1. Ino muuya wakuzundana inga wabajatikizya buti bantu?

MUNYIKA mazubaano bantu banji balakulwaizyigwa amuuya wakuzundana. Simakwebo umwi ulakonzya kubelesya bumpelenge kutegwa azwidilile kwiinda basimakwebonyina. Sikubalika mumuzundano, ulakonzya kucisa mweenzinyina acaali kutegwa azunde. Sicikolo ulakonzya kubeja mumusunko kutegwa atambulwe kuyunivesiti iili aampuwo. Mbotuli Banakristo, tulizyi kuti micito iili boobu tailuzi pe; ili akati ‘kamilimo yanyama.’ (Gal. 5:19-21) Nokuba boobo, sena babelesi ba Jehova bamwi balakonzya kubusya mizundano mumbungano kakunyina kuzyiba? Mubuzyo ooyu ulayandika kapati akaambo kuti muuya wakuzundana ulakonzya kunyonganya luumuno lwabunyina bwesu.

2. Ino tulabandika nzi mucibalo eeci?

² Mucibalo eeci, tulabandika bube ibutali kabotu ibukonzya kutupa kubusya mizundano abakwesu. Alimwi tulalanga-langa zikozyanyo zyamu Bbaibbele zyabaalumi abamakaintu basyomeka ibakatantamuka muuya wakuzundana. Cakusaanguna, atulange-lange mbotukonzya kulingula makanze eesu.

3. Mibuzyo nzi njotweelede kulibuzya?

³ Ciindi aciindi, cili kabotu kwaalingula makanze eesu. Tulakonzya kucita oobo kwiinda mukulibuzya kuti: ‘Sena ndilibona kuti ndili muntu, lilikke buyo nondilyeezyanisya abamwi? Sena ndilabeleka canguzu mumbungano kutegwa ndibainde boonse naa kutegwa ndimwiinde mukwesu umwi naa mucizyi?  Naa sena ndilabeleka canguzu akaambo kakuti ndiyanda kukkomanisya Jehova?’ Nkaambo nzi ncotweelede kulibuzya mibuzyo eeyi? Amubone ncolyaamba Jwi lya Leza.

4. Kweelana alugwalo lwa Bagalatiya 6:3, 4, nkaambo nzi ncotuteelede kulyeezyanisya abamwi?

⁴ Bbaibbele litwaambila kuti tatweelede kulyeezyanisya abamwi. (Amubale Bagalatiya 6:3, 4.) Nkaambo nzi? Kaambo kamwi nkakuti, ikuti katuyeeya kuti tulabainda bamwi tulakonzya kutalika kulisumpula. Kulubazu lumwi, ikuti katuciindizya kulimvwa kuti bamwi balatwiinda tulakonzya kutyompwa. Kuyeeya kuli boobo koonse, takuluzi pe. (Rom. 12:3) Mucizyi Katerina, * uukkala ku Greece wakaamba kuti: “Ndakali kulyeezyanisya abamwi mbondakali kubona kuti mbabotu ciwa, ibakali kucita kabotu mumulimo wamumuunda alimwi ibakacizyi kajana balongwe. Akaambo kaceeci, ndakali kulimvwa kubula mpindu.” Ncotweelede kuyeeya ncakuti, Jehova wakatukwela kulinguwe ikutali akaambo kakuti tuli babotu ciwa, tulicizyi kwaambaula kabotu, naa kuti bantu banji balatukkomanina, pele wakatukwela akaambo kakuti tulamuyanda alimwi akuswiilila Mwanaakwe.—Joh. 6:44; 1Kor. 1:26-31.

5. Ncinzi ncotwiiya kucakuluula camukwesu Hyun?

⁵ Mubuzyo uumbi ngotukonzya kulibuzya ngwakuti, ‘Sena ndizyibidwe kuba siluumuno naa kanji-kanji inga ndilazwangana abamwi?’ Amubone cakuluula camukwesu Hyun, uukkala ku South Korea. Aciindi cimwi, kali kale mwaalu, wakali kubona bamwi ibajisi mikuli kuti mbaasinkondonyina. Wakaamba kuti, “Tiindakali kubayanda bakwesu aaba, alimwi kanji-kanji tiindakali kuzizumina zintu nzyobakali kwaamba.” Ino ncinzi cakacitika? Wakayungizya kuti, “Mbondakali kuzibona zintu kwakapa kuti kutabi lukamantano mumbungano.” Balongwe baba Hyun bamwi bakabagwasya ikubona penzi ndyobakajisi. Mpoonya ba Hyun bakacinca, alimwi mazuba aano balabeleka kabali baalu ibali kabotu. Ikuti naa twabona kuti twatalika kuba acilengwa cakubusya mizundano muciindi cakukulwaizya luumuno, tweelede kubweza ntaamu cakufwambaana.

