1, 2. Ino nkaambo nzi Leza ncaakabona Daniele kuba “muntu uuyandwa kapati,” alimwi mbuti mbotukonzya kuba bantu bamvwida mbubwenya mbuli Daniele?

CIINDI ba Juda nobakatolwa ku Babuloni, bakanjila mumunzi iwakazwide mituni alimwi abantu ibakali kukomba mizimo. Nokuba boobo, ba Juda basyomeka mbuli Daniele abeenzinyina botatwe, bakakaka kuyungwa abantu bamu Babuloni. (Daniele 1:6, 8, 12; 3:16-18) Daniele abeenzinyina bakamuzumina Jehova kuba Mubumbi wabo alimwi bakazumanana kukomba nguwe alikke. Nokuba kuti Daniele wakali kukkala mubusena bubyaabi kwaciindi cilamfwu cabuumi bwakwe, mungelo wa Leza wakamwaamba kuti wakali “muntu uuyandwa kapati.”—Daniele 10:11, 19.

² Lyansiku, mubumbi wakali kubikka bulongo mucikombole kutegwa apange cintu cimwi. Mazuba aano, bakombi bakasimpe balizyi kuti Jehova ngo Mweendelezi wabubumbo boonse alimwi ulijisi nguzu zyakweendelezya masi. (Amubale Jeremiya 18:6.) Leza ulijisi nguzu zyakumubumba umwi aumwi wesu. Nokuba boobo, Jehova tasinikizyi muntu uuli woonse kucinca. Muciindi caboobo, uyanda kuti katulisungwide kubumbwa anguwe. Mucibalo  eeci, tulaiya mbotukonzya kuzumanana kuba mbuli bulongo butete mumaanza aa Leza. Tulabandika mibuzyo eeyi yotatwe: (1) Ino mbuti mbotukonzya kutantamuka tumpenda itukonzya kupa kuti tukake kutambula lulayo lwa Leza mpoonya akuba mbuli bulongo buyumu? (2) Ino mbuti mbotukonzya kuba abube ibukonzya kutugwasya kuzumanana kuba bantu bamvwida alimwi akuba mbuli bulongo butete? (3) Ino mbuti bazyali Banakristo mbobakonzya kubelekela antoomwe a Leza ciindi nobabumba bana babo?

3. Ino ntumpenda nzi itukonzya kupa kuti moyo wesu uyume? Amupe cikozyanyo.

³ Lugwalo lwa Tusimpi 4:23 lwaamba kuti, “Akati kazintu zyoonse nzyokwabilila, kokwabilila kapati moyo wako, nkaambo mulinguwo momuli tusensa twabuumi.” Kutegwa tutabi amyoyo miyumu, tweelede kutantamuka tumpenda mbuli kulisumpula, kuzumanana kucita zibi acaali, alimwi akubula lusyomo. Ikuti tiitwacenjela, tumpenda ootu tulakonzya kutupa kuba bantu batamvwi alimwi ibazangi. (Daniele 5:1, 20; Bahebrayo 3:13, 18, 19) Eeco ncecakacitikila Mwami Uziya wa Juda. (Amubale 2 Makani 26:3-5, 16-21.) Kumatalikilo, Uziya wakali muntu iwakali kumvwida alimwi iwakajisi cilongwe cibotu a Leza, aboobo Leza wakamupa nguzu. Pele “mbwaakabeda buyo anguzu, moyo wakwe wakalisumpula.” Wakalisumpula kapati cakuti wakasola kuumpa tununkilizyo mutempele nokuba kuti balikke bapaizi mbabakeelede kucita boobo. Ciindi bapaizi nobakamwaambila kuti walubizya, Uziya wakanyema kapati! Jehova wakamusubula mwami ooyu uulisumpula, alimwi wakaba sicinsenda kusikila naakafwa.—Tusimpi 16:18.

4, 5. Ino ncinzi cikonzya kucitika ikuti naa twaalilwa kucileka kulisumpula? Amupe cikozyanyo.

