1. Kweelana alugwalo lwa 3 Johane 3, 4, ncinzi citupa kukkomana?

AMWEEZEEZYE buyo mbwaakalimvwa mwaapostolo Johane ciindi naakamvwa kuti aabo mbaakagwasya kwiiya kasimpe bakali kuzumanana kubelekela Jehova cakusyomeka! Bakajana mapenzi manji, pele Johane wakabeleka canguzu ikuyumya lusyomo lwa Banakristo aaba basyomeka, balo mbaakali kubona kuti mbana bakwe bakumuuya. Mbubwenya buyo, andiswe tulakkomana ciindi bana besu bakulizyalila naa bakumuuya nobalyaaba kuli Jehova alimwi akuzumanana kumubelekela.—Amubale 3 Johane 3, 4.

2. Ino magwalo ngaakalemba Johane akajisi makanze nzi?

² Mu 98 C.E., kweelede kuti Johane wakali kukkala mu Efeso naa munsi-munsi amunzi ooyu. Ambweni wakaunka kumunzi ooyu ciindi naakazwa muntolongo kunsumbu ya Patmo. Aciindi eeco, muuya uusalala wa Jehova wakamusololela kulemba magwalo otatwe. Makanze aakulemba magwalo aaya akali aakukulwaizya Banakristo basyomeka kuti bazumanane kusyoma muli Jesu alimwi akuzumanana kweenda mukasimpe.

3. Mibuzyo nzi njotutiingule mucibalo eeci?

³ Johane ngowakali mwaapostolo wamamanino kupona anyika, aboobo wakalilibilikide kujatikizya bamayi bakubeja mbobakali kuyunga mbungano ya Bunakristo. * (1Joh. 2:18, 19, 26) Aboobo basiluleyo aaba bakali kulitaminina kuti balimuzyi Leza, pele tiibakali kwiitobela milawo yakwe. Lino atulange-lange lulayo lwakasololelwa amuuya ndwaakapa Johane. Mucibalo eeci tulaingula mibuzyo eeyi iitobela: Ino caamba nzi kweenda mukasimpe? Mbuyumuyumu nzi mbotujana? Alimwi ino  mbuti mbotukonzya kugwasyanya kutegwa tuzumanane kweenda mukasimpe?

4. Kweelana alugwalo lwa 1 Johane 2:3-6 a 2 Johane 4, 6, ino ncinzi cijatikizyidwe mukweenda mukasimpe?

⁴ Kutegwa tweende mukasimpe, tweelede kukazyiba kasimpe ikajanika mu Jwi lya Leza, Bbaibbele. Kuyungizya waawo, tweelede ‘kubamba milawo ya Jehova,’ nkokuti, ikwiitobela. (Amubale 1 Johane 2:3-6; 2 Johane 4, 6.) Jesu wakapa cikozyanyo cilondokede kujatikizya kumvwida Jehova. Aboobo nzila imwi iiyandika kapati mbotumumvwida Jehova, nkwiinda mukwiitobelesya mikondo ya Jesu.—Joh. 8:29; 1Pet. 2:21.

5. Ncinzi ncotweelede kusinizya?

⁵ Kutegwa tuzumanane kweenda mukasimpe, tweelede kusinizya kuti Jehova ngu Leza wakasimpe, akuti zyoonse nzyatwaambila kwiinda mu Jwi lyakwe Bbaibbele, nzyamasimpe. Alimwi tweelede kusinizya kuti Jesu ngo Mesiya iwakasyomezyegwa. Mazuba aano bantu banji baladooneka kuti Jesu wakananikwa kuba Mwami wa Bwami bwa Leza. Johane wakacenjezya kuti kwakali “basilweeno banji,” ibakali kukonzya kweena baabo ibatakalibambilide kwiiminina kasimpe kajatikizya Jehova alimwi a Jesu. (2Joh. 7-11) Johane wakalemba kuti: “Ino nguni mubeji kunze lyayooyo uukaka kuti Jesu ngu Kristo?” (1Joh. 2:22) Nzila ilikke iikonzya kutugwasya kweeleba kweenwa, nkwiiya Jwi lya Leza. Ikuti naa twacita oobo, ndendilyo notukonzya kumuzyiba Jehova alimwi a Jesu. (Joh. 17:3) Alimwi ndendilyo notukonzya kusinizya kuti tujisi kasimpe.

