1. Muunzila nzi Banakristo mobeelede kuba mbuli cisamu? (Amubone acifwanikiso.)

 “MUWO taukonzyi kutyola cisamu cibbenda.” Majwi aaya atondezya kuti zisamu ziyandika kuti kazili ziteteete naa kazibbenda ciindi nokuli muwo uulaanguzu kutegwa zitatyoki. Andiswe Tobanakristo tweelede kuba bantu banyoneka, ibalibambilide kubbenda kutegwa tuzumanane kuyuma kumuuya. Mubuti? Tweelede kuba bantu banyoneka kwiinda mukucinca ciindi bukkale bwesu nobwacinca alimwi akulemeka mizeezo yabamwi azintu nzyobasala kucita.

2. (a) Mbube nzi bukonzya kutugwasya kucinca kweelana abukkale? (b) Ino ncinzi ncotutiilange-lange mucibalo eeci?

² Mbotuli babelesi ba Jehova, tweelede kuba bantu banyoneka. Kuyungizya waawo, tweelede kuba bantu balicesya alimwi basilweetelelo. Mucibalo eeci, tulabona bube oobu mbobwakabagwasya Banakristo bamwi ciindi bukkale nobwakacinca. Alimwi tulabona mbobukonzya kutugwasya andiswe. Pele cakusaanguna, atubone Jehova a Jesu mbobali cikozyanyo cibotu cakunyoneka.

3. Ino tuzyi buti kuti Jehova ulanyoneka?

³ Jehova waambwa kuti “Nindomba” nkaambo ulakakatila, tazungaani pe. (Dt. 32:4) Nokuba boobo, ulanyoneka. Mboziyaabucinca zintu munyika iino, Jehova uluujisi kucinca kutegwa azuzikizye zisyomezyo zyakwe. Jehova wakalenga bantu mucinkonzya cakwe munzila yakuti kabacikonzya kucinca kweelana abukkale. Mu Bbaibbele tulajana njiisyo zikonzya kutugwasya kusala cabusongo mubukkale buli boonse motukonzya kulijana.  Aboobo cikozyanyo ca Jehova alimwi anjiisyo nzyaatupa zilatugwasya kuzyiba kuti walo ulanyoneka nokuba kuti “Nindomba.”

4. Amupe cikozyanyo citondezya kuti Jehova ulanyoneka. (Levitiko 5:7, 11)

⁴ Jehova ulacita zintu cakulondoka alimwi ulanyoneka. Kunyina naciindizya kujatikizya zintu zyalangila kubantu. Mucikozyanyo, amubone Jehova mbwaakatondezya kuti ulanyoneka kujatikizya bana Israyeli. Tanaakali kulangila kuti boonse kabapa zipaizyo zyeelene, nkaambo bamwi bakali bavwubi ibamwi bakali bacete. Mubukkale bumwi, wakali kuzumizya kuti umwi aumwi kapa kweelana abukkale bwakwe.—Amubale Levitiko 5:7, 11.

5. Amupe cikozyanyo icitondezya kuti Jehova ulalicesya alimwi ngusilweetelelo.

⁵ Kulicesya kwa Jehova alweetelelo kupa kuti kanyoneka. Mucikozyanyo, Jehova wakatondezya kuti ulalicesya ciindi naakali kuyanda kunyonyoona munzi mubyaabi wa Sodoma. Kwiinda mumungelo, wakaambila Loti kuti atijile kumalundu. Pele Loti wakayoowa kuunka nkuko. Aboobo wakalomba kuti walo amukwasyi wakwe baunke ku Zoari, idolopo syoonto, alyalo ndyaakali kuyanda kunyonyoona Jehova. Naakali kuyanda, Jehova naakaambila Loti kuti atobele buyo ncaakaambilwa. Pele muciindi cakucita boobo, wakamuzumizya Loti kuunka ku Zoari, alimwi tanaakalinyonyoona dolopo eeli. (Matl. 19:18-22) Nokwakainda myaanda yamyaka, Jehova wakatondezya lweetelelo kubantu bakali kukkala ku Nineve. Wakatuma musinsimi Jona kuti akaambilizye lunyonyooko lwakali kuyoosikila munzi ooyu antoomwe abantu babi ibakali mumo. Pele ciindi bana Nineve nobakeempwa, Jehova wakabafwida lubomba alimwi tanaakaunyonyoona munzi ooyu.—Jon. 3:1, 10; 4:10, 11.

