CIINDI bana Israyeli nobakali kulibambila kuzabuka Mulonga wa Jordano kuya munyika Leza njaakabasyomezyede, bantu bamwi bakabaswaya. Bantu aaba bakali bamakaintu ibatakali bana Israyeli ibakatamba bamaalumi kupobwe. Eeci cakali kulibonya kuba coolwe cilibedelede kapati. Cakali kunookkomanisya kujana balongwe bapya, kuzyana alimwi akulya zyakulya zibotu. Nokuba kuti zilengwa alimwi akulilemeka kwabamakaintu aaba tiikwakali kweendelana a Mulawo Leza ngwaakapede bana Israyeli, kweelede kuti bana Israyeli bamwi bakayeeya kuti: ‘Tatukonzyi kuyungwa ambabo. Tuyoobikkila maano.’

 Ino ncinzi cakacitika? Majwi aakasololelwa amuuya atwaambila kuti: “Bantu bakatalika kuvwuula abana basimbi baku Moabu.” Mubwini, bamakaintu aaba bakali kuyanda kuti bamaalumi aabo bana Israyeli bakombe baleza bakubeja. Aboobo bakacita oobo! Nkakaambo kaako, “bukali bwa Jehova bwakababukila bana Israyeli.”—My. 25:1-3.

Bana Israyeli aabo bakatyola Mulawo wa Leza munzila zyobilo. Yakusaanguna, bakakotamina zibumbwa alimwi yabili, bakacita bwaamu. Banji bakafwa akaambo kakutamvwida kwabamaalumi aaba. (Kul. 20:4, 5, 14; Dt. 13:6-9) Nkaambo nzi eeci ncobakacita ncocakali kuusisya kapati? Akaambo kaciindi nocakacitika. Ikuti bamaalumi aabo nobatakatyola Mulawo wa Leza, muciindi buyo cisyoonto bana Israyeli nobakazabuka Mulonga wa Jordano akunjila mu Nyika Yakasyomezyedwe.—My. 25:5, 9.

Kujatikizya ceeci cakacitika, mwaapostolo Paulo wakalemba kuti: “Zintu eezyi zyakabacitikila kutegwa zibe zikozyanyo, alimwi zyakalembelwa kutucenjezya swebo notupona kumamanino aabweende bwazintu bwiindene-indene.” (1Kor. 10:7-11) Cakutadooneka Saatani wakakkomana kapati akaambo kakuti bana Israyeli bamwi bakalubizya kapati calo cakapa kuti batanjili mu Nyika Yakasyomezyedwe. Eelo kaka inga twacita cabusongo ikuti twakutobela kucenjezya ooku, katuzyi kuti taakwe cimbi Saatani ncayanda kunze buyo lyakutulesya kunjila munyika ya Leza mpya!

Saatani ulabaca Banakristo kwiinda mukubelesya nzila nzyazi kabotu alimwi izyakabeleka kale kubantu banji. Mbubwenya mbotwabona kubana Israyeli, Saatani wakabelesya bwaamu. Mumazuba eesu, bwaamu kacili kakole kabyaabi. Nzila imwi iibeleka kapati motukonzya kucegwa akakole aaka, nkwiinda mukweebelela zintu ziletela muzeezo wakoonana.

Mazuba aano, muntu ulakonzya kweebelela zintu ziletela muzeezo wakoonana kakunyina kubonwa abamwi. Kaindi, muntu iwakali kuyanda kweebelela zintu ziletela muzeezo wakoonana wakeelede kuunka kuŋanda yakucitila misobano kuyakweebelela mafilimu aaletela muzeezo wakoonana naa kuunka kuzintoolo ikwakali kusambalwa mabbuku aaletela muzeezo wakoonana. Kweelede kuti bantu banji tiibakali kuunka mumasena aaya akaambo kakumvwa nsoni kuti bantu bamwi inga bababona. Pele lino, muntu uukonzya kuunka a Intaneti inga weebelela zintu ziletela muzeezo wakoonana kumulimo naa mumootokala wiimvwi. Muzisi zinji, mwaalumi naa mukaintu ulakonzya kweebelela zintu ziletela muzeezo wakoonana kali muŋanda yakwe.