⁴ Ikuti naa tiitwakutantamuka kulisumpula, inga twatalika kuyeeya kuti tuli kabotu kwiinda bamwi alimwi tulakonzya kutalika kukaka lulayo ndotupegwa iluzwa mu Bbaibbele. (Tusimpi 29:1; Baroma 12:3) Eeci ncecakacitika kumwaalu umwi utegwa Jim. Ba Jim tiibakazuminana abaalu bambi mumbungano kujatikizya kaambo kamwi. Bakati, “Ndakaambila bakwesu bambi kuti tabajisi luyando, mpoonya ndakazwa mumuswaangano wabaalu.” Nokwakainda myezi iili cisambomwe, bakalongela kumbungano imbi pele ooko tiibakasalwa kuti bazumanane kuba mwaalu. Ba Jim bakatyompwa kapati. Bakali masimpe kuti bakaliluzi cakuti bakacileka kubelekela Jehova alimwi tiibakacilisungweede kwamyaka iili 10. Baamba kuti bakali kulisumpula alimwi bakatalika kutongooka Jehova akaambo kazintu izyakali kucitika. Kwamyaka minji, bakwesu bakali kubaswaya ba Jim alimwi bakasola kubagwasya, pele bakakaka kugwasyigwa.

⁵ Ba Jim bakaamba kuti, “Ndakaalilwa kucileka kuyeeyela bamwi kuti balilubizyide.” Cikozyanyo cabo citondezya kuti kulisumpula inga kwatupa kuubya-ubya kulubizya kwesu. Ikuti eeci cacitika, inga twaleka kuba mbuli bulongo butete. (Jeremiya 17:9) Sena kuli nomwakalubizyilwa kale amukwesu naa mucizyi? Sena kuli nomwakauside kale akaambo kakusweekelwa mukuli umwi? Ino mwakacita buti? Sena mwakatalika kulisumpula, naa sena mwakazyiba kuti kuba muluumuno amunyoko alimwi akuzumanana kusyomeka kuli Jehova nzeziyandika kapati?—Amubale Intembauzyo 119:165; Bakolose 3:13.

6. Ino ncinzi cikonzya kucitika kuti katujisi cilengwa cakubisya acaali?

⁶ Ikuti naa muntu wazumanana kubisya, mane buya akusisa ncacita, cilakonzya kumuyumina  kutambula lulayo luzwa kuli Leza. Eeci inga capa kuti cuube-ube kunoobisya. Mukwesu umwi wakaamba kuti mukuya kwaciindi kunyina ambwaakali kulimvwa kujatikizya micito yakwe mibi. (Mukambausi 8:11) Mukwesu aumwi, kwaciindi cili mbocibede wakajisi cilengwa cakweebelela zintu ziletela muzeezo wakoonana kumbele wakaamba kuti, “Ndakatalika kubajanina twaambo tutako baalu.” Cilengwa eeci cakapa kuti cilongwe ncaakajisi a Jehova mukwesu ooyu cinyongane. Ciindi bamwi nobakazyiba ncaakali kucita, wakalomba lugwasyo kubaalu. Nincobeni kuti toonse tatulondokede. Pele ikuti twatalika kubayandawida twaambo aabo ibatupa lulayo naa kupa twaambo twakulitamizya ciindi notwalubizya muciindi cakulomba Leza kuti atulekelele akutugwasya, moyo wesu inga watalika kuyuma.

7, 8. (a) Ino mbuti kuyuma myoyo kwabana Israyeli bansiku mbokwakatondezya kubula lusyomo? (b) Ino eeci cituyiisya nzi?

⁷ Ciindi Jehova naakagusya bana Israyeli mu Egepita, bakalibonena kacita maleele aagambya manji. Nokuba boobo, nobakasika afwaafwi a Nyika Yakasyomezyedwe, myoyo yabo yakayuma. Nkaambo nzi? Nkaambo kakuti tiibakali kumusyoma Leza. Muciindi cakuti basyome Jehova, bakayoowa akutongooka Musa. Mane buya bakali kuyanda kupiluka ku Egepita, ooko nkobakali bazike! Cakamucisa kapati Jehova mpoonya wakaamba kuti: “Ino bantu aaba bayooleka lili kundisampaula?” (Myeelwe 14:1-4, 11; Intembauzyo 78:40, 41) Bana Israyeli aabo bakafwa munkanda akaambo kakuyuma kwamyoyo yabo alimwi akubula lusyomo.

