1. Ino bantu ibakali munkamu mpati yamumwaanda wamyaka wakusaanguna bakaambilwa kucita nzi?

NKAMU mpati yabaalumi abamakaintu ibakali kuzwa mumasi manji ibakali kwaambaula myaambo iindene-indene yakalibungene. Obuya buzuba kwakacitika cintu cigambya kapati. Ba Juda bamwi cakutayeeyela bakatalika kwaambaula myaambo yabantu ibakazwa mumasi aaindene-indene. Nokuba kuti nkamu eeyi yakagambwa, pele cakabagambya kapati makani ngobakali kwaamba ba Juda aabo alimwi amwaapostolo Petro. Makani akali kubikkilizya mulumbe iwakali kukonzya kubafwutula kuti nobakatondezya lusyomo muli Jesu Kristo. Mulumbe wakabasika amoyo bantu ibakali munkamu. Bantu bakaukkomanina kapati cakuti bakabuzya kuti: “Ino tucite buti?” Mukwiingula, Petro wakabaambila kuti: “Umwi aumwi wanu abbapatizyigwe.”—Mil. 2:37, 38.

2. Ncinzi ncotutiilange-lange mucibalo eeci? (Amubone cifwanikiso icili aacivwumbyo.)

² Cintu citobela icakacitika cilakkomanisya kapati. Bantu babalilwa ku 3,000 bakabbapatizyigwa mubuzuba oobo, akuba basikwiiya ba Kristo. Aaya ngaakali matalikilo aamulimo mupati Jesu ngwaakalailila basikwiiya bakwe kuti kabacita. Mane kusikila asunu basikwiiya bakwe balaucita mulimo ooyu. Mazuba aano, tatukonzyi kugwasya muntu kusika antaamu yakubbapatizyigwa mumaminiti masyoonto buyo. Cilakonzya kutola myezi, mwaka naa kwiinda waawo kutegwa sikwiiya asike ambaakani eeyi. Kuyandika kubeleka canguzu kutegwa muntu abe sikwiiya wa Kristo. Mucibalo eeci, tulalanga-langa ncomukonzya kucita kutegwa mugwasye basikwiiya Bbaibbele kubbapatizyigwa.

3. Kweelana alugwalo lwa Matayo 28:19, 20, ncinzi ncayelede kucita sikwiiya kutegwa ayelele kubbapatizyigwa?

³ Katanabbapatizyigwa, amumugwasye sikwiiya Bbaibbele kuzibelesya zintu nzyoliyiisya Bbaibbele. (Amubale Matayo 28:19, 20.) Ciindi sikwiiya nazibelesya nzyaiya, uba mbuli “muntu musongo” waambidwe mucikozyanyo ca Jesu iwakasya akuyaka ŋanda yakwe amwala. (Mt. 7:24, 25; Lk. 6:47, 48) Mbuti mbotukonzya kugwasya sikwiiya kubelesya zintu nzyaiya? Atulange-lange zintu zyotatwe nzyotukonzya kucita.

4. Mbuti mbotukonzya kugwasya sikwiiya kubelekela ambaakani yakubbapatizyigwa? (Amubone kabbokesi kakuti “ Amumugwasye Sikwiiya Kulibikkila Mbaakani Akuzizuzikizya.”)

⁴ Amumugwasye sikwiiya kulibikkila mbaakani. Nkaambo nzi ncomweelede kucita boobu? Atulange-lange cikozyanyo eeci: Kuti kamuunka kubusena kulamfwu amootokala, inga kamuyaabwiima mumasena mabotu. Eeci inga camupa kubona musinzo kuti tauli mulamfwu. Mbubwenya buyo, ciindi sikwiiya Bbaibbele nalibikkila mbaakani zitakatazyi alimwi akuzizuzikizya, ulalangilwa kutalika kubona kuti ayalo mbaakani yakubbapatizyigwa ilakonzyeka. Amubelesye cibeela cakuti “Mbaakani” icili mubbuku lya Amupone Kukabe Kutamani! kugwasya sikwiiya kulibikkila mbaakani. Kumamanino aciiyo cimwi acimwi, amubandike asikwiiya kubona mbaakani njaalibikkila mboikonzya kumugwasya kuzibelesya nzyaaiya. Ikuti nywebo kamujisi mbaakani yiindene ayasikwiiya, amwiilembe acibeela cakuti “Mbaakani Zimbi.” Lyoonse kamucibelesya cibeela eeci kulingula mbaakani zipati-pati alimwi azeezyo zitakatazyi nzyaakalibikkila sikwiiya.