Tacigoleli waawa. Mafooni alimwi amatabbuleti apa kuti cuube-ube kweebelela zintu ziletela muzeezo wakoonana. Ciindi bantu nobeenda munzila, nobali mumabbaasi naa muzitima, balakonzya kweebelela zintu izitali kabotu afooni naa atabbuleti njobajisi mumaanza.

Akaambo kakuti lino ncuuba-uba kweebelela zintu ziletela muzeezo wakoonana alimwi akuti kunyina uukonzya kuzyiba, zintu zili boobu zyabanyonyoona bantu banji mazuba aano kwiinda kaindi. Bantu banji ibazyeebelela zintu eezyi banyonganya lukwatano lwabo, mpuwo alimwi amanjezeezya aabo. Iciinda kubija ncakuti, cilongwe cabo a Leza cilakonzya kumana. Aboobo tamukonzyi kudooneka kuti zintu ziletela muzeezo wakoonana zilabanyonganya aabo ibazyeebelela. Kanji-kanji, kucita boobo kupa bantu kuba amizeezo iitali kabotu alimwi mizeezo eeyo ilakonzya kukkalilila mumoyo kwaciindi cilamfwu.

Nokuba boobo, tweelede kuzyiba kuti Jehova ulatukwabilila kukakole aaka ka Saatani. Kutegwa Jehova atukwabilile, tweelede kucita ceeco bana Israyeli ncobakaalilwa kucita, nkokuti, ‘kuswiilila cakumaninina.’ (Kul. 19:5) Tweelede kuzyiba kuti Leza ulakusulaika kweebelela zintu ziletela muzeezo wakoona. Nkaambo nzi ncotwaambila boobo?

Amuyeeye kujatikizya kaambo aaka: Milawo Leza njaakapa bana Israyeli yakaliindene amilawo yamasi aambi kuciindi eeco. Mbubwenya mbuli bwaanda, yakali kwaandaanya bana Israyeli kubantu ibakabazingulukide alimwi akumicito mibyaabi njobakali kucita bantu aabo. (Dt. 4:6-8) Milawo eeyo  yakakankaizya kasimpe ikayandika kapati kakuti, Jehova ulakusulaika kutalilemeka mumakani aakoonana.

Naakali kwaamba kujatikizya zintu zibyaabi nzyobakali kucita bantu ibakali muzisi zyakabazingulukide, Jehova wakaambila bana Israyeli kuti: “Tamweelede kucita mbobacita bana Kanana, munyika mondimutola. . . . Nyika yabo ilisofweede, alimwi ndiyoobasubula bantu bakkala mulinjiyo nkaambo kazibi zyabo.” Kuli Leza uusalala wa Israyeli, bukkale bwabana Kanana bwakali kusesemya kapati cakuti nyika njobakali kukkala wakaibona kuti yakalisofweede.—Lev. 18:3, 25.

Nokuba kuti Jehova wakabasubula bana Kanana, bantu bamwi bakazumanana kutalilemeka mumakani aakoonana. Nokwakainda myaka iinda ku 1,500, Paulo wakapandulula bantu bamasi balo Banakristo mbobakali kukkala limwi kuti ‘tiibakacijisi nsoni naaba aniini mubukkale bwabo.’ Alimwi buya, ‘bakalyaaba kubukkale busesemya akucita busofwaazi bwamusyobo uuli woonse cabulyato.’ (Ef. 4:17-19) Mbubwenya buyo, mazuba aano bantu banji tabalilemeki alimwi babona kuti cili buyo kabotu kucita boobo. Bakombi bakasimpe beelede kusolekesya kutantamuka kweebelela zintu zibyaabi izicitwa abantu bali munyika eeyi.

Zintu ziletela muzeezo wakoonana tazimulemeki Leza. Wakalenga bantu mucinkozya cakwe alimwi akutupa kuti katuzyiba cintu ciluzi acitaluzi. Leza wakacita cabusongo kwiinda mukutupa milawo iijatikizya koonana. Makanze aakwe akali aakuti koonana kacili cintu cikkomanisya kapati kubanabukwetene. (Matl. 1:26-28; Tus. 5:18, 19) Pele ino mbuti kujatikizya baabo ibapanga naa kusumpula zintu ziletela muzeezo wakoonana? Tabazibikkili maano naaceya zyeelelo zya Leza zyakulilemeka. Mubwini, bantu ibasumpula zintu zili boobo balamusampaula Jehova. Leza uyoobabeteka aabo ibatabikkili maano kuzyeelelo zyakwe kwiinda mukupanga naa kusumpula micito yakutalilemeka.—Rom. 1:24-27.