⁸ Mazuba aano, tuli afwaafwi kapati kunjila munyika mpya, alimwi lusyomo lwesu lulasunkwa. Aboobo tweelede kululingula mboluli luyumu lusyomo lwesu. Ino mbuti mbotukonzya kusinizya kuti nduyumu? Tulakonzya kulanga-langa majwi aa Jesu aali kulugwalo lwa Matayo 6:33. Amulibuzye kuti: ‘Sena mbaakani zyangu alimwi azyakusala zyangu ncobeni zilatondezya kuti ndilaasyoma majwi aa Jesu? Sena inga ndalovwa kumiswaangano naa mumulimo wamumuunda kutegwa ndipange mali manji? Ino inga ndacita buti ikuti naa mulimo wangu uyanda kuti kandibeleka canguzu kapati alimwi kwamawoola manji? Sena ndiyakwiilekela nyika eeyi kuti kaindeendelezya alimwi ambweni buya akundipa kuti ndicileke kubelekela Jehova?’

9. Ino nkaambo nzi ncotweelede ‘kuzumanana kulisunka’ kutegwa tubone naa tuli mulusyomo, alimwi mbuti mbotukonzya kucita boobo?

⁹ Ikuti katutatobeli Bbaibbele ncolyaamba kujatikizya balongwe babyaabi, kuyanzana abantu bagwisyidwe mumbungano, naa zyakulikondelezya, myoyo yesu inga yayuma. Ino ncinzi ncomweelede kucita ikuti naa eezyi zyatalika kumucitikila? Cakutasowa ciindi mweelede kululanga-langa lusyomo lwanu! Bbaibbele lyaamba kuti: “Amuzumanane kulisunka kutegwa mubone naa muli mulusyomo; amuzumanane kulilingula kutegwa mubone bwini mbomubede.” (2 Bakorinto 13: 5) Amulilingule akubona bwini mbomucita mumakani aaya, mpoonya amubelesye Jwi lya Leza lyoonse ikululamika mizeezo yanu.

10. Ncinzi cikonzya kutugwasya kuti tube mbuli bulongo butete ibuli mumaanza aa Jehova?

¹⁰ Kutegwa tuzumanane kuba mbuli bulongo butete, Leza watupa Jwi lyakwe, mbungano ya Bunakristo alimwi amulimo wakukambauka. Ciindi notuzumanana kubala Bbaibbele akuzinzibala kuyeeya nzyotubala abuzuba, tulagwasyigwa kuba mbuli bulongo butete ibuli mumaanza aa Jehova alimwi eeci cipa kuti atubumbe. Jehova wakalailila bami bana Israyeli kuti kabalemba bbuku lya Mulawo wa Leza akulibala abuzuba. (Deuteronomo 17:18, 19) Baapostolo bakalizyi kuti kubala Magwalo alimwi akuzinzibala kuyeeya nzyobakali kubala cakali kuyandika kapati kutegwa bazwidilile mumulimo wabo wakukambauka. Bakali kuzubulula zibeela zimwi zya Magwalo aa Chihebrayo ziindi zinji mumabbuku ngobakalemba, alimwi ciindi nobakali kubakambaukila bantu, bakali kubakulwaizya abalo kubelesya Magwalo. (Milimo 17:11) Ncimwi buyo amazuba aano, andiswe twabona kuti cilayandika kapati kubala Jwi lya Leza buzuba abuzuba akuzinzibala kuyeeya nzyotubala. (1 Timoteyo 4:15) Eeci citugwasya kuzumanana kuba bantu balicesya, alimwi ciyoopa kuti Jehova atubumbe.