6. Amwaambe zikozyanyo zimwi izitondezya Jesu mbwaakaiya kunyoneka kwa Jehova.

⁶ Jesu wakakwiiya kunyoneka kwa Jehova. Wakatumwa kuboola anyika kuzookambauka “kumbelele zisweekede zyamuŋanda ya Israyeli.” Pele wakatondezya kuti ulanyoneka ciindi naakali kucita mulimo ooyu. Aciindi cimwi, mukaintu umwi iwatakali muna Israyeli wakamulomba kuti aponye mwanaakwe musimbi, ‘iwakanjidwe daimona ilyakali kumupenzya kapati.’ Calubomba, Jesu wakacita ncaakalomba mukaintu ooyu akuponya mwanaakwe. (Mt. 15:21-28) Amubone cikozyanyo acimbi. Musyule mumulimo wakwe, Jesu wakaamba kuti: “Kufwumbwa uundikaka . . . , andime ndiyoomukaka.” (Mt. 10:33) Pele sena wakamukaka Petro, walo iwakamukaka ziindi zyotatwe? Peepe. Jesu wakalizyi kuti Petro wakeempwa alimwi wakali muntu uusyomeka. Aboobo ciindi naakabusyigwa, Jesu wakalibonya kuli Petro ambweni akumusyomezya kuti wakamulekelela alimwi akuti wakali kumuyanda kapati.—Lk. 24:33, 34.

7. Kweelana alugwalo lwa Bafilipi 4:5, ino tuyanda kuti bantu kabatubona buti?

⁷ Twabona kuti Jehova a Jesu balanyoneka. Ino mbuti kujatikizya ndiswe? Jehova uyanda kuti andiswe katuli bantu banyoneka. (Amubale Bafilipi 4:5.) Mu Bbaibbele limwi,  kapango aaka kakasandululwa kuti: “Amube aampuwo yakuba muntu uunyoneka.” Aboobo tulakonzya kulibuzya kuti: ‘Sena bantu bandizyi kuti ndili muntu uunyoneka alimwi silubomba? Naa bandizyi kuti ndili muntu uukatazya, uunyina lubomba alimwi uutanyoneki? Sena lyoonse ndiyanda kuti bamwi kabacita zintu kweelana ambondiyeeya? Naa sena ndilabaswiilila bamwi akutobela nzyobaamba ikuti kaceelela?’ Ikuti katuli bantu banyoneka, citondezya kuti tulamwiiya Jehova alimwi a Jesu. Lino amuleke tulange-lange bukkale bobilo motuyandika kunyoneka, nkokuti ciindi bukkale bwesu nobwacinca alimwi aciindi mizeezo yabamwi azyakusala zyabo nozyaindana azyesu.

8. Ncinzi cikonzya kutugwasya kuba bantu banyoneka ciindi bukkale nobwacinca? (Amubone abupanduluzi buyungizyidwe.)

⁸ Tuyandika kuba bantu banyoneka ciindi bukkale nobwacinca. Kucinca kwabukkale kulakonzya kuleta buyumuyumu mbotwatali kuyeeyela. Mucikozyanyo, tulakonzya kuciswa bulwazi bumwi cakutayeeyela. Naa kucinca kwabweende bwamali amakwebo, naa kucinca kwamfwulumende kubusena nkotukkala zilakonzya kunyonganya buumi bwesu cakutayeeyela. (Muk. 9:11; 1Kor. 7:31) Alimwi cilakonzya kutukatazya kuti naa mbunga yatupa mulimo uumbi naa kutwaambila kuyoobelekela kubusena bumbi. Pele kufwumbwa naa twaba abuyumuyumu buli buti, inga twacikonzya kucinca kweelana abukkale ikuti naa twatobela nzila eezyi zyone: (1) kuzumina kuti zintu zyacinca, (2) kubikkila maano kuzintu zyakumbele, (3) kubikkila maano kuzintu zibotu, mpoonya (4) akugwasya bamwi. b Amuleke tubone bakwesu abacizyi bamwi mbobagwasyigwa kwiinda mukutobela nzila eezyi.

