Mwaka wakatobela, kwakali cakwaambilizya kumukwasyi wa Beteli cakuti kumutabi waku South Africa kwakali kuyandika basikugwasyilizya nkaambo kwakali kuyoobikkwa muncini uupulinta mabbuku mupya. Aboobo ndakalilembya alimwi ndakakkomana kuti ndakasaIwa. Mpoonya kwakasalwa abakwesu bambi botatwe bamukwasyi wa Beteli waku Canada, ba Dennis Leech, ba Bill McLellan alimwi aba Ken Nordin. Twakaambilwa kuti tuyookkala ku South Africa kwaciindi cilamfwu!

Ndakatumina bamaama fooni akubaambila kuti: “Baama, kuli ncondiyanda kumwaambila. Nduunka ku South Africa!” Bamaama bakali baumuzi, pele bakali alusyomo alimwi akubikkila maano kapati kuzintu zyakumuuya. Tiibakaamba zinji, pele ndakalizyi kuti bakkomana. Nokuba kuti bamaama abataata bakausa akaambo kakuti nduunka kulamfwu, kunyina nobakatongooka akaambo kakusala kwangu.

Twakasaanguna kuunka ku Beteli yaku Brooklyn, kwalo kwamyezi yotatwe nkotwakayiisyigwa mboubelesyegwa muncini uupulinta. Kumane twakatanta bwato kuya ku Cape Town, ku South Africa. Ndakazwa aakukkwanya myaka iili 20. Akali mangolezya notwakatalika lweendo lwesu lulamfwu acitima kuzwa ku Cape Town kuya ku Johannesburg. Twakasaanguna kwiima mafwumofwumo mukadolopo kasyoonto munkanda ya Karoo. Kwakali lusuko, busi alimwi akupya. Swebo tone twakalanga awindo akugambwa busena oobu mbobwakabede. Twakalilibilikide kujatikizya mbounoobede mulimo wesu mupya. Kumbele nitwakaswaya busena oobu alimwi, twakazyikubona kuti madolopo aaya alakkomanisya kapati alimwi kuli luumuno.

Kwamyaka misyoonto, mulimo wangu wakali wakubelesya muncini uugambya alimwi uukatazya wa Linotype, ikubikka mabala aayelede kupulintwa aamagazini ya Ngazi Yamulindizi alimwi a Sinsimuka! Ofesi yamutabi yakali kupulinta mamagazini aamumyaambo yamu Africa minji, kutali aamu South Africa mulikke, pele kubikkilizya amumasi manji aamu Africa nkoili kunyika. Twakalikkomene kuti muncini mupya uubelesyegwa kupulinta iwakatugwisya ku Canada, wakali kubelesyegwa kapati!

Kumbele, ndakabelekela mu Ofesi yaku Fakitoli iyakali kulanganya milimo iisiyene-siyene mbuli kupulinta,  kutuma mabbuku alimwi amulimo wakusandulula. Ndakajisi bubi pele ndakalikkomene.

Mu 1968, ndakakwata mupainiya Laura Bowen, iwakali kukkala munsi-munsi a Beteli. Awalo wakali kubelekela a Beteli kali sikutaipa mudipatimenti yabasanduluzi. Mumazuba aayo, banabukwetene bapya tiibakali kukkala a Beteli, aboobo bakumutabi bakatupa mulimo wakuba bapainiya baalubazu. Pesi ndakalilibilikide asyoonto. Myaka iili 10 njondakakkala a Beteli ikuli zyakulya alimwi aakukkala, ino tunoocikonzya buti kuula zyoonse nzyotuyandika mumali masyoonto buyo ngotupegwa mbuli bapainiya baalubazu? Mwezi amwezi twakali kupegwa 25 rand ikuti naa twakkwanya mawoola aayandika, nyendo zyakupilukila alimwi akwaabila mabbuku. Mumali aayo, twakeelede kubbadela lenti, kuula zyakulya, kulanganya zyakweendela, busilisi alimwi azintu zimwi buyo zyakubelesya.

