Ba Haykanush, basikumwaya batanabbapatizyigwa ibakkala kucisi ca Armenia bakadobbela passport afwaafwi aŋanda yabo. Mukati, mwakali makkaadi aakubbanki alimwi amali manji kapati. Ba Haykanush bakaambila balumi babo balo ibali mbaasikumwaya batanabbapatizyigwa kujatikizya ncobakadobbela.

Banabukwetene aaba bakali mupenzi lyamali alimwi bakalijisi zikwelete. Pele bakasala kwaatola mali aaya kuli mukamwini iwakalembedwe mu passport. Mwaalumi ooyo iwakasweekelwa passport eeyi wakagambwa kapati, kubikkilizya amukwasyi wakwe. Ba Haykanush alimwi abalumi babo bakaamba kuti icakapa kuti basyomeke kujosya passport, nzintu nzyobakali kwiiya mu Bbaibbele. Mpoonya, bakabelesya coolwe eeci kubandika kujatikizya Bakamboni ba Jehova alimwi akupa mukwasyi ooyu mabbuku.

Mukwasyi ooyu wakali kuyanda kupa ba Haykanush mali aakubalumba, pele bakakaka kwaatambula. Buzuba bwakatobela, bakaintu aaba bakaswaya ba Haykanush abalumi babo kuŋanda yabo, alimwi kutegwa batondezye mbobakalumba kapati, bakasinikizya ba Haykanush kuti babweze nweenwe yadaimondi.

Mbubwenya mbowakagambwa mukwasyi ooyu, bantu banji inga bagambwa akaambo kakusyomeka kwaba Haykanush abalumi babo. Pele sena awalo Jehova wakagambwa? Ino wakakubona buti kusyomeka kwabo? Sena kusyomeka kwabo kwakagwasya?

Bwiinguzi kumibuzyo eeyo tabukatazyi pe. Nkaambo nzi? Nkaambo kakuti babelesi ba Leza balizyi kuti Jehova ulakkomana kapati ciindi babelesi bakwe nobaiya bube bwakwe kwiinda kuba adaimondi, ngolida, naa zintu zimwi zyakumubili. Inzya, zintu Jehova nzyabona kuti nziyandisi, bantu banji tabaziboni kuti zilayandika kapati. (Isaya 55:8, 9) Alimwi babelesi bakwe balimvwa kuti kusolekesya nkobacita kutegwa baiye bube bwa Jehova ncintu ciyandisi kapati.

Tulakonzya kukabona kaambo aaka kweelana a Bbaibbele ncolyaamba kujatikizya bupampu alimwi abusongo. Lugwalo lwa Tusimpi 3:13-15 lwaamba kuti: “Ulikkomene muntu ooyo uujana busongo ayooyo uulijanina bupampu; kuba ambubo nkubotu kwiinda kuba ampindu yansiliva, alimwi kuba ampindu yambubo nkubotu kwiinda kuba angolida. Mbubotu kapati kwiinda mabwe mayandisi aamulwizi; kunyina cintu nociba comwe ncolombozya icikonzya kweelana ambubo.” Cilisalede kuti Jehova ububona kuti bube oobu mbuyandisi kapati kwiinda lubono luli loonse.

Pele ino mbuti kujatikizya kusyomeka?

Jehova lwakwe mwini ulasyomeka. “Takonzyi kubeja.” (Tito 1:2) Wakasololela mwaapostolo Paulo kulembela Banakristo ba Hebrayo mumwaanda wamyaka wakusaanguna kuti: “Amuzumanane kutupailila, nkaambo tusyoma kuti tujisi manjezyeezya aasalala, mbwaanga tuyanda kuti katusyomeka muzintu zyoonse.”—Bahebrayo 13:18.

Jesu Kristo wakasiya cikozyanyo cibotu cakusyomeka. Mucikozyanyo, ciindi Mupaizi Mupati Kayafa naakamwaambila kuti, “Ndikwaambila kuti ukonke kuli Leza uupona kuti ulaamba masimpe akutwaambila naa nduwe Kristo Mwana wa Leza!,” Jesu wakaamba masimpe alimwi wakalizyibya kuti wakali Mesiya. Wakaamba masimpe nokuba kuti wakalizyi kuti Nkuta Mpati yaba Juda yakali kuyoomupa mulandu wakusampaula Leza alimwi akuti eeci cakali kukonzya kupa kuti ajaigwe.—Matayo 26:63-67.

Ino mbuti kujatikizya ndiswe? Ikuti katuli mubukkale bukonzya kutupa kuti tajane mpindu munzila imwi kwiinda mukutaamba twaambo twamasimpe naa ikutupilinganya, sena inga twazumanana kusyomeka?

Cilakonzya kuba cintu ciyumu kusyomeka mumazuba aano aamamanino ciindi bantu banji nobali “basikuliyanda, bayandisya mali.” (2 Timoteyo 3:2) Ciindi nokuli penzi lyakujana mali naa ciindi milimo noikatazya kujana, bantu banji cilabaubila kubba, kubeja, naa kucita zintu zimwi zitaluleme. Kuyeeya kuli boobu kulidumide kapati cakuti bantu banji bayeeya kuti, ikutegwa zintu zibeendele kabotu kumubili tabeelede kusyomeka pe. Nobaba Banakristo bamwi balacita zintu munzila iiteelede kutegwa ‘bajane mpindu cabumpelenge’ calo capa kuti babe ampuwo iitali kabotu mumbungano.—1 Timoteyo 3:8; Tito 1:7.