6. Mbuyumuyumu nzi mbobajana bakubusi Banakristo?

⁶ Banakristo boonse beelede kucenjela kutegwa bateenwi abusongo bwamunyika. (1Joh. 2:26) Kwaambisya bakubusi Banakristo beelede kukacenjelela kapati kakole aaka. Alexia, * mucizyi uujisi myaka iili 25 waku France wakaamba kuti: “Nondakacili kucikolo, ndakalikukatazyigwa amizeezo yamunyika, mbuli njiisyo yakusanduka alimwi abusongo bwamunyika. Zimwi ziindi, njiisyo eezyi zyakali kundikkomanisya. Pele ndakayeeya kuti inga tiicabota kwiile kusyoma buyo zintu zyoonse nzyobaamba bamayi bangu akutabikkila maano kujatikizya ncoliyiisya Bbaibbele.” Mucizyi ooyu wakabala bbuku lyakuti, Life—How Did It Get Here? By Evolution or by Creation? Mumvwiki buyo zisyoonto, wakacileka kudooneka. Wakayungizya kwaamba kuti: “Ndakasinizya kuti  Bbaibbele lijisi kasimpe. Alimwi ndakabona kuti kupona kweelena azyeelelo zyandilyo inga kwandipa lukkomano alimwi aluumuno.”

7. Ino ncinzi ncotweelede kukaka alimwi nkaambo nzi?

⁷ Banakristo boonse, bana alimwi abapati, beelede kukukaka kupona buumi bwakuupa-upa ameso. Johane cacigaminina wakaamba kuti tatukonzyi kweenda mukasimpe kumwi katupona buumi bwakutalilemeka. (1Joh. 1:6) Ikuti katuyanda kuti Jehova atukkomanine lino alimwi akumbele, lyoonse tweelede kuyeeya kuti Jehova ulazibona zintu zyoonse nzyotucita. Nokuba kuti bantu tabakonzyi kuzibona zintu nzyotucita cakusisikizya, pele kuli Jehova zintu zyoonse zili antangalala.—Heb. 4:13.

8. Ino ncinzi ncotweelede kukaka?

⁸ Tweelede kwiikaka nzila yabantu bamunyika iijatikizya mbobacibona cibi. Mwaapostolo Johane wakalemba kuti: “Ikuti naa twaamba kuti, ‘Tunyina cibi,’ twalyeena lwesu tobeni alimwi kasimpe takako pe mulindiswe.” (1Joh. 1:8) Kuciindi ncaakali kupona Johane, basiluleyo bakali kwaamba kuti muntu ulakonzya kabisya acaali pele aciindi nciconya kajisi cilongwe cibotu a Leza. Mazuba aano, tupona akati kabantu ibajisi mizeezo iili boobu. Ibanji balitaminina kusyoma Leza, pele cibi tabaciboni mbwacibona Jehova, ikapati ciindi nocijatikizya makani aakoonana. Bukkale Jehova mbwabona kuti ncibi balo babubona kuti ncintu ncakonzya kulisalila muntu, naa kuti ninzila buyo aimbi yabukkale.

9. Mbubotu nzi buliko ciindi bakubusi nobatobela ncolyaamba Bbaibbele?

⁹ Cilakonzya kubakatazya bakubusi Banakristo kwaalanga munzila yeelede makani akoonana ciindi babelesinyina naa basicikolonyina nobatacizumini ncolyaamba Bbaibbele kujatikizya makani aaya. Eeci ncecakacitikila Aleksandar. Wakaamba kuti: “Basimbi bamwi kucikolo bakasola kundisungilizya koonana ambabo. Bakali kwaamba kuti mbwaanga tandijisi musimbi, kweelede kuti ndoonana abantu mbotukozyenye limwi zizo.” Zintu zili boobu zilakonzya  kumucitikila. Pele kuti mwacita ncolyaamba Bbaibbele, muyookkomana, muyoolikwabilila kumalwazi, tamukakatazyigwi amanjezeezya alimwi muyoozumanana kuba acilongwe a Jehova. Alimwi lyoonse nomuzunda sunko, cinoomuubila kucita cintu ciluzi. Amuyeeye kuti, Saatani ngounyonganya bantu kuti kabaabona munzila iitaluzi makani aakoonana. Aboobo ciindi nomukaka kuyeeya mbuli bantu bamunyika, nkokuti “mwamuzunda ooyo imubi.”—1Joh. 2:14.