5. Kweelana alugwalo lwa Marko 10:17-22, ncinzi Jesu ncaakaambila mwaalumi muvwubi kucita, alimwi nkaambo nzi?

⁵ Amubagwasye basikwiiya kucinca bukkale bwabo. (Amubale Marko 10:17-22.) Jesu wakalizyi kuti cilakonzya kumuyumina mwaalumi muvwubi kusambala zintu zyakwe zyoonse.  (Mk. 10:23) Pele wakaambila mwaalumi kuti acince bukkale bwakwe. Nkaambo nzi? Nkaambo wakali kumuyanda. Zimwi ziindi, tulakonzya kuwayawaya kukulwaizya sikwiiya kubelesya zintu nzyaiya akaambo kakuti swebo tuyeeya kuti talibambilide kucinca. Cilakonzya kutola ciindi kuti bantu basamunune buntu bwabo bwakaindi akusama bupya. (Kol. 3:9, 10) Pele kuti mwafwambaana kumwaambila sikwiiya kuti weelede kucinca bukkale bwakwe, ulakonzya kufwambaana kutalika kucinca. Kwiinda mukuba amibandi iili boobu, mutondezya kuti mulamubikkila maano sikwiiya.—Int. 141:5; Tus. 27:17.

6. Nkaambo nzi ncociyandika kubuzya mibuzyo iigwasya kuzyiba mbwayeeya sikwiiya?

⁶ Cilayandika kapati kubuzya sikwiiya mbwayeeya kujatikizya makani ngotubandika. Eeci ciyootugwasya kuzyiba makani ngazyi sikwiiya alimwi akusyoma. Kuti kamucita oobu lyoonse, kumbele ciyoomuubila kubandika makani aakonzya kumukatazya kusyoma sikwiiya. Mubbuku lyakuti Amupone Kukabe Kutamani! kuli mibuzyo minji iigwasya kuzyiba mbwayeeya sikwiiya. Mucikozyanyo, muciiyo 04 kuli mubuzyo wakuti: “Ino muyeeya kuti Jehova ulimvwa buti ciindi nomubelesya zina lyakwe?” Muciiyo 09 muli wakuti: “Nzintu nzi nzyomunga mwayanda kubikkilizya mumipailo yanu?” Ciindi cakusaanguna, cilakonzya kumuyumina sikwiiya kwiingula mibuzyo eeyi. Mulakonzya kumuyiisya sikwiiya kuyeeya magwalo alimwi azifwanikiso zili mubbuku.

7. Mbuti mbotukonzya kuzibelesya kabotu zyakuluula zyakacitika ncobeni?

⁷ Ciindi sikwiiya naacizyiba ncayelede kucita, mweelede kubelesya zyakuluula zyakacitika ncobeni kutegwa mumukulwaizye. Mucikozyanyo, kuti sikwiiya kacimuyumina kujanika kumiswaangano, mulakonzya kumutondezya vidiyo yakuti “Jehova Wakandilanganya” iijanika muciiyo 14 mucibeela cakuti “Amuzyibe Zinji.” Muziiyo zinji zyabbuku lyakuti Amupone Kukabe Kutamani!, muyoojana zyakuluula zili boobu mucibeela cakuti “Amwiiye Zinji” naa cakuti “Amuzyibe Zinji.” * Tamweelede kweezyanisya sikwiiya wanu amuntu uumbi kwiinda mukwaamba kuti, “Kuti naa walo wakacikonzya, nkokuti andinywe inga mwacikonzya.” Amuleke sikwiiya alisalile cakucita. Muciindi caboobo, amunomoone twaambo tugaminide itwakagwasya muntu uuli muvidiyo kubelesya ncoliyiisya Bbaibbele. Ambweni mulakonzya kwaamba kaambo komwe kamumagwalo naa cintu cacigaminina cakacitwa. Kuti kacikonzyeka, amukankaizye Jehova mbwaakamugwasya muntu uuli muvidiyo.

