Sena cakamukkomanisya kubala mamagazini aa Ngazi Yamulindizi aalino-lino? Amubone naa inga mwayiingula mibuzyo eeyi iitobela:

Nzintu nzi zyone nzyotweelede kucita kutegwa tuyaambele mukwiimba?

Tweelede kwiima kabotu kwiinda mukulijatila mujulu-julu bbuku lyesu lyanyimbo. Tweelede kuyoya bweelede. Ciindi notujalula mulomo wesu akwiimba cakwaanguluka, tulakonzya kwiimba cakupozya.—w17.11, peeji 5.

Ncinzi citukkomanisya kujatikizya masena alimwi amigwagwa yaminzi yamayubilo mu Israyeli?

Kwakali minzi yamayubilo iili cisambomwe iyakaandaanizyidwe, kaijisi amigwagwa iibambidwe kabotu. Aboobo muntu wakali kukonzya kujana mayubilo cakufwambaana kakunyina buyumuyumu.—w17.11, peeji 14.

Nkaambo nzi cipego ca Leza cacinunuzyo kwiinda muli Jesu ncocili cipego cibotu kwiinda zyoonse?

Cilazuzikizya cintu ncotuyandika kutegwa tuzumanane kupona, alimwi cizuzikizya nzyotuyandika kutegwa twaangununwe kucibi alufwu. Akaambo kaluyando ndwajisi kubana ba Adamu, Leza wakatupa Jesu ciindi notwakacili basizibi.—wp17.6, peeji 6-7.

Ino mbuti lugwalo lwa Intembauzyo 118:22 mbolwaamba kujatikizya bubuke bwa Jesu?

Jesu bakamukaka kuti ngo Mesiya alimwi bakamujaya. Kutegwa abe “bbwe liyandika kapati lyakukkona,” wakeelede kubusyigwa.—w17.12, peeji 9-10.

Sena mulongo uusololela kuli Mesiya wakali kwiinda buyo mubana bataanzi kuzyalwa?

Zimwi ziindi mulongo wamazyalani uusololela kuli Jesu wakali kwiinda mumwana mutaanzi, pele kutali lyoonse. Davida tanaakali mwana mutaanzi wa Jese; nokuba boobo, Mesiya wakazwa muzyalani lyakwe.—w17.12, peeji 14-15.

Ino ninjiisyo nzi zimwi zyabusilisi izijanika mu Bbaibbele?

Mumulawo wa Musa, bantu baciswa malwazi aamwi bakeelede kuzandulwa. Bantu bakeelede kusamba kumaanza bamana kujata mutunta. Mulawo wa Musa wakali kwaamba kuti tubi twabantu tweelede kuvwukkilwa. Kupalulwa kwakeelede kucitwa mubuzuba bwalusele kuzwa ciindi mwana naazyalwa, eeci cakali kweelela akaambo kakuti bulowa bwakali kufwambaana kwaangana.—wp18.1, peeji 7.

Nkaambo nzi cili kabotu ku Munakristo kuliyanda munzila yeelede?

Tweelede kumuyanda simukoboma mbubonya mbotuliyanda. (Mk. 12:31) Balumi “beelede kuyanda bakaintu babo mbuli mbobayanda mibili yabo beni.” (Ef. 5:28) Nokuba boobo, kuliyanda kulakonzya kulemenena buyo kulubazu lomwe.—w18.01, peeji 23.

Nintaamu nzi zimwi nzyotweelede kubweza kutegwa tuyaambele kumuuya?

Tweelede kubala Jwi lya Leza alimwi akuzinzibala kuyeeya nzyotwiiya akuzibelesya. Tweelede kujalula mizeezo alimwi amoyo wesu kutegwa tugwasyigwe amuuya uusalala alimwi akulomba lugwasyo kuli bamwi.—w18.02, peeji 26.

Nkaambo nzi basikupandulula bweende bwanyenyeezi alimwi abasikusonda ncobatakonzyi kutugwasya kuzyiba zyakumbele?

Kuli twaambo tunji, pele kaambo kapati nkakuti Bbaibbele lilabasulaika boonse.—wp18.02, peeji 4-5.

Ino tweelede kukubona buti kuzumina kutambwa kucakulya?

Ikuti naa twakuzumina kutambwa, tweelede kusolekesya kucita nzyotwaamba. (Int. 15:4) Tatweelede kuleka kuunka kakunyina akaambo kayakomoonga. Nkaambo basikututamba inga babeleka canguzu kujika cakulya.—w18.03, peeji 18.

Nziiyo nzi nzyobakonzya kwiiya kuli Timoteyo baalumi basalidwe?

Timoteyo wakali kubalanganya ncobeni bantu alimwi akubikka zintu zyakumuuya mubusena bwakusaanguna. Wakali kubeleka canguzu mumulimo uusetekene alimwi wakali kuzibelesya zintu nzyaakali kwiiya. Wakazumanana kuliyiisya alimwi wakali kusyoma muuya wa Jehova. Baalu alimwi abamwi balakonzya kwiiya kucikozyanyo cakwe.—w18.04, peeji 13-14.