1. Ino nkaambo nzi Jehova ncali Mubumbi uusumpukide kapati?

MU November 2010, nongo mpati kapati yaku China iyeebeka yakabikkwa amuulo wamadola aatandila ku 70 miliyoni ku England. Cilagambya kuti mubumbi ulakonzya kubumba cintu cibotu kapati alimwi cidula kapati kuzwa kucintu citakatazyi kujana alimwi camuulo waansi mbuli bulongo. Jehova, Mubumbi wesu, ulisumpukide kapati kwiinda mubumbi muntunsi uuli woonse. Ibbaibbele lyaamba kuti Jehova wakalenga muntu uulondokede “kuzwa kubulongo bwaanyika,” nkokuti, kuzwa kubulongo bwakubumbya. (Matalikilo 2:7) Muntu ooyo, Adamu, wakali “mwana wa Leza” alimwi wakalengwa munzila iyakali kumupa kuti acikonzye kwiiya bube bwa Leza.—Luka 3:38.

2, 3. Ino inga twabaiya buti bana Israyeli ibakeempwa?

² Ciindi Adamu naakazangila Mulengi wakwe, tanaakacili mwana wa Leza pe. Pele bunji bwabana ba Adamu basala Jehova kuti abe Mweendelezi wabo. (Bahebrayo 12:1) Kwiinda mukumvwida Mulengi wabo cakumaninina, batondezya kuti bayanda nguwe kuti abe Usyi alimwi a Mubumbi wabo ikutali Saatani. (Johane  8:44) Kusyomeka kwabo kuli Leza kutuyeezya ncobakaamba bana Israyeli ibakeempwa nobakati: “O Jehova, yebo nduwe Taateesu. Swebo tuli bulongo, yebo uli Mubumbi wesu; swebo toonse tuli milimo yamaanza aako.”—Isaya 64:8.

³ Mazuba aano, abalo bakombi ba Jehova bakasimpe balasolekesya kapati kuba bantu balibombya alimwi ibamvwida. Bacibona kuti ncoolwe cipati kwiita Jehova kuti ngu Usyi, alimwi bayanda kuti abe Mubumbi wabo. Sena tulilibambilide kuba mbuli bulongo butete oobo Leza mbwakonzya kubumba kuti bube cintu ciyandisi? Sena bakwesu abacizyi boonse tubabona kuti bacibumbwa a Leza? Kutegwa zintu tuzibone munzila yeelede, tulalanga-langa Jehova mbwabasala aabo mbabumba, ikaambo ncababumbila, alimwi ambwababumba.

4. Ino Jehova ubasala buti aabo mbakwela kulinguwe? Amupe zikozyanyo.

⁴ Jehova taboni bantu mbuli mbotubabona swebo. Muciindi caboobo, ulalingula moyo akubona bwini mbwabede umwi aumwi wesu. (1 Samuele 16:7b.) Jehova wakacitondezya eeci ciindi naakatalisya mbungano ya Bunakristo. Wakakwela bantu banji kulinguwe aku Mwanaakwe balo bantu bamwi mbobakonzya kubona kuti tabakwe mulimo. (Johane 6:44) Mucikozyanyo, muntu umwi uuli boobo wakali mu Farisi wazina lya Saulo, “sikusampaula Leza asikupenzya bantu bakwe alimwi asikasampusampu.” (1 Timoteyo 1:13) Pele Jehova wakaulingula moyo wa Saulo alimwi tanaakamubona kuti wakali mbuli bulongo butakwe mulimo. (Tusimpi 17:3) Muciindi caboobo, Jehova wakabona kuti Saulo wakali kuyoobumbwa akuba ‘cibelesyo’ akuti wakali kuyookambauka “kuli bamasi akubami alimwi akubana ba Israyeli.” (Milimo 9:15) Jehova alimwi wakasala bantu abambi ibakali kuyoobumbwa akuba “cibelesyo cilemekwa,” balo ibakali kubikkilizya abantu ibakali bakolwi, ibatakali kulilemeka, alimwi ababbi. (Baroma 9:21; 1 Bakorinto 6:9-11) Nobakali kwiiya Magwalo, bakayumya lusyomo lwabo muli Jehova alimwi bakamuzumizya kuti ababumbe.

5, 6. Mbuti lusyomo ndotujisi lwakuti Jehova Mubumbi wesu mbolweelede kujatikizya mbotubabona (a) bantu mbotujana mucilawo cesu? (b) bakwesu abacizyi?