11, 12. Mbuti Jehova mbwakonzya kubelesya mbungano ya Bunakristo kuti amubumbe umwi aumwi wesu kweelana anzyayandika? Amupe cikozyanyo.

¹¹ Jehova ulizyi umwi aumwi wesu ncayandika alimwi ulatubumba kwiinda mukubelesya mbungano ya Bunakristo. Ba Jim ibaambwa kumatalikilo, bakatalika kuzibona munzila yeelede zintu ciindi mwaalu umwi naakatalika kubabikkila maano. Ba Jim bakati: “Kunyina buzuba mwaalu ooyu naakandipa mulandu  naa kunditongooka. Muciindi caboobo, wakazumanana kundikkazikila moyo alimwi wakatondezya kuti wakaliyandide kundigwasya camoyo woonse.” Nokwakainda myezi yotatwe, mwaalu ooyu wakabatamba kumuswaangano ba Jim. Ba Jim baamba kuti basimbungano bakabatambula kabotu alimwi luyando lwabo lwakabagwasya kucinca mbobakali kuzilanga zintu. Bakatalika kubona kuti mbobakali kulimvwa tiicakali ncecintu icakali kuyandika kapati. Baalu mumbungano mobakali kuzulilwa ba Jim alimwi abakaintu babo bakabakulwaizya, aboobo asyoonto-syoonto bakatalika kubelekela Jehova. Ba Jim alimwi bakagwasyigwa kapati kwiinda mukubala zibalo zyakuti “Jehova Tali Nguwe Ngotweelede Kupa Mulandu” (Jehovah Is Not to Blame) alimwi acakuti “Amubelekele Jehova Cakusyomeka” (Serve Jehovah Loyally), zijanika mu Ngazi Yamulindizi yamu Chingisi yamu November 15, 1992.

¹² Mukuya kwaciindi, ba Jim bakaba baalu alimwi. Kuzwa ciindi eeco, bagwasya bakwesu bamwi kumana mapenzi aali boobu alimwi akuyumya lusyomo lwabo. Bakaamba kuti bakali kuyeeya kuti bakajisi cilongwe ciyuma a Jehova pele bwini mbwakuti tiicakali boobo pe! Cilabacisa nobayeeya kuti bakazumizya kulisumpula kubapa kuti babikkile maano kukulezya kwabantu bamwi muciindi cakubikkila maano kuzintu ziyandika kapati.—1 Bakorinto 10:12.

13. Ino mbube nzi mbotukonzya kuba ambubo akaambo kamulimo wakukambauka, alimwi mbubotu nzi bujanika?

¹³ Mulimo wesu wakukambauka awalo ulakonzya kutugwasya kuba bantu bali kabotu. Munzila nzi? Ciindi notukambauka makani mabotu, tweelede kutondezya bube mbuli kulicesya alimwi azibeela ziindene-indene zyamucelo wamuuya wa Leza. (Bagalatiya 5:22, 23) Amuyeeye buyo bube bubotu mbomwaba ambubo akaambo kamulimo wakukambauka. Ciindi notwiiya Kristo, bantu balakwelelezyegwa kumulumbe wesu alimwi balakonzya kucinca mizeezo njobajisi kujatikizya ndiswe. Mucikozyanyo, Bakamboni bobilo ku Australia bakasola kukambaukila mukaintu umwi aŋanda yakwe, pele wakanyema kapati alimwi tanaakaambaula kabotu ambabo. Nokuba boobo, Bakamboni aaba bakamuswiilila cabulemu. Nokwakainda ciindi, mukaintu ooyu wakaliyeeya mpoonya wakalemba lugwalo kuofesi yamutabi. Wakalilekelela akaambo kancaakacita. Wakaamba kuti, “Ndafwubaala ikutanda bantu bobilo ibamwaya Jwi lya Leza munzila iili boobu.” Kweelana acakuluula eeci, twabona mbociyandika kapati kubomba moyo ciindi notukambauka. Inzya, mulimo wesu wakukambauka ulabagwasya bamwi, pele ulatugwasya andiswe kuba abube bubotu.

