Bataata bakali baalu mucikombelo ca United Church of Canada, aboobo nsondo ansondo mebo amwanookwesu bakali kutwaambila kuunka kukkilasi yabana mu Nsondo kuseeni, mpoonya twakali kubasangana kuswiilila mulumbe aciindi ca 11:00 hrs. Kumazuba, twakali kuunka ku Ŋanda ya Bwami abamaama. Aboobo cakali cuubauba kubona kwiindana kwakaliko akati kazikombelo eezyi zyobilo.

Bamaama bakaambila balongwe babo ba Bob aba Marion Hutcheson zintu nzyobakali kwiiya mu Bbaibbele, aboobo abalo bakaba Bakamboni ba Jehova. Mu 1958, Mukwesu alimwi a Mucizyi Hutcheson antoomwe abana babo basankwa botatwe, bakanditolelezya kumuswaangano wamazuba aali 8 wakuti “Divine Will International Assembly” ku New York City. Ndalanga musyule, ndiyeeya kuti tiicakali cuubauba kulimbabo kunditolelezya kumuswaangano ooyu, pele ngumwi wamiswaangano iyakandikkomanisya kapati mubuumi bwangu.

Nondakali kukubuka, twakali kukkala afaamu alo mpondakali kukkomana kapati kulanganya banyama. Aboobo ndakayeeya kuti nditalike lwiiyo lwakuba dokota wabanyama. Bamaama bakaambila mwaalu umwi mumbungano kujatikizya makanze aangu. Caluzyalo mwaalu ooyu wakandiyeezya kuti tupona “kumazuba aamamanino,” akundigwasya kubona kuunka kuyunivesiti kwamyaka minji mbokwakali kukonzya  kucijatikizya cilongwe cangu a Jehova. (2Tim. 3:1) Aboobo ndakasala kuti nditaunki kuyunivesiti.

Nondakamana lwiiyo lwakusekondali ndakacili kuyeeya ncondakali kukonzya kucita. Nokuba kuti ndakali kutola lubazu mumulimo wamumuunda nsondo ansondo, tiindakali kukukkomanina kukambauka alimwi tiindakali kuyeeya kuti ndakali kukonzya kubapainiya. Bataata alimwi amwanookwabo, balo ibatakali Bakamboni ba Jehova, bakatalika kundikulwaizya kubeleka mulimo wakumubili aakkampani imwi iyakazyibidwe kapati ku Toronto. Mwanookwabo abataata wakajisi cuuno caatala akkampani eeyi, aboobo ndakazumina kutalika kubeleka.

Ku Toronto, ciindi cinji ndakali kucimanina kumulimo akuyanzana abantu batakali Bakamboni, calo cakapa kuti kandisotaukila kujanika kumiswaangano alimwi akutola lubazu mumulimo wamumuunda. Kumatalikilo ndakali kukkala abasyaanene ibatakali Bakamboni, pele nobakafwa, ndakeelede kuyandaula kumbi kwakukkala.

Mukwesu a Mucizyi Hutcheson, balo ibakanditolelezyede kumuswaangano wacooko mu 1958, bakali mbuli bazyali bangu. Bakandiita kutegwa katukkala limwi muŋanda yabo alimwi bakandigwasya kapati kuyumya cilongwe cangu a Jehova. Mu 1960, ndakabbapatizyigwa antoomwe amwanaabo John. Ba John bakatalika bupainiya, akaambo kaceeci ndakayungizya ciindi ncondakali kutola mumulimo wamumuunda. Bakwesu mumbungano bakakubona kuyaambele kwangu, aboobo mukuya kwaciindi ndakasalwa kuba mulangizi Wacikolo Camulimo Weendelezyegwa a Leza. a

Mu 1966, ndakakwata mucizyi Randi Berge, walo iwakali painiya musungu alimwi iwakajisi luyandisisyo lwakuyoobelekela kubusena bubulide. Mulangizi wesu wabbazu wakatubikkila maano kapati akutukulwaizya kuyoogwasyilizya mbungano yakali ku Orillia, Ontario. Aboobo titwakawayawaya kuunka.