⁵ Tulasyoma kuti Jehova ulakonzya kusala alimwi akukwela bantu ibeelela. Nkakaambo kaako ncotuteelede kubeteka bantu mbotujana mucilawo cesu naa aabo ibali mumbungano motuzulilwa. Mucikozyanyo, amubone mwaalumi umwi uutegwa Michael ncaakali kucita ciindi nobakali kumuswaya Bakamboni ba Jehova. Waamba kuti: “Tiindakali kubabikkila maano alimwi tiindakali kuyanda akubabona pe. Masimpe, tiindakali kubayanda naaceya! Mukuya kwaciindi, ndakajana mukwasyi umwi walo iwakandikkomanisya kapati akaambo kabukkale bwabo bubotu. Mpoonya buzuba bumwi ndakagambwa kuzyiba kuti bakali Bakamboni ba Jehova! Bukkale  bwabo bubotu bwakandipa kuti ndikkale ansi akuyeeya kaambo ncondatakali kubayandila. Tiilyakalampa pe, ndakajana kuti icakali kundipa kutabayanda kwakali kubula luzyibo alimwi amamvwa-mvwa buyo.” Ba Michael bakali kuyanda kwiiya zinji, aboobo bakazumina kuba aciiyo ca Bbaibbele. Kumbele, bakabbapatizyigwa akunjila mulimo waciindi coonse.

⁶ Ciindi notuba aluzyibo lwakuti Jehova Mubumbi wesu, citupa kucinca mbotubabona bakwesu alimwi abacizyi. Tuyoobona kuti umwi aumwi wabo ucibumbwa. Oobu mbombubo Jehova mbwababona. Ulababona bwini mbobabede mumoyo alimwi ulizyi kuti kutalondoka kwabo nkwakaindi kasyoonto buyo. Kuyungizya waawo, ulizyi umwi aumwi wabo mbwakonzya kuba. (Intembauzyo 130:3) Tulakonzya kumwiiya Jehova ikuti andiswe katubabona munzila yeelede bakwesu. Alimwi buya tulakonzya kubelekela antoomwe a Mubumbi wesu kugwasya bakwesu abacizyi kuti bayaambele. (1 Batesalonika 5:14, 15) Baalu beelede kuba cikozyanyo cibotu mumbungano mukucita boobo.—Baefeso 4:8, 11-13.

7. Ino nkaambo nzi ncomulukkomanina lulayo lwa Jehova?

⁷ Bamwi bantu balakonzya kwaamba kuti: ‘Tiindakali kulukkomanina lulayo ndondakapegwa abazyali bangu kusikila ciindi andime nondakaba abana bakulizyalila.’ Mbotuyaabukomena, tulakonzya kutalika kulukkomanina lulayo akaambo kakuti tulubona kuti ncitondezyo caluyando. (Amubale Bahebrayo 12:5, 6, 11.) Inzya, Jehova ulatuyanda mbotuli bana bakwe, nkakaambo kaako cakukkazika moyo ulatulaya naa kutubumba. Uyanda kuti tube bantu basongo alimwi bakkomene akumuyanda mbwali Taateesu. (Tusimpi 23:15) Tayandi kutubona katupenga alimwi tayandi kuti tukafwe katuli basizibi bateempwi.—Baefeso 2:2, 3.

8, 9. Ino Jehova utuyiisya buti mazuba aano, alimwi ino mbuti lwiiyo oolu mboluyoozumanana kumbele?

⁸ Katutanamuzyiba Jehova, tulakonzya kuti twakajisi bube bubyaabi bunji. Pele Jehova wakatubumba alimwi wakatugwasya kucinca, aboobo lino tujisi bube bubotu. (Isaya 11:6-8; Bakolose 3:9, 10) Tukkala muparadaiso yakumuuya. Oobu mbukkale bulibedelede Jehova mbwabamba mumazuba eesu butugwasya kubumbwa. Mububambe oobu, tulimvwa kukwabililwa akuliiba nokuba kuti nyika iituzingulikide yabija kapati. Aabo ibakakomenena mumikwasyi mobatakali kutondezya luyando, lino balimvwa kuti balayandwa ncobeni abakwesu abacizyi muparadaiso yakumuuya. (Johane 13:35) Kuyungizya waawo, twaiya kutondezya bamwi luyando. Pele iciyandika kapati ncakuti, twamuzyiba Jehova alimwi lino tulalubona luyando lwakwe lwabuzyali.—Jakobo 4:8.

⁹ Munyika mpya, tuyakugwasyigwa cakumaninina muparadaiso yakumuuya. Alimwi tuyookkomana abuumi muparadaiso yakumubili iiyakweendelezyegwa a Bwami bwa  Leza. Kuciindi eeco, Jehova uyoozumanana kutubumba alimwi akutuyiisya munzila njotutakonzyi kuyeeyela lino. (Isaya 11:9) Alimwi Jehova uyoopa kuti mizeezo alimwi amibili yesu ilondoke. Eeci ciyoopa kuti cituubaubile kumvwisya alimwi akwaatobela malailile aakwe cakumaninina. Aboobo atuzumanane kuzumizya Jehova kuti atubumbe, alimwi atumutondezye kuti tulabikkila maano kucitondezyo caluyando ndwajisi kulindiswe.—Tusimpi 3:11, 12.