8. Mbuti mbomukonzya kugwasya sikwiiya kuyanda Jehova?

⁸ Amumugwasye sikwiiya kuyanda Jehova. Munzila nzi? Amujane ciindi cakugwasya sikwiiya wanu kwiiya zinji kujatikizya Jehova. Amumugwasye sikwiiya kubona Jehova kuti ngu Leza uukkomene walo uuyanda kugwasya baabo bamuyanda. (1Tim. 1:11; Heb. 11:6) Amumutondezye sikwiiya kuti ulakonzya kugwasyigwa kwiinda mukubelesya makani ngaiya alimwi akumupandulwida kuti kucita boobu kutondezya luyando ndwajisi kuli Jehova. (Is. 48:17, 18) Sikwiiya wanu uyookulwaizyigwa kucinca bukkale bwakwe ciindi luyando ndwajisi kuli Jehova noluyaabuyuma.—1Joh. 5:3.

9. Kweelana alugwalo lwa Marko 10:29, 30, mbuti mbomukonzya kugwasya muntu kwaaba zintu zimwi kutegwa ayelele kubbapatizyigwa?

⁹ Kutegwa ayelele kubbapatizyigwa, sikwiiya Bbaibbele weelede kulyaaba. Mbubwenya mbuli mwaalumi muvwubi waambwa kale, basikwiiya  bamwi beelede kwaaba zintu zimwi zyakumubili. Kuti mulimo ngobabeleka taweendelani anjiisyo zyamu Bbaibbele, beelede kujana mulimo uumbi. Banji bakacileka kuyanzana abalongwe ibatamuyandi Jehova. Bamwi bakazondwa abanamukwasyi ibatabayandi Bakamboni ba Jehova. Jesu wakaamba kuti bantu bamwi cilakonzya kubayumina kulyaaba munzila iili boobu. Pele wakasyomezya kuti aabo bamutobela kunyina nobayootyompwa pe. Bayoojana bulumbu bwakuba abanamukwasyi bakumuuya ibajisi luyando. (Amubale Marko 10:29, 30.) Mbuti mbomukonzya kugwasya basikwiiya Bbaibbele kuti bagwasyigwe acipego cibotu eeci?

10. Ncinzi ncomwiiya kucakuluula camukwesu Manuel?

¹⁰ Amube acilongwe asikwiiya wanu. Cilayandika kapati kuti nywebo mumutondezye sikwiiya kuti mulamubikkila maano. Nkaambo nzi? Amubone ncaakaamba mukwesu Manuel, uukkala ku Mexico. Ulayeeya ciindi naakacili sikwiiya Bbaibbele, wakaamba kuti: “Lyoonse katutanaiya, bayi bangu bakali kundibuzya mbondakali kupona. Bakali kundigwasya kulimvwa kwaanguluka akupa kuti kandaanguluka kubaambila makani amwi buyo. Ndakali kulimvwa kuti bakali kundibikkila maano.”

11. Mbuti basikwiiya mbobakonzya kugwasyigwa kwiinda mukuyanzana andiswe?

¹¹ Amujane ciindi cakuba asikwiiya wanu, mbubwenya Jesu mbwaakali kucita abasikwiiya bakwe. (Joh. 3:22) Kuti kacikonzyeka, amumutambe sikwiiya Bbaibbele uuyaambele kuŋanda yanu, kucakulya naa kuzikweebelela JW Broadcasting yamwezi umwi. Sikwiiya ulakonzya kukkomana kapati kuti mwamutamba, ciindi balongwe bakwe abanamukwasyi nobasekelela mapobwe aatali aamumagwalo kutegwa atalendelelwi. Mukwesu Kazibwe uukkala ku Uganda, wakaamba kuti: “Ndakaiya zintu zinji kujatikizya Jehova kuzwa kubayi bangu ciindi nindakali kuyanzana ambabo mbubwenya mbuli ciindi notwakali kwiiya. Ndakabona Jehova mbwabalanganya bantu bakwe alimwi ambobakkomene. Eeci ncindakali kuyanda mubuumi bwangu.”