Mbotwakasikila buyo ku Orillia, ndakabasangana bakaintu bangu kuba painiya waciindi coonse. Ndakakkomana kapati mbubwenya mbuli mbabo! Nondakatalika kubeleka canguzu kutegwa ndiyaambele mumulimo wabupainiya, ndakatalika kujana  lukkomano luboola akaambo kakubelesya Bbaibbele akubona bantu kabakamvwisya kasimpe. Cakatukkomanisya kapati kugwasya banabukwetene bamwi ku Orillia kucinca bukkale bwabo akuba babelesi ba Jehova.

Katuli kukuswaya ku Toronto, ndakazyibana aba Arnold MacNamara, balo ibakali kubelekela a Beteli. Bakandibuzya naa twakali kuyanda kuba bapainiya baalubazu. Mpoonya mpoonya ndakaingula kuti: “Inzya tulayanda! Inga twaunka kuli koonse pele kutali ku Quebec!” Ndakajisi kuyeeya kutaluzi nkobakajisi bantu baku Canada ibakali kwaambaula Cikuwa, kujatikizya bantu ibakali kwaambaula ci French ibakali kukkala ku Quebec. Aciindi eeci basimapolitikisi bamwi bakali kuyanda kuti Quebec ileke kuzulilwa mu Canada.

Ba Arnold bakaingula kuti,“ Calino ku Quebec nkonkuko kolikke mutabi nkoutuma bapainiya baalubazu.” Aboobo ndakazumina kuunka. Ndakalizyi kuti bakaintu bangu bakali kuyanda kuyoobelekela nkuko. Kumbele, ndakazyiba kuti ooku nkumwi kwakusala kwiinda kubota nkotwakacita mubuumi bwesu!

Noyakamana kkilasi yansondo zyosanwe yakwiiya ci French, mebo abakaintu bangu antoomwe amukwasyi wabanabukwetene umwi twakaunka ku Rimouski, ikulampa makkilomita aali 540 kuzwa ku Montreal. Kuli zinji nzyotwakeelede kwiiya, eeci cakalibonya ciindi notwakali kumuswaangano wambungano nondakali kubala zyakwaambilizya. Ndakabala kuti kumuswaangano wacooko uutobela kuyoojanika bantu banji ibazwa ku “ostrich” muciindi cakwaamba kuti ibazwa ku “Austria.”

Ku Rimouski, twakatalika kukkala abacizyi batakwetwe basungu bone alimwi amukwesu amucizyi Huberdeaus abana babo basimbi bobilo. Mukwesu amucizyi Huberdeau bakali kulentiŋa ŋanda mpati alimwi bapainiya boonse ibakali kukkala mumo bakali kugwasyilizya kubbadela leenti. Ŋanda eeyi twakali kuyiita kuti White House nkaambo nkoili kumbele yakapentedwe mubala uutuba alimwi yakajisi misemu iituba. Kanji-kanji mwakali kukkala bantu bali 12 naa 14. Mbwaanga twakali bapainiya baalubazu, mebo abakaintu bangu twakali kuunka mubukambausi kuseeni, syikati akumangolezya, aboobo twakali kukkomana kuba amuntu uutusangana mubukambausi, nociba ciindi nokwakali kutontola kapati kumangolezya.

Twakatalika kumvwana kapati abapainiya aaba basyomeka cakuti cakaba mbuli kuti tuli banamukwasyi. Zimwi ziindi twakali kukkala antoomwe katuyota mulilo naa kulida antoomwe. Mukwesu umwi wakali mwiimbi, aboobo bunji bwaziindi mu Mujibelo kumangolezya twakali kwiimba akuzyana.

Bantu banji ku Rimouski bakali kukukkomanina kwiiya Bbaibbele! Mumyaka iili 5 buyo, twakakkomana kubona basikwiiya Bbaibbele banji kabayaambele akusika antaamu yakubbapatizyigwa. Mbungano yakakomena cakuti yakaba abasikumwaya bali 35.

Ku Quebec, twakatambula lwiiyo lubotu lwakatugwasya kuba bakambausi bacibwene. Twakabona Jehova mbwaakatugwasya mumulimo wakukambauka alimwi akutupa zintu zyakumubili nzyotwakali kuyandika. Kuyungizya waawo, twakatalika kubayanda bantu ibakali kwaambaula mwaambo waci French, mwaambo wabo alimwi azilengwa. Eeci cakapa kuti tutalike kuziyanda azyalo zilengwa zimbi.—2Kor. 6:13.