10. Ino mbuti Jesu mbwaakatondezya kukkazika moyo alimwi aluzyibo lwa Mubumbi Mupati?

¹⁰ Mbubwenya mbuli mubumbi uucibwene mbwabuzyiba kabotu bulongo mbwabumba, Mubumbi wesu, Jehova, ulituzyi kabotu kapati. Ulikuzyi kulezya kwesu, kukompama kwesu, alimwi akuyaambele nkotwacita, alimwi ulamubumba umwi aumwi wesu kayeeyede twaambo ootu. (Amubale Intembauzyo 103:10-14.) Tulakonzya kwiiya Jehova mbwatubona swebo kwiinda mukulanga mbuli Jesu mbwaakali kukubona kutalondoka kwabaapostolo bakwe. Zimwi ziindi, baapostolo bakali kukazyanya kujatikizya iwakali mupati akati kabo. Ikuti nomwakaliko aciindi eeco, ino nomwakakubona buti kulilemeka kwabaapostolo? Ambweni nomwakalimvwa kuti tiibakali mbuli bulongo butete. Nokuba boobo, Jesu wakalizyi kuti bakali kukonzya kubumbwa ikuti nobakaswiilila kululayo ndwaakali kubapa cakukkazika moyo alimwi akuti nobakaiya kulicesya kwakwe. (Marko 9:33-37; 10:37, 41-45; Luka 22:24-27) Naakabusyigwa Jesu, baapostolo bakatambula muuya wa Leza alimwi tiibakacili kubikkila maano kujatikizya wakali mupati akati kabo. Muciindi caboobo, bakabikkila kapati maano kumulimo Jesu ngwaakabapa.—Milimo 5:42.

11. Ino muunzila nzi Davida mwaakatondezya kuba mbuli bulongo butete, alimwi ino inga twamwiiya buti?

¹¹ Mazuba aano, Jehova ubelesya Bbaibbele, muuya wakwe uusalala alimwi ambungano kutegwa atubumbe. Ino Bbaibbele inga lyatubumba buti? Tweelede kulibala, kuzinzibala kuyeeya nzyotwabala, akulomba Jehova kuti atugwasye kubelesya nzyotwaiya. Mwami Davida wakalemba kuti: “Ndilakuyeeya kandili abulo bwangu; ziindi zyakulinda masiku ndilazinzibala kukuyeeya.” (Intembauzyo 63:6) Alimwi wakalemba kuti: “Ndilatembaula Jehova, iwandilaya. Nociba ciindi camasiku, imizeezo yangu iili ansi aamoyo ilandilulamika.” (Intembauzyo 16:7) Inzya, Davida wakazinzibala kuyeeya lulayo lwa Jehova akuluzumizya kuti lweendelezye mizeezo yakwe ambwaakali kulimvwa, noliba leelyo lulayo nolwakali kukatazya kutobela. (2 Samuele 12:1-13) Davida wakatusiila cikozyanyo cibotu cakulicesya alimwi akumwvida. Aboobo amulibuzye kuti: ‘Ciindi nondamana kubala Bbaibbele, sena ndilazinzibala kuyeeya nzyondabala akuzumizya lulayo lwa Leza kundisika aamoyo? Sena inga ndayungizya kucita boobu?’—Intembauzyo 1:2, 3.

12, 13. Ino Jehova utubumba buti kwiinda mumuuya uusalala alimwi ambungano ya Bunakristo?

¹² Muuya uusalala ulakonzya kutweendelezya munzila ziindene-indene. Mucikozyanyo, ulakonzya kutugwasya kwiiya bube bwa Jesu alimwi akutondezya zibeela ziindene-indene zyamucelo wamuuya. (Bagalatiya 5:22, 23) Cibeela cimwi camucelo ooyu, nduyando. Tulamuyanda Leza alimwi tuyanda kumumvwida akubumbwa anguwe nkaambo tulizyi kuti milawo yakwe ilatugwasya. Kuyungizya waawo, muuya uusalala ulakonzya kutupa nguzu  zyakukaka kweendelezyegwa anyika eeyi mbyaabi. (Baefeso 2:2) Ciindi mwaapostolo Paulo naakacili mwana, wakali kweendelezyegwa abasololi bacikombelo caba Juda ibakali kulisumpula. Pele muuya uusalala wakamugwasya kucinca. Kumbele wakazoolemba kuti: “Muzintu zyoonse ndilijisi nguzu kwiinda muli yooyo uundipa nguzu.” (Bafilipi 4:13) Andiswe tweelede kuulomba muuya uusalala, katusinizyide kuti Jehova uyakuyiingula mipailo yesu iipailwa camoyo woonse.—Intembauzyo 10:17.

