“KAMWAAMBA! Mwabuka buti?”

Cakutadooneka, kanji-kanji mulaabelesya majwi aaya ciindi nomwaanzyanya. Ambweni kunze lyakwaamba buyo majwi aaya, mulabajata mumaanza naa kubakumbata buya aabo mbomwaanzyanya limwi. Zilengwa alimwi amajwi aabelesyegwa zilakonzya kwiindana kweelana abusena, pele makanze aakwaanzyanya alikozyenye. Alimwi buya, kutaanzya naa kutaingula notwaanzyigwa kulakonzya kubonwa kuti nkubula luyando naa ncitondezyo cakubula bulemu.

Pele tabali bantu boonse ibajisi cilengwa cakwaanzya bamwi. Bamwi balawaya-waya kwaanzya bamwi akaambo kansoni naa kulitenga. Ibambi cilabayumina kwaanzya bantu mbobaindene mubala, bukkale naa mpuwo. Pele nokuba kwaanzya mubufwaafwi kulakonzya kubakulwaizya kapati bamwi.

Amulibuzye kuti: ‘Ino kwaanzya kujisi mulimo nzi? Alimwi mbuti Jwi lya Leza mbolikonzya kundiyiisya kujatikizya kwaanzyanya?’

Ciindi mwaapostolo Petro naakatambula wamasi wakusaanguna, Korneliyo, mumbungano ya Bunakristo, wakaamba kuti: “Leza tasalululi.” (Mil. 10:34) Nokwakainda ciindi Petro wakalemba kuti Leza “uyanda kuti boonse bakonzye kweempwa.” (2Pet. 3:9) Ambweni inga twayeeya kuti majwi aaya aamba muntu wiiya kasimpe. Pele alimwi Petro wakakulwaizya Banakristo kuti: “Amubalemeke bantu bamisyobo yoonse, amube aluyando kuciinga coonse cabakwesu.” (1Pet. 2:17) Aboobo, sena inga tiicabota kubaanzya bamwi tacikwe makani amusyobo wabo, zilengwa naa mbobakakomena? Eeci ciyootondezya kuti tulabalemeka alimwi akubayanda.

Mwaapostolo Paulo wakaambila baabo ibakali mumbungano kuti: “Amutambulane mbubonya Kristo mbwaakatutambula andiswe.” (Rom. 15:7) Paulo wakabaamba mazina bakwesu aabo ‘ibakamuyumya-yumya.’ Aboobo bantu ba Leza mazuba aano, bayandika kuyumizyigwa kapati kwiinda mbocakabede mumazuba aa Paulo, nkaambo Saatani ujisi bukali bupati mumazuba aano aamamanino.—Kol. 4:11, bupanduluzi buyungizyidwe; Ciy. 12:12, 17.

Zikozyanyo zyamu Magwalo zilatondezya kuti kwaanzyanya takubapi buyo kulimvwa kutambulwa bamwi.

Nocakasika ciindi cakuti buumi bwa Mwana wa Leza bulonzyegwe kuya mwida lya Mariya, Jehova wakatuma mungelo kuyoobandika anguwe. Mungelo wakatalika kwiinda mukwaamba kuti, “Wapona yebo ooyandwa kapati, Jehova ulaanduwe.” Mariya “wakanyongana kapati,” tanaakakazyi kaambo kakapa kuti mungelo aambaule anguwe. Naakabona boobo, mungelo wakaamba kuti: “Utayoowi Mariya, nkaambo Leza wakukkomanina.” Mungelo wakapandulula kuti akali makanze aa Leza kuti walo akazyale Mesiya. Muciindi cakuzumanana kanyongene, cakulibombya Mariya wakaingula kuti: “Bona, mebo ndili muzike wa Jehova! Akube mbubonya mbowaamba.”—Lk. 1:26-38.

Cakali coolwe cipati kapati kumungelo kubeleka kali mutumwa wa Jehova; nokuba boobo, tanaakaubona kuba mulimo waansi kapati kuyoobandika amuntu uutalondokede. Aboobo wakasaanguna kumwaanzya. Sena kuli ncotukonzya kwiiya kucikozyanyo eeci? Tweelede kuti lyoonse katulibambilide kubaanzya bamwi alimwi akubakulwaizya. Kwiinda mumajwi masyoonto buyo, tulakonzya kubagwasya bamwi alimwi akubapa kulimvwa kuba cibeela ciyandika kapati akati kabantu ba Jehova.

