1. Ino ndukkomano nzi lwaalubazu ndotujisi?

EELO kaka cilakkomanisya kumvwa mweelwe wabantu ba Jehova mbouyaabuyungizyika! Mwaka wamana twakasololela ziiyo zya Bbaibbele iziinda ku 10,000,000. Eeci citondezya kuti babelesi ba Jehova balamunika mumuni wabo. Alimwi amuyeeye buyo kujatikizya bantu banji ibajisi luyandisisyo ibakaboola ku Ciibalusyo. Bakaiya kujatikizya luyando ndwaakatondezya Leza ciindi naakapa cinunuzyo.—1Joh. 4:9.

2, 3. (a) Ino mbuyumu-yumu nzi ibutakonzyi kutukasya ‘kumweka mbuli mimuni’? (b) Kweelana amajwi aa Jesu aalembedwe kulugwalo lwa Matayo 5:14-16, ino tulabandika kaambo nzi?

² Nyika yoonse mbwiizulwa, bantu ba Jehova baambaula myaambo iindene-indene. Nokuba boobo, eeci tacitukasyi kumutembaula caantoomwe Taateesu, Jehova. (Ciy. 7:9) Tacikwe makani amwaambo wesu alimwi abusena nkotukkala, tulakonzya kumunika “mbuli mimuni munyika eeyi.”—Flp. 2:15.

³ Ikuyungizyika nkotubona, lukamantano ndotujisi alimwi amuuya wakulangila ngotusolekesya kuba anguwo, zyoonse eezyi zipa kuti  katupa bulemu kuli Jehova. Mucibalo eeci, tulabandika mbocicitwa eeci.—Amubale Matayo 5:14-16.

4, 5. (a) Kunze buyo lyakutola lubazu mumulimo wakukambauka, mbuti mbotukonzya kumunika mumuni wesu? (b) Mbubotu nzi bujanika akaambo kakucita zintu calubomba? (Amubone cifwanikiso icili kumatalikilo aacibalo.)

⁴ Cibalo cijisi mutwe wakuti “Light in the Darkness,” icakamwaigwa mu Ngazi Yamulindizi ya Chingisi yamu June 1, 1925 caamba kuti: “Kunyina uukonzya kusyomeka ku Mwami mazuba aano. . . ccita buyo kuti wacibelesya coolwe cakumunika mumuni.” Cibalo cakayungizya kuti: “Weelede kucita oobo kwiinda mukukambauka makani mabotu kubantu boonse, alimwi akupona kweelana anzila zyamumuni.” Aboobo, nzila imwi motupa kuti mumuni wesu umunike nkwiinda mukukambauka makani mabotu alimwi akupa bantu kuti babe basikwiiya. (Mt. 28:19, 20) Kuyungizya waawo, tulakonzya kupa kuti Jehova alemekwe kwiinda mukulilemeka kwesu kwa Bunakristo. Bantu mbotujana mumaanda alimwi abasimweenda nzila balabona mbotulilemeka. Mbotumweta-mweta cabulongwe alimwi ambotwaazya kulayubununa bwini mbotubede alimwi a Leza ngotukomba.

⁵ Jesu wakaambila basikwiiya bakwe kuti: “Nomunjila muŋanda, amubaanzye bali mumo.” (Mt. 10:12) Kubusena Jesu alimwi abaapostolo bakwe nkobakali kumvwula kukambaukila, cakali cilengwa buya kutambula bantu mbobatazyi kabotu mumaanda aabo. Pele mazuba aano, cilengwa eeci cakamana mumasena manji. Nokuba boobo, ikuti mwabapandulwida cabulemu bantu ikaambo ncomwabaswaila, kanji-kanji balaanguluka. Kumweta-mweta lyoonse kulayandika kapati ciindi notutalika mubandi. Alimwi eeyi nzila yababelekela kabotu bakwesu abacizyi nobatola lubazu mubukambausi bwakubuleya kubelesya kakubikkila mabbuku kakukuba. Ciindi nomutola lubazu mumulimo uuli boobu, mulajana kuti bantu banji bayoowutambula mulumbe akaambo kambomubamwetela-mwetela ambomubaazya. Eeci inga cabakwelelezya kusika afwaafwi akubweza bbuku lyabakkomanisya. Mbomucita zintu calubomba akwalo kulakonzya kumugwasya kutalisya mubandi.