¹³ Jehova alimwi ubelesya mbungano alimwi abaalu kuti bamubumbe umwi aumwi wesu. Mucikozyanyo, kuti baalu babona kuti kuli mpotulezya, balasoleka kutugwasya. Nokuba boobo, tabapi lulayo iluyeeme amizeezo yabo. (Bagalatiya 6:1) Muciindi caboobo, cakulibombya balapaila kuli Jehova kutegwa abape busongo alimwi akumvwisya. Mpoonya balavwuntauzya kubelesya Bbaibbele alimwi amabbuku eesu aa Bunakristo kutegwa bajane makani aakonzya kutugwasya. Ikuti baalu baboola kulindinywe akumupa lulayo munzila yaluyando, ambweni kujatikizya mbomusamide, amuyeeye kuti eeci ncitondezyo cakuti Leza ulamuyanda. Ikuti mwalutobela lulayo, muyooba mbuli bulongo butete Jehova mbwakonzya kubumba, aboobo muyoogwasyigwa kapati.

14. Nokuba kuti ulijisi nguzu zyakucita ncayanda kubantu, ino mbuti Jehova mbwatondezya kuti ulazilemeka nguzu nzyotujisi zyakulisalila?

¹⁴ Ikuti twamvwisya Jehova mbwatubumba, eeco inga catugwasya kuba acilongwe cibotu abasyomima. Alimwi tuyakubalanga munzila yeelede bantu mbotujana mucilawo cesu, kubikkilizya abaabo mbotwiiya limwi Bbaibbele. Lyansiku, mubumbi wakeelede kusaanguna kugusya mabwe azintu zimwi zitayandiki izyakali mubulongo katanatalika kubumba. Mubumbi Mupati, Jehova ulabagwasya bantu ibayanda kubumbwa. Tabasinikizyi kuti bacince pe, pele muciindi  caboobo, ulabatondezya zyeelelo zyakwe zisalala. Mpoonya beelede kulisalila kuti naa balayanda kucinca.

15, 16. Ino basikwiiya Bbaibbele batondezya buti kuti bayanda kuti Jehova ababumbe? Amupandulule.

¹⁵ Amulange-lange cakacitika kumucizyi umwi waku Australia utegwa Tessie. Cakali cuuba-uba kapati kulinguwe kwiiya ncolyaamba Bbaibbele. Pele tanaakaunka ambele kumuuya, alimwi tanaakali kuunka akumiswaangano. Mucizyi iwakali kwiiya Bbaibbele anguwe wakapaila kuli Jehova alimwi wakayeeya buyo kuti acileke kwiiya anguwe. Mpoonya kwakacitika cintu cimwi cigambya. Ciindi nobakali kwiiya, Tessie wakaambila bayi bakwe ikaambo ncaatakali kuyaambele kumuuya. Wakaamba kuti wakali kulimvwa mbuli kuti ngusikuupa-upa ameso akaambo kakuti wakali kuyandisya kubbeja. Pele lino wakakanzide kuti acileke kubbeja.

¹⁶ Tiilyakalampa, Tessie wakatalika kuunka kumiswaangano akutondezya bube bwa Bunakristo nokuba kuti beenzinyina bamwi bakali kumuseka. Mukuya kwaciindi, Tessie wakabbapatizyigwa akuba mupainiya waciindi coonse, nokuba kuti wakajisi bana baniini. Cilisalede kuti ciindi basikwiiya Bbaibbele nobatalika kucinca kutegwa bakkomanisye Leza, Leza ulaswena kulimbabo alimwi ulababumba kuti babe zibelesyo ziyandisi.

17. (a) Ino ncinzi cimupa kukkomana ikubumbwa a Mubumbi wanu Jehova? (b) Ino nimbazu nzi zimwi zyakubumba nzyotuyoolanga-langa mucibalo citobela?

¹⁷ Mazuba aano, babumbi bamwi bacibikkila maano kapati kubumba zintu zibotu kubelesya maanza. Mbubwenya buyo, Jehova ulatubumba cakukkazika moyo kwiinda mukubelesya lulayo lwakwe, alimwi ulatulangilila kutegwa abone mbotutiicite. (Amubale Intembauzyo 32:8.) Sena mwabona kuti Jehova ulamubikkila maano? Sena mulibwene Jehova mbwabikkilide maano ikumubumba? Ikuti kacili boobo, ino mbube nzi ibuyoomugwasya kuba mbuli bulongo butete oobo Jehova mbwakonzya kubumba? Ino ntulengwa nzi ntomweelede kweeleba kutegwa mutabi mbuli bulongo buyumu ibutakonzyi kubumbwa? Alimwi ino mbuti bazyali mbobakonzya kubelekela antoomwe a Jehova kubumba bana babo? Cibalo citobela ciyakuyiingula mibuzyo eeyi.