1-2. Mbuti majwi aa Jehova aali kulugwalo lwa Isaya 65:16, 17 mbwaatukulwaizya kuzumanana kuliyumya?

“AMUZUMANANE KULIYUMYA!” wakali mutwe wamakani wapulogilamu yamuswaangano wacooko uukkomanisya wamu 2017. Pulogilamu yakatondezya mbotukonzya kuliyumya kumapenzi eesu. Kwainda myaka yone kuzwa ciindi notwakajisi muswaangano ooyu, alimwi tuciliyumya abuumi munyika mbyaabi eeyi.

² Mapenzi nzi ngomwali kulwana? Sena nkufwidwa munamukwasyi naa mulongwe? Sena nkuciswa bulwazi bupati? Sena mapenzi aaboola akaambo kakucembaala? Sena nintenda zilicitikila, nkondo naa kupenzyegwa? Sena mapenzi aaboola akaambo kabulwazi mbuli bwa COVID-19? Eelo kaka tulabulangila buzuba oobo ciindi mapenzi oonse aaya naayoomana, kulubwa alimwi anaatakabi limbi!—Amubale Isaya 65:16, 17.

3. Ncinzi ncotweelede kucita lino, alimwi nkaambo nzi?

³ Buumi mubweende oobu mbuyumu, alimwi tulalangilwa kuyooba amapenzi mapati kumbele. (Mt. 24:21) Kwaamba masimpe, tweelede kuzumanana kwiiya kuliyumya. Nkaambo nzi? Nkaambo Jesu wakaamba kuti: “Kwiinda mukuliyumya kwanu, muyoofwutula buumi bwanu.” (Lk. 21:19) Kuyeeya mbobazwidilila bamwi kuliyumya mumasunko aakozyenye angotujisi kulakonzya kutugwasya kuliyumya.

4. Nkaambo nzi ncotukonzya kwaamba kuti Jehova ncikozyanyo cibotu cakuliyumya?

⁴ Nguni uujisi cikozyanyo cibotu cakuliyumya? Ngu Jehova Leza. Sena bwiinguzi oobu bulamugambya? Ambweni mwagambwa, pele kuti mwabuyeeyesya tamukonzyi kugambwa. Nyika  eeyi yeendelezyegwa a Diabolosi, alimwi izwide mapenzi. Jehova ulijisi nguzu zyakwaamana mapenzi noliba lino, pele ulindila kubuzuba nayoocita oobo. (Rom. 9:22) Calino, Leza wazumanana kuliyumya kusikila ciindi eeco ncabikkide cikasike. Atulange-lange zintu zili fwuka Jehova nzyaasala kuliyumya.

5. Mbuti zina lya Leza mbolyasampaulwa, alimwi ino mulimvwa buti?

⁵ Masampu aaletwa kuzina lyakwe. Jehova ulaliyanda zina lyakwe, alimwi uyanda kuti boonse kabalilemeka. (Is. 42:8) Pele kwamyaka iili 6,000, zina lyakwe lyali kusampaulwa. (Int. 74:10, 18, 23) Eeci cakatalikila mumuunda wa Edeni ciindi Diabolosi, (naa “Sikubejekezya”) naakatamikizya Leza kuti ba Adamu a Eva wakali kubaima cintu cimwi ncobakali kuyandika kutegwa bakkomane. (Matl. 3:1-5) Kuzwa ciindi eeco, Jehova walikutamikizyigwa kwiima bantu cintu ncobayandika ncobeni. Jesu wakali kulibilika kujatikizya masampu aakaletwa kuzina lya Bausyi. Akaambo kaceeci, wakayiisya basikwiiya bakwe kupaila kuti: “Taateesu ooli kujulu, alisalazyigwe zina lyako.”—Mt. 6:9.

6. Nkaambo nzi Jehova ncaalekela kuti kwiinde ciindi cinji katanabamba kaambo kajatikizya bweendelezi bwakwe?

⁶ Kukazya nguzu zyakwe zyabweendelezi. Jehova alikke nguweelela kweendelezya majulu alimwi anyika, alimwi bweendelezi bwakwe mbobwiinda kubota. (Ciy. 4:11) Diabolosi wakasola kweena bangelo alimwi abantu akubapa kuyeeya kuti Leza teeleli kweendelezya. Makani aatondezya kuti Leza nguweelela kweendelezya, tanaakali kukonzya kubambwa mubuzuba bomwe buyo. Cabusongo, Leza walindila kwaciindi cili mbocibede kutegwa bantu balibonene kuti ciindi nobasola kulyeendelezya kakunyina Mulengi, tabakonzyi kuzwidilila. (Jer. 10:23) Akaambo kakukkazika moyo kwa Leza, makani aaya ayoobambwa ciindi comwe mane kukabe kutamani. Jehova uyoosumpulwa ciindi aakutondezya kuti Bwami bwakwe bulikke mbobukonzya kuleta luumuno lwini-lwini alimwi alukwabililo munyika.