6. Mbuti banabukwetene bamwi bacembeede mbobakayungizya mulimo wabo wakukambauka?

⁶ Banabukwetene bacembeede baku England balaciswa-ciswa calo cipa kuti kabatauciti kabotu mulimo wabo wakukambauka kuŋanda aŋanda. Bakasala kuti mumuni wabo kaumunika mpoonya anze aŋanda yabo. Balabikka mabbuku aamba zyamu Bbaibbele atebule ciindi bazyali nobainda kuyoobweza bana babo kucikolo cili munsi-munsi ankobakkala. Akaambo kakuyanda kuzyiba zinji, cakapa kuti banji babweze mabbuku aa Questions Young People Ask—Answers That Work, Volumes 1 a 2, alimwi amabroshuwa. Mucizyi mupainiya wamumbungano yabo wakabasangana mubukambausi oobu. Kulilemeka kwakwe alimwi akwabanabukwetene aaba, kwakapa kuti muzyali umwi azumine kwiiya Bbaibbele.

7. Ndugwasyo nzi ndomukonzya kupa bapya ibali kubusena nkomukkala?

⁷ Mumyaka misyoonto yainda, bazangalisi bavwula kapati muzisi zinji. Ino ncinzi ncomukonzya kucita kutegwa mugwasye bantu bali boobo kumuzyiba Jehova alimwi amakanze aakwe? Cakusaanguna, mbuti kuti mwaiya mbobaanzya mumwaambo ngobavwula kubelesya bapya ibaboola kubusena nkomukkala? JW Language app inga yamugwasya kucita oobo. Kuyungizya waawo, sena inga tiimwaiya mabala masyoonto aakonzya kubapa kuba aaluyandisisyo? Alimwi mulakonzya kubasololela a jw.org akubatondezya mavidiyo aaindene-indene alimwi amabbuku aaliko mumwaambo wabo.—Dt. 10:19.

8, 9. (a) Malailile nzi aagwasya ngotutambula kumiswaangano yesu iicitwa mukati kansondo? (b) Mbuti bazyali mbobakonzya kubagwasya bana babo kutola lubazu lyamiswaangano?

 ⁸ Caluyando, Jehova ulatupa Muswaangano wa Buumi Amulimo kutegwa tube bantu bacibwene kapati mumulimo wamumuunda. Malailile aagwasya ngotutambula kumuswaangano ooyu alatugwasya tobanji kuba basungu kucita nyendo zyakupilukila alimwi akusololela ziiyo zya Bbaibbele.

⁹ Ibapya banji balabona kuti bana besu balatola lubazu lyamiswaangano. Nobazyali, amubagwasye bana banu kuti kabamunika mumuni wabo kwiinda mukubayiisya kwiingula mumajwi aabo. Bwiinguzi bwabo buuba-uba alimwi ibuzwa ansi amoyo zimwi ziindi bukulwaizya bapya kuti bakabone kasimpe.—1Kor. 14:25.

10. Ino kukomba mumukwasyi kubeleka mulimo nzi mukusumpula lukamantano?

¹⁰ Nzila aimwi yakupa kuti mumuni wanu umunike njakusumpula lukamantano mumukwasyi wanu alimwi amumbungano yanu. Nzila imwi bazyali mbobakonzya kucita oobo nkwiinda mukupanga pulogilamu ya Kukomba Mumukwasyi lyoonse. Banji balabikkilizya akweebelela JW Broadcasting aciindi cimwi mumwezi. Mwamana kweebelela pulogilamu, mbuti kuti mwabandika kujatikizya mbomukonzya kutubelesya twaambo ntomwaiya? Ciindi nobasololela kukomba kwamumukwasyi, bazyali beelede kuyeeya kuti busolozi mbwayandika mwana muniini bulakonzya kwiindana aboobo mbwayandika mukubusi. Amupandulule kabotu-kabotu mbwaakonzya kubelesyegwa makani aayo kutegwa munamukwasyi uuli woonse agwasyigwe.—Int. 148:12, 13.

11-13. Mbuti boonse mbobakonzya kusumpula lukamantano mumbungano alimwi akugwasya bamwi kuti bamunike mumuni wabo?

