1. Nkasimpe nzi nkomwakazyiba nomwakatalika kwiiya Bbaibbele?

 SENA mulayeeya ciindi nomwakatalika kwiiya Bbaibbele? Ambweni mwakagambwa nomwakazyiba kuti Leza ulijisi zina. Andiza mwakakkomana kuzyiba kuti Leza kunyina nasubula bantu mumulilo wahelo. Alimwi kweelede kuti mwakakkomana kapati kuzyiba kuti muyoobonana alimwi abayandwa banu bakafwa akupona ambabo munyika yaparadaiso.

2. Kunze lyakwiiya kasimpe kamu Bbaibbele, nkuyaambele nzi kumwi nkomwakacita? (Baefeso 5:1, 2)

² Mbomwakali kuyaabuyaambele kwiiya Jwi lya Leza, alwalo luyando lwanu kuli Jehova lwakali kuyaabukomena. Mpoonya luyando oolo lwakamukulwaizya kutalika kuzibelesya zintu nzyomwakali kwiiya. Mwakatalika kusala zyakucita kweelana anjiisyo zyamu Bbaibbele. Mwakaiya kuyeeya akucita zintu ziluzi kutegwa mumukkomanisye Leza. Mbubwenya mbuli mwana mbwaiya muzyali siluyando, andinywe mwakali kwiiya Taata wenu wakujulu.—Amubale Baefeso 5:1, 2.

3. Mibuzyo nzi njotukonzya kulibuzya?

³ Tulakonzya kulibuzya mibuzyo mbuli yakuti: ‘Sena ndilamuyanda kapati Jehova lino kwiinda ciindi nondakaba Munakristo? Kuzwa ciindi nondakabbapatizyigwa, sena kuyeeya kwangu ambondicita zintu kuleendelana akwa Jehova, kwaambisya mumakani aakutondezya luyando kubakwesu abacizyi?’ Ikuti naa mwabona kuti ‘luyando ndomwakajisi kumatalikilo’ lwaceya, mutatyompwi pe. Eeci cakabacitikila a Banakristo bamumwaanda wamyaka wakusaanguna. Jesu kunyina naakaleka kubayanda, andiswe takaleki kutuyanda. (Ciy. 2:4, 7) Kayi ulizyi kuti tulakonzya  kulubukulusya luyando ndotwakajisi kumatalikilo ciindi notwakaiya kasimpe.

4. Ncinzi ncotutiibandike mucibalo eeci?

⁴ Mucibalo eeci, tulabandika mbotukonzya kuzumanana kuyaambele mutondezya luyando kuli Jehova akuli bamwi. Mpoonya tulabona azilongezyo zimwi nzyotuyoojana kuti katumuyanda kapati Jehova alimwi abakwesu abacizyi.

5-6. (a) Mbuyumuyumu nzi mbwaakajana mwaapostolo Paulo ciindi naakali kucita mulimo wakwe? (b) Ncinzi cakamukulwaizya kuzumanana kumubelekela Jehova?

⁵ Mwaapostolo Paulo wakalikkomene kubelekela Jehova, pele zimwi ziindi wakali kujana buyumuyumu. Kanji-kanji wakali kweenda misinzo milamfwu, alimwi mazuba aayo cakali kukatazya kweenda. Naakali mulweendo, Paulo zimwi ziindi wakali kuba “muntenda zyamumilonga” alimwi “amuntenda kuzigwebenga.” Mpoonya zimwi ziindi basinkondonyina bakali kumuuma buya. (2Kor. 11:23-27) Kunze lyaboobo, abalo Banakristonyina talili lyoonse nobakali kutondezya kulumba kuzintu nzyaakali kubacitila.—2Kor. 10:10; Flp. 4:15.

⁶ Ncinzi cakamugwasya Paulo kuzumanana kumubelekela Jehova? Paulo wakabuzyiba kabotu bube bwa Jehova kwiinda mukwiiya Magwalo alimwi azintu zyakamucitikila. Wakali masimpe kuti wakali kuyandwa kapati a Jehova Leza. (Rom. 8:38, 39; Ef. 2:4, 5) Eeci cakapa kuti awalo amuyande kapati Jehova. Paulo wakatondezya kuti wakali kumuyanda Jehova “kwiinda mukubabelekela alimwi akuzumanana kubabelekela basalali.”—Heb. 6:10.

