Baiminina bangelo kujulu ibakajatikizyidwe mukunyonyoona Jerusalemu alimwi ibayakutola lubazu mukunyonyoona nyika mbyaabi ya Saatani lya Amagedoni. Ooku nkucinca kujatikizya mbotwali kwaapandulula makani aaya. Ino nkaambo nzi ncokwaba kucinca ooku?

Kautanasika mwaka wa 607 B.C.E., Jehova wakatondezya Ezekieli cilengaano cijatikizya icakali kuyoocitika mu Jerusalemu, kautananyonyoonwa munzi ooyu. Mucilengaano eeco, Ezekieli wakabona zintu zinji zibyaabi kapati izyakali kucitika ooko. Mpoonya wakabona baalumi bali cisambomwe umwi aumwi kajisi “cilwanyo cakwe cakupwayauzya mujanza lyakwe.” Alimwi kwakali mwaalumi iwakali aambabo “iwakasamide cisani cuuba-uba” alimwi iwakajisi “nkomo yazilembyo yamulembi.” (Ezekieli 8:6-12; 9:2, 3) Mwaalumi ooyu wakaambilwa kuti ainde mumunzi ‘akubikka citondezyo ankumo zyabantu ibalila akutongela akaambo kazintu zyoonse zisesemya zicitika mumunzi.’ Kumane baalumi bali cisambomwe ibakajisi zilwanyo bakaambilwa kuti bajaye bantu boonse ibakali mumunzi ibatakajisi citondezyo. (Ezekieli 9:4-7) Ncinzi ncotwiiya kucilengaano eeci, alimwi ino mwaalumi iwakajisi nkomo yazilembyo yamulembi nguni?

Ezekieli wakacibona cilengaano eeci mu 612 B.C.E. Kuzuzikizyigwa kwakusaanguna kwabusinsimi oobu kwakacitika nokwakainda myaka yosanwe ciindi Jehova naakazumizya basikalumamba bana Babuloni kuti banyonyoone munzi wa Jerusalemu. Kwiinda mukucita boobo, Jehova wakabelesya bana Babuloni kuti basubule bantu bakwe  ibatakali kumvwida. (Jeremiya 25:9, 15-18) Pele ino mbuti kujatikizya ba Juda baluleme ibatakali kuzikkomanina zintu zibi izyakali kucitika mumunzi ooyu? Jehova wakabona masimpe kuti bafwutulwa.

Mucilengaano eeci, Ezekieli kunyina naakatola lubazu cacigaminina mukubikka citondezyo ankumo yamuntu uuli woonse naa kutola lubazu mukunyonyoona munzi. Muciindi caboobo, bangelo mbabakasololela mukunyonyoona munzi wa Jerusalemu. Aboobo businsimi oobu butupa coolwe cakuzyiba zicitika kujulu. Jehova wakaambila bangelo bakwe kuti basololele mukunyonyoona basizibi alimwi akubona masimpe kuti baluleme bafwutulwa. *

Businsimi oobu buyoozuzikizyigwa alimwi kumbele. Musyule oomu twakali kwaamba kuti imwaalumi iwakajisi nkomo yazilembyo yamulembi wakali kwiiminina bananike ibacipona anyika. Alimwi twakali kwaamba kuti bantu bakali kubikkwa citondezyo cakufwutulwa ciindi nobakali kuswiilila akutambula makani mabotu ngotukambauka. Pele caino-ino, cakalibonya caantangalala kuti twakeelede kucinca mbotubupandulula businsimi oobu. Kulugwalo lwa Matayo 25:31-33 twakaiya kuti Jesu ngonguwe uubeteka bantu. Uyakucita oobu kumbele lyamapenzi mapati. Kuciindi eeco, aabo ibayoobetekwa mbuli mbelele bayoofwutuka, pele aabo ibayoobetekwa mbuli mpongo bayoonyonyoonwa.

Aboobo, ino twiiya nzi kucilengaano ca Ezekieli? Nzyeezyi ziiyo zyosanwe:

1. Munzi wa Jerusalemu kautananyonyoonwa, Ezekieli, Jeremiya alimwi a Isaya, bakacenjezya bantu kujatikizya icakali kuyoocitikila munzi ooyu. Bakali mbuli balindizi. Mazuba aano, Jehova ubelesya kakamu kasyoonto kabananike kuti kabayiisya bantu bakwe alimwi akucenjezya bantu naatanatalika mapenzi mapati. Bwini mbwakuti, bantu ba Leza boonse, nkokuti, babelesi ba Kristo bamuŋanda yakwe, balatola lubazu mumulimo ooyu wakucenjezya bantu.—Matayo 24:45-47.

2. Ezekieli taakwe naakabikka citondezyo ankumo zyabaabo ibakali kuyoofwutuka. Abalo bantu ba Leza mazuba aano tabaciti oobo. Mulimo wabo ngwakukambaukila buyo bantu alimwi akubacenjezya kujatikizya iciyoocitika kumbele. Mulimo ooyu wakukambauka munyika yoonse ulacitwa kwiinda mukugwasyigwa abangelo.—Ciyubunuzyo 14:6.

3. Aabo ibakafwutulwa kuciindi ca Ezekieli tiibakajisi citondezyo cini ankumo zyabo. Mazuba aano aabo ibayoofwutulwa abalo tabanoojisi citondezyo cini ankumo zyabo. Ino ncinzi bantu ncobeelede kucita kutegwa bakafwutuke lyamapenzi mapati? Ciindi nobamvwa kucenjezya ooku, beelede kwiiya mbobakonzya kumwiiya Kristo, kulyaaba kuli Leza, alimwi akubeleka antoomwe abanabokwabo Kristo kwiinda mukukambauka makani mabotu. (Matayo 25:35-40) Lyamapenzi mapati, aaba bayoobikkwa citondezyo, nkokuti bayoosalwa kuti bakafwutuke.

4. Mwaalumi uujisi cilembyo wiiminina Jesu. Lyamapenzi mapati, Jesu uyoobikka citondezyo kubantu bamunkamu mpati ciindi nayoobabeteka kuti nimbelele. Mpoonya bayooba acoolwe cakupona anyika kukabe kutamani.—Matayo 25:34, 46. *

5. Mazuba aano baalumi ibali cisambomwe ibajisi zilwanyo zyakupwayauzya baiminina makamu aabangelo aasololelwa a Jesu. Lino-lino ayoonyonyoona masi alimwi akumanizya bubi boonse.—Ezekieli 10:2, 6, 7; Ciyubunuzyo 19:11-21.

Ziiyo nzyotwiiya kucilengaano eeci zitugwasya kuba alusyomo lwakuti Jehova takabanyonyooni baluleme antoomwe abasizibi. (2 Petro 2:9; 3:9) Ziiyo eezyi alimwi zituyeezya kuti mulimo wakukambauka uucitwa mazuba aano ngomulimo uuyandika kapati. Muntu umwi aumwi weelede kucenjezyegwa mamanino naatanasika!—Matayo 24:14.