¹¹ Mbuti bakubusi mbobakonzya kusumpula lukamantano mumbungano alimwi akukulwaizya bamwi kumunika mumuni wabo? Ikuti naa muli mukubusi Munakristo, mbuti kuti mwalibikkila mbaakani yakubabikkila maano aabo bacembeede? Cabulemu, mulakonzya kubalomba kuti bamwaambile icabagwasya kuzumanana mumulimo ooyu kwamyaka minji. Eeci ciyoomuyumya-yumya kapati, alimwi nyoonse muyookulwaizyigwa kuzumanana kupa kuti mumuni wakasimpe kaumunika. Alimwi toonse tulakonzya kubatambula aabo ibaboola kumiswaangano ku Ŋanda ya Bwami. Kucita boobo kuyoosumpula lukamantano alimwi kulakonzya kukulwaizya beenzu kuti abalo batole lubazu mukumunika mumuni wabo? Kusoleka kwanu kulakonzya  kubikkilizya akubaanzya beenzu, ambweni buya akubagwasya kujana aakukkala. Amubazyibye kuli bamwi, eeci ciyoobapa kwaanguluka.

¹² Ikuti naa mupedwe mukuli wakusololela muswaangano wakuunka mumulimo wamumuunda, mweelede kubagwasya bacembeede kutola lubazu mumulimo. Sena balijisi zilawo zibeelede? Zimwi ziindi mulakonzya kubaaba kuti babeleke aumwi uucili mwana kutegwa abagwasyilizye. Alimwi mweelede kubabikkila maano aabo baciswa-ciswa alimwi ibajisi bukkale ibutabazumizyi kubeleka kwaciindi cilamfwu. Inzya, kubikkila maano alimwi akubelesya bupampu kulakonzya kugwasya bakubusi alimwi abapati, bajisi luzyibo lunji alimwi abatajisi luzyibo lunji, kukambauka makani mabotu cabusungu.—Lev. 19:32.

¹³ Sintembauzyo wakakulwaizyigwa kwaamba kuti: “Eelo kaka ncibotu alimwi cilakondelezya kuti babunyina kabakkede antoomwe calukamantano!” (Amubale Intembauzyo 133:1, 2.) Kwiinda mukukamantana, bana Israyeli bakagwasyigwa kapati abaabo ibakali kukomba Jehova. Eeci cakali mbuli mafwuta aakunana aakali mabotu alimwi aakali kununkilila. Mbuti kuti mwaba amakanze aakuba acilengwa cibotu cakusumpula lukamantano akati kabakwesu alimwi abacizyi? Ikuti naa mulacita kale oobo, nkokuti mucita kabotu. Sena inga “mwajalula myoyo yanu,” nkokuti kuzumanana kucita boobo cakutaleka?—2Kor. 6:11-13.

14. Ncinzi ncomukonzya kucita kutegwa mumuni wanu kaumunika mucilawo momukkala?

¹⁴ Ino mbuti kujatikizya kuyungizya mulimo wanu wakumunika kasimpe kamu Bbaibbele mucilawo momukkala? Majwi alimwi amilimo yanu yaluzyalo zilakonzya kumukwelelezya simukobonyoko kukasimpe. Amulibuzye kuti: ‘Ino basimukoboma bandibona buti? Sena ŋanda azintu zyangu zilasalala, kupa kuti basimukoboma kabandibona munzila iili kabotu? Sena ndilabagwasya bamwi?’ Ciindi nomubandika a Bakamboni bamwi, mbuti kuti mwababuzya kujatikizya luzyalo lwabo akulilemeka kwabo kubotu mbokwakabajatikizya bacibbululu, basimukobonyina, babelesinyina, naa basicikolonyina? Tacidoonekwi buya kuti bayoomwaambila zyakuluula zibotu.—Ef. 5:9.

15. Nkaambo nzi kulangila ncokuyandika kapati?

¹⁵ Mbotuzibona zintu ciindi notusola kuyaambele mukupa kuti mumuni wesu kaumunika, kuyoolibonya. Cakwiinduluka-induluka Jesu wakabaambila basikwiiya bakwe kuti: “Amulangile.” (Mt. 24:42; 25:13; 26:41) Cakutadooneka, ikuti katuyeeya kuti “mapenzi mapati” acili kule, ayakuboola kumbele ikutali muciindi cesu cino, tatukaubeleki cabusungu mulimo wesu wakukambauka. (Mt. 24:21) Muciindi cakupa kuti mumuni wesu umwekesye mucilawo cesu, tuyoopa kuti uleke kumwekesya alimwi ulakonzya kuzimina limwi buya.

16, 17. Ncinzi ncomukonzya kucita kutegwa muzumanane kuba amuuya wakulangila?

