1, 2. Ino Bbaibbele lyakasinsima nzi kujatikizya kuvwula kwabantu ba Jehova?

NYIKA yoonse mbwiizulwa, kuli mbunga yabantu ibamuyanda Jehova alimwi akumubelekela. Bantu aabo baitwa kuti Bakamboni ba Jehova. Nokuba kuti abalo balalezya akulubizya, Jehova ulabasololela bantu bakwe amuuya wakwe uusalala. Atubone nzila zimwi mbwaabalongezya.

² Mu 1914, bantu ibakali kukomba Jehova bakali basyoonto kapati. Nokuba boobo Jehova waulongezya mulimo wakukambauka. Akaambo kamulimo ooyu, bantu banji baiya kasimpe kamu Bbaibbele alimwi baba Bakamboni bakwe. Jehova wakapandulula kuvwula ooku naakaamba kuti: “Muniini uyooba cuulu awalo musyoonto uyooba cisi cilaanguzu. Mebo lwangu, nde Jehova, ndiyoopa kuti eeci cifwambaane kucitika muciindi cancico ceelede.” (Isaya 60:22) Mazuba aano tulakonzya kubona caantangalala kuti businsimi oobu bwazuzikizyigwa. Bantu ba Jehova bali mbuli cisi cipati. Mubwini, kuli zisi  zinji kapati munyika izijisi bantu basyoonto twazyeelanisya amweelwe wabantu ba Jehova.

3. Ino mbuti babelesi ba Leza mbobatondezya luyando?

³ Kuciindi eecino camamanino, Jehova wabagwasya bantu bakwe kuyumya luyando ndobajisi kuli umwi amweenzinyina. “Leza nduyando,” alimwi balamwiiya. (1 Johane 4:8) Jesu wakalailila basikumutobela bakwe kuti ‘kabayandana.’ Alimwi wakabaambila kuti: “Eeci nceciyoozyibya bantu boonse kuti muli basikwiiya bangu—ikuti kamujisi luyando akati kanu.” (Johane 13:34, 35) Mazuba aano, babelesi ba Jehova balalutondezya luyando oolu kuli umwi amweenzinyina noliba leelyo bantu bamasi nobalwana. Mucikozyanyo, munkondo yanyika yabili, bantu batandila ku 55 miliyoni bakajaigwa. Pele bantu ba Jehova tiibakajaya muntu naba omwe munkondo eeyo. (Amubale Mika 4:1, 3.) Eeci cakabagwasya kutaba ‘amulandu wabulowa bwabantu boonse.’—Milimo 20:26.

4. Ino nkaambo nzi kuvwula kwabantu ba Jehova ncokugambya?

⁴ Bantu ba Leza bazumanana kuvwula nokuba kuti kuli sinkondo ulaanguzu kapati uubalwana, nkokuti Saatani. Walo ngo “leza wabweende bwazintu obuno.” (2 Bakorinto 4:4) Saatani nguuzyeendelezya mbunga zyamapolitikisi izili munyika iino, kubikkilizya abasimubweza twaambo, alimwi ubelesya nzila eezyi kulesya mulimo wakukambauka makani mabotu. Pele takonzyi kuulesya mulimo ooyu. Nokuba boobo, Saatani ulizyi kuti ujisi buyo kaindi kaniini, aboobo wazumanana kusola kutulesya kukomba Jehova.—Ciyubunuzyo 12:12.

5. Ino nkaambo nzi zimwi ziindi bamwi ncobakonzya kutunyemya? (Amubone cifwanikiso icili kumatalikilo aacibalo.)

⁵ Babelesi ba Leza baiya kuti cilayandika kapati kuyanda Leza alimwi abantu bamwi. Jesu wakaamba kuti: “‘Weelede kuyanda Jehova Leza wako amoyo wako woonse, abuumi bwako boonse alimwi amizeezo yako yoonse.’ Ooyu ngomulawo mupati alimwi ngonguwe wakusaanguna. Alimwi ngooyu wabili uuli mbuli yooyu: ‘Weelede kuyanda simukobonyoko mbubonya mbuli mboliyanda omwini.’” (Matayo 22:35-39) Nokuba boobo, Bbaibbele litondezya kuti bantu boonse balazyalwa kabatalondokede akaambo kacibi ca Adamu. (Amubale Baroma 5:12, 19.) Aboobo ziindi zimwi, ibamwi mumbungano balakonzya kwaamba naa kucita cintu cikonzya kutunyemya. Ikuti eeci cacitika, ino tuyoocita buti? Sena luyando lwesu kuli Jehova luyoozumanana kuba luyumu? Sena tuyoozumanana kusyomeka kulinguwe alimwi akubantu bakwe? Bbaibbele lilatwaambila kujatikizya babelesi ba Leza bamwi ibakaamba naa kucita zintu zyakanyemya bamwi. Atubone ncotukonzya kwiiya kuzintu zyakabacitikila.

