Cakudooneka, Jehova uyanda kuti bantu bakwatana bazumanane kukkomana alimwi akumvwana. (Mt. 19:4-6) Kuti kamuyanda kukwata naa kukwatwa, mbuti mbomukonzya kujana muntu wakukwatana limwi uuli kabotu? Mbwaanga Jehova Mulengi wesu, ulizyi ncotweelede kucita kutegwa tukabe alukkomano mucikwati. Aboobo kuti mwazibelesya njiisyo nzyaakatupa, muyookkomana ncobeni. Atulange-lange njiisyo zimwi.

Cakusaanguna, tweelede kuzyiba kaambo aaka kajatikizya ndiswe kakuti: “Moyo uleena kwiinda cintu cimbi cili coonse alimwi ulapenzya kapati.” (Jer. 17:9) Ciindi bantu bobilo ibayanda kukwatana nobabonana akutalika kweebana balakonzya kuyandana kapati, kuti eeci cacitika cilakonzya kubayumina kusala cabusongo. Ciindi bantu nobasala kukwatana akaambo buyo kambobalimvwa, kumbele bayootyompwa. (Tus. 28:26) Nkakaambo kaako, tacili cabusongo kufwambaana kwaambilana mbobalimvwa kuluumwi amweenzinyina naa kusyomezyanya zintu zimwi kabatanazyibana kabotu-kabotu.

Lugwalo lwa Tusimpi 22:3 lwaamba kuti: “Muntu uucenjede abona mapenzi ulayuba, pele aabo batakwe maano balaunka nkukonya ooko, aboobo balapenga.” Nintenda nzi iikonzya kuba kwiinda mukubelesya mawebbusaiti aabelesyegwa kuyandaula muntu wakukwatana limwi? Cuusisya ncakuti, bantu bamwi bakajana bantu mbobatazyi aintaneti akutalika kweebana, mpoonya kumbele bakazyiba kuti muntu ooyo wakabacenga. Alimwi, ibantu batasyomeki bakapanga maakkaunti aakubeja kutegwa bacenge bantu akubabbida mali. Zimwi ziindi bantu aabo ibatasyomeki balyaamba kuti Mbaakamboni.

Amubone ntenda iimwi. Mumawebbusaiti aabelesyegwa kuyandaula muntu wakukwatana limwi, babalila buya kutegwa bazyibe muntu wakweebana limwi. Nokuba boobo, kunyina bumboni butondezya kuti nzila eezyi zilagwasya ncobeni. Inga tiicaba cabusongo kusyoma pulogilamu yaakkompyuta yakapangwa amuntu, ikumugwasya kusala mumakani aayandika kapati aakujana muntu wakukwatana limwi. Mapulogilamu aakkompyuta, kunyina naakonzya kusyomeka mbuli njiisyo zyamu Bbaibbele.—Tus. 1:7; 3:5-7.

Njiisyo njotubala ku Tusimpi 14:15 yaamba kuti: “Muntu mufwubafwuba ulaasyoma makani oonse, pele ooyo uucenjede ulakkala ansi kuyeeya ntaamu zyakwe.” Kamutanasala muntu wakukwatana  limwi, mweelede kusaanguna kumuzyiba kabotu muntu ooyo. Pele kuzyibanina buyo aintaneti cilakonzya kumukatazya kucita oobo. Nokuba kuti mulaabona makani aajatikizya muntu ooyo alimwi akubandika anguwe kwaciindi cilamfwu aintaneti, sena caamba kuti mulimuzyi ncobeni muntu ooyo? Bamwi ibakali kuyeeya kuti bajana luyando lwini-lwini, bakagambwa ncobakazyiba ciindi nobakabonana amuntu ooyo cacigaminina.

Sintembauzyo wakaamba kuti: “Tandiyanzani abantu bampelenge, alimwi ndilabatantamuka basikuupaupa ameso.” (Int. 26:4) Bantu banji bayeeya kuti cili buyo kabotu kubeja mumakani aakusyabana aintaneti kutegwa balibonye kuti mbantu bali buyo kabotu. Balakonzya kulisisa bwini mbobabede ciindi nomubandika ambabo aintaneti. Nokuba kuti bamwi balakonzya kulyaamba kuti Mbaakamboni ba Jehova, sena mubwini Mbanakristo babbapatizyidwe? Sena balisimide kumuuya? Sena balijisi cilongwe ciyumu a Jehova? Sena balalemekwa mumbungano mobazulilwa? Sena nzikozyanyo zibotu naa ‘mbalongwe babyaabi’? (1Kor. 15:33; 2Tim. 2:20, 21) Sena baleelela kukwata naa kukwatwa kweelana anjiisyo zyamu Magwalo? Mweelede kujana bwiinguzi kumibuzyo eeyi, pele cilakonzya kukatazya kujana bwiinguzi kakunyina kubandika a Bakamboni bamwi ibamuzyi kabotu muntu ooyo. (Tus. 15:22) Alimwi buya, mubelesi wa Jehova uusyomeka kunyina nakonzya ‘kunjila mujoko lyomwe’ amuntu uutali musyomi.—2Kor. 6:14; 1Kor. 7:39.

Akaambo kantenda ziliko mukubelesya mawebbusaiti aakujana muntu wakukwatana limwi, kuli nzila zibotu nzyomukonzya kubelesya kutegwa mumuzyibe kabotu muntu ooyo ngomuyanda kuyookwatana limwi. Nkuli nkomukonzya kujana muntu wakukwatana limwi? Ciindi nocikonzyeka kuswaangana antoomwe, tulakonzya kubazyiba bamwi lyamiswaangano yambungano, yabbazu, yacooko alimwi amiswaangano iimwi buyo.

Ciindi miswaangano yakubuleya eeyi noitakonzeki, mbuli lyabulwazi bwa COVID-19, tubelesya intaneti kucita miswaangano yambungano, mwalo motuba azyoolwe zyakuyanzana a Bakamboni bamwi ibatakwete naa kukwatwa. Mulakonzya kubamvwa kabapa makani alimwi akutondezya lusyomo lwabo ciindi nobaingula. (1Tim. 6:11, 12) Alimwi mulakonzya kubandika ambabo, yamana miswaangano kubelesya breakout room, kuti kacikonzyeka. Kwiinda mukuyanzana a Bakamboni mulakonzya kubona muntu ooyo ngomuyanda kukwatana limwi mbwabeendelezya bamwi, calo cikonzya kutondezya bwini mbwabede. (1Pet. 3:4) Kumbele, mwaakumuzyiba kabotu muntu ooyo, mulakonzya kumubuzya naa mujisi mbaakani zikozyenye alimwi akuti naa mulakonzya kuba banabukwetene bali kabotu.

Ciindi aabo batakwete naa kukwatwa nobabelesya njiisyo zyamu Bbaibbele ciindi nobayandaula muntu wakukwatana limwi, balalangilwa kuyookkomana mucikwati cabo mbubwenya bwaamba kasimpi kakuti, ‘Ooyo wajana mulumi naa mukaintu mubotu wajana cintu cibotu, alimwi ulakkomaninwa kuli Jehova.’—Tus. 18:22.