7. Mbuti mbotukonzya kupa kuti luyando ndotujisi kuli Jehova lukomene?

⁷ Luyando ndotujisi kuli Leza lulakonzya kukomena kwiinda mukwiiya Jwi lyakwe cabusungu. Ciindi nomubala Bbaibbele, amusole kubona cibalo cimwi acimwi ncocimuyiisya kujatikizya Jehova. Amulibuzye kuti: ‘Ino cibalo eeci citondezya buti kuti Jehova ulandiyanda? Ntwaambo nzi tuli mucibalo eeci itweelede kundipa kumuyanda Jehova?’

8. Ino mupailo inga watugwasya buti kukomezya luyando ndotujisi kuli Leza?

⁸ Nzila aimwi mbotukonzya kupa kuti luyando ndotujisi kuli Jehova lukomene nkwiinda mukupaila kulinguwe buzuba abuzuba akumwaambila bwini mbotulimvwa. (Int. 25:4, 5) Mpoonya Jehova uyakuyiingula mipailo yesu. (1Joh. 3:21, 22) Mucizyi Khanh waku Asia, wakaamba kuti: “Kumatalikilo, ndakali kumuyanda Jehova akaambo kazintu nzyondakaiya kujatikizya nguwe. Pele nondakabona mbwaakali kwiingula mipailo yangu, ndakatalika kumuyanda kapati. Eeci cakapa kuti kandicita zintu zimukkomanisya.” b

9. Ino mbuti Paulo mbwaakatondezya kuti Timoteyo wakali kuyaambele mukutondezya luyando?

⁹ Nokwakainda myaka iili mbwiibede kuzwa naakaba Munakristo, Paulo wakazyibana amukubusi Timoteyo. Timoteyo wakali kumuyanda kapati Jehova abantu. Paulo wakaambila bana Filipi kuti: “Taakwe uumbi ngondikonzya kutuma uujisi moyo uuli mbuli [wa Timoteyo] uuyoozilanganya bweelede zintu zijatikizya ndinywe.” (Flp. 2:20) Aawa, Paulo tanaakali kwaamba mbwaakacibwene kubamba zintu Timoteyo naa mbwaakali mwaambi mubotu, pele Paulo wakakkomana kubona Timoteyo mbwaakali kubayanda bakwesu abacizyi. Tacidoonekwi buya kuti mbungano nzyaakali kuswaya Timoteyo zyakali kukkomana kapati kuswaigwa anguwe.—1Kor. 4:17.

10. Mbuti ba Anna abalumi babo mbobakatondezya luyando ndobakajisi kubakwesu abacizyi?

¹⁰ Andiswe tweelede kuyandaula nzila  yakugwasya bakwesu abacizyi. (Heb. 13:16) Amumvwe cakuluula caba Anna, ibaambidwe mucibalo cainda. Nokwakamana kucitika guwo liyoosya, balo abalumi babo bakaunka kuyooswaya mukwasyi umwi wa Bakamboni. Mpoonya bakajana kuti ciluli caŋanda yamukwasyi ooyu cakanyonyooka. Akaambo kaceeci, zisani zyabo zyoonse zyakabija dooti. Ba Anna bakaamba kuti: “Twakazibweza zisani zyabo akuyooziwasya, kuziccisa akuzipilusya kazipetedwe kabotu. Swebo twakabona kuti kunyina amulimo uuyakoomoonga ngotwakacita, pele eeci cakapa kuti tutalike kumvwana kapati kusikila sunu.” Ba Anna abalumi babo bakali kubayanda kapati bakwesu abacizyi calo cakapa kuti babagwasye.—1Joh. 3:17, 18.

11. (a) Ino bamwi inga balimvwa buti ciindi notutondezya kuti tulabayanda? (b) Kweelana alugwalo lwa Tusimpi 19:17, ino Jehova ulimvwa buti notutondezya luyando?