9. Ncinzi cakagwasya banabukwetene bamwi bamisyinali kuliyumya ciindi nobakali mubukkale bukatazya?

⁹ Amuzumine kuti zintu zyacinca. Ba Emanuele aba Francesca bakatumwa kuyoobelekela kucisi cimbi kabali bamisyinali. Ciindi nobakatalika buyo kwiiya mwaambo alimwi akutalika kuzyibana abakwesu abacizyi bamumbungano yabo mpya, kwakabbuka bulwazi bwa COVID-19 aboobo bakeelede kuleka kuyanzana abantu cacigaminina. Mpoonya cakutayeeyela, banyina ba Francesca bakafwa. Ba Francesca bakaliyandide kuunka kwabo kutegwa bakabe abanamukwasyi, pele tiibakali kukonzya kuunka akaambo kabulwazi. Ino ncinzi cakabagwasya kuliyumya mubukkale oobu bukatazya? Cakusaanguna, ba Emanuele aba Francesca bakali kupaila antoomwe kulomba busongo kutegwa bacikonzye kuliyumya buzuba bumwi abumwi. Jehova wakali kuyiingula mipailo yabo kwiinda muzyakulya zyakumuuya izipegwa aciindi ceelede. Mucikozyanyo, bakakulwaizyigwa kapati avidiyo imwi mwalo mukwesu umwi mwaakaamba kuti: “Ikuti twafwambaana kubuzumina bukkale bupya, tuyoofwambaana kuba alukkomano akuba acoolwe cakubelekela Jehova, ikugwasya bamwi.” c Cabili, bakayaambele kucita bukambausi bwakubelesya fooni mane buya bakatalisya aciiyo ca Bbaibbele. Catatu, bakazumina kugwasyigwa abakwesu abacizyi. Mucizyi uumwi wakali kubatumina kagwalo ikajisi akapango kamu Bbaibbele abuzuba kwamwaka. Mbubwenya buyo, kuti andiswe twabuzumina bukkale bwesu bupya, tuyoojana lukkomano muzintu nzyotukonzya kucita kweelana abukkale.

10. Ino mucizyi umwi wakacita buti ciindi nokwakaba kucinca mubuumi bwakwe?

 ¹⁰ Amubikkile maano kuzintu zyakumbele, alimwi azintu zibotu. Ba Christina, imucizyi waku Romania uukkala ku Japan, bakatyompwa kapati ciindi mbungano ya Cikuwa nkobakali kuswaangana noyakajalwa. Nokuba boobo, kunyina nobakazumanana kuyeeya cakacitika. Muciindi caboobo, bakasala kuunka kumbungano yakali kubelesya mwaambo waci Japanese akusolekesya kukambauka mumwaambo ooyu. Kumane bakalomba mukaintu umwi ngobakali kubeleka limwi kaindi kuti kabayiisya mwaambo waci Japanese. Mukaintu ooyu wakazumina kuyiisya ba Christina ci Japanese kubelesya Bbaibbele abroshuwa yakuti Amupone Kukabe Kutamani! Aboobo ba Christina bakaiya kuwaambaula kabotu mwaambo ooyu, pele cikkomanisya kapati ncakuti mukaintu ooyu iwakali kubayiisya awalo wakayanda kuzyiba zinji kujatikizya Bbaibbele. Ciindi notuzumanana kubikkila maano kuzintu zyakumbele kutali zyamusyule alimwi akuzilanga kabotu zintu, kucinca kwabukkale kulakonzya kutuletela zilongezyo nzyotwatali kuyeeyela.