Pele ino mbuti kujatikizya bantu aabo ibabala naa kweebelela zintu ziletela muzeezo wakoonana acaali? Bamwi balakonzya kuyeeya kuti ncakulikondelezya icili buyo kabotu. Pele mubwini bali kulubazu lwabaabo ibasampaula zyeelelo zya Jehova. Ambweni aaya tanaakali ngamakanze aabo ciindi nobakatalika kweebelela zintu ziletela muzeezo wakoonana. Nokuba boobo, Bbaibbele lilacisalazya kuti bakombi ba Leza wakasimpe beelede kuzisulaika zintu ziletela muzeezo wakoonana. Ibbaibbele  lyaamba kuti: “Nywebo nomuyandisya Jehova, amusulaike bubi.”—Int. 97:10.

Nobaba baabo ibayanda kutantamuka kweebelela zintu ziletela muzeezo wakoonana cilakonzya kubayumina kucita boobo. Tatulondokede, aboobo tweelede kubeleka canguzu kukaka mizeezo yakoonana iisofweede. Kuyungizya waawo, akaambo kakuti tatulondokede, tulakonzya kuyeeya kuti tacilubide kweebelela zintu ziletela muzeezo wakoonana. (Jer. 17:9) Pele banji ibakaba Banakristo bacikonzya kwiilwana nkondo eeyi. Kuzyiba makani aaya kulakonzya kumukulwaizya ikuti naa kamuli mubukkale bukozyenye. Amubone Jwi lya Leza mbolikonzya kumugwasya kutantamuka kakole ka Saatani kakweebelela zintu ziletela muzeezo wakoonana.

Mbubwenya mbokwaambwa kale, bana Israyeli banji bakalekela micito mibyaabi kukomena mumizeezo yabo calo icakapa kuti bacite cintu icakabaletela mapenzi aataambiki. Cintu cili boobu cilakonzya kutucitikila andiswe mazuba aano. Jakobo imwanookwabo Jesu wakaamba kuti: ‘Umwi aumwi . . . uloongelezyegwa akucegwa azisusi zyakwe mwini. Lino zisusi eezyo zyamita, zizyala cibi.’ (Jak. 1:14, 15) Ikuti muntu walekela zisusi zibyaabi kukomena mumizeezo yakwe, mukuya kwaciindi inga wabisya. Aboobo tweelede kusolekesya kugwisya zisusi zyakutalilemeka mumizeezo yesu, nkokuti kutaziyeeya.

Ikuti mwabona kuti mwazumanana kuyeeya zisusi zyakutalilemeka, amubweze ntaamu cakufwambaana. Jesu wakati: “Lino ikuti kwaanza naa kuulu kwako kulakulebya, kokukosola akukusowa. . . . Alimwi ikuti liso lyako kalikulebya, kolinonkola akulisowa.” (Mt. 18:8, 9) Jesu tanaakali kwaamba kuti tweelede kuzigwisya buya cacigaminina zizo zyesu zyamubili. Wakabelesya cikozyanyo eeci kutugwasya kuzyiba icitupa kuyeeya zintu zitaluzi alimwi akubweza ntaamu cakufwambaana. Mbuti mbotukonzya kulubelesya lulayo oolu kujatikizya kweebelela zintu ziletela muzeezo wakoonana?

Ikuti mwabona zintu ziletela muzeezo wakoonana, mutaambi kuti, ‘Tandikonzyi kuyungwa anzizyo.’ Cakufwambaana amulange kumbi. Cakufwambaana amwiizime TV. Amwiizime kkompyuta, tabbuleti naa fooni cakufwambaana. Amubikkile maano kuzintu zibotu. Kucita boobu inga kwamugwasya kuyeendelezya mizeezo yanu muciindi cakulekela zisusi zibyaabi kumweendelezya.

Mbuti kuti naa mwakacikonzya kuleka kweebelela zintu ziletela muzeezo wakoonana, pele ziindi zimwi zintu eezyo zilaboola mumizeezo yanu? Zifwanikiso izijatikizya zintu ziletela muzeezo wakoonana zilakonzya kukkala mumizeezo yamuntu kwaciindi cilamfwu. Zifwanikiso eezyi zilakonzya kuboola mumizeezo aciindi cili coonse. Ikuti naa zintu eezyo zyaboola mumizeezo, inga camupa kuyanda kucita cintu cimwi citasalali, mbuli kulisobanya kubusankwa naa kubukaintu. Aboobo amupakamane nkaambo mizeezo iili boobo ilakonzya kuboola kufwumbwa ciindi alimwi mweelede kuti kamulibambilide kwiilwana.