Twakatumwa kuyoocita bupainiya munsi-munsi adolopo lya Durban, ku Indian Ocean. Kwakali bantu banji bazwa ku India, bunji bwabo bakali bana babaabo ibakaboola kuzoobeleka mukkampani iipanga syuga kuma 1800. Lino bakali kubeleka milimo iimbi pele bakazumanana acilengwa cabo alimwi anzila mbobajika zyakulya. Alimwi bakali kwaambaula Chikuwa calo icakali cuuba-uba kulindiswe kubakambaukila.

Bapainiya baalubazu bakeelede kubeleka mawoola aali 150 mwezi amwezi mubukambausi, aboobo mebo aba Laura twakamvwana kuti tubeleke mawoola aali 6 buzuba bwakusaanguna. Oobo buzuba kwakali kupya. Twakanyina nyendo zyakupilukila alimwi aziiyo zya Bbaibbele, aboobo twakeelede kukkwanisya mawoola aali 6 mubukambausi bwakuŋanda aŋanda. Nikwakainda ciindi kuzwa nitwakatalika kukambauka, ndakalanga ankoloko, nkujana kwainda buyo maminiti aali 40! Ndakalibilika akulibuzya kuti, mwati tulacikonzya?

Cakufwambaana, twakapanga mulongo mubotu. Abuzuba, twakali kunyamuna mabbaanzi alimwi akkofi mufulasiki. Twayanda kulyookezya twakali kupakiŋa moota wesu ansi aacisamu, mpoonya zimwi ziindi bana babamweenye ibalibonya kabotu bakali kuboola akutalika kutweebelela nkaambo twakaliindene kapati ambabo! Nikwakainda mazuba masyoonto, twakazyiba kuti kwainda buyo mawoola obilo naa otatwe, buzuba bwakali kufwambaana kumana.

Cakali kukkomanisya kapati kubatolela kasimpe kamu Bbaibbele ibantu aaba basamausya bamucilawo eeci! Twakajana kuti bamweenye balaabulemu, mbabotu myoyo alimwi balamuyoowa Leza. Ba Hindu banji bakali kuutambula mulumbe ngotwakali kubatolela. Bakali kuyanda kwiiya kujatikizya Jehova, Jesu, Bbaibbele, nyika mpya yakumbele yaluumuno alimwi abulangizi kujatikizya bafwide. Nikwakainda mwaka, twakaba aziiyo zya Bbaibbele zili 20. Abuzuba twakali kukkomana kulinda antoomwe cakulya cakumangolezya amukwasyi omwe akati kamikwasyi njotwakali kwiiya limwi. Twakalikkomene kapati.

Tiilyakalampa, twakatumwa mubbazu ilyakali mumbali-mbali a Indian Ocean. Nsondo ansondo, twakali kuswaya mikwasyi iindene-indene akubeleka abasikumwaya mumbungano kutegwa tubakulwaizye. Bakali kutweendelezya mbuli banamukwasyi alimwi twakali kukkomana kwiizya ambabo, bana babo alimwi akusobanya zivwubwa zyabo. Nokwakainda myaka yobilo, cakutayeeyela twakatambula fooni kuzwa kuofesi yamutabi iyakajisi mulumbe wakuti, “Twali kuyeeya kuti mujokele kuno ku Beteli.” Ndakaingula kuti, “Tulikkomene kapati kuno nkotubede.” Nokuba boobo, twakalilisungwide kubeleka kufwumbwa.

Ku Beteli ndakali kubelekela ku Dipatimenti Yamulimo, kwalo nkondakaba acoolwe cakubeleka abakwesu banji basimide alimwi bajisi luzyibo. Mumazuba aayo, mulangizi wabbazu amana kuswaya mbungano wakali kutuma lipooti kumutabi. Mpoonya baku Dipatimenti Yamulimo bakali kutuma lugwalo kumbungano kweelana alipooti yamulangizi wabbazu. Magwalo aayo akali aakukulwaizya mbungano alimwi akupa busolozi ikuti kakuyandika. Balembi bakali kubeleka canguzu kusandulula malipooti aabalangizi bamabazu kuzwa muci Xhosa, ci Zulu, alimwi amumyaambo imwi kutola mu Chikuwa. Mpoonya bakali kusandulula magwalo kumutabi kuzwa mu Chikuwa kutola mumyaambo  imwi yamu Africa. Ndilabalumba basanduluzi aabo ibakali kubeleka canguzu alimwi ibakandigwasya kuzyiba buyumuyumu mbobakali kujana bakwesu abacizyi basiya bamu Africa.