14. Ino ncinzi ncobeelede kucita bazyali ikuti kabayanda kuzwidilila ncobeni ciindi nobabumba bana babo?

¹⁴ Bana basyoonto banji balalicesya alimwi balayandisya kwiiya. (Matayo 18:1-4) Aboobo cileelela kuti bazyali kabagwasya bana babo kwiiya kasimpe akukayanda ciindi nobacili  bana. (2 Timoteyo 3:14, 15) Kutegwa bazwidilile, bazyali lwabo beni beelede kukayanda kasimpe alimwi akutobela ncolyaamba Bbaibbele mubuumi bwabo. Ikuti bazyali kabacita boobu, cilabaubila bana babo kukayanda kasimpe. Kunze lyaboobo, bana bayoobona kuti lulayo ndobapegwa abazyali babo lutondezya kuti balabayanda alimwi akuti Jehova ulabayanda.

15, 16. Ino mbuti bazyali mbobakonzya kutondezya kuti balamusyoma Leza ikuti mwanaabo wagwisyigwa mumbungano?

¹⁵ Noliba leelyo bazyali nobabayiisya bana babo kasimpe, bana bamwi balaleka kukomba Jehova naa kugwisyigwa mumbungano. Ikuti eeci cacitika, mukwasyi ulapenga kapati. Mucizyi umwi kucisi ca South Africa wakati: “Ciindi mwanookwesu musankwa naakagwisyigwa mumbungano, cakali mbuli kuti wafwa buya. Cakali kucisizya moyo!” Pele ino ncinzi mucizyi ooyu alimwi abazyali bakwe ncobakacita? Bakatobela malailile aajanika mu Bbaibbele. (Amubale 1 Bakorinto 5:11, 13.) Bazyali bakalizyi kuti kutobela lulayo lwa Leza kwakali kuyoobagwasya boonse. Alimwi bakalizyi kuti ikutobela bubambe bwakugwisyigwa ndulayo lwaluyando kuzwa kuli Jehova. Aboobo bakali kubandika amwanaabo lilikke buyo nokwakali kuyandika kubandika twaambo tupati twamumukwasyi.

¹⁶ Ino mwanaabo ooyu wakalimvwa buti? Nokwakainda ciindi wakaamba kuti, “Ndakalizyi kuti bamukwasyi wangu tiibakalindisulide pe, pele bakali kumvwida Jehova alimwi ambunga yakwe.” Alimwi wakayungizya kuti, “Ciindi bukkale nobupa kuti noyanda notayandi ulombe Jehova kuti akugwasye akukulekelela, ndendilyo nozyiba kuti Leza ulayandika kapati.” Amweezyeezye buyo mukwasyi ooyu mbowakakkomana ciindi mulombwana ooyu naakapiluka kuli Jehova! Inzya, tunookkomene alimwi tuyoozwidilila ikuti lyoonse katumumvwida Leza.—Tusimpi 3:5, 6; 28:26.

17. Ino nkaambo nzi kulibombya kuli Jehova ncoceelede kuba cintu ciyandika kapati mubuumi bwesu, alimwi ino kucita boobu inga kwatugwasya buti?

¹⁷ Musinsimi Isaya wakasinsima kuti ba Juda ibakali ku Babuloni bakali kuyakweempwa akwaamba kuti: “O Jehova, yebo nduwe Taateesu. Swebo tuli bulongo, yebo uli Mubumbi wesu; swebo toonse tuli milimo yamaanza aako.” Alimwi bakali kuyoomukombelezya Jehova kuti: “Alimwi cinyonyoono cesu utaciyeeyi mane kukabe kutamani. Twakomba akaka kotulanga, nkaambo swebo toonse tuli bantu bako.” (Isaya 64:8, 9) Ikuti katulicesya alimwi akumumvwida Jehova, uyootuyanda kapati mbuli mbwaakali kumuyanda Daniele. Jehova uyoozumanana kutubumba kubelesya Jwi lyakwe, muuya wakwe, alimwi ambunga yakwe kutegwa kumbele tukabe “bana ba Leza” balondokede.—Baroma 8:21.