7. Ino mbaani bamuzangila Jehova, alimwi ino uyoobacita buti?

⁷ Kuzanga kwabana bakwe bamwi. Jehova wakalenga bangelo alimwi abantu balondokede. Pele mungelo muzangi Saatani (naa “Sikukazya”) wakoongelezya bantu balondokede, ba Adamu a Eva, kuzangila Jehova. Mpoonya bangelo bamwi alimwi abantu bakamusangana mubuzangi bwakwe. (Jud. 6) Kumbele, nobaba bana Israyeli bamwi, ibantu mbaakasalide Leza, bakamukaka akutalika kukomba ba Leza bakubeja. (Is. 63:8, 10) Jehova wakausa kapati. Nokuba boobo, waliyumya alimwi uyoozumanana kuliyumya kusikila mane akabanyonyoone bazangi aabo boonse. Eeci ciyooleta zilongezyo zikatalusya kubantu bakwe basyomeka, aabo antoomwe anguwe ibazumanana kuliyumya kuzintu zibyaabi mubweende bwazintu oobu!

8-9. Makani nzi aakubeja aambwa kujatikizya Jehova, alimwi ncinzi ncotukonzya kucita kujatikizya ngawo?

⁸ Kuzumanana kubejekezyegwa a Diabolosi. Saatani wakatamikizya Jobu alimwi ababelesi ba Jehova basyomeka, ikuti bakomba buyo Leza akaambo kazintu nzyabacitila. (Job. 1:8-11; 2:3-5) Diabolosi wazumanana kubejekezya bantu kusikila asunu. (Ciy. 12:10) Tulakonzya kutondezya kuti Saatani mubeji kwiinda mukuliyumya mumasunko eesu, alimwi akuzumanana kusyomeka kuli Jehova akaambo kakuti tulamuyanda. Mbubwenya mbuli Jobu, tuyoolongezyegwa akaambo kakuliyumya.—Jak. 5:11.

 ⁹ Saatani ubelesya basololi bazikombelo zyakubeja kwaamba kuti Jehova ngusilunya akuti nguupa kuti bantu kabapenga. Mane buya bamwi baamba kuti ciindi bana nobafwa, Leza ulababweza nkaambo uyanda kuyungizya bangelo kujulu. Eelo kaka ooku nkumusampaula Leza! Pele swebo tulizyi kuti Jehova ngu Taata siluyando. Ciindi notuciswa bulwazi bupati naa kufwidwa muyandwa, kunyina notumupa mulandu Leza wesu. Muciindi caboobo, tulijisi lusyomo lwakuti bumwi buzuba, uyoozibambulula zintu. Aboobo tulakonzya kubaambila boonse aabo ibayanda kuswiilila kuti Jehova ngu Leza siluyando. Mpoonya Jehova ulakonzya kumuvwiila ooyo uumusampaula.—Tus. 27:11.

10. Ncinzi lugwalo lwa Intembauzyo 22:23, 24 ncolwaamba kujatikizya Jehova?

¹⁰ Kupenga kwababelesi bakwe bayandwa. Jehova ngu Leza silweetelelo. Ulausa kapati ciindi nabona katupenga ambweni akaambo kakuciswa, kutalondoka kwesu naa kupenzyegwa. (Amubale Intembauzyo 22:23, 24.) Jehova ulaazyi kabotu mapenzi eesu; ulayanda kwaamana, alimwi uyakwaamana. (Amweezyanisye Kulonga 3:7, 8; Isaya 63:9.) Alimwi buyoosika buzuba ‘nayoosindula misozi yoonse kumeso eesu alimwi lufwu talukabi limbi, akwalo koomoka, kulila nokuba kucisa takukabi limbi pe.’—Ciy. 21:4.