¹¹ Ciindi bamwi notubeendelezya caluyando, kanji-kanji balabona kuti tulasolekesya kumwiiya Jehova. Alimwi balalumba kapati akaambo kalugwasyo ndotubapa. Ba Khanh, ibaambwa kale, balabayeeya aabo ibakabagwasya. Bakaamba kuti: “Ndilabalumba kapati bacizyi ibakali kunditolelezya mumulimo wakukambauka. Bakali kuboola kuŋanda kundibweza, bakali kunditamba kucakulya mpoonya akundijosya alimwi kuŋanda. Lino ndabona kuti ooyu tiiwakali mulimo muubauba. Pele bakaubeleka calukkomano.” Bwini mbwakuti, tabali boonse bayootucitila zintu zibotu akaambo kazintu nzyotubacitila. Ba Khanh bakaamba boobu kujatikizya baabo ibakali kubagwasya: “Nocali kukonzyeka nondatondezya kulumba akaambo kazintu zyoonse nzyobakandicitila, pele tandikuzyi nkobakkala boonse. Nokuba boobo, Jehova ulikuzyi nkobakkala alimwi ndipailila kuti akabalumbule boonse akaambo kakundigwasya.” Ikaambo nkobakaamba ba Khanh nkamasimpe. Jehova ulazibona zintu zibotu zyoonse nzyotucitila bamwi, noziceya buti. Ubona kuti nkulyaaba  kupati alimwi uyootulumbula.—Amubale Tusimpi 19:17.

12. Mbuti bakwesu mbobakonzya kutondezya kuti balabayanda bantu bamumbungano? (Amubone azifwanikiso.)

¹² Ikuti naa muli mukwesu, mbuti mbomukonzya kutondezya luyando kuli bamwi akucita zintu zikonzya kubagwasya? Mukwesu umwi mukubusi wazina lya Jordan wakabuzya mwaalu ncaakali kukonzya kucita kutegwa agwasye mumbungano. Mwaalu ooyu wakamulumbaizya kapati akaambo kakuyaambele nkwaakacitide kale mpoonya wakamwaambila azimbi nzyaakali kukonzya kucita. Mucikozyanyo, wakakulwaizya Jordan kuti kafwambaana kusika kuŋanda ya Bwami akwaanzya bantu, katola lubazu lyamiswaangano, kakambauka lyoonse antoomwe akabunga kamulimo nkwazulilwa alimwi akuyandaula nzila zimbi mbwakonzya kugwasya bamwi. Ciindi Jordan naakatalika kuzicita zintu eezyi, wakazyiba mbozicitwa zintu zimwi alimwi akubayanda kapati bakwesu abacizyi. Wakazyiba kuti ciindi mukwesu naaba mukutausi, tacili nceciindi natalika kugwasya bamwi; pele inga uzumanana buya kubagwasya.—1Tim. 3:8-10, 13.

13. Ino luyando lwakamukulwaizya buti mukwesu Christian kusika azyeelelo zyakuba mwaalu alimwi?

¹³ Mbuti kuti kaindi mwakali mukutausi naa mwaalu? Jehova ulaiyeeya milimo njomwakamubelekela kaindi alimwi aluyando ilwakamukulwaizya kwiibeleka. (1Kor. 15:58) Alimwi ulalubona luyando ndomuzumanana kutondezya. Mukwesu Christian wakatyompwa kapati ciindi naakagwisyigwa abwaalu. Pele wakaamba kuti: “Akaambo kaluyando, ndakasala kuzumanana kumubelekela Jehova kusikila mpondigolela tacikwe makani ndijisi mikuli naa pe.” Mukuya kwaciindi, wakasalwa alimwi kuba mwaalu. Mukwesu Christian wakaamba kuti: “Kumatalikilo ndakawayawaya kuzumina kuba mwaalu akaambo kakulibilika. Pele ndakayeeya  kuti, ikuti naa Jehova wakali kuyanda kuti ndibe mwaalu alimwi, ndilazumina akaambo kaluyando ndondijisi kulinguwe alimwi akubakwesu abacizyi.”

14. Ncinzi ncomwiiya kumajwi ngaakaamba mucizyi umwi waku Georgia?

¹⁴ Babelesi ba Jehova balatondezya luyando kuli basimukobonyina. (Mt. 22:37-39) Mucikozyanyo, mucizyi Elena wakucisi ca Georgia wakaamba kuti: “Kumatalikilo, ndakali kukambauka akaambo buyo kaluyando ndondijisi kuli Jehova. Pele luyando oolu nolwakali kuyaabukomena, alwalo luyando ndondakajisi kubantu lwakakomena. Aboobo ndakali kusola kweezeezya mapenzi ngobakajisi alimwi amakani aakali kukonzya kubakkomanisya. Akaambo kakusolekesya kucita boobu, cakandipa kuba aluyandisisyo lwakubagwasya.”—Rom. 10:13-15.