6. Ino muunzila nzi Eli mwaakaalilwa kulaya bana bakwe?

⁶ Mucikozyanyo, Eli wakali mupaizi mupati wabana Israyeli, pele bana bakwe basankwa bobilo tiibakali kutobela milawo ya Jehova. Bbaibbele lyaamba kuti: “Bana ba Eli bakali baalumi babi; tiibakali kumulemeka Jehova pe.” (1 Samuele 2:12) Eli wakalizyi kuti bana bakwe bakali kucita zintu zibyaabi kapati. Nokuba boobo, wakali kubalendekezya.  Mukuya kwaciindi, Jehova wakamusubula Eli abana bakwe bobilo. Kumbele, tanaakazumizya balunyungu lwa Eli kubeleka kabali bapaizi bapati. (1 Samuele 3:10-14) Ikuti nomwakapona mumazuba aa Eli alimwi ikuti nomwakalizyi kuti wakali kulekela bana bakwe kucita zintu zibyaabi, sena nomwakafwumpuzyigwa? Sena bukkale oobu nobwakamutyompya akuleka kusyoma Jehova, alimwi sena nomwakacileka kumubelekela?

7. Ino mbuti Davida mbwaakacita cibi cipati, alimwi ncinzi Leza ncaakacita kujatikizya kaambo aaka?

⁷ Davida wakajisi bube bubotu, nkakaambo kaako Jehova wakali kumuyanda kapati. (1 Samuele 13:13, 14; Milimo 13:22) Pele awalo Davida wakacita cintu cibi kapati. Ciindi Uriya naakali kunkondo, Davida wakoonana amukaintu wa Uriya, Bati-seba, eelyo wakamita. Davida tanaakali kuyanda kuti bantu bazyibe ncaakacita. Aboobo wakamwiita Uriya akumoongelezya kuti aunke kuŋanda yakwe. Davida wakali kuyanda kuti Uriya akoonane a Bati-seba kutegwa bantu bakayeeye kuti Uriya ngo usyi mwana. Pele Uriya tanaakaunka kuŋanda pe. Aboobo Davida wakaba masimpe kuti Uriya wajaigwa munkondo. Akaambo kazibi zyakwe zipati eezyi, Davida amukwasyi wakwe bakapenga kapati. (2 Samuele 12:9-12) Pele Jehova wakamufwida luse alimwi wakamulekelela. Wakalizyi kuti Davida wakali kuyanda kucita ciluzi. (1 Bami 9:4) Ikuti nomwakaliko aciindi eeco, ino nomwakalimvwa buti kujatikizya ncaakacita Davida? Sena nomwakacileka kumubelekela Jehova?

8. (a) Ino mwaapostolo Petro wakaalilwa buti kusyomeka? (b) Nokuba kuti Petro wakalubizya, ino nkaambo nzi Jehova ncaakazumanana kumubelesya?

⁸ Cikozyanyo acimbi camu Bbaibbele cijatikizya mwaapostolo Petro. Jesu wakamusala kuti abe mwaapostolo. Nokuba boobo,  Petro zimwi ziindi wakali kwaamba akucita zintu zitaluzi. Mucikozyanyo, Petro wakaamba kuti takamusiyi Jesu nokuba kuti boonse bakacite oobo. (Marko 14:27-31, 50) Pele Jesu naakajatwa, boonse baapostolo bakamusiya kubikkilizya a Petro. Mpoonya aziindi zyotatwe ziindene-indene, Petro wakaamba kuti tanaakamuzyi Jesu. (Marko 14:53, 54, 66-72) Nokuba boobo, Petro wakausa kapati kujatikizya ncaakacita. Aboobo Jehova wakamulekelela alimwi wakazumanana kumubelesya. Ikuti nomwakali sikwiiya wa Jesu aciindi eeco alimwi akuzyiba Petro ncaakacita, sena nomwakazumanana kumusyoma Jehova?