6. Kweelana alugwalo lwa Bagalatiya 5:26, mbube nzi ibutali kabotu ibukonzya kutupa kubusya mizundano?

⁶ Amubale Bagalatiya 5:26. Mbube nzi ibutali kabotu ibukonzya kusololela kukubusya mizundano? Nkulisumpula. Muntu uulisumpula ulibikkila buyo maano lwakwe mwini. Bube bumbi bubyaabi, munyono. Muntu uuli amunyono tayandi buyo cintu ncajisi muntu umwi, pele alimwi tayandi kuti muntu ooyo kacijisi cintu eeco. Aboobo muntu uunyonokela muntu umwi mubwini tamuyandi muntu ooyo. Cakutadooneka, tuyanda kubutantamuka bube oobu bubyaabi ibuli mbuli bulwazi buyambukila!

7. Ncikozyanyo nzi citondezya kuti kulisumpula alimwi amunyono nzibyaabi?

⁷ Kulisumpula amunyono inga zyakozyanisyigwa kudooti likonzya kunjila mumungwimba wamundeke. Ndeke ilakonzya kunyamuka pele dooti lilakonzya kusinka tupaipi mwiinda mungwimba akupa kuti ndeke iwe akaambo kakubula nguzu. Mbubwenya buyo, muntu umwi ulakonzya kumubelekela Jehova kwaciindi cili mbocibede. Pele kuti naa watalika kulisumpula alimwi akuba amunyono, ulakonzya kuwa. (Tus. 16:18) Muntu ooyo ulakonzya kucileka kubelekela Jehova, akuliletela mapenzi lwakwe mwini abamwi. Aboobo, mbuti mbotukonzya kutantamuka muuya wakulisumpula alimwi amunyono?

8. Mbuti mbotukonzya kulwana muuya wakulisumpula?

 ⁸ Tulakonzya kulwana muuya wakulisumpula kwiinda mukuyeeya majwi amwaapostolo Paulo ngaakalembela Bafilipi aakuti: “Mutaciti cintu cili coonse amuuya wakuzwangana naa cakulisumpula, pele amucite zintu zyoonse cakulicesya akubona bamwi kuti balamwiinda.” (Flp. 2:3) Kuti katubona bamwi kuti balatwiinda tatukazundani abaabo ibajisi zipego alimwi aluzyibo lwakucita zintu kwiinda ndiswe. Muciindi caboobo, tunookkomana akaambo kamilimo njobacita. Kwaambisya ikuti luzyibo oolo balubelesya mumulimo wa Jehova kutegwa bamutembaule. Alimwi kuti bakwesu abacizyi aabo ibajisi zipego kabalutobela lulayo lwa Paulo, bayoobikkila maano kubube bubotu mbotujisi. Akaambo kaceeci, toonse tuyookulwaizya luumuno alimwi alukamantano mumbungano.

9. Mbuti mbotukonzya kucileka kuba amunyono?

⁹ Tulakonzya kuleka kuba amunyono kwiinda mukuba abube bwakulicesya, nkokuti kuzyiba kuti kuli mbazu motulezya. Kuti katulicesya, tatukasoli kulitondezya kuti tulabainda bamwi. Muciindi caboobo, tuyoosoleka kwiiya kuli baabo ibajisi luzyibo kwiinda ndiswe. Mucikozyanyo, mbuti kuti mukwesu kajisi cipego cakupa kabotu makani aabuleya? Tulakonzya kumubuzya mbwalibambila makani aakwe. Kuti mucizyi kacizyi kujika, tulakonzya kumulomba kuti atuyiisye mbwajika. Kuti Munakristo uucili mwana-mwana kacimukatazya kujana balongwe, ulakonzya kulomba lugwasyo kuli umwi uucizyi kujana balongwe. Kwiinda mukucita zintu eezyi, tatukabi amunyono alimwi tuyooyungizya luzyibo lwesu.