Aciindi eeco, bantu baku South Africa bakali kweendelezyegwa amfwulumende iyakali kukulwaizya muuya wakusalulula. Musyobo amusyobo kuli nkowakali kukkala aboobo bantu bamisyobo iindene kunyina nobakali kuyanzana. Bakwesu basiya bamu Africa bakali kwaambaula myaambo yabo, kukambauka mumyaambo yabo alimwi akuswaangana mumbungano zyamumyaambo yabo.

Tabali banji bantu basiya bamu Africa mbondakazyi akaambo kakuti ndakali kuswaangana buyo kumbungano zya Chikuwa. Pele aciindi eeco ndakaba acoolwe cakuzyiba bantu bamu Africa alimwi azilengwa zyabo. Ndakazyiba buyumuyumu bakwesu mbobajana akaambo kazilengwa zyakubusena oobo alimwi atunsiyansiya twabukombi. Eelo kaka bakali kutondezya busicamba kwiinda mukukaka tunsiyansiya tutali twamu Magwalo, nokuba kuti bakali kukazyigwa kapati abanamukwasyi alimwi abantu bamumunzi, akaambo kakukaka kutobela zintu zijatikizya mizimo! Aabo ibakali kukkala muminzi bakali bacete kapati. Banji tiibakayiide kapati, pele bakali kulilemeka Bbaibbele.

Alimwi ndakaba acoolwe kugwasyilizya kulanganya makani aamunkuta aajatikizya kulwanina lwaanguluko lwabukombi alimwi akutatola lubazu mutwaambo twacisi. Eelo kaka cakali kukulwaizya kapati kubona lusyomo alimwi abusicamba bwa Bakamboni ibacili bana ibakatandwa kucikolo akaambo kakukaka kusangana mumipailo alimwi amunyimbo zyazikombelo.

Bakwesu alimwi bakajana buyumuyumu mucisi cisyoonto camu Africa icakali kwiitwa kuti Swaziland (lino ciitwa kuti Eswatini). Ciindi Mwami Sobhuza II naakafwa, bantu bamucisi oomo boonse bakeelede kutola lubazu muzilengwa zimwi zyaadilwe. Bamaalumi bakeelede kugelwa minkulu mpoonya bamakaintu bakeelede kugelwa akusiya masusu mafwaafwi. Bakwesu abacizyi banji bakapenzyegwa akaambo kakukaka kutola lubazu mucilengwa eeci icakaswaangene akukomba basikale. Kusyomeka kwabo kuli Jehova kwakatukkomanisya kapati! Twakaiya zinji kujatikizya kusyomeka akukkazyika moyo kuzwa kubakwesu aaba bamu Africa, aboobo eeci cakayumya lusyomo lwesu.

Mu 1981, ndakajokela alimwi kumulimo wakupulinta kutegwa ndikagwasyilizye mumulimo wakupulinta kubelesya makkompyuta. Eeci cakali kukkomanisya kapati! Inzila zibelesyegwa mukupulinta zyakali kuyaabucinca. Simakwebo umwi wakucisi eeco wakapa mutabi imuncini mupya uubelesyegwa kupulinta ikuti bausole kakunyina kubbadela. Eeci cakapa kuti mincini iili 9 njitwakajisi injililwe mubusena amincini eeyo yosanwe mipya. Kwakabikkwa amuncini uumbi mupya aboobo mulimo wakali kweenda cakufwambaana!

Makkompyuta akatugwasya kubelesya nzila mpya yakubikka kabotu mabala amapepa kwiinda kubelesya MEPS (Multilanguage Electronic Publishing System.) Tekinologi yakasumpuka kapati kuzwa ciindi tobakwesu bone nitwakazwa ku Canada notwakaboola kuzoobelekela ku South Africa! (Is. 60:17) Aciindi eeco toonse twakalikwete bapainiya ibakali kubikkila maano kapati zintu zyakumuuya. Mebo aba Bill twakacili kubelekela a Beteli. Pele ba Ken aba Dennis bakaba amikwasyi.