9. Ino nkaambo nzi ncomusyoma kuti Leza lyoonse uliluleme?

⁹ Kuzwa kuzikozyanyo eezyi, twabona kuti babelesi ba Jehova bamwi bakacita zintu zibi alimwi bakatyompya bamwi kapati. Ikuti naa eeci cacitika mazuba aano, ino inga mwacita buti? Sena inga mwacileka kuunka kumiswaangano naa buya kucilekela limwi kukomba Jehova alimwi akuswaangana abantu bakwe? Naa sena muyoofwambaana kuyeeya kuti Jehova ngusiluse alimwi akuti ambweni ucilindila muntu ooyo kuti aempwe? Pele kulakonzya kuba ziindi zimwi eelyo muntu wacita zibi zipati nateempwi akaambo kazintu nzyaacita. Sena muyoosyoma kuti Jehova ulizibwene zicitika alimwi akuti aciindi ceelede uyakuzilanganya? Ulakonzya kumugusya mumbungano muntu ooyu ikuti kwayandika. Sena mulasyoma kuti Jehova lyoonse ucita zintu ziluzi alimwi ziluleme?

10. Ino ncinzi Jesu ncaatakacita kujatikizya kulubizya kwa Judasi Isikariote alimwi a Petro?

¹⁰ Mu Bbaibbele, tubala kujatikizya bantu banji ibakazumanana kusyomeka kuli Jehova alimwi akubantu bakwe nokuba kuti bamwi ibakabazingulukide bakali kucita zibi zipati. Jesu ncikozyanyo cibotu. Naakamana kupaila masiku woonse kulomba lugwasyo kuli Bausyi, wakasala baapostolo bali 12. Pele umwi wabo, Judasi Isikariote, kumbele wakamwaaba. Awalo mwaapostolo Petro wakaamba kuti tanaakamuzyi Jesu. (Luka 6:12-16; 22:2-6, 31, 32) Jesu kunyina naakapa Jehova mulandu naa basikwiiya bakwe bambi ciindi bamwi nobakamutyompya. Muciindi caboobo, Jesu wakali acilongwe ciyumu aba Bausyi alimwi wakazumanana kubabelekela cakusyomeka. Akaambo kaceeci, Jehova wakamulumbula kwiinda mukumubusya alimwi kumbele wakamubikka kuba Mwami wa Bwami buli kujulu.—Matayo 28:7, 18-20.

11. Ino ncinzi Bbaibbele ncolyakasinsima kujatikizya babelesi ba Jehova mazuba aano?

¹¹ Cikozyanyo ca Jesu cituyiisya kusyomeka kuli Jehova alimwi akubantu bakwe. Alimwi tulijisi twaambo tubotu ncotweelede kucitila boobo. Twabona kuti Jehova ulabasololela babelesi bakwe muciindi cino camamanino. Ulabagwasya kukambauka kasimpe munyika yoonse, alimwi balikke buyo mbabacita mulimo ooyu. Kuyungizya  waawo, balikamantene ncobeni alimwi balikkomene akaambo kazyoonse Jehova nzyabayiisya. Jehova wakacipandulula eeci naakaamba kuti: “Amubone! Babelesi bangu bayakoongolola cakukondwa akaambo kakukkomana kwamyoyo yabo.”—Isaya 65:14.

12. Ino tweelede kukubona buti kulubizya kwabamwi?

¹² Tulikkomene ncobeni akaambo kakuti Jehova ulatusololela alimwi ulatugwasya kucita zintu zinji zibotu. Mukwiimpana, bantu munyika eeyi ya Saatani tabakkomene alimwi tabajisi bulangizi bwini-bwini bwakumbele. Inga tiicaba camaano ikuleka kukomba Jehova alimwi akuyanzana abantu bakwe akaambo buyo kakuti umwi mumbungano waamba naa kucita cintu cimwi citaluzi! Muciindi caboobo, tweelede kuzumanana kusyomeka kuli Jehova akutobela busolozi bwakwe. Tweelede kwiiya mbotweelede kukubona kulubizya kwabamwi alimwi ancotweelede kucita.

13, 14. (a) Nkaambo nzi ncotweelede kukazikkilana moyo? (b) Ino ncisyomezyo nzi ncotweelede kuyeeya?

¹³ Ino mweelede kucita buti ikuti naa mukwesu umwi waamba naa kucita cintu cimwi icamunyemya? Bbaibbele lyaamba kuti: “Utafwambaani kunyema pe, nkaambo kunyema-nyema kukkala mucamba cabafwubafwuba.” (Mukambausi 7:9) Toonse tatulondokede alimwi tulalubizya. Aboobo tatweelede kulangila kuti ciindi coonse bakwesu banakwaamba naa kucita zintu ziluzi. Kuyungizya waawo inga tiicabota kwiile kuyeeya buyo kulubizya kwabo. Ikuti twacita boobo, inga twacileka kubelekela Jehova katukkomene. Ciinda kubija ncakuti, lusyomo lwesu mulinguwe inga lwaceya, alimwi buya inga twazwa mumbunga ya Jehova. Mpoonya, inga tiitwamubelekela Jehova naa kuba abulangizi bwakuyoopona munyika yakwe mpya.