11. Ncinzi cakagwasya banabukwetene bamwi ibakajisi penzi lyamali?

¹¹ Amugwasye bamwi. Banabukwetene bamwi ibakkala mucisi mulimo wesu moulesyedwe bakaba apenzi lyakujana mali ciindi makwebo aamucisi naakanyongana. Ino ncinzi cakabagwasya? Cakusaanguna, bakasola kuubya-ubya buumi bwabo. Kumane, muciindi cakubikkila maano kumapenzi ngobakajisi, bakasala kubikkila maano kugwasya bamwi kwiinda mukujata bubi mumulimo wakukambauka. (Mil. 20:35) Balumi bakaamba kuti: “Kujata bubi mumulimo wakukambauka kwakatugwasya kubikkila maano kucita kuyanda kwa Leza muciindi camapenzi eesu.” Aboobo ciindi bukkale bwesu nobwacinca, tweelede kuyeeya mbociyandika kapati kuzumanana kugwasya bamwi, kwaambisya kwiinda mukutola lubazu mumulimo wakukambauka.

12. Ino cikozyanyo camwaapostolo Paulo inga catugwasya buti kucinca ciindi notuli mubukambausi?

¹² Mumulimo wesu wakukambauka, tuyandika kuba bantu balibambilide kucinca. Bantu mbotukambaukila bajisi mizeezo yiindene-indene kujatikizya Leza, bazwa mumasena aasiyene-siyene azilengwa. Mwaapostolo Paulo wakali kucinca-cinca, alimwi tulakonzya kwiiya cikozyanyo cakwe. Jesu wakasala Paulo kuba “mwaapostolo kuli bamasi.” (Rom. 11:13) Aboobo Paulo wakali kukambauka kuba Juda, ba Giriki, bantu bayiide, bantu bakkala kumunzi, beendelezi bamfwulumende alimwi abami. Pele kutegwa abasike amoyo bantu boonse aaba ibakali kuzwa mubukkale bwiindene-indene, Paulo wakaba “zintu zyoonse kubantu bamisyobo yoonse.” (1Kor. 9:19-23) Wakali kuzibikkila maano zilengwa zyabo, mbobakakomezyegwa alimwi azintu nzyobakali kusyoma baswiilizi bakwe ,mpoonya akucinca kweelana abukkale. Andiswe tulakonzya kuyaambele mumulimo wesu ikuti katucinca kweelana abukkale alimwi akusolekesya kujana nzila mbotu yakumusika amoyo muntu umwi aumwi.

13. Nintenda nzi yaambidwe kulugwalo lwa 1 Bakorinto 8:9 njotukonzya kweeleba kuti naa katwiilemeka mizeezo yabamwi?

¹³ Kunyoneka alimwi kulatugwasya kulemeka mizeezo yabamwi. Mucikozyanyo, bacizyi bamwi balakukkomanina kulipenta-penta, pele bamwi tabakukkomanini. Banakristo bamwi balanywa bukoko cansaizi, pele bamwi basala kutasolela limwi. Banakristo boonse balayanda kuba abuumi buli kabotu, pele balaindana caboola kukusala busilisi mbobayanda.  Ikuti katulimvwa kuti nzyotusala swebo lyoonse nzeziluzi akutalika kukulwaizya bakwesu abacizyi kuti abalo basale mbuli ndiswe, tulakonzya kubatyompya bamwi akunyonganya lukamantano mumbungano. Eelo kaka inga tiitwayanda kucita boobo! (Amubale 1 Bakorinto 8:9; 10:23, 24) Atulange-lange zikozyanyo zyobilo zitondezya kubelesya njiisyo zyamu Bbaibbele mbokukonzya kutugwasya kuzilanga kabotu zintu alimwi akuzumanana kuba aluumuno.