11. Ino Jehova ulimvwa buti kujatikizya babelesi bakwe basyomeka ibakafwa?

¹¹ Kwaandaana abalongwe bakwe ibakafwa. Ino Jehova ulimvwa buti kujatikizya baalumi alimwi abamakaintu basyomeka ibakafwa? Ulayandisya kuyoobabona alimwi! (Job. 14:15) Amweezeezye Jehova mbwayandide kuyoomubona mulongwe wakwe Abrahamu. (Jak. 2:23) Naa Musa, ooyo ngwaakabandika anguwe “mulomo mpande.” (Kul. 33:11) Alimwi ulayandisya kuyoomvwa Davida alimwi  abasintembauzyo bamwi kabaimba nyimbo zyabo zibotu zyakumutembaula! (Int. 104:33) Nokuba kuti balongwe ba Leza aaba bakafwa, Jehova tabalubide pe. (Is. 49:15) Ulabuyeeya bube bwabo boonse. Munzila imwi, “boonse mbaumi mumeso aakwe.” (Lk. 20:38, bupanduluzi buyungizyidwe.) Bumwi buzuba, uyoobabusya alimwi akutalika kuswiilila mipailo yabo iizwa ansi aamoyo akutambula bukombi bwabo. Ikuti naa mwakafwidwa muyanda, majwi aaya alakonzya kumuumbulizya.

12. Ncinzi cimupa kuusa kapati Jehova mumazuba aaya mabyaabi aamamanino?

¹² Kupenzyegwa kwabantu bakwe abantu babyaabi. Ciindi buzangi nobwakatalika mu Edeni, Jehova wakalizyi kuti zintu ziyakwiindila kubija, kazitanabota. Jehova tabuyandi bubi, kutalulama alimwi ankondo iziliko munyika mazuba aano. Lyoonse wali kubeetelela aabo bapengede, mucikozyanyo aabo ibatajisi nguzu naa bakubakwabilila mbuli bamucaala alimwi abamukabafwu. (Zek. 7:9, 10) Jehova ulausa kapati ciindi nabona babelesi bakwe basyomeka kabapenzyegwa naa kwaangwa. Alimwi amusyome kuti ulamuyanda kapati nyoonse nomuliyumya antoomwe anguwe.

13. Ino micito nzi yakutalilemeka Leza njabona mubantu, alimwi ino uyoocita nzi kujatikizya njiyo?

¹³ Kutalilemeka kwabantu. Saatani ulakkomana kupa bantu ibalengedwe mucinkozya ca Leza kutalilemeka. Ciindi Leza ‘naakabona kuti bubi bwabantu bwavwulisya’ mumazuba aa Nowa, “Jehova wakausa kuti wakalenga bantu anyika alimwi wakapenga mumoyo.” (Matl. 6:5, 6, 11) Sena nyika yabota kuzwa ciindi eeco? Peepe! Diabolosi ulikkomene kuti misyobo yoonse yakutalilemeka mumakani aakoonana ilidumide kapati, kubikkilizya akutalilemeka mumakani aakoonana kuliko akati kabantu baindene zizo alimwi abantu bakozyenye zizo! (Ef. 4:18, 19) Saatani ulakkomana kapati ciindi bantu bakomba Jehova nobacita cibi cipati. Ciindi Jehova aakuleka kubakkazikila moyo bantu batalilemeki, uyootondezya mbwatakuyandi kutalilemeka, kwiinda mukubanyonyoona.

14. Ncinzi bantu ncobacita kunyika alimwi akubanyama?

¹⁴ Kunyonyoonwa kwanyika. Muntu teendelezyi buyo ‘muntunyina munzila iimweetela mapenzi,’ pele waalilwa kulanganya nyika alimwi abanyama kweelana a Jehova mbwaakalailila kuti bantu kabacita. (Muk. 8:9; Matl. 1:28) Basayaansi bamwi baamba kuti, akaambo kazintu nzyobacita bantu, zilenge izili 1 miliyoni tazicinooliko mumyaka misyoonto iiboola. Aboobo cilalimvwisya kaambo bantu ncobalibilika kujatikizya zilenge! Pele cikkomanisya ncakuti, Jehova wakasyomezya “kunyonyoona baabo banyonyoona nyika,” akucinca nyika yoonse kuba paradaiso.—Ciy. 11:18; Is. 35:1.

15-16. Ncinzi ceelede kutukulwaizya kuliyumya mbubwenya mbuli Jehova? Amupe cikozyanyo.