¹⁴ Aboobo, ino ncinzi cikonzya kumugwasya kuzumanana kubelekela Jehova calukkomano noliba leelyo bamwi nobacita zintu zimupenzya mumoyo? Lyoonse kamuyeeya cisyomezyo cakwe cuumbulizya cakuti: “Amubone! Ndilenga majulu mapya anyika mpya; eelyo zintu zyakaindi tazikaibalukwi limbi pe, nokuba kuyeeyegwa mumoyo.” (Isaya 65:17; 2 Petro 3:13) Jehova uyoomupa zilongezyo eezyi ikuti mwazumanana kusyomeka kulinguwe.

15. Ncinzi Jesu ncaakaamba kuti tweelede kucita ikuti bamwi balubizya?

¹⁵ Masimpe, tatunanjila munyika mpya. Aboobo ikuti naa muntu watunyemya, tweelede kuzinzibala kuyeeya zintu Jehova nzyayanda kuti katucita. Mucikozyanyo, Jesu wakati: “Kuti kamulekelela bantu milandu yabo, awalo Uso uuli kujulu uyoomulekelela; pele kuti kamutalekeleli bantu milandu yabo, awalo Uso takamulekeleli milandu yanu.” Alimwi ciindi Petro naakabuzya Jesu kuti naa tweelede kulekelela ‘kusikila kuziindi zili ciloba,’ Jesu wakamuvwiila kuti: “Tandikwaambili kuti ziindi zili ciloba  pe, pele nkusikila kuziindi zili 77.” Jesu wakatuyiisya kuti lyoonse tweelede kuba bantu balisungwide kulekelela bamwi.—Matayo 6:14, 15; 18:21, 22.

16. Ino ncikozyanyo nzi cibotu Josefa ncaakatondezya?

¹⁶ Cikozyanyo ca Josefa cituyiisya ncotukonzya kucita ikuti naa bamwi batulubizyila. Josefa amwaanookwabo muniini musankwa mbabakali bana balikke Jakobo mbaakazyala kuli Rakele. Jakobo wakalijisi bana basankwa bambi ibali kkumi, pele wakali kuyanda kapati Josefa kwiinda boonse. Eeci cakapa kuti bamufwide munyono Josefa. Cuusisya ncakuti, bakamuzonda kapati cakuti bakamusambala mubuzike, alimwi wakatolwa ku Egepita. Nokwakainda myaka minji, mwami waku Egepita wakabikka Josefa kuba wabili kumweendelezi wacisi eeci akaambo kakuti milimo ya Josefa yakamukkomanisya kapati. Kumbele, banabokwabo Josefa bakaboola ku Egepita kuzikuula zyakulya akaambo kanzala yakaliko. Nobakamubona Josefa, tiibakamuzyiba pe, pele walo wakabazyiba. Nokuba kuti tiibakamweendelezya kabotu, tanaakabasubula pe. Muciindi caboobo wakabasunka kutegwa abone naa bakalicincide ncobeni. Josefa naakabona kuti bakacinca, wakaliyubununa kuti wakali mwaanookwabo. Mpoonya wakabaumbulizya akwaamba kuti: “Mutayoowi. Ndiyoozumanana kumutumina cakulya nywebo abana banu.”—Matalikilo 50:21.

17. Ncinzi ncomweelede kucita ikuti naa bamwi balubizya?

¹⁷ Mutalubi kuti, mbwaanga muntu uuli woonse ulalubizya, andinywe mulakonzya kulubizyila bamwi. Aboobo ikuti naa mwabona kuti mwalubizyila muntu umwi, amutobele lulayo lwamu Bbaibbele. Amulombe kulekelelwa, alimwi amubambe luumuno anguwe. (Amubale Matayo 5:23, 24.) Tulakkomana ikuti bamwi batulekelela. Aboobo andiswe tweelede kubacitila mbubonya. Lugwalo lwa Bakolose 3:13 lutwaambila kuti: “Amuzumanane kweengelelana akulekelelana camoyo woonse nokuba kuti umwi kajisi kaambo kakutongooka mweenzinyina. Mbubonya Jehova mbwaakamulekelela camoyo woonse, andinywe mweelede kucita mbubonya oobo.” Ikuti katubayanda ncobeni bakwesu, tatukazumanani kunyema akaambo kazintu nzyobakacita kaindi. (1 Bakorinto 13:5) Alimwi ikuti katubalekelela bamwi, Jehova awalo uyootulekelela. Aboobo ikuti bamwi balubizya, atubafwide luse mbubonya mbuli Taateesu, Jehova, mbwatufwida luse andiswe.—Amubale Intembauzyo 103:12-14.