Amuyumye makanze aanu aakuyeeya alimwi akucita kweelana ambwayanda Leza. Amube mbuli mwaapostolo Paulo, ooyo iwakalibambilide ‘kudinkaula mubili wakwe akuweendelezya mbuli muzike.’ (1Kor. 9:27) Mutalekeli zisusi zibyaabi kuti kazimweendelezya. “Amusandulwe kwiinda mukucinca mizeezo yanu, kutegwa muzyibe kuyanda kwa Leza, ikubotu, kutambulika alimwi kulondokede.” (Rom. 12:2) Amuyeeye kuti: Kuyeeya alimwi akucita zintu kweelana akuyanda kwa Leza kuleta zilongezyo zinji kapati kwiinda kutobela zisusi zibyaabi.

Amusoleke kubikka magwalo aamwi mumutwe. Mpoonya ikuti naa zintu zibyaabi zyaboola mumizeezo yanu, mweelede kuyeeya magwalo aayo. Magwalo mbuli Intembauzyo 119:37; Isaya 52:11; Matayo 5:28; Baefeso 5:3; Bakolose 3:5; a 1 Batesalonika 4:4-8 ayoomugwasya kweendelanya mizeezo yanu kweelana ambwakubona Jehova kweebelela zintu ziletela muzeezo wakoonana alimwi ancayanda kuti mucite.

Ncinzi ncomukonzya kucita ikuti naa mwalimvwa kuti tamucikonzyi kuleka kweebelela naa kuyeeya zintu ziletela muzeezo wakoonana? Amwiiye Jesu, Cikozyanyo cesu cibotu. (1Pet. 2:21) Jesu naakabbapatizyigwa, Saatani wakazumanana kumusunka. Ino ncinzi ncaakacita? Awalo wakazumanana kumukazya. Jesu wakazubulula magwalo aayindene-indene ciindi naakali kukazya masunko ngaakamuletela Saatani. Wakati: “Kozwa aawa Saatani!” aboobo Saatani wakamusiya. Mbubwenya Jesu mbwaatakaleka kumukazya Diabolosi, andinywe tamweelede kuleka pe. (Mt. 4:1-11) Saatani anyika yakwe bayoozumanana kusoleka kumupa kuti kamuyeeya zintu ziletela muzeezo wakoonana, pele mutaleki kubalwana. Mulakonzya kwiizunda nkondo yakulwana kweebelela zintu ziletela muzeezo wakoonana. Kwiinda mukugwasyigwa a Jehova, mulakonzya kumuzunda sinkondonyoko.

Amuzumanane kupaila kuli Jehova alimwi akulomba kuti amugwasye. Paulo wakaamba kuti: “Amumuzyibye Leza nzyomulomba; eelyo luumuno lwa Leza oolo lwiinda maano oonse luyookwabilila myoyo yanu amizeezo yanu kwiinda muli Kristo Jesu.” (Flp. 4:6, 7) Leza uyoomupa luumuno lwamumizeezo kutegwa lumugwasye kukaka kucita cibi. Ikuti naa mwaswena kuli Jehova, “awalo ulaswena kulindinywe.”—Jak. 4:8.

Tuyookwabililwa kutukole twa Saatani ikuti naa twazumanana kuba acilongwe ciyumu a Mweendelezi wabubumbo boonse. Jesu wakaamba kuti: “Mweendelezi wanyika ulaboola, lino tajisi nguzu zyakundizunda.” (Joh. 14:30) Nkaambo nzi Jesu ncaakajisi lusyomo luli boobu? Aciindi cimwi wakaamba kuti: “Ooyo wakandituma ulaandime; kunyina naakandilekelezya nkaambo lyoonse ndicita zimukkomanisya.” (Joh. 8:29) Ikuti kamucita zintu zimukkomanisya Jehova, andinywe kunyina nayoomulekelezya. Amukatantamuke kakole kakweebelela zintu ziletela muzeezo wakoonana, eelyo Saatani kunyina nayoocikonzya kumuca.