10. Mbuti lugwalo lwa 1 Johane 1:9 mbolutugwasya kubelekela Jehova katujisi manjezeezya aasalala?

¹⁰ Tulazumina kuti Jehova ngoweelede kutwaambila cintu ciluzi alimwi acitaluzi. Aboobo tulasolekesya kusikila mpotugolela kutacita cintu cibi. Pele kuti naa twabisya, tweelede kulyaambilila cibi cesu kuli Jehova mumupailo. (Amubale 1 Johane 1:9.) Pele kuti naa twacita cibi cipati, tweelede kulomba lugwasyo kubaalu balo Jehova mbaakasala kuti kabatulanganya. (Jak. 5:14-16) Aboobo tatweelede kuzumanana kulipa mulandu kujatikizya kulubizya nkotwakacita musyule. Nkaambo nzi? Akaambo kakuti Taateesu siluyando wakapa cipaizyo cacinunuzyo ca Mwanaakwe kutegwa zibi zyesu zilekelelwe. Ciindi Jehova naamba kuti ulabalekelela basizibi ibeempwa, ulabalekelela ncobeni. Aboobo kunyina cintu cili coonse icikonzya kutulesya kubelekela Jehova katujisi manjezeezya aasalala.—1Joh. 2:1, 2, 12; 3:19, 20.

11. Mbuti mbotukonzya kukwabilila mizeezo yesu kunjiisyo zikonzya kunyonganya lusyomo lwesu?

¹¹ Tweelede kuzikaka njiisyo zyabasiluleyo. Kuzwa kumatalikilo aambungano ya Bunakristo, Diabolosi wali kubelesya basiluleyo banji kusola kunyonganya lusyomo lwabantu ba Leza ibasyomeka. Aboobo tweelede kuzyiba kwaandaanya kasimpe alimwi abubeji. * Basinkondoma balakonzya kubelesya Intaneti naa  mawebbusaiti aakubandikila a Intaneti kusola kunyonganya lusyomo lwesu muli Jehova alimwi aluyando ndotujisi kubakwesu. Tatweelede kwaasyoma makani aaya aakubeja, nkaambo azwa kuli Saatani.—1Joh. 4:1, 6; Ciy. 12:9.

12. Nkaambo nzi ncotweelede kuyumya lusyomo lwesu mukasimpe nkotwakaiya?

¹² Kutegwa tutazundwi kukulwanwa a Saatani, tweelede kuyumya lusyomo lwesu muli Jesu alimwi alubazu ndwajisi mumakanze aa Leza. Kuyungizya waawo, tweelede kwiisyoma nzila ilikke njabelesya Jehova kusololela mbunga yakwe mazuba aano. (Mt. 24:45-47) Tulaluyumya lusyomo lwesu kwiinda mukwiiya Jwi lya Leza abuzuba. Kwiinda mukucita oobo, lusyomo lwesu luyooba mbuli cisamu cisimpide miyanda. Paulo wakaamba kaambo kakozyenye akaaka ciindi naakalembela mbungano yaku Kolose. Wakaamba kuti: “Mbubonya mbomwakamuzumina Kristo Jesu Mwami, amuzumanane kweenda kamukamantene anguwe, kamusimpide miyanda akuyakwa mulinguwe alimwi akukkalikila mulusyomo lwanu.” (Kol. 2:6, 7) Kunyina ncakonzya kucita Saatani naa aabo ibayungwa anguwe kutegwa banyonganye Munakristo iwakayumya kale lusyomo lwakwe.—2Joh. 8, 9.

13. Ncinzi ncotweelede kulangila, alimwi ino nkaambo nzi?

¹³ Tweelede kukulangila kusulaikwa anyika. (1Joh. 3:13) Johane utuyeezya kuti, “nyika yoonse ili mumaanza aamubi.” (1Joh. 5:19) Mbobuyaabuya kumamanino bweende bwazintu oobu, bukali bwa Saatani buyaabwiindila buya. (Ciy. 12:12) Kutegwa abayunge bantu Saatani ubelesya nzila nzyotutakonzyi kuzyiba, mbuli koongelezya kujatikizya kutalilemeka mumakani aakoonana naa bubeji bwabasiluleyo. Kunze lyazeezyi, Saatani ulatulwana cacigaminina kwiinda mukutupenzya calunya. Ulizyi kuti ujisi buyo ciindi cisyoonto cakusola kulesya mulimo wesu wakukambauka alimwi akunyonganya lusyomo lwesu. Aboobo tacitugambyi kuti milimo yesu imwi naa yoonse ilikasyidwe muzisi zimwi. Nokuba boobo, bakwesu alimwi abacizyi ibali muzisi eezyi bazumanana kuliyumya. Kwiinda mukucita boobo, batondezya kuti tacikwe makani amasunko ngakonzya kutuletela Saatani, tulakonzya kuzumanana kusyomeka!