Cakutayeeyela, bamutabi bakatulomba kuti tuunke kudolopo lya Tracadie, ilyakali kujwe ankomwe ya New Brunswick. Eeci tiicakali cuubauba nkaambo twakazwide aakusaina cipepa cakulentiŋa ŋanda imwi alimwi ndakasainide cipepa cakuti kandiyiisya acikolo cimwi mazuba amwi. Kuyungizya waawo, bantu mbotwakali kuyiisya Bbaibbele bamwi, bakazwide  akuba basikumwaya alimwi kwakali mulimo wakuyaka Ŋanda ya Bwami.

Twakapaila kwamazuba obilo kujatikizya makani aaya alimwi twakaunka kuyookubona, kwakaliindene aku Rimouski. Aboobo twakasala kuti tuunke nkaambo kwakali kuyanda kwa Jehova. Twakamusola Jehova akubona mbwaakali kugusya cisinkilizyo cimwi acimwi. (Malk. 3:10) Mbwaanga bakaintu bangu bakalisimide kumuuya, bakalilyaabide aboobo tiicakatukatazya kulonga.

Mumbungano yesu mpya ba Robert Ross mbobakali baalu balikke. Bakali kubeleka mumbungano eeyi kabali bapainiya abakaintu babo ba Linda, alimwi bakasala kuzumanana kukkala nociba ciindi mwanaabo wakusaanguna naakazyalwa. Nokuba kuti bakali kulanganya mwanaabo musankwa, bakatutambula kabotu alimwi bakali basungu mumulimo wakukambauka.

Twakabeleka ku Tracadie katuli bapainiya kwamyaka yobilo, mpoonya twakatambwa kuyoobelekela mubbazu, icintu ncotwatakali kuyeeyela. Twakabeleka kwamyaka iili 7 mubbazu ilyakali kubelesya mwaambo wa Cikuwa, kumane twakatumwa kuyoobelekela mubbazu lyakali kubelesya ci French mu Quebec. Mulangizi wesu wacooko ku Quebec, mukwesu Léonce Crépeault, wakali kundilumbaizya akaambo kamakani ngondakali kupa. Pele alimwi lyoonse wakali kundibuzya kuti, “Mbuti mbokonzya kwaapa munzila iigwasya kapati?” b Kundibikkila maano kuli boobu kwakapa kuti kandiyiisya munzila iigaminide alimwi iitakatazyi.

Mulimo umwi ngonditakalubi ngooyo ngondakali kubeleka a Muswaangano Wamasi mu 1978 wakuti “Victorious Faith” ku Montreal. Ndakali kubelekela kudipatimenti yazyakulya. Kwakali kuyoojanika bantu basika ku 80,000, alimwi twakeelede kutobela bubambe bupya bwakupa bantu zyakulya. Zintu zyoonse zyakali zipya: zibelesyo, zyakulya izyakeelede kujikwa alimwi ambozyakeelede kujikwa. Twakajisi mafiliji mapati aali 20, pele zimwi ziindi tanaakali kubeleka kabotu. Mubuzuba bwakuti muswaangano ulatalika juunza, tiicakali kukonzyeka kuzibambila limwi zintu zyoonse musitediyamu akaambo kamusobano iwakeelede kucitika buzuba oobo, aboobo zintu twakazibikka akati kamasiku. Alimwi twakeelede kutalika kujika cakulya cakuseeni kalitanapola zuba! Twakakatala kapati, pele ndakaiya ziiyo zibotu kapati, kubona babelesima mbobakali kubeleka canguzu, mbobakasimide alimwi ambobakali kuseka-seka. Twakaba acilongwe ciyumu kapati, cakuti cicizumanana anoliba lino. Eelo kaka cakali kukkomanisya kujanika  amuswaangano ooyu uuyandika kapati ku Quebec, icooko nkobakali kupenzyegwa kapati bakwesu abacizyi kuma 1940 a 1950!

Ndakaiya zinji kubalangizi bamabazu bamwi lyamiswaangano mipati ku Montreal. Mwaka umwi, mukwesu David Splane, lino uubelekela mu Kabunga Keendelezya, ngowakali mulangizi wamuswaangano. Amuswaangano wakatobela, nondakalombwa kuti ndibe mulangizi wamuswaangano, Mukwesu Splane wakandigwasya kapati.