10. Mbuyumuyumu nzi mbwaakajana Gideoni?

¹⁰ Atulange-lange icakacitikila Gideoni, iwakali kuzwa mumusyobo wa Manase, alimwi abaalumi ibakali kuzwa mumusyobo wa Efraimu. Jehova wakagwasya Gideoni abaalumi bali 300 kuzunda munkondo calo icakali kukonzya kubapa kulisumpula citaambiki. Baalumi bana Efraimu bakaboola kumulwana Gideoni, ikutali kumulumbaizya. Kulisumpula kwakabapa kunyema  nkaambo kuzwa kumatalikilo Gideoni kunyina naakabatamba kuti bamusangane mukulwana basinkondonyina a Leza. Bakabikkila maano kapati kukulemeka musyobo wabo, pele bakaluba kuti Gideoni wakabikkila maano kapati kukulemeka zina lya Jehova alimwi akukwabilila bantu bakwe.—Bab. 8:1.

11. Ncinzi Gideoni ncaakaambila baalumi bana Efraimu?

¹¹ Cakulicesya Gideoni wakaambila baalumi bana Efraimu kuti: “Ino ncinzi ncondacita mebo icili mbuli ncomwacita nywebo?” Mpoonya wakabapa cikozyanyo comwe icitondezya Jehova mbwaakabalongezyede. Akaambo kaceeci, baalumi aaba “bakatontomana.” (Bab. 8:2, 3) Gideoni wakalicesya kutegwa abambe luumuno akati kabantu ba Leza.

12. Ncinzi ncotwiiya kucikozyanyo cabana Efraimu alimwi a Gideoni?

¹² Ncinzi ncotwiiya kucibalo eeci? Kuzwa kucikozyanyo cabana Efraimu, twiiya kuti tatweelede kubikkila maano kapati kukulijanina bulemu, pele tweelede kubikkila maano kukulemeka Jehova. Basilutwe bamikwasyi alimwi abaalu kuli ncobakonzya kwiiya kucikozyanyo ca Gideoni. Kuti naa umwi wanyema akaambo kacintu cimwi ncobacita, beelede kumvwisya camupa kunyema muntu ooyo. Alimwi balakonzya kumulumbaizya muntu ooyo mumbazu nzyacita kabotu. Kucita boobo kuyandika kulicesya, kwaambisya kuti muntu ooyo nguulubizyide. Pele ciyandika kapati, nkuba acilongwe cibotu abakwesu muciindi cakulitondezya kuti balo baliluzi.

13. Mbuyumuyumu nzi mbwaakajisi Hana, alimwi ino wakabuzunda buti?

¹³ Amuyeeye cikozyanyo ca Hana. Wakalikwetwe kumwaalumi mu Levi wazina lya Elikana, iwakali kumuyanda kapati. Pele Elikana wakajisi mukaintu uumbi, Penina. Elikana wakali kumuyanda kapati Hana kwiinda Penina; nokuba boobo, “Penina wakalijisi bana, pele Hana tanaakajisi bana pe.” Akaambo kaceeci, Penina wakali kumusampaula cakutaleka Hana “kutegwa ause.” Ino Hana wakali kulimvwa buti? Wakali kunyema kapati cakuti “wakali kulila akutalya.” (1Sam. 1:2, 6, 7) Nokuba boobo, Bbaibbele kunyina mpolyaamba kuti Hana wakasola kupilusya cibi kuli Penina munzila iili yoonse. Muciindi caboobo, Hana wakapaila camoyo woonse kuli Jehova akusyoma kuti uyoozibamba zintu. Sena Penina wakacinca kujatikizya mbwaakali kumweendelezya Hana? Bbaibbele talyaambi. Pele ncotuzyi ncakuti Hana wakaba aluumuno lwamumizeezo, cakuti “tanaakacuuside alimwi pe.”—1Sam. 1:10, 18.

14. Ncinzi ncotukonzya kwiiya kucikozyanyo ca Hana?

¹⁴ Ncinzi ncotukonzya kwiiya kucikozyanyo ca Hana? Kuti umwi kasola kuzundana andinywe munzila iili yoonse, amuyeeye kuti nywebo ndinywe mukonzya kupa kuti bukkale bwiindile kubija naa pe. Tamweelede kulekela  kuti mutalike kuzundana amuntu ooyo. Muciindi cakupilusya cibi kucibi, amusole kubamba luumuno anguwe. (Rom. 12:17-21) Ikuti naa wakaka, nywebo muyoozumanana kuba aluumuno lwamumizeezo.

15. Muunzila nzi Apolo alimwi a Paulo mobakakozyenye?

¹⁵ Camamanino, atulange-lange ncotukonzya kwiiya kucikozyano casikwiiya Apolo alimwi amwaapostolo Paulo. Balumi boonse aaba bakalaazyi kabotu Magwalo. Boonse bakali bamayi bacibwene alimwi ibakazyibidwe kapati. Alimwi boonse bakagwasyilizya bantu banji kuba basikwiiya. Pele kunyina nobakali kufwidilana munyono.

