabi alimwi bakali basinkondo. Bakaamba kuti: “Ndiciziyeeya zintu zyoonse zibyaabi nzyondakali kubacitila bantu. Zimwi ziindi ndilatyompwa kapati. Pele ndilamulumba Jehova akaambo kakuzumizya sizibi mbuli ndime kukambaukila bamwi makani mabotu. Aboobo ciindi nondibona mbobaatambula makani mabotu bantu, cindiyeezya mbwali mubotu Jehova alimwi ambwali siluyando. Ndilimvwa kuti Jehova ulandibelesya kugwasya bamwi ibali mubukkale mbuli mbondakajisi andime.”

Mulimo wesu wakukambauka ulatugwasya kuyeeya alimwi akucita zintu zibotu. Utupa kusinizya luzyalo, luyando alimwi alusyomo ndwajisi Jesu mulindiswe.

Kusikila mane bweende bwazintu bubyaabi bukanyonyoonwe, myoyo yesu inootupa mulandu akaambo kazibi nzyotwakacita musyule. Ncinzi cikonzya kutugwasya kulwana kulimvwa boobu?

Ba Jean, balo kanji-kanji ibakatazyigwa amizeezo akaambo kakuti kabacili bana bakali kupona buumi bubyaabi kakuli bakali Banakristo bakaamba kuti: “Ndilakkomana kuzyiba kuti ‘Leza mupati kwiinda myoyo yesu.’” (1Joh. 3:19, 20) Mbubwenya mbuli ba Jean, andiswe tulakonzya kukkomana nkaambo tulizyi kuti Jehova alimwi a Jesu balizyi kuti tuli basizibi. Amuyeeye kuti, caluyando bakapa cinunuzyo, kutali kubantu balondokede, pele kuli basizibi ibeempwa.—1Tim. 1:15.

Tulasinizya kuti cinunuzyo cilatugwasya andiswe kutugama ciindi notuzinzibala kuyeeya nzila Jesu mbwabeendelezya bantu batalondokede alimwi aciindi notuubeleka kusikila mpotugolela mulimo ngotwakapegwa. Kwiinda mukucita boobu, mbubwenya mbuli Paulo, tulakonzya kwaamba kuti: Jesu “wakandiyanda akulyaaba akaambo kandime.”