Bumboni butondezya kuti Jesu wakaba Mupaizi Mupati ciindi naakabbapatizyigwa mu 29 C.E. Ino tuzyi buti oobo? Ciindi Jesu naakabbapatizyigwa, wakatondezya kuti wakalilisungwide kupa buumi bwakwe aacipaililo cacikozyanyo iciiminina “kuyanda” kwa Leza. (Gal. 1:4; Heb. 10:5-10) Mbwaanga cipaililo cacikozyanyo eeco caliko kuzwa ciindi Jesu naakabbapatizyigwa kuyakumbele, tempele lipati lyakumuuya, iliiminina bubambe bwa Jehova bwabukombi busalala ibuyeeme acituuzyo cacinunuzyo, lyeelede kuti alyalo lyakatalika aciindi eeco. Cipaililo ncibeela ciyandika kapati catempele lyakumuuya.—Mt. 3:16, 17; Heb. 5:4-6.

Mbwaanga tempele lipati lyakumuuya lyakatalisyigwa, mupaizi mupati wakali kuyandika kutegwa kabelekela mumo. Aboobo Jehova wakamunanika Jesu “amuuya uusalala anguzu” kutegwa abe mupaizi mupati. (Mil. 10:37, 38; Mk. 1:9-11) Pele ino mbuti mbotukonzya kuba masimpe kuti Jesu wakabikkwa kuba Mupaizi Mupati katanafwa alimwi akubusyigwa? Tulajana kaambo kalimvwisya ciindi notulanga-langa cikozyanyo ca Aroni abaabo ibakamutobela kubeleka kabali bapaizi bapati mu Mulawo wa Musa.

Kweelana a Mulawo, alikke mupaizi mupati nguwakali kunjila mu Busena Busalalisya bwatente lyakubunganina, mpoonya kumbele wakali kunjila mu Busena Busalalisya bwatempele. Mulembo wakusitilizya nguwakali kwaandaanya Busena Busalalisya oobu alimwi a Busena Busalala. Mupaizi Mupati wakali kwiinda mumulembo wakusitilizya mubuzuba bomwe buyo, nkokuti mu Buzuba Bwakumanya Milandu. (Heb. 9:1-3, 6, 7) Mbubwenya Aroni abaabo ibakamutobela kubeleka kabali bapaizi bapati mbobakananikwa kabatananjila ‘akwiinda mumulembo wakusitilizya [wini-wini]’ watente lyakubunganina, awalo Jesu weelede kuti wakabikkwa kuba Mupaizi Mupati watempele lipati lyakumuuya katanafwa, kuzwa waawo wakanjila ‘akwiinda mumulembo wakusitilizya, nkokuti mubili wakwe’ kubuumi bwakujulu. (Heb. 10:20) Akaambo kaceeci, mwaapostolo Paulo wakaamba kuti Jesu wakaboola “kali mupaizi mupati,” mpoonya “wakainda mutente lipati alimwi lilondokede kwiinda leelyo lyakayakwa amaanza aabantu,” alimwi wakanjila “kujulu kwini buya.”—Heb. 9:11, 24.

Aboobo kunyina kwiindana kuliko kujatikizya ciindi cizuminano cipya nocakasinizyigwa alimwi aciindi nocakatalisyigwa. Nkaambo nzi ncotwaambila boobo? Nkaambo kakuti ciindi Jesu naakaunka kujulu akupa mpindu yacituuzyo cacinunuzyo akaambo kandiswe, wakabweza ntaamu zyotatwe zyakapa kuti cizuminano cipya cisinizyigwe. Alimwi ntaamu nzyomunya eezyi zyakatalisya cizuminano. Ino nintaamu nzi eezyo?

Yakusaanguna, Jesu wakasika kumbele lya Jehova; yabili, Jesu wakapa mpindu yacituuzyo cacinunuzyo kuli Jehova; mpoonya yatatu, Jehova wakaizumina mpindu yabulowa bwa Jesu ibwakatika. Ciindi ntaamu eezyi zyotatwe nozyakazuzikizyigwa, ndendilyo cizuminano cipya nocakatalika kubeleka.

Bbaibbele talitwaambili cacigaminina ciindi Jehova naakaizumina mpindu yacituuzyo cacinunuzyo ca Jesu. Aboobo tatukonzyi kwaamba cacigaminina ciindi cizuminano cipya nocakasinizyigwa akutalika kubeleka. Nokuba boobo, tulizyi kuti Jesu wakaunka kujulu kakusyeede buyo mazuba aali kkumi kuti busike buzuba bwa Pentekoste. (Mil. 1:3) Aciindi cimwi mumazuba masyoonto aayo, Jesu wakapa mpindu yacituuzyo cacinunuzyo cakwe kuli Jehova, ooyo iwakacizumina. (Heb. 9:12) Bumboni ibujatikizya kaambo aaka bulalibonya caantangalala kweelana aceeco cakacitika mubuzuba bwa Pentekoste. (Mil. 2:1-4, 32, 33) Kweelede kuti aciindi eeco cizuminano cipya cakalitalisyidwe kale alimwi cakali kubeleka.

Mubufwaafwi, cizuminano cipya cakasinizyigwa alimwi akutalisyigwa ciindi Jehova naakazumina mpindu yabulowa bwa Jesu ibwakatika. Aboobo cizuminano icijisi Simwiimaakati Mupaizi Mupati, Jesu, cakatalika kubeleka.—Heb. 7:25; 8:1-3, 6; 9:13-15.