¹⁵ Amuyeeye buyo kujatikizya mapenzi woonse Taateesu wakujulu ngaali kuliyumya kwamyaka minji. (Amubone kabbokesi kakuti “ Zintu Jehova Nzyaaliyumya.”) Jehova ulakonzya kubumanizya bweende bwazintu oobu kufwumbwa ciindi. Pele kukkazika moyo kwakwe kwatugwasya kapati! Amuyeeye cikozyanyo eeci. Amweezeezye kuti banabukwetene baambilwa kuti bayoozyala mwana uulemene alimwi akuti mwana ooyo uyoopenga, mpoonya akufwa kacili mwana. Pele bazyali banookkomene ciindi mwana ooyo naazyalwa, nokuba kuti cinoobakatazya kumulanganya. Luyando ndobajisi kumwana ooyo lubapa kuliyumya kumapenzi aali woonse ngobakonzya kujana kutegwa bamulanganye kabotu mwanaabo.

 ¹⁶ Mbubwenya buyo, bana ba Adamu a Eva boonse balazyalwa kabatalondokede. Pele Jehova ulabayanda alimwi akubalanganya. (1Joh. 4:19) Mukwiimpana abazyali bali mucikozyanyo, Jehova ulakonzya kwaamana mapenzi aabana bakwe. Aciindi ncasalide, uyakwaamana mapenzi woonse aapenzya bantu. (Mt. 24:36) Luyando lwa Jehova, lweelede kutupa kuliyumya kufwumbwa buyo kuti kaciyandika kucita boobo.

17. Mbuti majwi aa Jesu aalembedwe ku Bahebrayo 12:2, 3 mbwaatukulwaizya kuzumanana kuliyumya?

¹⁷ Jehova ncikozyanyo cibotu cakuliyumya. Jesu wakazwidilila kwiiya cikozyanyo ca Bausyi cakuliyumya. Naakali anyika, Jesu wakaliyumya kukufwubaazyigwa, kusampaulwa alimwi aacisamu cakupenzyezya akaambo kandiswe. (Amubale Bahebrayo 12:2, 3.) Kakunyina kudooneka, cikozyanyo ca Jehova cakuliyumya cakapa Jesu nguzu zyakuliyumya. Andiswe cilakonzya kutuyumya.

18. Mbuti lugwalo lwa 2 Petro 3:9 mbolutugwasya kumvwisya kukkazika moyo kwa Jehova ncokuzuzikizya?

¹⁸ Amubale 2 Petro 3:9. Jehova ulizyi ciindi cibotu cakunyonyoona nyika eeyi mbyaabi. Akaambo kakukkazika moyo kwakwe, bantu banji bamuzyiba, alimwi lino nkamu mpati yabantu ilamukomba. Alimwi boonse balikkomene kuti Jehova wakaliyumya kwaciindi cilamfwu kutegwa bazyalwe, baiye kumuyanda alimwi akulyaaba kulinguwe. Ciindi bantu banji baakuliyumya kusikila kumamanino, ciyoolibonya kuti Jehova wakasala cabusongo kukkazika moyo.

19. Makanze nzi ngotweelede kuba angawo, alimwi mbulumbu nzi mbotuyoojana?

¹⁹ Tulaiya kuzwa kuli Jehova mbotukonzya kuzumanana kuliyumya kumwi katukkomene. Tacikwe makani amause alimwi akupenga Saatani nkwaaleta, Jehova wazumanana kuba “Leza uukkomene.” (1Tim. 1:11) Andiswe tulakonzya kuzumanana kukkomana notulindila cakukkazika moyo kuti Jehova akasalazye zina lyakwe, kusumpula bweendelezi bwakwe, kumana bubi boonse, alimwi akumanizya mapenzi woonse ngotujisi lino. Aboobo atube amakanze aakuzumanana kuliyumya alimwi akuumbulizyigwa akaambo kakuzyiba kuti awalo Taateesu wakujulu ulaliyumya. Ikuti twacita oobo, majwi aaya ayooba amasimpe kuluumwi aumwi wesu aakuti: “Ulikkomene muntu ooyo uuzumanana kuliyumya mumasunko, nkaambo ikuti naa Leza wamukkomanina uyootambula musini wabuumi, ooyo Jehova ngwaakasyomezya baabo ibazumanana kumuyanda.”—Jak. 1:12.