12. Nkaambo nzi ncociyandika kuunka abasikumwaya baindene-indene kuciiyo ca Bbaibbele?

 ¹² Amutambe basikumwaya baindene-indene kuciiyo canu. Zimwi ziindi, tulakonzya kulimvwa kuti ncuuba-uba kuunka buyo tolikke kuciiyo naa kuunka buyo asikumwaya ngweena lyoonse. Nokuba kuti inga kacili cuuba-uba kucita boobo, pele sikwiiya Bbaibbele ulakonzya kugwasyigwa kapati, kuti zimwi ziindi katuunka abasikumwaya baindene-indene. Mukwesu Dmitrii uukkala ku Moldova, wakaamba kuti: “Sikumwaya uuli woonse iwakali kuboola abayi bangu kundiyiisya wakali kupandulula zintu munzila iindene. Eeci cakali kundigwasya kubona mbondakali kukonzya zibelesya nzyondakali kwiiya. Alimwi eeci cakandigwasya kutalisenda ciindi cakusaanguna nindakaunka kumuswaangano, kayi twakalibwenene kale abakwesu alimwi abacizyi banji.”

13. Nkaambo nzi ncotweelede kugwasya sikwiiya kuti atalike kujanika kumiswaangano?

¹³ Amumugwasye sikwiiya kujanika kumiswaangano yambungano. Nkaambo nzi? Nkaambo Jehova ulailila bakombi bakwe kuti kabaswaangana antoomwe, amana buya ncibeela cabukombi bwesu. (Heb. 10:24, 25) Kuyungizya waawo, bakwesu abacizyi mukwasyi wesu wakumuuya. Notuli antoomwe kumiswaangano, cili mbuli kuti tuli antoomwe aŋanda kwaabana cakulya cinona. Ciindi nomugwasya sikwiiya Bbaibbele kujanika kumiswaangano, mumugwasya kucita cintu ciyandika kapati kutegwa ayelele kubbapatizyigwa. Pele cilakonzya kumukatazya kutalika kujanika kumiswaangano. Mbuti bbuku lya Amupone Kukabe Kutamani! mbolikonzya kumugwasya sikwiiya kuzunda buyumu-yumu buli boonse ibumulesya kujanika kumiswaangano?

14. Mbuti mbotukonzya kukulwaizya sikwiiya kutalika kuswaangana?

¹⁴ Amubelesye ciiyo 10 cabbuku lya Amupone Kukabe Kutamani! kutegwa mukulwaizye sikwiiya wanu. Kalitanamwaigwa bbuku eeli, basikumwaya bacibwene bamwi bakalombwa kubelesya ciiyo eeci kuli basikwiiya babo. Bakaamba kuti cakagwasya kapati kukulwaizya basikwiiya kujanika kumiswaangano. Nokuba boobo, tamweelede kulindila kuti mane mukasike muciiyo 10 nomuya mumutambe kumiswaangano sikwiiya. Amufwambaane kumutamba alimwi akuzumanana kucita oobo. Basikwiiya Bbaibbele balajana mapenzi aaindene-indene. Aboobo amubikkile maano kuzintu nzyayandika sikwiiya wanu, akubona mbomukonzya kumugwasya. Mutatyompwi kuti catola ciindi kutegwa atalike kuswaangana. Amukkazike moyo akuzumanana kumutamba.