Milimo amutabi yakavwula. Myaambo iyakajisi mabbuku aamba zyamu Bbaibbele aakali kuyandika kusandululwa akupulintwa yakali kuyaabuvwula, alimwi mabbuku aayo akeelede kutumwa amumitabi iimbi. Kwakali kuyandika mayake mapya a Beteli. Aboobo bakwesu bakayaka mayake mabotu kumbo aa Johannesburg alo akaabwa mu 1987. Cakali kukkomanisya ikutola lubazu mukuyaambele ooko kwakacitika alimwi akubeleka mu Kkomiti Yamutabi waku South Africa kwamyaka minji.

Mu 2001, twakagambwa kapati ciindi nondakatambwa kuyoobeleka mu Kkomiti Yamutabi waku United States iyakazwa akupangwa. Nokuba kuti twakausa akaambo kakusiya mulimo alimwi abalongwe ku South Africa, twakakkomana ikutalika buumi bupya katuli cibeela camukwasyi wa Beteli yaku United States.

Nokuba boobo, twakalilibilikide kusiya banyina baba Laura ibacembeede. Tiitwakacili kucikonzya kubagwasyilizya mumbazu zyoonse nitwakaunka ku New York, pele banabokwabo aba Laura botatwe bakalyaaba kubagwasyilizya muzintu zyoonse nzyobakali kuyandika. Bakaamba kuti, “Swebo tatukonzyi kuba mumulimo waciindi coonse, pele kuti twabalanganya bamaama cilakonzya kumugwasya ikuzumanana mumulimo wanu.” Eelo kaka tulabalumba kapati!

Mbubwenya buyo, mwanookwesu amukaintu wakwe ibakali kukkala ku Toronto, ku Canada, bakali kubalanganya bamaama bamukamufwu. Aciindi eeco bamaama bakali kukkala kale ambabo kwamyaka iinda ku 20. Tulabalumba kapati akaambo kakubalanganya alimwi aluyando ndobakali kubatondezya kusikila nobakafwa nokwakainda ciindi cisyoonto buyo kuzwa notwakasika ku New York. Eelo kaka ncilongezyo cipati ikuba abanamukwasyi ibalibambilide kucinca bukkale bwabo kutegwa balanganye bazyali bacembeede calo zimwi ziindi icitali cuuba-uba!

Kwamyaka iili mbwiibede ku United States, ndakali kubelekela kucibeela cipanga mabbuku calo mazuba aano icauba-uba akaambo katekinologi. Lino ndibelekela ku Dipatimenti Yuula Zintu. Eelo kaka cali kukkomanisya myaka iili 20 yainda ikuba cibeela camutabi mupati lino uujisi bamukwasyi wa Beteli bali 5,000 ababelesi beenda buya ibali 2,000!

Myaka iili 60 yainda, kunyina nondakazyi kuti ndinooli kokuno. Mumyaka yoonse eeyi ba Laura bali kundigwasyilizya kapati kuzwa ansi amoyo. Eelo kaka ndapona buumi bukkomanisya! Eelo kaka tulikkomene kapati akaambo kamilimo iindene-indene njotwakabeleka alimwi abantu bali kabotu mbotwakabeleka limwi, kubikkilizya abaabo mbotwakali kuswaya mumitabi minji mumulimo wakuswaya mitabi mumasena manji aamunyika. Lino akaambo kakuti ndijisi myaka iinda 80, milimo yangu yakacesyegwa-cesyegwa akaambo kakuti kuli bakwesu banji bacili bana-bana ibakonzya kwiilanganya.

Sintembauzyo wakalemba kuti: “Cilikkomene cisi cijisi Jehova kuba Leza wancico.” (Int. 33:12) Eelo kaka ndilalumba kapati akaambo kakuti ndilamubelekela Jehova abantu bakwe bakkomene!