15-16. Kweelana ambokutondezyedwe muzifwanikiso, nzilongezyo nzi ziboola akaambo kakutondezya luyando kuli bamwi?

¹⁵ Ciindi notutondezya luyando kubakwesu, tabali buyo mbabo balikke bagwasyigwa. Mucikozyanyo, nobwakatalika bulwazi bwa COVID-19, mukwesu Paolo abakaintu bakwe bakagwasya bacizyi banji bacembeede kuzyiba mbobakonzya kukambauka kwiinda mukubelesya mafooni, matabbuleti naa makkompyuta. Mucizyi uumwi iwakali kwaalilwa kubelesya kancini kakwe kumatalikilo, awalo wakacizyiba. Mane buya wakacikonzya kutamba bacibbululu ku Ciibalusyo kwiinda mukubelesya nkako. Cikkomanisya ncakuti bali 60 bakacikonzya kujanika kwiinda mukubelesya videoconference!  Aboobo mucizyi ooyu ababbululu bakwe boonse bakagwasyigwa akaambo kaluyando ndwaakatondezya mukwesu Paolo abakaintu bakwe. Mukuya kwaciindi, mucizyi ooyu wakalembela mukwesu Paolo kuti: “Akaka twalumba kapati kutuyiisya tobamacembele. Tandikalubi kubona Jehova mbwatubikkila maano alimwi akubeleka canguzu nkomwakacita kutegwa mutugwasye.”

¹⁶ Zyakuluula zili boobu, zyakamuyiisya ciiyo ciyandika kapati mukwesu Paolo. Wakaiya kuti luyando ncintu ciyandika kapati kwiinda luzyibo naa kucizyiba kucita cintu cimwi. Wakaamba kuti: “Ndakali mulangizi wabbazu. Pele ndilizyi kuti nokuba kuti basikumwaya ambweni bakaaluba makani ngondakali kupa, baciziyeeya zintu zibotu nzyondakabacitila.”

17. Mbaani abamwi ibayoogwasyigwa ciindi notutondezya luyando?

¹⁷ Ciindi notutondezya luyando kuli bamwi, andiswe lwesu tulagwasyigwa munzila nzyotutayeeyeli. Mukwesu Jonathan uukkala ku New Zealand, wakakazumina kaambo aaka. Bumwi buzuba mu Mujibelo syikati kakupya kapati, wakabona painiya umwi kakambauka alikke mumugwagwa. Aboobo mukwesu Jonathan wakasala kuti kabeleka antoomwe apainiya ooyu mu Mujibelo syikati. Aciindi aawa, mukwesu Jonathan kunyina naakazyi mbwaakali kuyoogwasyigwa akaambo kakulyaaba kunoobeleka apainiya ooyu. Mukwesu Jonathan wakaamba kuti: “Aciindi aawa, tiindakali kukukkomanina kukambauka. Pele nondakali kuswiilila mbwaakali kuyiisya painiya ooyu alimwi akubona mbwaakali kuzwidilila, ndakatalika kuukkomanina mulimo wakukambauka. Alimwi wakaba mulongwe mubotu kapati iwakandigwasya kuyaambele kumuuya, kubukkomanina bukambausi alimwi akuba cilongwe ciyumu a Jehova.”

18. Ncinzi Jehova ncayanda kuti tucite?

¹⁸ Jehova uyanda kuti toonse tukomezye luyando ndotujisi kulinguwe alimwi akuli bamwi. Kweelana ambotwaiya, tulakonzya kuyumya luyando ndotujisi kuli Jehova kwiinda mukubala Jwi lyakwe, kuzinzibala kuyeeya nzyotubala alimwi akupaila kulinguwe lyoonse. Tulakonzya kuyumya luyando ndotujisi kubakwesu abacizyi kwiinda mukubapa nzyobayandika. Aboobo mboluyaabukomena luyando lwesu, tuyoozumanana kuba acilongwe ciyumu a Jehova alimwi abakwesu abacizyi. Alimwi zilongwe eezyi ziyoozumanana mane kukabe kutamani!