¹⁶ Mboziyaabwiindila kubija zintu, toonse tweelede kuzumanana kulangila. Ciindi Jehova aakubweza ntaamu, uyoocita boobo aciindi ceelede. Kunyina akudooneka naaceya. (Mt. 24:42-44) Pele kwaciindi ecino, amukkazike moyo akuzumanana kulangila. Amubale Jwi lya Leza abuzuba alimwi akupakamana kupaila. (1Pet. 4:7) Amubikkile maano kuzikozyanyo zibotu zyabakwesu abacizyi aabo ibatondezya kuti balikkomene mubuumi bwabo akaambo kakuzumanana kulangila alimwi akumunika mumuni wabo. Cikozyanyo cimwi cibotu ncakuluula icili mucibalo cakuti, “Kukakatila Kucikobela Camu Juda Kwamyaka Iili 70,” icakamwaigwa mu Ngazi Yamulindizi yamu April 15, 2012, peeji 18-21.

¹⁷ Amujate bubi mumulimo wa Jehova. Amucitile bamwi milimo yaluzyalo alimwi akujana ciindi cakuyanzana a Banakristonyoko. Kucita boobo kuyoomuletela lukkomano lunji alimwi muyoobona mbuli kuti ciindi cileenda cakufwambaana. (Ef. 5:16) Myaka iili 100 yainda, bakwesu bakajisi bubi kapati alimwi bakacita milimo  minji. Pele mazuba aano tuli mukucita zinji kapati kwiinda mukusololelwa ajanza lya Jehova. Tuli mukumunika mumuni wesu munzila yatakali kuyeeyelwa.

18, 19. Mbuti baalu mumbungano mbobakonzya kutugwasya kupakamana akuba basungu? Amupe cikozyanyo.

¹⁸ Cilayumya lusyomo kuzyiba kuti kutalondoka kwesu takukonzyi kutulesya kubelekela Jehova munzila iitambulika. Aboobo, amutondezye kulumba ‘kuzipego mubantu’ nzyaakatupa Jehova, nkokuti, baalu mumbungano. (Amubale Baefeso 4:8, 11, 12.) Ciindi ciboola mwaalu aakumuswaya, amukacibelesye coolwe eeci kwiiya kuzwa kubusongo bwakwe alimwi akugwasyigwa alulayo lwakwe.

¹⁹ Baalu bobilo ku England bakaunka kuti bakagwasye banabukwetene bakajisi mapenzi. Mukaintu wakali kulimvwa kuti mulumi wakwe tanaakali silutwe mubotu muzintu zyakumuuya. Mulumi wakazumina kuti tanaakacibwene kuyiisya alimwi tanaakapangide pulogilamu yakukomba mumukwasyi lyoonse. Baalu bakaambila banabukwetene aaba cikozyanyo ca Jesu. Wakali kubabikkila maano basikwiiya bakwe alimwi azintu nzyobakali kuyandika. Baalu bakakulwaizya mulumi kwiiya Jesu. Alimwi bakakulwaizya mukaintu kukkazyika moyo. Baalu alimwi bakapa banabukwetene aaba nzila zigwasya kujatikizya mbobakonzya kubelekela antoomwe kutegwa kabakomba mumukwasyi abana babo bobilo. (Ef. 5:21-29) Mpoonya baalu bakamulumbaizya mulumi akaambo kakusolekesya kwakwe. Bakamukulwaizya kuzumanana akulomba muuya uusalala kutegwa umugwasye kuba silutwe mubotu muzintu zyakumuuya. Luyando alimwi alugwasyo lwabo zyakapa kuti mumuni wamukwasyi ooyu uzumanane kumunika.

20. Ncinzi ncomukonzya kulangila ciindi nomuzumanana kumunika mumuni wanu?

²⁰ Sintembauzyo wakaimba kuti: “Ulikkomene muntu woonse uuyoowa Jehova, ooyo weenda munzila zyakwe” (Int. 128:1) Ciindi nomuzumanana kumunika mumuni wanu kwiinda mukutamba abamwi kuti babelekele Leza, kulilemeka munzila iisumpula lukamantano, kuzumanana kuba amuuya wakulangila, muyooba alukkomano lunji kapati. Bantu bamwi bayakwiibona milimo yanu mibotu, alimwi ibanji bayookulwaizyigwa kupa bulemu kuli Taata.—Mt. 5:16.