16. Ino Apolo wakali muntu uuli buti?

¹⁶ Apolo “wakazyalilwa ku Alekizandiriya,” busena ikwakali zikolo zisumpukide kapati mumwaanda wamyaka wakusaanguna. Wakali kupasaula kukanana alimwi “wakalaazyi kapati Magwalo.” (Mil. 18:24) Ciindi naakali kubelekela ku Korinto, bakwesu bamwi mumbungano bakatondezya kuti bakali kumuyanda kapati kwiinda bakwesu bamwi, kubikkilizya a Paulo. (1Kor. 1:12, 13) Pele sena Apolo wakakulwaizya muuya ooyo wakuzundana? Kunyina naakacita boobo. Alimwi buya, aciindi cimwi Apolo naakazwa ku Korinto, Paulo wakamulomba kuti ajokele ku Korinto. (1Kor. 16:12) Paulo naatakacita oobo ikuti naakalimvwa kuti Apolo waandaanya mbungano. Cilalibonya kuti Apolo wakabelesya zipego zyakwe munzila mbotu, nkokuti kwaambilizya makani mabotu alimwi akuyumyayumya bakwesu. Aboobo tulakonzya kusyoma kuti, Apolo wakali mwaalumi uulicesya. Mucikozyanyo, Bbaibbele kunyina mpolyaamba kuti Apolo wakanyema ciindi Akula a Purisila ‘nobakamupandulwida bwini mboibede nzila ya Leza.’—Mil. 18:24-28.

17. Mbuti Paulo mbwaakakulwaizya luumuno?

 ¹⁷ Mwaapostolo Paulo wakaluuzyi mulimo mubotu ngwaakacita Apolo. Pele Paulo kunyina naakalibilika kuti bantu balayeeya kuti Apolo ulamwiinda. Kulicesya, kulibombya alimwi akunyoneka kwa Paulo kulalibonya mululayo ndwaakapa kumbungano yaku Korinto. Kunyina naakayungwa abaabo ibakali kwaamba kuti “Mebo ndili wa Paulo,” muciindi caboobo, bulemu boonse wakabupa kuli Jehova Leza alimwi a Jesu Kristo.—1Kor. 3:3-6.

18. Kweelana alugwalo lwa 1 Bakorinto 4:6, 7, ncinzi ncotwiiya kucikozyanyo ca Apolo alimwi a Paulo?

¹⁸ Ncinzi ncotukonzya kwiiya kucikozyanyo ca Apolo alimwi a Paulo? Tulakonzya kubeleka canguzu mumulimo wa Jehova, alimwi tulakonzya kugwasya banji kweelela kubbapatizyigwa. Pele ncotweelede kuyeeya ncakuti, kuzwidilila kuli koonse kulakonzyeka kwiinda mukugwasyigwa a Jehova. Kuyungizya waawo, cikozyanyo ca Apolo a Paulo, cituyiisya kuti ciindi notujisi mikuli minji mumbungano, ndendilyo notukonzya kucita zinji kutegwa tukulwaizye luumuno mumbungano. Eelo kaka tulakkomana ciindi baalumi basalidwe nobakulwaizya luumuno alimwi alukamantano kwiinda mukutobela lulayo lwamu Jwi lya Leza, alimwi akutayanda kulijanina mpuwo lwabo beni, pele kwiinda mukutobela cikozyano ncaakatusiila Kristo Jesu!—Amubale 1 Bakorinto 4:6, 7.

19. Ncinzi umwi aumwi wesu ncayelede kucita? (Amubone kabbokesi kakuti “ Amutantamuke Kubusya Mizundano.”)

¹⁹ Umwi aumwi wesu ulijisi cipego naa luzyibo ndwaakapegwa a Leza. Tulakonzya kucibelesya cipego eeco “mukubelekelana.” (1Pet. 4:10) Tulakonzya kulimvwa kuti nzyotucita nzisyoonto. Pele zintu zisyoonto izikulwaizya lukamantano zili mbuli kkotoni iiswaanganya cisani. Toonse atuzumanane kubeleka canguzu kutegwa tugwisye muuya wakuzundana. Aboobo atube amakanze akucita kufwumbwa ncotukonzya kutegwa tukulwaizye luumuno alimwi alukamantano mumbungano.—Ef. 4:3.