Paulo wakalemba kuti: “Kwiinda mumulawo ndakafwa kumulawo kutegwa ndibe muumi kuli Leza.”—Gal. 2:19.

Ncaakalemba Paulo cakali kweendelana akaambo kapati nkaakali kwaambila mbungano zyamucooko ca Roma ku Galatiya. Banakristo bamwi ooko bakali kuyungwa abamayi bakubeja. Baalumi aaba bakali kuyiisya kuti kutegwa muntu akafwutulwe, wakeelede kuutobela Mulawo wa Musa, ikapati makani aakupalulwa. Pele Paulo wakalizyi kuti Leza tanaakacili kuyanda kuti basyomi kabapalulwa. Kwiinda mukubandika munzila iinjila mumoyo, wakatondezya kuti njiisyo eezyo zyakali zyakubeja, alimwi wakayumya lusyomo lwabakwesu mucipaizyo cacinunuzyo ca Jesu Kristo.—Gal. 2:4; 5:2.

Bbaibbele lilacisalazya kuti ciindi muntu nafwa, tazyibi cintu cili coonse naa kujatikizyigwa azintu zicitika. (Muk. 9:5) Ciindi Paulo naakaamba kuti: “Ndakafwa kumulawo,” wakali kupandulula kuti tanaakacili kweendelezyegwa a Mulawo wa Musa. Muciindi caboobo, Paulo wakalisinizyide kuti kwiinda mulusyomo lwakwe mucipaizyo cacinunuzyo, ‘wakaba muumi kuli Leza.’

Kucinca ooku mubukkale bwa Paulo kwakaba “kwiinda mumulawo.” Ino eeci cakacitika buti? Wakazwide akupandulula kuti “muntu waambwa kuti mululami ikutali akaambo kakucita milimo yaambwa mumulawo pe, pele buyo kwiinda mulusyomo ndwajisi muli Jesu Kristo.” (Gal. 2:16) Masimpe, Mulawo wakazuzikizya cintu ciyandika kapati. Paulo wakapandulwida bana Galatiya kuti: “Wakayungizyigwa ikutegwa kusotoka mulawo kulibonye, kusikila lunyungu oolo lukasike, oolo lwakasyomezyegwa.” (Gal. 3:19) Inzya, Mulawo wakacisalazya kuti bantu basizibi ibatalondokede tiibakali kukonzya kuutobela Mulawo cakulondoka, aboobo bakali kuyandika cipaizyo cilondokede. Aboobo Mulawo wakabasololela bantu ‘kulunyungu,’ nkokuti Kristo. Kwiinda mukutondezya lusyomo muli Jesu Kristo, muntu ulakonzya kwaambwa kuti mululami a Leza. (Gal. 3:24) Paulo wakakabona kaambo aaka, nkaambo kwiinda mu Mulawo wakazumina akuba alusyomo muli Jesu. Aboobo Paulo ‘wakafwa kumulawo’ alimwi akuba “muumi kuli Leza.” Mulawo wakacinyina nguzu aalinguwe, pele Leza nguwakajisi nguzu.

Paulo wakakaamba kaambo kakozyenye akaaka mulugwalo lwakwe kubana Roma. Wakati: “Nobakwesu, andinywe mwakafwa kujatikizya Mulawo kwiinda mumubili wa Kristo . . . twaangununwa ku Mulawo ooyo, nkaambo twafwa kuli ceeco cakatwaangide.” (Rom. 7:4, 6) Lugwalo oolu kubikkilizya alwa Bagalatiya 2:19, luyubununa kuti Paulo tanaakali kwaamba kujatikizya kufwa kali sizibi uusinganizyidwe mu Mulawo. Muciindi caboobo, cacigaminina wakali kwaamba kujatikizya kufwutulwa. Mulawo wakacinyina nguzu alinguwe alimwi abambi ibali mbuli nguwe. Bakaangununwa kwiinda mulusyomo mucinunuzyo ca Kristo.