15. Mbuyoofwu nzi mbobakonzya kuba ambubo basikwiiya besu?

¹⁵ Sena mulayeeya mbomwakayoowede kuba umwi wa Bakamboni ba Jehova? Ambweni mwakali kuyeeya kuti inga tiimwacikonzya kukambauka kubuleya. Naa ambweni mwakali kuyoowa kuti balongwe naa banamukwasyi balakonzya kumukazya. Kuti mbomwakali kulimvwa oobo, mulakonzya kumumvwisya sikwiiya Bbaibbele wanu. Jesu wakaamba kuti bantu bamwi bakali kuyooba abuyoofwu buli boobu. Nokuba boobo, wakakulwaizya basikumutobela kuti tiibakeelede kulekela buyoofwu kubalesya kubelekela Jehova. (Mt. 10:16, 17, 27, 28) Mbuti Jesu mbwaakagwasya basikumutobela kuzunda buyoofwu bwabo? Alimwi mbuti mbomukonzya kutobela cikozyanyo cakwe?

16. Mbuti mbotukonzya kuyiisya sikwiiya kwaambila bamwi zintu nzyaiya?

¹⁶ Asyoonto-syoonto amumugwasye sikwiiya kutalika kwaambila bamwi nzyasyoma. Kweelede kuti basikwiiya ba Jesu bakali kulibilika ciindi naakabatuma kuyookambauka. Pele Jesu wakabagwasya kwiinda mukubaambila nkobakeelede kukambaukila alimwi amulumbe ngobakeelede kukambauka. (Mt. 10:5-7) Mbuti mbomukonzya kumwiiya Jesu? Amumugwasye sikwiiya kuzyiba nkwakonzya kukambaukila. Mucikozyanyo,  amumubuzye naa kuli muntu ngwazyi uukonzya kugwasyigwa kuzyiba kasimpe kamwi kamu Bbaibbele. Mpoonya amumugwasye kulibambila mbwakonzya kwaamba kwiinda mukumutondezya nzila iitakatazyi yakwaambila bamwi kasimpe aako. Kuti kacikonzyeka, mulakonzya kucita citondezyo anguwe kubelesya nzila zyaambidwe ansi aakatwe kamakani kakuti “Bamwi Baamba Kuti” alimwi akakuti “Umwi Inga Wabuzya Kuti,” ituli mubbuku lya Amupone Kukabe Kutamani! Mwamana, amumugwasye sikwiiya kubona mbwakonzya kubelesya Bbaibbele kwiingula munzila nguba-uba acabupampu.

17. Mbuti mbotukonzya kubelesya lugwalo lwa Matayo 10:19, 20, 29-31 ciindi notugwasya basikwiiya kusyoma Jehova?

¹⁷ Amumugwasye sikwiiya kusyoma Jehova. Jesu wakaambila basikwiiya bakwe kuti Jehova wakali kuyoobagwasya nkaambo wakali kubayanda. (Amubale Matayo 10:19, 20, 29-31.) Amumwaambile sikwiiya wanu kuti Jehova uyoomugwasya awalo. Mulakonzya kumugwasya kusyoma Jehova kwiinda mukupaila anguwe kujatikizya mbaakani zyakwe. Mukwesu Franciszek uukkala ku Poland, wakaamba kuti: “Bayi bangu kanji-kanji bakali kuzibikkilizya mbaakani zyangu mumipailo. Nindakabona Jehova mbwaakali kwiingula mipailo yabo, cakufwambaana ndakatalika kupaila. Ndakabona Jehova mbwaakali kundigwasya lyoonse ciindi nondakali kulomba kuti mazuba amwi kanditabeleki kutegwa kandijanika kumiswaangano yambungano alimwi akumuswaangano wacooko.”

18. Ino Jehova ulimvwa buti kujatikizya mulimo ngobacita bamayi Banakristo?

¹⁸ Jehova ulababikkila maano kapati basikwiiya Bbaibbele. Ulalumba kubeleka canguzu nkobacita bamayi Banakristo ikugwasya bantu kuba acilongwe anguwe, alimwi ulabayanda kapati. (Is. 52:7) Kuti kamutajisi ciiyo ca Bbaibbele lino, mulakonzya kugwasya basikwiiya Bbaibbele kweelela kubbapatizyigwa kwiinda mukuunka abasikumwaya bambi kuziiyo zyabo.