Nokuba boobo, Banakristo banji baiya Jesu. Balizyi kuti ikuba abube bwa Leza ibuli boobo kulayandika kapati kwiinda kuba abuvwubi naa mpindu iili yoonse. Nkakaambo kaako Banakristo bacili bana-bana tabaciti calweeno kutegwa bapase kucikolo. (Tusimpi 20:23) Mbubwenya mbuli ba Haykanush, talili lyoonse notukonzya kutambula bulumbu akaambo kakusyomeka. Nokuba boobo, Leza waamba kuti kusyomeka ncecintu  ciluzi, alimwi kutupa kuba amanjezyeezya aasalala, icintu ciyandisi ncobeni.

Cikozyanyo caba Gagik cilatondezya oobo. Baamba kuti: “Kanditanaba Munakristo, ndakali kubeleka mukkampani mpati oomo mukamwini mwaakali kuzelauka kubbadela mutelo kwiinda mukwaamba kuti kkampani tiiyakali kujana mpindu mpati. Mbwaanga ndakali mupati wakkampani, ndakeelede ‘kumvwana’ asikutelesya kwiinda mukumupa cisinkamulomo kutegwa ataambi bumpelenge mboyakali kucita kkampani. Akaambo kaceeci, ndakaba ampuwo yakutasyomeka. Nondakaiya kasimpe, ndakacileka kucita boobo akuuleka mulimo, nokuba kuti mulimo ooyu wakali kuvwolwa mali manji. Muciindi caboobo, ndakatalika kucita makwebo aandigeme. Kuzwa buzuba mbondakatalika makwebo, ndakailembya kkampani yangu alimwi ndakali kutela mitelo yoonse.”—2 Bakorinto 8:21.

Ba Gagik baamba kuti: “Mali ngondakali kujana akaceya kapati, aboobo tiicakali cuuba-uba kulanganya mukwasyi wangu. Nokuba boobo, lino ndilikkomene kapati. Ndijisi manjezyeezya aasalala kuli Jehova. Ndili cikozyanyo cibotu kubana bangu basankwa bobilo, alimwi lino ndakeelela kuba amikuli mumbungano. Lino ndijisi mpuwo yakuba muntu usyomeka kuli basikulingula mitelo alimwi akubantu mbondibeleka limwi mumakwebo.”

Jehova ulabayanda aabo ibamutembaula kwiinda mukwiiya bube bwakwe ibutaliboteli, kubikkilizya akusyomeka. (Tito 2:10) Alimwi kuti twacita boobu, utusyomezya kuti unootugwasya. Wakasololela Mwami Davida kwaamba kuti: “Ndakali mwana lino ndacembaala, nokuba boobo tandinabwene mululami wakalekelezyegwa, nobaba bana bakwe kabalombelela cakulya.”—Intembauzyo 37:25.

Icakamucitikila Rute, walo iwakali kusyomeka cilakasinizya kaambo aako. Cakusyomeka wakakkala abanyinazyala ba Naomi, muciindi cakuti abasiye akaambo kakuti bakalicembeede. Rute wakaunka ku Israyeli, kwalo nkwaakali kukonzya kukomba Leza wakasimpe. (Rute 1:16, 17) Wakali kusyomeka alimwi wakali kubeleka canguzu kuvwulula, ikutobela bubambe bwakaliko mu Mulawo bwakugwasilizya bapengede. Alimwi mbuli mbocakamucitikila Davida kumbele, Jehova taakwe naakabalekelezya ba Rute a Naomi. (Rute 2:2-18) Alimwi nzinji Leza nzyaakamucitila Rute kunze lyakumupa buyo nzyaakali kuyandika kumubili. Wakamusala kuba cibeela camukwasyi wa Mwami Davida alimwi buya aca Mesiya wakasyomezyedwe!—Rute 4:13-17; Matayo 1:5, 16.

Cilakonzya kubayumina kapati babelesi ba Jehova bamwi kujana mali aayandika kutegwa bajane zintu nzyobayandika mubuumi. Nokuba boobo, muciindi cakubelesya nzila zitakatazyi pele zitasyomeki, balabeleka canguzu alimwi mbasungu. Kwiinda mukucita boobu, batondezya kuti bube bwa Leza butaliboteli ibubikkilizya akusyomeka, bulayandika kapati kulimbabo kwiinda zintu zyakumubili zili zyoonse.—Tusimpi 12:24; Baefeso 4:28.

Mbubwenya mbuli Rute, Banakristo nyika yoonse mboizulwa bali kutondezya lusyomo munguzu nzyajisi Jehova izyakubagwasya. Balamusyoma cakumaninina ooyo iwakasyomezya kuti: “Ziyume zitete, tandikakusiyi pe alimwi tandikakulekelezyi pe.” (Bahebrayo 13:5) Kuzwa kaindi, Jehova wali kutondezya kuti ulakonzya alimwi uyoobagwasya aabo ibasyomeka lyoonse. Lyoonse wali kuzuzikizya cisyomezyo cakwe cakupa zintu nzyobayandika babelesi bakwe.—Matayo 6:33.

Inzya, bantu balakonzya kubona kuti daimondi alimwi azintu zimwi zyakumubili zilayandika kapati. Pele tulakonzya kusinizya kuti Taateesu wakujulu ulakukomanina kapati kusyomeka kwesu alimwi abube bumbi bubotu kwiinda mabwe mayandisi aali woonse!