14. Muunzila nzi motukonzya kugwasya bakwesu abacizyi kutegwa bazumanane kweenda mukasimpe?

¹⁴ Kutegwa tubagwasye bakwesu abacizyi kuzumanana kweenda mukasimpe, tweelede kutondezya luzyalo. (1Joh. 3:10, 11, 16-18) Tweelede kuyandana umwi amweenzinyina kutali buyo ciindi zintu nozili kabotu, pele aciindi nokwaba mapenzi. Mucikozyanyo, sena kuli muntu umwi ngomuzyi iwakafwidwa muyandwa alimwi uuyandika luumbulizyo naa kugwasyigwa buya cacigaminina? Sena mwakamvwa kuti kuli basyomima ibakasweekelwa zintu akaambo kantenda izilicitikila alimwi akuti bayandika kugwasyigwa kuyakulula Maanda aabo aa Bwami naa maanda aakukkala? Tulatondezya luyando lupati alimwi aluzyalo kubakwesu abacizyi kutali buyo mumajwi, pele ikapati kwiinda muzintu nzyotucita.

15. Kweelana alugwalo lwa 1 Johane 4:7, 8, ino ncinzi ncotweelede kucita?

¹⁵ Tulamwiiya Taateesu wakujulu siluyando ciindi notutondezya luyando kuli umwi amweenzinyina. (Amubale 1 Johane 4:7, 8.) Nzila iiyandika kapati mbotutondezya luyando nkwiinda mukulekelelana. Mucikozyanyo, muntu umwi ulakonzya kutunyemya mpoonya walilekelela. Tulatondezya luyando kwiinda mukumulekelela alimwi akuziluba zintu nzyaakatulubizyila. (Kol. 3:13) Mukwesu wazina lya Aldo wakalijana musunko eeli ciindi naakamvwa mukwesu  umwi ngwaakali kulemeka kaamba zintu zibyaabi kujatikizya musyobo wakwe. Mukwesu Aldo wakaamba kuti, “Ndakazumanana kupaila kuli Jehova kuti andigwasye kutaba amizeezo mibi kujatikizya mukwesu ooyo.” Pele kuli cintu cimwi mukwesu Aldo ncaakacita. Wakalomba mukwesu ooyo kuti babeleke limwi mumulimo wamumuunda. Ciindi nobakali kubeleka, mukwesu Aldo wakamwaambila mukwesu ooyo kujatikizya mbwaakamucisa makani ngaakaamba. Mukwesu Aldo wakayungizya kuti, “mukwesu ooyo naakamvwa mbondakalimvwide kujatikizya zintu zibi nzyaakaamba, wakalilekelela. Kweelana ambolyakali kulimvwisya jwi naakali kwaambaula, ndakazyiba mbwaakauside kujatikizya zintu nzyaakaamba. Kuzwa aciindi eeco, twakatalika kumvwana alimwi.”

16-17. Ino makanze nzi ngotweelede kuba angawo?

¹⁶ Mwaapostolo Johane wakali kubayanda kapati basyominyina alimwi wakali kuyanda kuti babe alusyomo luyumu. Luyando ndwaakajisi kulimbabo alimwi ambwaakali kubabikkila maano zilalibonya kabotu-kabotu mululayo ndwaakabapa mumagwalo aakwe otatwe. Eelo kaka cilakulwaizya kuzyiba kuti aabo ibayoolela antoomwe a Jesu kujulu, abalo balijisi luyando alimwi balabikkila maano mbubonya mbwaakali kucita Johane!—1Joh. 2:27.

¹⁷ Aabe makanze eesu ikulutobela lulayo ndotwabandika. Atuzumanane kweenda mukasimpe, nkokuti kumumvwida Jehova mumbazu zyoonse zyabuumi bwesu. Amuliiye Jwi lyakwe alimwi akulisyoma. Amube alusyomo luyumu muli Jesu. Amubukake busongo bwabantu alimwi anjiisyo zyabasiluleyo. Amukweelebe kupona buumi bwakuupaupa ameso alimwi akucita zintu zibyaabi. Amupone kweelana azyeelelo zya Jehova zyakulilemeka izisumpukide. Alimwi atubagwasye bakwesu kuzumanana kuyuma kwiinda mukubalekelela aabo ibatunyemya alimwi akugwasya baabo ibabulide. Ikuti twacita oobo, nokuba kuti twajana buyumuyumu, tuyoozumanana kweenda mukasimpe.