14. Ninjiisyo nzi zyamu Bbaibbele nzyotweelede kuyeeya kujatikizya makani aansamino akulibamba?

¹⁴ Nsamino akulibamba. Jehova kunyina natwaambila zisani nzyotweelede kusama, muciindi caboobo wakatupa njiisyo zyotweelede kutobela. Tweelede kusama kabotu munzila iitondezya kuti tuli babelesi ba Leza, ikutondezya kunyoneka, bulemu alimwi ‘akulibatamika.’ (1Tim. 2:9, 10; 1Pet. 3:3) Aboobo, tatweelede kusama munzila iipa kuti bantu kabayeeya buyo kujatikizya nsamino yesu. Njiisyo zyamu Bbaibbele alimwi zilakonzya kugwasya baalu kutabikkila bamwi milawo iijatikizya nsamino alimwi akubamba masusu. Mucikozyanyo, baalu bamumbungano imwi bakali kuyanda kugwasya bakwesu bakubusi ibakali kwiiya bantu bamunyika kubamba masusu mafwaafwi, pele kaatakamwidwe. Mbuti baalu mbobakali kukonzya kubagwasya kakunyina kubikka mulawo? Mulangizi wabbazu wakakulwaizya baalu kwaambila bakwesu aaba kuti: “Ikuti naa muli acibumbili mpoonya baswiilizi batalika kubikkila maano kapati kujatikizya mbomuboneka muciindi cakubikkila maano kuli ncomwaamba, nkokuti inga kuli cilubide kujatikizya nsamino yanu alimwi akulibamba.” Eeci cakabagwasya bakubusi aaba kuzyiba ncobakeelede kucita, alimwi baalu kunyina nobakabikka mulawo. d

15. Ino milawo nzi yamu Bbaibbele anjiisyo izitugwasya ciindi notusala makani aabusilisi? (Baroma 14:5)

 ¹⁵ Busilisi. Munakristo umwi aumwi weelede kulisalila kujatikizya busilisi mbwayanda. (Gal. 6:5) Ciindi Banakristo nobasala busilisi, beelede kutobela milawo yamu Bbaibbele iijatikizya kutantamuka bulowa alimwi amizimo. (Mil.15:20; Gal. 5:19, 20) Pele bunji bwamakani aambi aajatikizya busilisi, beelede kulisalila. Ibamwi bayandaula busilisi kuzwa kuli basimukobonyina, pele bamwi babelesya nzila zimbi buyo. Tacikwe makani ambotulimvwa kujatikizya busilisi bumwi, tweelede kukulemeka kusala kwabakwesu abacizyi kujatikizya makani abusilisi mbobayanda. Mubukkale oobu tweelede kunooyeeya twaambo ootu tutobela: (1) Bulikke Bwami bwa Leza mbobuyooponya bantu cakumaninina. (Is. 33:24) (2) Munakristo umwi aumwi weelede “kusinizya cakumaninina” kujatikizya cintu ciyandika kapati kulinguwe. (Amubale Baroma 14:5.) (3) Tatweelede kubabeteka bamwi naa kucita cintu cikonzya kubalebya. (Rom. 14:13) (4) Banakristo balatondezya luyando alimwi balizyi kuti lukamantano lwambungano lulayandika kapati kwiinda mbobayeeya. (Rom. 14:15, 19, 20) Kuti twazumanana kutuyeeya twaambo ootu, tuyooyumya cilongwe cesu abakwesu abacizyi alimwi akukulwaizya muuya walukamantano mumbungano.

16. Mbuti mwaalu mbwakonzya kutondezya kuti ulanyoneka caboola kunzila mbwayendelezya baalunyina? (Amubone acifwanikiso.)

¹⁶ Baalu beelede kuba cikozyanyo cibotu cakunyoneka. (1Tim. 3:2, 3) Mucikozyanyo, mwaalu teelede kuyeeya kuti mizeezo yakwe yeelede kunootobelwa lyoonse akaambo buyo kakuti ngomupati naa nguujisi luzyibo lunji akati kabaalu. Weelede kuyeeya kuti muuya wa Jehova ulakonzya kupa kuti mwaalu uuli woonse mukabunga kabaalu aambe kaambo kamwi kakonzya kugwasya kupanga cakusala cili kabotu. Alimwi kuti kakunyina njiisyo yamu Bbaibbele yasotokwa, mwaalu uunyoneka ulakuzumina kusala kwakabunga kabaalu, nokuba kuti walo inga kajisi muzeezo wiindene.

17. Ino tugwasyigwa buti akaambo kakuba bantu banyoneka?

¹⁷ Banakristo balajana zilongezyo zinji akaambo kakuba bantu banyoneka. Tulakkomana kuba acilongwe ciyumu abakwesu abacizyi alimwi mumbungano kulaba luumuno. Bulatukkomanisya bube bwiindene-indene alimwi azilengwa zili akati kabakombi ba Jehova. Kwiinda zyoonse, tulakkomana kuzyiba kuti twiiya Leza wesu uunyoneka, Jehova.