Mu 2011, notwakakkwanya myaka iili 36 katuli mumulimo wabbazu, ndakasalwa kuba mwiiyi wa Cikolo ca Baalu. Mebo abakaintu bangu twakoona mumalo aayindene-indene aali 75 mumyaka yobilo buyo, pele eeci cakali coolwe cilibedelede. Kumamanino ansondo imwi aimwi, baalu bakali kulumba kapati kubona bamu Kabunga Keendelezya mbobakali kubikkila maano kugwasya baalu kuyumya cilongwe cabo a Jehova.

Mukuya kwaciindi, ndakaba mwiiyi wa Cikolo Cabakambausi ba Bwami. Bunji bwaziindi basicikolo bakali kukatala kapati akulibilika akaambo kakuvwula kwazintu zyakucita: kukkala mukkilasi kwamawoola aali 7 abuzuba, kucita mahomuwekki kwamawoola otatwe abuzuba kumangolezya, alimwi akucita maasainimenti aali 4 naa 5 ansondo. Mebo abamayi bambi twakabaambila kuti tiibakali kukonzya kuzicita zintu zyoonse eezyi ccita kuti bagwasyigwa a Jehova. Lyoonse ndilayeeya basicikolo mbobakali kugambwa kapati ikubona kusyoma Jehova mbokwakali kubapa kuzuzikizya milimo minji kwiinda mbobakali kuyeeyela.

Akaambo kakuti bamaama bakali kubabikkila maano bamwi, cakapa kuti aabo mbobakali kuyiisya Bbaibbele bayaambele kapati alimwi buya bakagwasya bataata kucinca mbobakali kukabona kasimpe. Nokwakainda mazuba otatwe kuzwa nobakafwa bamaama, bataata bakajanika ku Ŋanda ya Bwami kuswiilila makani aabuleya, calo icakatugambya kapati alimwi bakazumanana kujanika kumiswaangano kwamyaka iili 26 yakatobela. Nokuba kuti bataata kunyina nobakabbapatizyigwa, baalu bakali kundaambila kuti lyoonse mbobakali kuba bakusaanguna kusika kumiswaangano yambungano.

Bamaama bakali cikozyanyo cibotu kapati kulindime abanabokwesu. Boonse bacizyi bangu botatwe abamalumi babo balamubelekela Jehova cakusyomeka. Bobilo babelekela kumaofesi aamutabi, umwi iili ku Portugal mpoonya umbi iili ku Haiti.

Mebo abakaintu bangu lino tulabeleka katuli bapainiya baalubazu ku Hamilton, Ontario. Katuli mumulimo wabbazu, twakali kukkomana kusangana bamwi munyendo zyakupilukila akuziiyo zya Bbaibbele. Pele lino tulikkomene kubona bantu mbotuyiisya kabayaambele kumuuya. Alimwi notupanga zilongwe abakwesu abacizyi mumbungano mpya, tulakulwaizyigwa kubona Jehova mbwabagwasya muziindi zili kabotu alimwi amuziindi zitali kabotu.

Twalanga musyule, tulalumba kapati ikubona bakwesu abacizyi banji mbobakatubikkila maano. Aboobo andiswe twasolekesya kutondezya “busungu” kuli bamwi, kubakulwaizya kubelekela Jehova kusikila mpobagolela. (2Kor. 7:6, 7) Mucikozyanyo, mumukwasyi umwi, bakaintu, mwana musankwa alimwi amwana musimbi bakali kubeleka mumulimo waciindi coonse. Ndakabuzya balumi kuti naa kuli ciindi nobakayeeyede kujatikizya kucita bupainiya. Bakaingula kuti mbebakali kugwasyilizya banamukwasyi kucita bupainiya. Aboobo ndakababuzya kuti, “Sena inga mwamwiinda Jehova kubalanganya?” Ndakabakulwaizya kuti batalike kutegwa bajane lukkomano ndobakali kujana banamukwasyi. Nokwakainda buyo myezi iili 6 bakatalika bupainiya.

Mebo abakaintu bangu tuyoozumanana ‘kwaambila zyalani liboola’ kujatikizya ‘milimo ya Jehova iigambya’ alimwi tulombozya kuti bakajane lukkomano mumulimo wa Jehova mbubonya andiswe mbotwakajana lukkomano.—Int. 71:17, 18.