Paulo wakabazyiba bantu banji mumbungano izyakali mu Asia Minor alimwi a Europe. Magwalo aakwe ajisi myooni minji iigaminide. Eeci tulacibona kulugwalo lwa Baroma caandaano 16. Paulo wakatuma myooni ku Banakristonyina banji. Wakaamba Febi  kuti, “mucizyi wesu,” alimwi wakaambila bakwesu kuti “mumutambule kabotu mu Mwami munzila yeelede basalali, alimwi akuti mumugwasye mumakani aali woonse mwanga wayandika lugwasyo.” Paulo wakaanzya Purisika a Akula kuti, “aabo ibalumbwa ikutali andime buyo pele ambungano zyoonse zyabamasi.” Alimwi wakaanzya abamwi ibatazyibidwe kabotu mazuba aano kuti, “muyandwa wangu Epeneto” kubikkilizya a “Turufena a Turufosa, bamakaintu ibabeleka canguzu mu Mwami.” Cakutadooneka, Paulo wakalilibambilide ciindi coonse kubaanzya bakwesu abacizyi.—Rom. 16:1-16.

Amuyeeye buyo mbobakakkomana kuzyiba kuti bakali kuyeeyegwa kapati. Kweelede kuti luyando lwabo kuli Paulo alimwi akuli umwi amweenzinyina lwakakomena kapati. Alimwi kumvwa myooni eeyo yaluyando kwakabakulwaizya kapati Banakristo bamwi, kwakabagwasya kuzumanana kuyuma mulusyomo. Masimpe, myooni iitondezya kuti tulababikkila maano kapati bamwi akubalumbaizya ipa kuti zilongwe ziyume alimwi ilabakamantanya babelesi ba Leza basyomeka.

Ciindi Paulo naakasika kucito ca Putiyolo akutozya ku Roma, Banakristo bakubusena ooko bakaboola kumusanza kumucinga. Mbwaakababonena buyo alaale, Paulo “wakalumba Leza akuyumizyigwa.” (Mil. 28:13-15) Zimwi ziindi, tulakonzya kubaanzya bamwi kwiinda mukubamwetela-mwetela buyo naa kubabbaibbisya. Inzya, kucita boobo akwalo kulakonzya kumukulwaizya muntu, ikapati ooyo uuside naa uutyompedwe.

Sikwiiya Jakobo wakali kuyanda kupa lulayo lulaanguzu kapati. Banakristo bamwi bakatalikide kuba basimamambe bakumuuya kwiinda mukupanga cilongwe anyika. (Jak. 4:4) Pele amubone Jakobo mbwaakalutalika lugwalo lwakwe:

“Ndime Jakobo, imuzike wa Leza alimwi awa Mwami Jesu Kristo, nendilembela misyobo iili 12 iimwaikide koonse-koonse kuti: Kamupona kabotu!” (Jak. 1:1) Tacidoonekwi buya kuti babali bakwe cakabaubila-ubila kulutambula lulayo lwakwe ciindi nobakabona kuzwa kumooni wakwe kuti bakali mubukkale bukozyenye kuli Leza. Masimpe, mooni uutondezya kulicesya ulakonzya kujalula mulyango nokuba kumubandi uujatikizya makani mapati.

Mooni uukulwaizya kapati, nokuba kuti mufwaafwi, weelede kuti kauzwa ansi aamoyo alimwi kautondezya luyando lwini-lwini. Mboceelede kuba oobo nokuba kuti walibonya kutabikkilwa maano. (Mt. 22:39) Mucizyi umwi ku Ireland, aciindi cimwi wakasika a Ŋanda ya Bwami miswaangano noyakali kuyanda kutalika. Ciindi naakali kunjila cakufwambaana, mukwesu umwi wakacenguluka, wamweta-mweta akumwaambila kuti: “Kamwaamba. Cabota kumubona.” Mucizyi ooyo wakaile buyo kukkala.

Nokwakainda buyo nsondo zisyoonto, mucizyi ooyo wakaunkila mukwesu akuyoomwaambila kuti kwaciindi cili mbocibede wakali mubukkale bukatazya kuŋanda. Wakati: “Ndakalinyemede kapati mangolezya aalya cakuti kwakasyeede buyo aasyoonto kuti ndilovwe ku Ŋanda ya Bwami. Tandiyeeyede zinji izyakaambwa kumuswaangano kunze buyo lyamooni wanu. Ndakalimvwa kutambulwa ncobeni. Aboobo ndalumba.”

Mukwesu ooyo tanaakazyi nguzu nzyowakajisi mooni wakwe mufwaafwi. Wakaamba kuti, “Ciindi mucizyi naakandaambila kuti majwi masyoonto aalya akamugwasya, ndakakkomana akaambo kakusolekesya kwangu. Alimwi andime ndakalimvwa kabotu.”

Solomoni wakalemba kuti: “Kowaala cinkwa cako atala aamaanzi, nkaambo kwaakwiinda mazuba manji uyoocijana alimwi.” (Muk. 11:1) Kwiinda mukubikkila maano kujatikizya mbouyandika mooni, kwaambisya ku Banakristoma, tulabakulwaizya bamwi alimwi buya andiswe tulakulwaizyigwa. Aboobo, tutazyuubyi-ubyi nguzu nzyokujisi kwaanzya.